Imburijany Kutakaman ni Ronganyin ya Yesu

1, 2. (a) Ov, mutapu ik tukutwisha kusal mulong wa kupand? (b) Ov, chom ik chikutwisha kutukwash kudandamen mwi njil yitwadila ku mwom wa chikupu?

PITUKATA kwikal in kwilej a Kristu, tukat kusal mudi muntu wasambisha kal weny. Weny winou ukutwish kututwal ku mwom, chikalap mwiur ap pa divu. Yesu walonda anch: “Muntu mwawonsu ukeza kujijaman mu ritiy djat ni ku rufu rend [kwinsudiel kwa ditenchik diyimp dined dia yom] Nzamb ukez kumupandish.” (Mat. 24:13) Mwaning, anch twadandamen kubambil mau mwi njil ya ritiy, tukutwish kupand. Pakwez, mwi njil, tufanyidin kusal usu wa kulik kwikal nich kampuw ap kushadik. (1 Yoh. 2:15-17) Ov, mutapu ik tukutwisha kudandamen mu weny wetu?

² Yesu watushila chilakej chiwanyidina. Weny wend aulejen mu Bibil. Kusutil ku kwilej rusangu riner, tukwijik chidiay Yesu. Tukutwish kushiken ku kumukat ni kwikal nich ritiy mudiay ndiy. (Tang 1 Pita 1:8, 9.) Vurik anch kambuy Pita walonda anch Yesu watushila chilakej chakwel tulondula nawamp mu rizau rend. (1 Pita 2:21) Anch twalondul nawamp chilakej cha Yesu, tukwijik “rutong” ridiaku mulong wa ritiy retu​—mwom wa chikupu.a Mu mutu wa mulong wasutina ou, twisambidin piur pa mutapu tukutwisha kwimburij chilakej cha Yesu pa kwikal in kwikepish ni in ranaken. Tushinshikinany amboku katat mutapu tukutwisha kulondul chilakej chend pa kumekesh kutakaman ap mushiku ni ronganyin.

YESU UDI MWIN KUTAKAMAN

3. Ov, kutakaman chom ik, ni mutapu ik tukutwisha kumekesh kutakaman?

³ Kutakaman udi mwikadil wa kwikal ni kashinsh kakin kakata kutukwash kwikal ajijamena yisu ya mar. Kwikal mwin kutakaman akurumburila mudi “kujijaman mu chirungu cha mar,” ni “kulamat ku yom yitentamina,” ni “kurish mar nich kwitudish ap ritiy.” Kutakaman kwendining pamwing nich wom, ruchingej, ni rukat. Ov, mutapu ik? Kumwov Nzamb wom kukat kutwinkish mushiku wa kulik kumwov muntu wom. (1 Sam. 11:7; Jinsw. 29:25) Ruchingej rakin rikat kutukwash kulik kuman ching yikokujol, pakwez rikutukwash kand kuchingejin machuku ma kurutu nich kashinsh. (Kus. 27:14) Kwipan kwetu kwa rukat kutwitin kumekesh kutakaman ap anch kusal mwamu kukututek mu ubaj. (Yoh. 15:13) Tukat kwikal nich kutakaman anch twamuchingejin Nzamb ni anch twalondul chilakej cha Mwanend.​—Kus. 28:7.

4. Ov, mutapu ik wamekeshay Yesu kutakaman mu tempel ‘mukach mwa alej’? (Tal chipich chidia kwinsambishil.)

⁴ Ap anch wading ni mivu 12, Yesu wimana ni kutakaman ku yom yitentamina. Tal yashikena chisu chading mwan nsand Yesu “mu Chikumbu cha Nzamb, ushich nau alej.” (Tang Luka 2:41-47.) Alej inay ading ij nakash ching kusu Yijil ya Moses pakwez ading kand ij yishankur ya in Yuda. Pakwez Yesu kovap wom wa kulond; wading “ukat kuyipul.” Chakin kamu Yesu kadingap kuyipul yipul mudi yipwilingay mwanikanch. Tukutwish kutongin pa mutapu wipulangay Yesu mulong wa kusarumun yipul yiyifundishina alej inay ashicha ni afundila yom yalondangay. Ap anch alej apakisha kumukangesh Yesu pa kumwipul yipul yakad kuwanyin, akanganya. Chawiy lel, antu awonsu amuteshanga​—kuyiwejinaku ni alej—​“ashimwoka nakash, mulong wakulanga kwa manangu”—​yakul yiney yamekesha chakin uyakin wa Dizu dia Nzamb!

