Yob Watumbisha Dijin Dia Yehova
“Chifanyidin dijin dia [Yehova] ditumba kwau!”—YOB 1:21.
1. Ov, nany kamu wafunda mukand wa Yob, ni chisu ik?
MOSES wadinga ni mivu 40 pachinay mu Idjibit mulong wa kuchin ku ujim wa Farao ni waya kushakam mu Madian. (Mid. 7:23) Padingay mwi ngand yiney, ndiy watesha rusangu ra yoziu yamutana Yob, muntu wadinga ushiching mwin ngand ya piswimp ya Uz. Pa kusut kwa mivu, pashikay Moses ni muchid wa in Isarel piswimp ni Uz piswimp ni kupwish weny wau wa mwimpay, chimeken anch Moses watesha ya rusangu ra mivu ya kwinsudiel ya Yob. Kukwatijan nich rusangu ra Ayuda Moses ndiy wafunda mukand wa Yob kupwa kwa rufu ra Yob.
2. Mukand wa Yob udi dikasikesh kudi atushalapol a Yehova a mu chirung chetu mu mitapu ik?
2 Mukand wa Yob ukasikeshin ritiy ra atushalapol a Nzamb a mu chirung chinech. Mu mitapu ik? Rusangu ra yishiken yijim nakash yitukwashin tutesha kurumburil kwa yom yasadika mwiur ni chikasikeshidin mulong ujim wa ukaleng wa mangand wa Nzamb. Rusangu ra Yob ritukwashin kand tutesha nawamp chikwatina ku kushinshaman ni ritukwashin kand tutesha mulong wak pa yisu yimwing Yehova ukat kuyilik atushalapol end amana mar. Chikwau, mukand wa Yob umujingunishin Satan Djabul mudi Mukankuny wa kusambish wa Yehova ni wa antu. Mukand winou ulejen kand anch antu akayitil mudi Yob akutwish ikal ashinshamena kudiay Yehova chikalap nchik yoziu yikash. El tushinshikinany yishiken yimwing yisambidinau mu mukand wa Yob.
Satan Wamupaka Yob
3. Yom ik twija piur pa Yob, ni mulong wak wikala diloz dia Satan?
3 Yob wadinga mpich ni ikundj ukweta ntumb, nshakur mwin mashakamin mawamp. Wadinga mwin kuyulan mujim, wayikwashanga atuzweny. Chijim nakash, Yob wamwova Nzamb wom. Yob amulejen mudi muntu “wading ni kumwov Nzamb wom ni kwiyep ku kuyip.” Chadinga mulong wa kushinshaman kwa Yob kudi Nzamb—kichadingap mulong wa mapit mend ap mulong wa ntumb yend—chawiy chamwikadisha diloz dia Satan Djabul.—Yob 1:1; 29:7-16; 31:1.
4. Kushinshaman chom ik?
4 Rusangu ra kusambish ridia mu mukand wa Yob risambidin piur pa chikumangan chasadika mwiur chezau angel kwimekesh ku mes kwa Yehova. Satan niyend weza, ni wamufunda Yob. (Tang Yob 1:6-11.) Ap anch Satan wisambina piur pa mapit ma Yob, pakwez washindamena nakash pa kushinshaman kwa Yob. Dizu “kushinshaman” dirumburikin kwikal wonikina, wakad kufa nich mulong, utentamina ni wakad kurumbuk. Mudi mudisadidilau mu Bibil, kushinshaman kwa chiuntu kudi kwipan ni muchim umwing kudi Yehova.
5. Chom ik chalonday Satan piur pa Yob?
5 Satan walonda anch Yob ukat kumwifukwil Nzamb mulong yisakin yend ya choy, kichidiap mulong wa kushinshaman. Chawiy Satan walonda anch Yob ukutwish kushinshaman kudi Yehova ching anch Nzamb wadandamen kumufut ni kumulam. Chakwel kumwakul Satan, Yehova wamulika Satan chakwel amurishisha muntu winou mukaritiy. Mudi chibudikin, pa dichuku dimwing kusu, Yob watesha anch yivam yend ayiy kal ap anch ayishesh kal, antwend a mudimu ayijipa, ni an end dikum afa kal. (Yob 1:13-19) Ov, Yob wawila mu choziu cha Satan? Rusangu rapepilau risambidin pa chisal cha Yob pashadishay mapit mend anch: “[Yehova] ndiy mwin kupan, [Yehova] ndiy kand watambula kal. Chifanyidin dijin dia [Yehova] ditumba kwau!”—Yob 1:21.
