Ikalany In Kuziyil Ni Atakamena Mudi Mwadingay Kristu

“Wikalangany in kushimpishany muchim awamp: am napandikan kal mangand.”—YOH. 16:33.

1. Yesu wadinga umuziyidil Nzamb mu chilik ik?

YESU KRISTU wadinga ni kusal rusot ra Nzamb chisu chawonsu. Kandikal dichuku ap dimwing atonga chitongijok cha kumubwambwil Tatukwend wa mwiur. (Yoh. 4:34; Heb. 7:26) Pakwez yom yamanay padingay pa divu kiyamuswapeshinap yom chakwel aziyila. Kudiosh kamu kwisambishil kwa mudimu wend wa kulejan, akankuny a Yesu, pamwing ni Satan amwinend, apakisha kumwitiyikish, kumushindil ni usu ni kusot kumurumbul Yesu chakwel alika mashakamin mend ma mwom wa kushinshaman. (Mat. 4:1-11; Luka 20:20-25) Akankuny inay amumesha Yesu mar makash mu manangu, mu yovil ni ku mujimbu. Kwinsudiel, atwisha kumujipin pa mutond wa mar. (Mat. 26:37, 38; Luka 22:44; Yoh. 19:1, 17, 18) Mu yom yiney yawonsu, ni chikalap nchik mar makash mamanay, Yesu “waziyil[a] djat kamu ku rufu.”—Tang Filipoi 2:8, MM.

2, 3. Chom ik tukutwisha kwilejin ku kuziyil kwa Yesu chikalap nchik mar mamanay?

² Yesu wileja yom yisu pa mulong wa kuziyil kusutil ku yom yamanay pikalay muntu panap pansh. (Heb. 5:8) Chikutwish chamekan anch Yesu kadingap uswirikedina chom kanang cha kwilej pa mulong wa kumusadil Yehova. Ap mwamu, ndiy wadinga ni urund wa piswimp nakash ni Yehova mu tutikit twa mivu ni wadinga “mwant wa mudimu” wa Nzamb pa chisu chatangay yom. (Jinsw. 8:30) Chikalap nchik mwamu, kujijamen kwend mu ritiy padingay muntu chikalap nchik mar kumekeshin kujijaman kwend kwawonsu. Yesu, Mwan a Nzamb, wapama muspiritu. Chom ik tukutwisha kwilejin ku yom yamanay?

³ Ap anch wadinga muntu uwanyidina, Yesu kasotap kupakish kushal mwin kuziyil uwanyidina mu kuman kwend amwinend. Wamwilembila Nzamb amukwasha chakwel ikala mwin kuziyil. (Tang Hebereu 5:7.) Chakwel anch tuziyila, niyetu tuswiridin twikepisha. Mulong wa diyingish dined, chawiy kambuy Paul wayiyula in Kristu anch: “Ikalany ni chiyul chimwing chadinga kand mu Yesu Kristu,” muntu “wikepisha amwinend, wikal mwin kuziyil [djat ni] ku rufu.” (Filip. 2:5-8) Yesu wamekesha mu mwom wend anch chitwishikin kuziyil ap mu chisak cha antu ayimp. Chakin, Yesu wadinga muntu uwanyidina, pakwez chikwikal nchik ku mutambu wa antu akad kuwanyin mudi etu?

Kuziyil Chikalap Nchik Kuburen Kuwanyin

4. Chirumburikin ik kulond anch atutanga nich want ipetu?

⁴ Nzamb wayitanga Adam ni Eve yitang yikweta manangu ni want ipau. Chitudia anau, niyetu tukwet want ipetu. Chom chinech chirumburikin ik? Chirumburikin anch tukutwish twakwat mupak wa kusal yom yiwamp ap yiyimp. Mu kulond mu mazu makwau, Nzamb watwinkisha want ipetu wa kutond kuziyil ap kubwambwil. Pa want ipau winou ujim padi chisend, kuturumburish. Chakin, mipak yetu yikutwish yatuletin mwom ap rufu. Yikwet kand usu padi antu atwombilamu.