5. Ov, mu mitapu ik wamekeshay Yesu kutakaman mu mudimu wend wa kulejan?

⁵ Mu mudimu wend wa kulejan, Yesu wamekesha kutakaman mu mitapu kushalijan. Chilakej wamekesha patok kudi antu anch antakel a relijon ading kuyidimb nich malejan mau ma makash. (Mat. 23:13-36) Chikwau kand, Yesu kitiyijap anch mangand mayipisha yitongijok yend. (Yoh. 16:33) Wadandamena kulejan chikalap nchik ubaj wa in kumupompat. (Yoh. 5:15-18; 7:14) Tupamp twaad, ndiy wayopata nich kutakaman antu ading kuyipish difukwil diakin mulong watokisha tempel.​—Mat. 21:12, 13; Yoh. 2:14-17.

6. Ov, mutapu ik wamekeshay Yesu kutakaman dichuku dia nsudiel dia mwom wend wa pa divu?

⁶ Chidi kumekesh ritiy rikash anch twalondul kutakaman kwa Yesu mu chirungu cha mar. Tushinshikinany bil pa kutakaman kwamekeshay mu dichuku dia nsudiel dia mwom wend wa pa divu. Wading wij yom yafanyina kumushiken kupwa kwa Yudas kumupan. Pakwez, chisu cha yakudia ya Kusut kwa Yehova, Yesu wamuleja Yudas anch: “Yom yawonsu yiusotila kusal, yisal kamu katat.” (Yoh. 13:21-27) Mu chir cha Getiseman, Yesu wimekesha amwinend pakad wom kudi amasalay eza kumukwat. Ap anch mwom wend wading mu ubaj, wasala chakwel anch in kwilejend ikala mu diking. (Yoh. 18:1-8) Chisu chamwipulau kurutu kwa Sanedrin, walonda pakad wom anch wading Kristu ni Mwan wa Nzamb, ap anch wading wij anch mwin kupesh mujim wading ukimbin mutapu wa kumujipesh. (Mar. 14:60-65) Yesu wamushinshamena Nzamb ni wafa rufu riyimp ku mutond wa mar. Kurutu kwa kukatul mupim wend, Yesu walonda anch: “Katat yom yawonsu yawanyin kal!”​—Yoh. 19:28-30.

IMBURIJ KUTAKAMAN KWA YESU

7. Ansand, ov, mutapu ik ukata kwiyovany piur pa kwikal ni dijin dia Yehova, ni mutapu ik ukutwishanya kumekesh anch ukwetany mushiku?

⁷ Ov, mutapu ik tukutwisha kumwimburij Yesu pa kumekesh kutakaman? Ku shikol. Ansand, ukat kumekeshany mushiku chisu chiukatanya kwiyijikish pakad kulab kudi ansand a shikol ap kudi antu akwau anch udiany Atuman a Yehova. Mwamu umekeshinany anch ukwetany musangar wa kwikal ni dijin dia Yehova. (Tang Kuseng 86:12.) Antu amwing akusot anch witiyany malejan ma dikarumuk. Pakwez ufanyidinany kwikal nich kashinsh anch yifundishinay Bibil piur pa yitang yidi yakin. Ukutwish kusadilany broshir Cinq questions à se poser sur l’origine de la vie mulong wa kupan chakul chiwamp kudi antu akimbina kwijik piur pa ‘ruchingej riukwetanya mu michim yen.’ (1 Pita 3:15) Chawiy lel ukwikalany ni musangar anch wijikany anch upaninany uman piur pa uyakin wa Bibil.

