Kwikasikesh Kukasikeshinau Nich Rukat

“Nzamb katwinkap muchim wa wom, pakwez wa usu, ni wa rukat, ni wa kwirijek.”—2 TIMOTEU 1:7.

1, 2. (a) Rukat rikutwish kumubachik muntu kusal yom ik? (b) Ov, mulong wak kwikasikesh kwa Yesu kwadinga kwa pakampwil?

AMBAY a uruw asu andama kanjimu mu mem piswimp ni chikum cha kwingangel kwa Australie. Chadingau piswimp ni kutuntuk mupap (baleine) wasota kumukwat mband. Mu chisal chimwing cha kwikasikesh, ikundj wamubachika mukajend kwa ni mupap wamukwata ndiy. Mwadiamufu wadila ku chidil anch: “Wanfilang am.”

² Chakin, rukat rikutwish kuyibachik antu kumekesh kwikasikesh kujim. Yesu Kristu amwinend walonda anch: “Kwikil muntu ukweta rukat rujim rupandiken riner, ra kuladik kupand kwend mulong wa arund nend.” (Yohan 15:13) Kwinyim kwa masaa piswimp 24 palonday Yesu mazu minam, ndiy wapana mwom wend amwinend, kichadingap mulong wa muntu umwing kusu, pakwez mulong wa antu awonsu. (Mateu 20:28) Chikwau kand, Yesu kapanap mwom wend mu chisal cha kukashimuk cha kumekesh kwikasikesh. Ndiy wadinga wij anch akez kumuswingish ni kumusal nayimp, akez kumurumburish chakad kutentam, ni kumujipin pa mutond wa mar. Wayitenchika kand in kwilej end mu manangu mulong wa chishiken chinech, walond anch: “Talany bil, tuyilany ku Yerusalem; Mwan a muntu akez kamupan ku makas ma in kupesh ajim, nau in kufund; Akez kamusip, akamuchil mat ni kumubul, akez kamujip.”—Mako 10:33, 34.

3. Chom ik chawejina ku kwikasikesh kwa Yesu?

³ Chom ik chawejina ku kwikasikesh kwa pakampwil kwa Yesu? Ritiy ni kumwov Nzamb wom kwadinga ni usey ujim. (Hebreu 5:7; 12:2) Pakwez, chipandikenamu, kwikasikesh kwa Yesu kwadiokala ku rukat rend, ramukatay Nzamb ni ambay nend antu. (1 Yohan 3:16) Anch twakudish rukat mudi riner kuwejin pa ritiy ni kumwov Nzamb wom, niyetu tukez kwikal akash mudi mwadingay Yesu. (Efesus 5:2) Ov, mutapu ik tukutwisha kukudish rukat riner? Tuswiridin kujingunin musul war.

“Rukat Ridiokil Kudi Nzamb”

4. Ov, mulong wak chitwishikina kulond anch Yehova ndiy musul wa rukat?

⁴ Yehova udi rukat ni musul wa rukat. Kambuy Yohan wafunda anch: “Akarukat nam, chifanyidin etu kudandamen kukatijan muntu ni mukwau, mulong rukat ridiokil kudi Nzamb. Muntu mwawonsu ukatena udi mwan a Nzamb, umwij kand Nzamb. Ndiy wakad kukatan kamwijip Nzamb; mulong Nzamb udi rukat.” (1 Yohan 4:7, 8 NW ) Chawiy lel, rukat ra Nzamb, rikutwish kukul mu muntu ching anch wamusejin Yehova kusutil ku ronganyin rakin ni wasal kukwatijan ni ronganyin riner nich kuziyil kwa muchim.—Filipoi 1:9; Yakob 4:8; 1 Yohan 5:3.

5, 6. Chom ik chayikwasha in kwilej a Yesu a kusambish kukudish rukat mudi ra Kristu?