5. Kurish ik tukata kurish nich etwawonsu, ni mutapu ik tukutwisha kupandakan?

⁵ Chikatap kutuswapel kuziyil, mulong wa kuburen kuwanyin kutwaswana. Chiswapelingap chisu chawonsu kuziyil ku yijil ya Nzamb. Paul wadinga ni kurish chakwel aziyila. Ndiy wafunda anch: “Nikat kuman yijil yikwau mu yid yam, yikat kurish ni yijil ya mu muchim wam, yikat kwingandjik mu uswik mwishin mwa yitil yidia mu am.” (Rome 7:23) Chakin, anch kudi kwipan, kusansan ap mikadil yikwau yikash, kuziyil kuswapeling. Pakwez, mutapu ik tusadilinga anch kudi kupwitijan pakach pa kusot kwetu kuziyil ni “maku ma mujimbu wa mbij, maku ma mes”? Usu winou uyimp udiokiling ku kuburen kwetu kuwanyin ni ku chipwichik cha “mwiku wa mangand” utwombilamu, ni yiding yikash. (1 Yoh. 2:16; 1 Kor. 2:12, MM) Chakwel anch tuyijijamena, tufanyidin ‘turijeka michim yetu’ kurutu turisha nich choziu chinech chakwel tukwata mupak anch tukumuziyil Yehova, kwikalap nchik chom chin chawonsu chikushikenaku. (Kus. 78:8) Tukwet yilakej yivud yidia mu Bibil ya antu apandakana mulong arijeka michim yau.—Ezra 7:10; Dan. 1:8.

6, 7. Let chilakej chilejena mutapu ukutwisha kutukwash dilejan dia muntu ipend kukwat mipak ya manangu.

⁶ Njil yimwing ya kurijekin michim yetu yidi kwilej ni mushiku Mifund ni mikand yirumburila Bibil. Tong bil anch udi mu mwikadil unou. Tulonda anch wawiy urel ukata kwilej. Wamulembil kal Yehova akukwasha nich mwiku wend chakwel usadila yom yiukwileja mu Dizu diend. Wateka anch ukutal filim kanang pa televizion urel wa diamashik. Wateshap kal antu amwing alondil anch udi muwamp; pakwez ey wij anch mudi yikunku yimwing ya masandj ni ya chisum.

⁷ Watongijokin pa chiyul cha Paul chidia mu Efes 5:3: chilondila anch: “Kusotan, ni kwijond kwawonsu, ap ris, kangal ayijimbul kusu pakach penen wikadilanya kal in Kristu.” Wavurik kand chiyul chikwau cha Paul chidia mu Filipoi 4:8. (Tang.) Piutongijokidina pa chiyul chinech chapepilau, wiyipul amwiney anch: ‘Anch natek muchim wam amwinam ni manangu mam ku kutal maprogam minam, ov, nimburijin chilakej cha Yesu cha kumuziyil Nzamb mu yawonsu?’ Ov, ukusal ik? Ov, ukudandamen kwey kutalang filim winou?

8. Mulong wak tufanyidina kulam mikadil ya piur ni yijil ya muspiritu?

⁸ Kukwikal kurumbuk kuziyish mupak wetu ni yijidik yetu ya muspiritu, pamwingap ni kusambish kutongijokin anch tudi akash mu chilik cha kujijaman usu wa urund uyimp, urund winou ukutwish kwiswedish nich chisu ap ni masandj. Pakwez, tufanyidin twichidija ayinetu ni anetu palemp nich kwijondish ni spiritu wa Satan. In kusadil ma ordinater asadil usu nakash wa kulam yam yiney chakwel kangal viris muyimp ukutwisha kushesh ni kushadish yidiamu andamamu, kangal ayipisha mutapu wa kusal wa cham chinech, pamwingap kudiosh cham ni kuchisadil mulong wa kurishish nich maordinater makwau. Ov, tufanyidin kulalaku tul pakemp pa mulong wa kwichidij kwetu ku “yom yawonsu yitenchikinay”?—Efes 6:11, MM.