8. Ov, mayingish ik tukweta ma kulejan nich kutakaman ap mushiku?

⁸ Mu mudimu wetu wa kulejan. Mulong tudi in Kristu akin, tufanyidin kudandamen ‘kulond nich kutakaman rusangu ku usu wa Yehova.’ (Mid. 14:3) Ov, diyingish ik tukweta dia kulejan nich kutakaman, ap mushiku? Twij anch yitufundishina yidi uyakin mulong yimedin pa Bibil. (Yoh. 17:17) Twitiyin anch “tudi in mudimu nend Nzamb” ni ukat kutwinkish mwiku wend utumbila mulong wa kutukwash. (1 Kor. 3:9; Mid. 4:31) Chimeken anch, pitukata kupan uman nich mushiku, tukat kumekesh anch twipanin kudi Yehova ni tuyikatin amutej netu. (Mat. 22:37-39) Mulong tukwet mushiku, tukezap kulik kulejan. Pakwez, tudandamedin kulejan uyakin kudi antu abwikau kal pa mes kudi antakel a ma relijon. (2 Kor. 4:4) Ni tukez kudandamen kulejan rusangu ruwamp ap anch antu akwau alik kwau kutesh rusangu retu ap atusip, ap anch atupompat.​—1 Tes. 2:1, 2.

9. Ov, mutapu ik tukutwisha kumekesh kutakaman chisu chiturishina nich mar?

⁹ Chisu turishina nich mar. Kumuchingejin Nzamb kukat kutwinkish ritiy ni kutakaman mulong wa kujijamen mar. Anch mukatish netu wafa, tukat kwovang ushon, pakwez tukatap kushadish ruchingej. Tukwet kashinsh anch “Nzamb ukata kupan kwongoj kwawonsu” ukutukasikesh. (2 Kor. 1:3, 4; 1 Tes. 4:13) Anch turishin nich mayej makash ap anch tumen mar, tukutwish kwov nayimp, pakwez tufanyidinap kwitek mu ubaj. Tufanyidin kulik mitapu yin yawonsu ya kwiyokish yikata kupwitijan ni yany ya mu Bibil. (Mid. 15:28, 29) Anch tukwet runeng, “michim yetu [yikutwish] yatufish nich,” pakwez mulong tumuchingejidin Nzamb udinga “piswimp nau awiy akweta michim yinenganena,” kitukuziyap.b​—1 Yoh. 3:19, 20; Kus. 34:18.

YESU UDI MWIN RONGANYIN

10. Ov, ronganyin chom ik, ni mutapu ik ufanyidinay mwin Kristu kulond ni kusal?

¹⁰ Ronganyin udi ukaliweny wa kwijik kushalijan kudia pakach pa uwamp ni uyimp, ni kupwa kutond kusal yom yitentamina. (Heb. 5:14) Arirumburila mudi “ukaliweny wa kwikal ni yitongijok yiwamp mu milong ya muspiritu.” Mwin Kristu ukweta ronganyin ukata kulond ni kusal yom yimusangarishina Nzamb. Muntu mudi winou ukat kutond mazu makutwisha kuyikwash antu akwau kulik makutwisha kuyovish nayimp. (Jinsw. 11:12, 13) Udi “wakad kuzazimwok swa mu ujim.” (Jinsw. 14:29) Muntu winou ukat “kwend salal,” chawiy lel, ukat kukwat mipak yiwamp mu mwom wend. (Jinsw. 15:21) Ov, mutapu ik tukutwisha kwikal ni ronganyin? Tufanyidin kwilej Dizu dia Nzamb ni kusadin yitwilejina. (Jinsw. 2:1-5, 10, 11) Chidi cha usey nakash kushinshikin pa chilakej cha Yesu, muntu wadinga ukweta ronganyin nakash.