⁵ Mu malembil mend ma nsudiel pamwing ni atwimbuy end 11 ashinshamena, Yesu walejana kukwatijan kudia pakach pa kumwijik Nzamb ni kukul mu rukat, palonday anch: “Am nadijikish kal dijin diey kudi awiy, nikez kadijikish kand, chakwel rukat riwinkatila nich ey rukwikal mu awiy, ni yam [nikwikal mu uumwing ni awiy].” (Yohan 17:26) Yesu wayikwasha in kwilej end kukudish mulad wa rukat ridinga pakach pendendiy ni Tatukwend, wamekesha kusutil ku kulond ni ku chilakej chirumburikina dijin dia Nzamb—ngikadil ya pakampwil ya Nzamb. Chawiy, Yesu watwisha kulond anch: “Wamena kal am wamumen kal Tatuku.”—Yohan 14:9, 10; 17:8.

⁶ Rukat mudi ra Kristu ridi dibuj dia mwiku utumbila wa Nzamb. (Galatia 5:22) Chisu chatambulau in Kristu a kusambish mwiku utumbila washilaumu pa Pentekot wa muvu wa 33 pa chirung chetu, kavurikap ching kusu yom yivud yayilejau kudi Yesu pakwez atesha kand nakash kurumburik kwa Mifund. Njingunin yiney yijim yakudisha rukat rau mulong wa Nzamb. (Yohan 14:26; 15:26) Kwadinga chibudikin ik? Ap mu chak cha mwom wau, alejana rusangu ruwamp ni mushiku.—Midimu 5:28, 29.

Kwikasikesh ni Rukat Yisadila

7. Chom ik chafanyinay Paul ni Barnaba kusal chakwel kujijaman mu weny wau wa umishoner?

⁷ Kambuy Paul wafunda anch: “Nzamb katwinkap muchim wa wom, pakwez wa usu, ni wa rukat, ni wa kwirijek.” (2 Timoteu 1:7) Paul wadinga ni kulondil piur pa yom yamanay amwinend. Tushinshikinany yom yamanay ndiy ni Barnaba mu weny wau wa umishoner. Alejana mu misumb yivud, pamwing ni musumb wa Antiok, Ikonium, ni Lista. Mu musumb ni musumb, antu amwing itiyija, pakwez akwau ikala in rupompat ra chisum. (Midimu 13:2, 14, 45, 50; 14:1, 5) Mu Lista rumb ra antu in chisum ramwasa Paul mayal, amusha walengumukang kal! “Pakwez in kwilej chadingau amwimanyidin tanda, ndiy walank, watumbuk wandam mu ul, chikwacha wanunginaku waya nend Barnaba ku Derbe.”—Midimu 14:6, 19, 20.

8. Ov, mutapu ik kwikasikesh kwamekeshay Paul ni Barnaba kwamekesha rukat rau rijim rayikatau antu?

⁸ Ov, kusot kumujip Paul kwinoku kwamuziyisha ndiy ni Barnaba mu chilik cha kusot kulik kulejan? Bwat! Chapwishau kwikadish “in kwilej avud” mu Derbe, amakundj inay aad “achirik[a] ku Lista, ku Ikonium ni ku Antiok.” Ov, mulong wak? Chadinga mulong wa kuyikasikesh antu asu kwiman dang mu ritiy. Paul ni Barnaba alonda anch: “Tuwapidil kwandam mu want wa Nzamb ni yakamish yivud.” Chakin, kwikasikesh kwau kwadiokala ku rukat rau rikash rayikatau ‘an amikoku’ a Kristu. (Midimu 14:21-23; Yohan 21:15-17) Chayitondau kal amakurump mu yikumangen yawonsu yisu, akadivar inay aad alembila ni “ayipana kudi mwant [ Yehova] witiyau.”

9. Mutapu ik wasalau amakurump a ku Efesus mulong wa rukat rayikatau kudi Paul?

⁹ Paul wadinga muntu mwin rukat ni mwin kwikasikesh wakatau nakash kudi in Kristu avud a kusambish. Vurik bil yom yasadika ku chikumangan chasalay Paul ni amakurump a mu Efesus, kwasalay mivu yisatu ni amupompata nakash. (Midimu 20:17-31) Kupwa kwa kuyikasikesh kuyilam amikoku ayinkishau kudi Nzamb, Paul wasa nau manungun pansh ni walembila. Chad lel, “awiy awonsu adil nakash, amubwikat Paul mwi nshing amususu, ushon wayikwata awonsu palonday anch, kiukez kumananyip kand mpal yam kakwau.” Akadivar inay amukata Paul nakash! Chakin kamu, chisu cha kuya pachawanyina, chayifanyina Paul ni ambay nend a weny ‘ayisiunika’ mulong amakurump kadingap asotila kuyilik aya.—Midimu 20:36–21:1.