9. Ov, mulong wak tufanyidina kukwat mupak wa kumuziyil Yehova pichuku pichuku?

⁹ Pichuku ni pichuku, mu mutapu umwing ap ukwau tukweting cha kutond kutal anch tukutwish kusal yom mudi mukatinay Yehova ap anch bwat. Chakwel anch tupanda, tufanyidin tumuziyila Nzamb ni tushakama kukwatijan nich yijil yend yitentamina. Kusutil ku kwimburij chilakej cha Yesu cha kuziyil “djat kamu ku rufu,” tukumekesh anch ritiy retu ridi rikash. Yehova ukez kutufut mulong wa mwom wetu wa kushinshaman. Yesu wakana anch: “Wawonsu ukeza kajijaman ni kushik kwisudiel, ndiy mwinau ukez kapandishau.” (Mat. 24:13) Choviken patok, chom chinech chitining kukapuk nakash, mudi mwadingay Yesu.—Kus. 31:24.

Yesu—Chilakej Chijim cha Kujijaman

10. Yipwichik ya milad ik yikutwisha kutushiken, ni mutapu ik tufanyidina kusal?

¹⁰ Ngikadil ni mikadil ya mangand manam yitwombilamu, yawiy tuswirikedina kujijaman chakwel kangal yitusamburikina. In Kristu akat kura nich yipwichik ya mwikadil, ya mu chisak, yikokujol ya kutan nfalang ni ya relijon yikutwisha yayishikij ku kupumbuk mu jinjil ja Yehova. Avud arishin nich kuyipompat mu majuku mau. Mu jingand jimwing, mashikol makat kudandamen nich kupalangesh malejan malejena anch yom yikarumuna ayinay, ni kuburen ritiy mudiay Nzamb kupalangen nakash. Pa kuman yipwichik yiney yawonsu, kitufanyidinap kuyidiul chamwamu mu chilik cha kukangany cha kusal. Tufanyidin tusala chom kanang chakwel tujijamena ni twichidija ayinetu. Chilakej cha Yesu chitulejin mutapu tukutwisha kupandakan.

11. Kutongijokin pa chilakej cha Yesu kutwinkishining mutapu ik wa kujijaman?

¹¹ Yesu wayileja in kwilejend anch: “Mu mangand ukwetany yakamish; pakwez wikalangany in kushimpishany muchim awamp: am napandikan kal mangand.” (Yoh. 16:33) Ndiy wayijijamena yipwichik ya mangand. Kalikinap mangand mamukangesha kusal mudimu wa kulejan ap ajirilaku yijil yend ya piur pa mulong wa difukwil diakin ni pa mulong wa mashakamin mawamp; niyetu tukutwish twasal mwamu. Yesu walonda piur pa in kwilejend mu malembil anch: “Awiy kadip a mangand, mudi am kinidip wa mangand.” (Yoh. 17:16) Kwilej ni kutongijokin pa chilakej cha kujijaman kwa Kristu kukutwish kwatwinkish kujijaman kutuswirikedina chakwel tulika kwiyandjik mu milong ya mangand.

Ilejinany Kujijaman Kudiay Yesu

12-14. Let yilakej ya Yesu ya kumekesh kwend kujijaman.

¹² Yesu wamekesha kujijaman mu mudimu wend wa kulejan wawonsu. Wasadila ulabu wend mudi Mwan a Nzamb, pakad wom “wandama mu tempel ya Nzamb, wayibudish awonsu adinga ni kuland ni kulandishiril mu tempel, ndiy wabumburil mes ma in kuswimpol nfalang, ni yitwam ya in kulandish atwinkudimb.” (Mat. 21:12) Pezau amasalay kumukwat Yesu pa uchuku wend wa nsudiel panap pansh, nich kujijaman waya kurutu mulong wa kuyichidij in kwilejend, ni walonda anch: “Anch lel winsotilany am, yilikany kwau inang aya.” (Yoh. 18:8) Pa kusut kwa kachisu kakemp, ndiy wamwela Pita anch chirish mpak yey ya musamun mu chilal, chawiy chamekesha anch Yesu kadingap ni kuchingejin mu mat ma panap pansh, pakwez mudiay Yehova.—Yoh. 18:11.