11. Ov, mutapu ik wamekeshay Yesu ronganyin mu yom yalondangay?

¹¹ Yesu wading kumekesh ronganyin mu yom yawonsu yalondangay ni yasalangay. Mu yom yalondangay. Wasadilanga nawamp ronganyin padingay kulejan rusangu ruwamp, watondanga “mazu ma ranaken” mayishimokishanga in kumutesh. (Luka 4:22; Mat. 7:28) Wasalanga chisu chawonsu anch Dizu dia Nzamb dilonda​—pa kuditang, kujimbul mufund, ap kulejan mifund yifanyidina mulong wa kukasikesh chitongijok chend. (Mat. 4:4, 7, 10; 12:1-5; Luka 4:16-21) Chikwau kand, antu atesha yom yarumburilay Yesu ova anch yom yiney yayishika ku michim. Kwinyim kwa kuvumbuk kwend, padingay kwambamb ni in kwilejend aad mwi njil ya kuya ku Emaus, “wayirumburila yom yawonsu yalondau mulong wendendiy mu Mikand ya Nzamb.” Kupwa in kwilej alonda anch: “Ov, michim yetu kiyaswanangap mwivumu padingay ni kuturumburil . . . mazu ma Mikand ya Nzamb?”​—Luka 24:27, 32.

12, 13. Ov, yilakej ik yimekeshina anch Yesu kadingap kujiman swa ni wading ni mwikadil wisikena?

¹² Mu manangu ni mwikadil wend. Ronganyin ramukwasha Yesu kuyikel manangu mend, ni ramukwasha kulik ‘kujiman swa.’ (Jinsw. 16:32) Wading muntu ‘ushimpishina muchim.’ (Mat. 11:29) Washimpishanga muchim chisu chawonsu pantaliken ni in kwilejend chikalap nchik yilim yau. (Mar. 14:34-38; Luka 22:24-27) Wanineta zong chisu chamurumbukinau.​—1 Pita 2:23.

¹³ Ronganyin ramukwasha kand Yesu chakwel ikala ni mwikadil wisikena. Watesha kurumburik kwa Chijil cha Moses; wading wij yom yadinga mu Chijil ni wading kuyisadil antu kukwatijan nich Chijil chinech. Chilakej, shinshikin bil pa rusangu rilejenau mu Marko 5:25-34. (Tang.) Mband wading ukweta musong wa rulong ra mash weza mukach mwa chisak cha antu, wakwat ku maswin ma Yesu, ni wayerik. Kukwatijan ni Chijil wading wijondil, chawiy lel kadingap ufanyidin kumukwataku muntu mwawonsu. (Lev. 15:25-27) Pakwez Yesu​—muntu wadinga wij anch pakach pa “malejan mapandakena kujimb ma Yijil” pading “riy, ni uyakin”—​kamukangeshap mband winou chakwel kangal amukwata ku maswin. (Mat. 23:23) Yesu walonda nich musangar anch: “Mwanam mband, ey wayerik kal mulong wa ritiy rey. Yang kwey nich chisambu, musong wey wapwa kal kamu.” Chilakej chiwamp mud ik cha ronganyin ramubachika Yesu kumekesh muchim uwamp mudi winou!

14. Ov, chom ik chatonday Yesu kusal, ni mutapu ik wadandamenay kushinshikin pa mudimu wend wa kulejan?

¹⁴ Mu mwom wend. Yesu wamekeshanga ronganyin mu mashakamin ma mu mwom wend. Wipana nakash mu kulejan rusangu ruwamp, ni wateka mudimu winou pa ndond ya kusambish. (Luka 4:43) Chikwau kand, Yesu wakwata mipak yamukwasha kushinshikin piur pa mudimu wend ni kuman mutapu wa kuuwanyish. Watonda kwa manangu kwikal nich mwom uswapela chakwel anch asadina chisu ni usu wend mu mudimu wa kulejan. (Luka 9:58) Wading wij anch chadinga cha usey kuyifundish antu akwau chakwel adandamena nich mudimu wa kulejan kwinyim kwa rufu rend. (Luka 10:1-12; Yoh. 14:12) Wayikana in kwilejend anch wafanyina kudandamen kuyikwash mu mudimu winou “djat ni kwisudiel kwa mangand.”​—Mat. 28:19, 20.