10. Mutapu ik umekeshinau Atuman a Yehova ilel unou, rukat rikash mulong wa antu akwau?

¹⁰ Ilel unou, atulam in kwendangan, amakurump a chikumangen, ni antu akwau avud ayikatil nakash mulong wa kwikasikesh kukatau kumekesh mulong wa amikoku a Yehova. Chilakej, mu jingand mudia njit ja an a ngand ap mujidikinau mudimu wa kulejan, atulam in kwendangan ni akajau atekining mwom wau mu ubaj ni mu chak cha kuyikas mulong wa kuya ni kutal yikumangen. Chilik chimwing kand, Atuman avud akat kuyimesh mar kudi anyikel in chisum ni atubwebu au anch mulong kakatap kuyitungan ambay nau Atuman ap kusaul kukatau kutambwil yakudia ya mu spiritu. Akwau tunan ni tunan ayizengola, ayimesh mar, ap kuyijip mulong kalikap kulejan rusangu ruwamp ap kulik kukumangan pamwing ni ambay nau in ritiy ku yikumangan ya Ukristu. (Midimu 5:28, 29; Hebreu 10:24, 25) Twilikejany amboku ritiy ni rukat ra akadivar ni anambaz inay ikasikesha!—1 Tesalonika 1:6.

Kangal Walikany Rukat Ren Ritalala Zong

11. Satan wasining mutapu ik njit ni atushalapol a Yehova, ni chiyitin ik ku mutambu wau?

¹¹ Chisu chamudjibulau Satan pansh, wakwata mupak wa kuyipepin nkabu yend atushalapol a Yehova mulong awiy “akat kulam yijidik ya Nzamb ni kusend uman wa Yesu Kristu.” (Kuburik 12:9, 17) Nkeu yimwing ya Satan yidi kuzengol. Pakwez, chisu ni chisu, nkeu yiney yikweting chibudikin chikwau mulong chikat kunung nakash antu a Nzamb pamwing mu moj wa rukat ra Ukristu ni chikat kuyibachikin avud ku mushiku ujim. Nkeu yikwau ya Satan yidi kusadil ngikadil ya chivadik ya kusal yitil. Kujijaman mu nkeu yiney kwitin kwikasikesh kwa mutapu windjing mulong wa njit jidia ja mukach mwa mujimbu, pantaliken nich maku mayimp madia mu muchim wetu ‘wa matung ni win kwiyakamish.’—Yeremiy 17:9; Yakob 1:14, 15.

12. Mutapu ik usadidilay Satan “mwiku wa mangand” mu kusot kwend kuziyish rukat retu ra Nzamb?

¹² Mu yom ya njit yikwetay Satan mudi ut ukwau wa usu—“mwiku wa mangand minam,” wawiy udia, chibachik chau chiyikedila, upwitijadin ni mwiku utumbila wa Nzamb. (1 Korint 2:12 MM ) Mwiku wa mangand upalangeshin ris ni rukat ra mapit yidia—“maku ma mes.” (1 Yohan 2:16; 1 Timoteu 6:9, 10) Ap anch kupit mapit kudiap kwau kuyimp, anch twamakat nakash kupandakanamu kumukat Nzamb, chirumburikin anch Satan watuwinin kal. Usu, ap anch ‘wintakel,’ wa mwiku wa mangand udia mu maku ma mujimbu wa yitil, udi mwi nkeu jau, wakad kulik ni ukat kushesh mudi rinkind. Kangal walikin mwiku wa mangand ukwata muchim wey!—Efesus 2:2, 3; Jinswir 4:23.

13. Mutapu ik utekiningau kwikasikesh kwa kwishitul mu ngikadil yetu mu choziu?

¹³ Pakwez, chakwel kujijaman ni kudjibul mwiku uyimp wa mangand, chitining kuhamuk chakwel twishitula mu ngikadil. Chilakej, chitining kwikasikesh chakwel kutumbuk ni kubudik mu chikumbu mukatau kutadil mafilim ni masengan ap kufung ordinater ap televizion anch yipich yiyimp yasambish kumekan. Chitining kwikasikesh chakwel kujijaman ku chipwichik chiyimp cha arund ni kukatul urund ni arund ayimp. Chilik chimwing, chitining kwikasikesh chakwel kuchidij yijil ni yany ya Nzamb kurutu kwa in kuswingishan, ikalap nchik arund a shikol, ambay a mudimu, amutej netu, ap anamakwetu.—1 Korint 15:33; 1 Yohan 5:19.