¹³ Yesu wayisaula pakad wom alej amakasu adinga pa chirung chend ni malejan mau. Yesu wayileja anch: “Riyind kudi en in kufund ni Afarise, in ribabek! Mulong wayipatilany kal antu chis cha want wa mwiur; . . . Washilany kal yom yijim yifanyidina kupan mudi mudia chijil: kutentam, riy, ni ritiy; . . . Ukat kutokishany piur pa rupas ni dilong, pakwez mukash mwizwil nich kutakanan ni kwikis.” (Mat. 23:13, 23, 25) In kwilej a Yesu niyawiy adinga aswirikedin kujijaman mudi kwinoku mulong antakel a relijon wa makasu akez kuyizengol ni kuyijip amwing au.—Mat. 23:34; 24:9.

¹⁴ Yesu wadinga ujijamena ap kurutu kwa ayilembil. Dichuku dimwing, amutalikena kudi ikundj umwing wadinga ni chilembil wa usu nakash ni kwadingap muntu ap umwing watwisha kumukas ap nich miyolal. Pakad wom, Yesu wamudiosha chilembil wadinga umuyikedila ikundj winou. (Marko 5:1-13) Nlel, Nzamb kayinkishinap in Kristu usu wa kusal yilay mudi yiney. Pakwez, mu mudimu wetu wa kukun dizu ni wa kulejan, niyetu tukat kura njit ja muspiritu kumutaliken Satan, ukata kubwik “mes ma michim yau [akad] kwitiy.” (2 Kor. 4:4) Mudi muchadinga ku mutambu wa Yesu, mat metu “kimadiap ma wuntu, pakwez madi mat ma ukash wa Nzamb makutwisha kushesh mapat makash.” (2 Kor. 10:4, MM) Tukat kwilejin yom yivud kudiay Yesu piur pa mutapu wa kusadil mat minam ma muspiritu.

15. Kujijaman kwa Yesu kwadinga kwengamidin pa chom ik?

¹⁵ Kujijaman kwa Yesu kwadingap kwengamidina pa kukapuk kwend, pakwez pa ritiy. Niyetu tufanyidin twengamidina pa ritiy. (Marko 4:40) Mutapu ik tukutwisha kwak ritiy rakin? Kakwau kand, chilakej cha Yesu chikutwish kutukwash. Ndiy wamekesha patok anch wadinga nich ronganyin rijim ra Mifund ni wadinga ni kuyichingejin nakash. Yesu wasadila Dizu dia Nzamb mudi ut, kichidiap mudi mpak ya musamun ya ku mujimbu, pakwez mudi mpak ya musamun ya muspiritu. Chisu ni chisu wadinga ni kukasikeshin malejan mend nich Mifund. Chisu ni chisu wadinga ni kusambel kulond anch: “Achifundila kal anch,” mu Dizu dia Nzamb.a

16. Mutapu ik tukutwisha kushiken ku kwikal nich ritiy rikash?

¹⁶ Chakwel anch tukudisha ritiy rikutwisha kujijamen yoziu yikata kutushiken mulong wa kwikal kwetu in kwilej, niyetu tufanyidin tutanga ni kwilej Bibil pichuku pichuku ni kukumangan ku yikumangen ya Ukristu, ni kutek uyakin mu michim yetu mulong yawiy mufulandal wa ritiy retu. (Rome 10:17) Tufanyidin kand kutongijokin—kutongijokin nakash—pa yom yitwilejina, kuyisal chakwel yandama kamu mu muchim wetu. Ching kusu ritiy ridia rom rawiy rikutwisha kutubachik ku kusal chisal cha kujijaman. (Yak. 2:17) Ni tufanyidin tulembila chakwel atwinkisha mwiku utumbila mulong ritiy ridi chikunku cha dibuj dia spiritu.—Gal. 5:22.

17, 18. Mutapu ik wamekeshay nambaz umwing changadim kujijaman kwend ku shikol?