6. (a) Chom ik chasadika pa chikumangan chikwau cha mwiur? (b) Nany wadinga mu manangu ma Satan pidjidjekay piur pa kushinshaman kwa Yob ku mes kwa Yehova?
6 Kwikala kand chikumangan chikwau mwiur. Satan wamufunda kand Yob, wend walond anch: “Yom yawonsu yakwetay muntu ukuyipan mulong wa kuchidij mom wend! Pakwez tandjek bil chikas chey, ushesha mafup mend ni mujimbu wend, chakin, ukukushing patok.” Shinshikin anch Satan wajimbisha kufundan kwend. Palonday anch: “Yom yawonsu yakwetay muntu ukuyipan mulong wa kuchidij mom wend,” Djabul kidjidjekap kusu piur pa kushinshaman kwa Yob, pakwez kwa “muntu” win mwawonsu umwifukwidila Yehova. Kupwa kand, Nzamb wamwinkisha Satan mbil ya kumwas Yob musong ukash wa mayej. (Yob 2:1-8) Pakwez yiney kiyadingap yoziu yawonsu yamanay Yob.
Yitwilejidina Kudiay Yob
7. Mukajend a Yob pamwing ni angendj end amwakamisha mu mitapu ik?
7 Kwisambishil mukajend a Yob wamana mar ma chilik chimwing mudi nfumwend. Kufa kwa anend ni kusheshik kwa mapit ma dijuku kwamumesha mar nakash. Chimeken anch wov kusansan ku muchim chisu chayelay nfumwend musong wa mayej makash. Chawiy wamwela Yob anch: “Ov, ni katat, komb uchishich kwey daang nich kwiyingish kwey? Mushinga kwey Nzamb chakwel ufa!” Kupwa, kweza amakundj asatu—Elifaz, Bildad, ni Zofar—mulong wa kumwongoj Yob. Chakin kamu, awiy asadila yitongijok ya makasu ni ikala “in kwongoj akwakamishan.” Chilakej, Bildad walonda anch an enday Yob adinga asadil kal yitil ni yom yayishikena yadinga yiyifanyidin. Elifaz niyend walonda anch, Yob wadinga umen mar mulong wa yitil yend ya pasak. Ni widjidjeka pa mulong wa kwijik anch antu ashinshamena akwet usey ku mes ma Nzamb! (Yob 2:9, 11; 4:8; 8:4; 16:2; 22:2, 3) Mu yakamish yiney yikash, Yob walama kushinshaman kwend. Chakin kamu, warumbuka chisu chasambishay: “kwiyingish nich amwinend kurutu kwa Nzamb.” (Yob 32:2) Chikalap nchik mwamu, ndiy washinshamana mu yom yiney yawonsu.
8. Chilakej ik chiwamp chayishilau in kuyulan ilel kudiay Elihu?
8 Cha kaad, tutangin anch Elihu, niyend weza kumutal Yob. Cha kusambish Elihu watesha bil yalonday Yob ni arund nend asatu. Ap anch ndiy wadinga nsand mwishin mwa amakundj inay anying, Elihu wamekesha manangu majim. Nich kalimish, wisamba ni Yob. Elihu wamujikitisha Yob mulong wa kutentam kwend. Pakwez walonda kand anch Yob ushandakeshidin nakash pa kusot kumekesh anch kakwetap kwend mulong. Kupwa, Elihu wamuleja Yob nich kashinsh anch kumusadil Nzamb nich kushinshaman chidi cha usey nakash. (Tang Yob 36:1, 11.) Chilakej chiwamp mudi ik kudi antu akata kupan yiyul ilel! Elihu wamekesha kushimpish, kutesh nich kalimish, wamujikitisha pa chadia chifanyidina, ni wamwinkisha yiyul yiwamp.—Yob 32:6; 33:32.
9. Yehova wamukwasha Yob mutapu ik?
9 Kupwa, Yob watambula ngendj umwing mujim! Rusangu rilondil anch: “[ Yehova] wamwakwila Yob mu chinzwij.” Ndiy wasadila yipul yivud, nich kudimuk ni kujijaman Yehova wamukwasha Yob chakwel akarumuna yitongijok yend. Yob witiyija dipup, ni walonda anch: “Am nidi kwam mukemp . . . Nakarumun kal muchim wam, ni kwibumburol pansh.” Papwishay Yehova kwisamb ni Yob, Wamekesha ujim wend pantaliken nau arund asatu a Yob mulong awiy ‘kalondap kwau nawamp.’ Chamufanyidina Yob alembil mulong wau. Kupwa, “Papwishay Yob kulembil mulong wa arund nend, [ Yehova, NW] wamuchirishina yom tupamp twaad kupandakan yakwetingay pakusambish.”—Yob 38:1; 40:4; 42:6-10.