14. Chom ik tufanyidina kusal anch mwiku wa mangand watukwatin kal?

¹⁴ Chawiy, chidi cha usey ujim nakash mud ik anch tukasikesha rukat retu mulong wa Nzamb ni mulong wa akadivar ni anambaz etu a mu spiritu! Itekina chisu cha kushinshikin ntong jey ni mashakamin ma mwom chakwel kutal anch mwiku wa mangand wakukwatin kal mwi njil yimwing ap yikwau. Anch wakukwatin kal—ap pakemp kusu—mulembila Yehova akwinkisha kwikasikesh chakwel uubwita ni kuudjibwil kulemp. Yehova kakudiburilap malembil minam makin. (Kuseng 51:17) Chikwau kand, mwiku wend ukwet usu kupandakanamu wa mangand.—1 Yohan 4:4.

Kurishish Yoziu Yetu Nich Kwikasikesh

15, 16. Rukat mudi ra Kristu ritukwashin nchik mu yoziu yetu? Let chilakej.

¹⁵ Yikokujol yikwau yirishinau nich atushalapol a Yehova yidi yibudikin ya kuburen kuwanyin ni ya upal, yikata kulet mayej, ubid, runeng, ni milong yikwau yivud. (Rome 8:22) Rukat mudi ra Kristu rikutwish kutukwash kurish nich yoziu yiney. Tushinshikinany chilakej cha Namangolwa, wakudila mu dijuku dia in Kristu mu Zambie. Padingay ni mivu yaad, Namangolwa wikala chibid. Ulondil anch: “Niyova nayimp amwinam, natonga anch ubid wam ukutwish kuyovish antu kuyip nakash. Pakwez, akadivar nam a mu spiritu ankwasha chakwel nimana yom mu mutapu windjing. Mudi chibudikin, nasala usu wa kupandakan kwiyov kwam nayimp, ni mu kusut kwa chisu ambabatisha.”

¹⁶ Ap anch Namangolwa wadinga ni nking ya ayibid, pakwez chisu chivud wadinga ni kushet anch wasutil mwi njil yikweta usukuril uvud. Ap mwamu, ndiy wadinga ni kusal mudimu wa chibol nkwash angond aad pa muvu. Mwin chikumbu umwing wadila pamulejau uman kudi Namangolwa. Mulong wak? Mulong wamana ritiy rikash ra kwikasikesh kwa nambaz wetu. Mudi uman wa chiyukish chipitishina, antu atan ileja Bibil ni Namangolwa ayibabatisha, ni umwing wikadil kal mukurump mu chikumangen. Namangolwa ulondil anch: “Chisu chivud mend manswananga nakash; mend madinga ni kwinsum nakash, pakwez chinech chankangeshap kusal mudimu.” Nambaz winou udi umwing wa Atuman avud aziyila ku mujimbu adia mu mangand pakwez akash mu spiritu mulong wa rukat rau rimukatinau Nzamb ni amutej nau. Yehova uyikatil nakash antu inay awonsu!—Agay 2:7.

17, 18. Chom ik chikata kuyikwash antu avud kujijaman mu mayej ni mu yoziu yikwau? Let yilakej ya pol pen.

¹⁷ Musong wa machuku mavud ukutwish kwikal niwawiy musul wa kuziy, ap wa kwinan. Mukurump umwing wa chikumangen ulondil anch: “Mu chirund cha dilejan dia buku munikumangeninga, nambaz umwing uyedil musong wa diabet ni wa an asuk, mukwau ukwet kanser, aad ayedin musong ukash wa tubonkwas, ni mukwau uyedil musong wa kunanijan udiokilinga ku chimpim ni yikatal mujimbu wawonsu. Yisu yimwing aziyanga nakash. Chikalap nchik mwamu, akat kuburenang yikumangan ching anch ayedin nakash ap anch adi mu rupital. Awonsu asadil mudimu wa chingand pakad kujing. Akat kwinvurish yalonday Paul anch: ‘Ang niziyilip nchik chawiy nidi kal mukash.’ Nikat kusanger rukat ni kwikasikesh kwau. Pamwing mwikadil wau uyinkishin chitokish chijim mu mwom ni mu milong yijim.”—2 Korint 12:10.