¹⁷ Nambaz umwing changadim ukweta dijin dia Kitty wimena amwinend mutapu ukata ritiy rakin kulet kujijaman. Kusambishin kamu mu wanikanch wend, ndiy wadinga wij anch kafanyidinap kwovu “usany wa katumb kawamp” ku shikol, ni chakin kamu wadinga ni impu ya kuyilej akwau ansand a shikol uman uwamp. (Rome 1:16) Pa muvu ni muvu, ukat kwitekin mupak wa kusot kuyilej akwau rusangu ruwamp, pakwez kadingap mwin kujijaman. Padingay piswimp ni kuwanyish mivu makum maad, waswimpa shikol. Ndiy ulondil anch: “Katat nikusal usu wa kusadil mitapu yinashadisha.” Kitty walembila chakwel ikala nich kujijaman mudi kwa Kristu, nich kushimpish ni pa chisu chin chifanyidin kamu.

¹⁸ Pa dichuku dia kusambish ku shikol, ayita ansand a shikol chakwel iyijikisha umwing ni umwing. Avud alejana marelijon mau, ni adinga ni kulond anch pakwez kakatap kusadil ritiy rau. Kapamp kamwing Kitty wajingunina anch chawiy chisu chadingay ni kukimb palembilay. Pa chashikena chisu chendend kwiyijikish, nich kujijaman ndiy walonda anch: “Am nidi Kaman wa Yehova, Bibil ndiy musul wa umutakel wam wa muspiritu ni wa mashakamin mam.” Padingay ni kulond, ansand a shikol amwing atalijana. Pakwez akwau ata matu ni kupwa amwipula yipul. Mulej walonda anch Kitty udi chilakej chiwamp cha muntu ushicha kukwatijan nich yitiyij yend. Kitty wasangara nakash mulong wa kwilejin kwend kusutil ku chilakej cha kujijaman cha Yesu.

Mekeshany Ritiy ni Kujijaman Mudi kwa Kristu

19. (a) Yom ik yikwau yidiaku ku kwikal nich ritiy rakinakin? (b) Mutapu ik tukutwisha kumusangaresh Yehova?

¹⁹ Atwimbuy niyau ajingunina anch yisal yau ya kujijaman yifanyidin kwengamidin pa ritiy. Chawiy chamwitau Yesu anch: “Jimbish ritiy retu.” (Tang Luka 17:5, 6.) Kwikal nich ritiy rakin kurumburikin yom yivud kupandakanamu kwau kusu kwitiyij anch Nzamb udiaku. Kurumburikin kand kukudish urund ukash ni Yehova, kiudiap mudi urund udingay nich mwan ni tatukwend mwin rukat. Mwiku utumbila wamubachika Salomon afunda anch: “Mwanam ikundj, anch muchim wey ukwet manangu chad muchim wam kand ukez kasangar. Mupim wam ukez kasangar anch kan key kakat kulond yom yitentamina.” (Jinsw. 23:15, 16) Mwinjil yawiy yimwing, kujijamen kwetu ku yijidik yitentamina kukat kumusangaresh Yehova, ni kwijik mwamu kukat kujimbish kujijaman kwetu. Chawiy lel, el tudandamenany kwimburij chilakej cha Yesu, cha kwikal ajijamena ku mutapu wa yom yitentamina!

[Mazu madia kwishin kwa paj]

[Chipich chidia pa paj wa 16]

Ukat ‘kuutenchik muchim wey’ chakwel ujijamena yoziu?

[Chipich chidia pa paj wa 18]

Tukutwish twamekesh kujijaman kwengamidina pa ritiy, mudi mwasalay Yesu

[Picture on page 17]

Ov, Ukutwish Kurumburil?

• Chom ik chikututwishisha twikala in kuziyil chikalap nchik kuburen kuwanyin kwetu?

• Ritiy rakinakin rengamidin pa chom ik, ni mutapu ik rikutwisha kutukwash kwikal ajijamena?

• Chibudikin ik chikwikalaku anch twikal in kuziyil ni in kujijaman mudi Kristu?