Mu Chilik ik Tumukatina Yehova?
10. Ov, mulong wak Yehova kadiulap ni walika kumushesh Satan?
10 Yehova udi Sakatang wa mangand, mukaleng wa yitang yawonsu. Ov, mulong wak walikay kudiul kufundan kwa Djabul? Nzamb wadinga wij anch, chikala kumudiul Satan ap kumushesh kukutwishap kupwish mulong walangwishay. Djabul walonda anch Yob, kashalapol mujim wa Yehova, kakezap kushinshaman anch washadish mapit mend. Kushinshaman kwa Yob kwawina kupakiu. Kupwa, Satan walonda kand anch muntu ap wisu ukutwish wamubwambwil Nzamb anch udi mu mar ma ku mujimbu. Yob wamana mar, pakwez kalikap kushinshaman kwend. Chawiy lel, Satan wamekana mukamakasu pa mulong wa kushinshaman kwa muntu winou mukayitil. Ov, chidi nchik kudi atushalapol akwau a Nzamb?
11. Ov, mutapu ik wakulay Yesu ku makasu ma Satan?
11 Pa chinech, kashalapol umwing ni umwing wa Nzamb ulamina kushinshaman kwend kwikalap nchik yom yimuletidinau kudi Satan, umekeshin anch ku mutambu wend, kufundan kwinoku kwa mukankuny mujim kudi kwa makasu. Yesu weza pa divu ni wakula ku makasu ma Satan. Yesu wadinga muntu uwanyidina, mudi tatukwetu wa kusambish, Adam. Kushinshaman kwa Yesu djat ni ku rufu kwamekesha anch Satan udi mukamaksu ni anch kufundan kwend kudi kwa makasu.—Kubur. 12:10.
12. Chisend ni mutapu ik ukwetay kashalapol mwawonsu wa Yehova?
12 Ap mwamu, Satan udandamedin kuyipak in kumwifukwil Yehova. Muntu ni muntu pakach petu ukwet mutapu ni chisend cha kumekesh kushinshaman kwend anch tukat kumusadil Yehova mulong tumukatin—kichidiap mulong wa mayingishin ma choy. Ov, mutapu ik tumena chisend chinech? Tuchimen mudi kwitapil dilau dia kushinshaman kudiay Yehova. Chitwongojin kand pa kwijik anch Yehova utwinkishining usu wa kujijaman ni, mudi muchadinga ku mutambu wa Yob, anch utekining mipak ku yoziu yikutwisha kutushiken.—1 Kor. 10:13.
Satan—Mukankany Mwin Chibud ni Mwin Kupumbuk
13. Yom yilejenau mu mukand wa Yob piur pa Satan?
13 Mifund ya Hebereu yilejen kachom kamwing ni kamwing piur pa mudimu uyimp wa Satan mu kumurishikish Yehova ni kuyipumbul antu. Mu Mifund ya Grek ya Ukristu, tutaninamu jinsangu jivud piur pa mutapu ukatay Satan kumupompat Yehova, ni mu mukand wa Kuburik, twilejinamu mutapu ukezay Yehova kuchidij ukaleng wend ni kumushesh shitit Satan. Mukand wa Yob utuwejidin ku rongany retu mutapu wa wintombuj wa Satan. Padingay Satan ku chikumangan chasadika mwiur, ndiy kayap kukumangan nich rutong ra kumutumbish Yehova. Djabul wadinga nich manangu mayimp ni rutong riyimp. Kupwa kwa kumufund Yob ni kutambul mbil ya kumupak, “Chawiy Sakudimban wadiokala kurutu kwa [ Yehova, NW].”—Yob 1:12; 2:7.
14. Ov, mwikadil ik wamekeshay Satan piur pa Yob?
14 Komb, mukand wa Yob umulejen Satan anch udi mukankuny muka chisum wa antu. Kudiokal pa chikumangan cha mwiur chisambidinau mu Yob 1:6 ni chisambidinau mu Yob 2:1, pasuta chisu chitwakad etu kwijik, pa chisu chinech Yob wadinga mu kupakiu kukash. Kushinshaman kwa Yob kwamutwishisha Yehova amwela Satan anch: “[ Yob] wiminy kamu kwend daang, chad uyingil kand. Ey wambachika kwey kumushadish chamwamu.” Pakwez Satan kitiyijap yalonday yidi ya makasu. Pa chinech, ndiy wita anch chifanyidin kumutek Yob mu choziu chikwau chikash. Chawiy, Djabul wamupaka Yob padingay uchidi mpich ni pikalay kazweny. Choviken patok, Satan kakatap kuyovil atuzweny riy ap adia mu mar ma yak ya chitangil. Ndiy uyikisining antu ashinshamena. (Yob 2:3-5) Ap mwamu, kushinshaman kwa Yob kulejen anch Satan udi mukamakasu.