IMBURIJANY RONGANYIN RA YESU

15. Ov, mutapu ik tukutwisha kumekesh ronganyin mu yom tulondina?

¹⁵ Shinshikin kand mutapu ukwau ukutwisha kusal mulong wa kumwimburij Yesu. Mu yom tukata kulond. Pitukata kwambamb ni ambay netu akaritiy, tufanyidin kusadin mazu makata kuyikasikesh, kulik makata kuyiziyish. (Efes 4:29) Pitukata kwambamb ni antu akwau piur pa Want wa Nzamb, tufanyidin kuwapish yitulondina chakwel yikala yitadila “mudi mungu.” (Kol. 4:6, TMK) Tufanyidin kusal usu wa kujingunin maswir ni yom yikatinau antu twambambina nau ni kupwa tufanyidin kutond mazu makwatijadina nich maswir mau. Tufanyidin kuvurik anch mazu ma kalimish makutwish kutwanzuril yis​—ni michim ya antu. Chikwau kand, anch twarumburil yitiyij yetu, tufanyidin kulik Bibil amwinend alonda piur petwetu. Chawiy lel, tufanyidin kujimbul Bibil mulong ukwet usu, ni tufanyidin kumutang anch chitwishikin. Twitiyijin anch rusangu ra Bibil rikwet usu nakash kupandakanamu yawonsu tukutwisha kulond ku usu wetu ayinetu.​—Heb. 4:12.

16, 17. (a) Ov, mutapu ik tukutwisha kumekesh anch tukatap kujiman swa ni anch tudi isikena? (b) Ov, mutapu ik tukutwisha kwipan nakash mu mudimu wetu wa kulejan?

¹⁶ Mu manangu ni mu mwikadil wetu. Ronganyin rikat kutukwash kuyikel manangu metu, ni ritukwashin kulik ‘kujiman swa.’ (Jak. 1:19) Anch antu aturumbukin, tufanyidin kujingunin chayibachikanga kusal ap kulond mwamu. Chitongijok mudi chinech chikutwish kutukwash chakwel ‘tudiwula kuyip kukat kutusalau.’ (Jinsw. 19:11) Ronganyin rikat kutukwash kwikal kand isikena. Tufanyidinap kuyichingejin ambay netu akaritiy anch ikala awanyidina, tufanyidin kuvurik anch akutwish pamwing ap kwikal ni milong yitwakad etu kwijik nawamp. Tufanyidin kwikal nich kuswir kwa kutesh yovil yau ni anch chitwishin tufanyidin kwitiy chitongijok chau.​—Fil. 4:5.

¹⁷ Mu mwom wetu. Mulong tudi in kwilej a Yesu, twij anch kulejan rusangu ruwamp chawiy chisend chijim nakash tukweta. Tufanyidin kusal usu wa kukwat mipak yikutwisha kutukwash chakwel tudandamena kushinshikin pa mudimu wetu wa kulejan. Tufanyidin kutond kutek yom ya muspiritu pa ndond ya kusambish, ni kwikal ni mwom uswapela, mwamu tukutwish kwipan nakash mu mudimu wa kulejan kurutu kwa disudiel dia mangand kushik.​—Mat. 6:33; 24:14.

18. Ov, mutapu ik tukutwisha kudandamen mu weny wetu utwadila ku mwom wa chikupu, ni chom ik utongina kusal?

¹⁸ Ov, umenap anch chisangareshin nakash kutongin pa mikadil yiwamp ya Yesu? Tongin bil mutapu tukutwisha kutaninamu mu kwilej piur pa mikadil yend yikwau ni mutapu tukutwisha kwikal mudi ndiy. Chawiy lel, tudandamenany amboku kumwimburij Yesu. Anch twasal mwamu, tukudandamen mu weny wetu utwadila ku mwom wa chikupu ni tukwikal piswimp ni Yehova, muntu umwing kusu wimburijay Yesu mu mutapu uwamp.