¹⁸ Anch urishin nich ubid, mayej, ap mulong ukwau, “lembilany wakad kulik” chakwel kangal wawil mu kuziy. (1 Tesalonika 5:14, 17) Chakin kamu, yisu yimwing ukweting yitongijok yiwamp ni yiyimp, pakwez shinshikin yom yiwamp, yom ya mu spiritu, pakampwil pa ruchingej retu ripandikena kuwap ra Want. Nambaz umwing walonda anch: “Kudi am, mudimu wa chingand udi mwom.” Kuyilej antu akwau rusangu ruwamp kukat kumukwash kwikal nich yitongijok yiwamp.

Rukat Riyikwashin Antu Asadila Yitil Kuchirik Kudi Yehova

19, 20. (a) Chom ik chikutwisha kuyikwash antu awila mu yitil kuvuvurish kwikasikesh kwau chakwel kumuchirikin Yehova? (b) Chom ik tukeza kushinshikin mu mutu wa mulong wambakedinap ou?

¹⁹ Antu avud aziyila kal mu spiritu ap awila mu chitil chikatap kuyiswapel kuchirikin kudi Yehova. Pakwez kwikasikesh kufanyidina kukez kwez anch antu inay akarumuk chakin kamu ni achirish rukat rau rimukatilingau Nzamb. Talany chilakej cha Mario, ushichinga mu États-Unis.a Mario wadiokala mu chikumangen cha Ukristu, wikala china maar ni mon ya kulewish (damb), kupwa wasala mivu 20 mu rukan. Mario ulondil anch: “Nasambisha kutongijokin nakash pa machuku mam ma kurutu, nasambisha kand kutang Bibil. Pa kusut kwa chisu, nasambisha kusanger ngikadil ya Yehova, pakampwil ranaken rend, rinadinga ni kumwit mu malembil chisu ni chisu. Kupwa anlikishaku, niyepa arund nam a pasak, naya ku yikumangan ya Ukristu, ni anchirisha. Nikat kwangul yinakuna mu mujimbu wam, pakwez katat nikwet ruchingej risangarishina nakash. Nitwishinap kumujikitish Yehova muchifanyidina mulong wa ranaken rend ni dilikishin diend.”—Kuseng 103:9-13; 130:3, 4; Galatia 6:7, 8.

²⁰ Chakin kamu, antu adia mu mwikadil mudi wenday Mario chiyifanyidin kusal usu nakash chakwel achirika kudi Yehova. Pakwez kuchirish rukat rau—kudiokiling ku kwilej Bibil, kulembil, ni kutongijokin—kukez kuyikasikesh ni kukwat mupak uswiridinau. Ruchingej ra Want ramukasikesha kand Mario. Mwaning, pamwing ni rukat, ritiy, ni kumwov Nzamb wom, ruchingej rikutwish kwikal usu ukash chakwel kutaninamu yiwamp mu mwom wetu. Mu mutu wa mulong wambakedinap ou, tukez kushinshikin nakash chipan chinech cha mu spiritu.

[Mazu madia kwishin kwa paj]

Ov, Ukutwish Kwakul?

• Rukat rawejina nchik ku kwikasikesh kwa pakampwil kwa Yesu?

• Mutapu ik rukat rayikatau akadivar nau ramukasikesha Paul ni Barnaba pakampwil?

• Satan ukat kupakish kushesh rukat ra Ukristu kusutil kwi nkeu ik?

• Kumukat Yehova kukutwish kutukasikesh kujijaman mu yoziu ik?

[Chipich chidia pa paj wa 21]

Rukat ra Paul rayikatay antu ramukasikesha kujijaman

[Chipich chidia pa paj wa 23]

Chitining kwikasikesh chakwel kuchidij yany ya Nzamb

[Chipich chidia pa paj wa 23]

Namangolwa Sututu