15. Chom ik chisadilau in kupumbuk a katat yikwatijadina ni rutong ra Satan?
15 Satan ndiy chitang cha kusambish kupumbuk. In kupumbuk a katat amekeshin mwikadil umwing ni wa Djabul. Manangu mau makutwish mikal ching ma kuyilondang nayimp antu adia mu yikumangen, amakurump in Kristu, ap Chisak Chitakedina. In kupumbuk amwing alikining kusadil dijin dia Nzamb, Yehova. Kasangaredinap kwilej yom ya Yehova ap kumusadil kwin. Mudi tatukwau, Satan, in kupumbuk akata kurishish antu ashinshamena. (Yoh. 8:44) Chidiap cha kushimok atushalapol a Yehova akat kuyiyep nakash!—2 Yoh. 10, 11.
Yob Watumbisha Dijin dia Yehova
16. Mwikadil ik wamekeshay Yob pantaliken nend Yehova?
16 Yob wadinga ni kusadil ni kutumbish dijin dia Yehova. Ap pa chisu chateshay rusangu riyimp ra kufa kwa anend, Yob kamushinyinap Nzamb kuyip. Ap anch pakad kwijik Yob wamutongina Nzamb anch ndiy washadisha kal yom yend, pakwez ndiy watumbisha dijin dia Yehova. Mu chishimu chend chimwing chatay, Yob walonda anch: “Tal kwa, kumwov Nsalejey wom, mawiy manangu. Kuchin kuyip, rawiy ronganyin.”—Yob 28:28.
17. Chom ik chamukwasha Yob alama kushinshaman kwend?
17 Chom ik chamukwasha Yob alama kushinshaman kwend? Choviken kamu patok, kurutu mar makash mamushikena, ndiy wadinga wakudisha kal urund ukash ni Yehova. Ap anch tukwetap uman ulejena anch ndiy wading wij anch Satan wamusarumuna Yehova, Yob wakata mupak wa kushinshaman. Ndiy walonda anch: “Djat ni ku rufu ram nikudandamen kamu kulond anch, kinifilap nich.” (Yob 27:5) Mutapu ik wakudishay Yob urund winou wa piswimp nakash? Pakad kwidjidjek, ndiy wakata nakash yom yateshay piur pa yisal ya Nzamb piur pa Abraham, Isak ni Yakob, adinga a mu muchid wau. Ni kusutil ku kutal yitang, Yob watwisha kujingunin ngikadil yivud ya Yehova.—Tang Yob 12:7-9, 13, 16.
18. (a) Mutapu ik wamekeshay Yob kushinshaman kwend kudiay Yehova? (b) Mu jinjil ik tukutwisha kwimburij chilakej chiwamp cha Yob?
18 Yom yilejay Yob yawiy yalangwisha maku mend chakwel amusangaresha Yehova. Anch pamwingap yidi ya dijuku diend yasala chom chakad kumusangaresh Nzamb ap anch akutwish “kumusaal Nzamb mu michim yau,” chawiy chadingay ni kulambwil milambu chisu ni chisu. (Yob 1:5) Ap padingay mu choziu chikash, Yob wadinga ni kulond yom yiwamp piur pa Yehova. (Yob 10:12) Chilakej chiwamp mudi ik? Niyetu tufanyidin twaka ronganyin rakin ra Yehova ni ra yakushilamu yend. Tufanyidin twikala nich chaku chiwamp pa mulong winou mudi kwilej, kukumangan ku yikumangan, kulembil, ni kulejan rusangu ruwamp. Chikwau, tukutwish twasal yom yawonsu yitutwishina mulong wa kwijikish dijin dia Yehova. Mudi kamu kushinshaman kwa Yob kwamusangaresha Yehova, chawiy kand kushinshaman kwa atushalapol ilel a Nzamb kukat kuusangaresh muchim wa Yehova. Wawiy mulong tukwisambina mu mutu wa mulong wambakedinap ou.
Ov, Uvurikin?
• Ov, mulong wak Satan wiyakamisha piur pa Yob?
• Choziu ik chajijamenay Yob, ni chom ik chasalay?
• Chom ik chikutukwasha tulama kushinshaman kwetu, mudi mwasalay Yob?
• Yom ik twilejina piur pa Satan mu mukand wa Yob?
[Chipich chidia pa paj wa 12]
Kushinshaman kwey kukutwish kwapakiu mu mikadil ik?