Job Walama Kujijaman Kwend

OV, MUNTU ukutwish kudandamen kumushinshamen Nzamb anch amupak chipandakena nakash ni anch kuziyin kwend kwamekan anch kakutaninapamu yom ya ku mujimbu? Ikundj umwing utazukinau anch Job wakula ku chipul chinech chalangwishau.

Padingau in Isarel mu Idjibit, Job mwanamakwend wa Aburaham, wading ushich mwi ngand yitazukinau katat anch Arabi. Pa chisu chinacha, angel mwiur akumangana kurutu kwa Nzamb, ni Satan wading nau pamwing. Ku chikumangan chinacha cha mwiur, Yehova wamekesha anch uchingejidin kushinshaman kwa kashalapol wend Job. Chawiy Yehova walonda anch kwikil muntu ap umwing ujijamena mud Job. Pakwez Satan wamekesha anch Job umusadidin Nzamb mulong Nzamb umuyukishin ni umuchidijin. Satan walonda anch ang amutambul Job yom yawonsu yikwetay, ukumushing Nzamb.

Nzamb wamulikidila Satan kumutambul bil chakusambish mapit mend, anend ni kupwa ukash wa mujimbu wend. Mulong kadingap kija chisend cha Satan pa mulong winou, Job kateshap mulong wak Nzamb walikidila anch mar minam mamushikena. Ap mwamwap nchik, Job kamwombap Nzamb nyim.

Arund asatu a makasu eza kumutal Job. Mu mazu mavud malondau madia mu buku wa Job, amakundj inay asala usu wa kumukasikesh Job anch Nzamb ndiy wadinga umupupina mulong wasala yitil ku ujindj. Ashikena ni kukulond anch Nzamb kakatap kuyisanager atushalapol end ni kayichingejidinap bwat. Job kitiyijap yitongijok yau yiyimp. Wayileja nich kashinsh anch ukulam kujijaman kwend djat ni ku rufu!

Pakwez Job warumbuka pasalay usu wa kwiyingish nich nakash. Nsand umwing utazukinau anch Elihu, wading uteshin yom yawonsu yading yilondinau, niyend waleta yitongijok yend. Elihu wamuyula Job mulong wakanganya kulondin ukaleng wa Yehova Nzamb udia wa usey nakash kusutamu kumulondin muntu win mwawonsu. Elihu wayikanda kand nakash arund a makasu a Job.

Kupwa Yehova Nzamb wambamba ni Job mulong wa kuwapish mutapu wend wa kutong. Kusutil kupwitin nkeu jend pa yitang yiwamp, Yehova wamumekeshina Job anch mwan a muntu ud mukemp nakash anch amufanakesh ni kujimb kwa Nzamb. Job witiya nich kwikepish kupup kwa Nzamb. Yehova wamekesha anch “wizwil nich kuwap ni riy,” wamuchirishina Job ukash wa mujimbu, wamwinka mapit tupamp twaad kusutamu madingay nich ni wamuyukisha kusutil kumwinkish an dikum. (Jakobu 5:11) Mulong walama kujijaman kwend kud Yehova chikalap nchik mar makash, Job wakula nawamp ku chipul cha Satan chilondina anch antu kakutwishap kumushinshamen Nzamb anch ayipak.

​—Yidiokil mu buku wa Job.