Imburijany Kwikepish ni Ranaken ra Yesu

1. Ov, mulong wak kulondul chilakej cha Yesu kukat kutusejish piswimp nend Yehova?

TUKATINING kwimburij chilakej cha antu akwetinga untu ni mikadil tubazininga. Pakach pa antu awonsu ashakama pa divu, kwikil muntu ap umwing wading ukweta mikadil ya kwimburij mudi ya Yesu Kristu. Ov, mulong wak mwamu? Yesu amwinend walonda anch: “Muntu mwawonsu wamena kal am, wamumen kal Tatuku.” (Yoh. 14:9) Yesu wamekesha untu wa Tatukwend chawiy anch wamuman Mwan chidi mudi wamuman kal Tatukwend. Chawiy lel, anch twalondul chilakej cha Yesu, tukusej piswimp ni Yehova, Mukaleng Mwant wa piur pa mangand mawonsu. Chidi chiyukish mudi ik cha kulondul mikadil ni yom yasalay Mwanend!

2, 3. (a) Ov, mulong wak Yehova waturumburila kachom pa kachom piur pa mwom wa Mwanend, ni chom ik chitwitinay Yehova kusal? (b) Ov, yom ik tukwambambina mu mutu wa mulong winou ni ulondwilaku?

² Ap anch chidi mwamu, ov, mutapu ik tukutwisha kwijik chidiay Yesu? Cha musangar, tukwet mukand wapepilau umekeshina mikadil ya Yesu. Yehova wafundisha yom yiney, yilejenau mu Mifund ya Grek ya win Kristu, mulong usotin anch etu tumwijika Mwanend mwamu tukutwish kumwimburij. (Tang 1 Pita 2:21.) Mu Bibil, chilakej chashay Yesu achifanikeshin nich “rizau.” Pakwez, Yehova utulejin anch tufanyidin kumulondul Yesu ni kwendin mu rizau rend. Chad, Yesu watushila chilakej chiwanyidina, ap anch tudi akad kuwanyin. Ap mwamu, Yehova katwitinap anch tulondula chilakej cha Yesu mudi antu awanyidina. Pakwez, Tatuku utwitin anch tusal usu wa kumwimburij Mwanend ap anch tudi akad kuwanyin.

³ Katat, tushinshikinany amboku mikadil yimwing ya Yesu. Mu mutu wa mulong winou, tukwambambin piur pa Kwikepish ni ranaken rend; mu mutu wa mulong ulondwilaku, tukwambambin piur pa kutakaman ap mushiku ni ronganyin rend. Kukwatijan ni mwikadil wawonsu, tukwakul ku yipul yisatu: Ov, yirumburikin ik? Ov, mutapu ik wamekeshay Yesu mwikadil winou? Ov, mutapu ik tukutwisha kumwimburij?

YESU UDI MWIN KWIKEPISH

4. Ov, mutapu ik ukutwisha kurumbul kwikepish?

⁴ Ov, kwikepish chom ik? Mu mangand minam ma in kwitutul, antu amwing akat kuman anch kwikepish kudi mudi kuziy ap kuburen kwa ruchingej. Ap anch chidi mwamu, yisu yivud chitongijok chinech chiding chinyim ni uyakin. Kumekesh kwikepish kwitining usu ni kutakaman. Arumburila kwikepish mudi “mwikadil udia chinyim nich chibud ap kwitutul.” Mu Mifund ya Grek ya win Kristu, dizu dikarumwinau anch “kwikepish” dikutwish kurumburik kand anch “kwitudish” (Fil. 2:3) Kwikepish kukat kusambishang kusutil ku yom yitukata kwitongin ayinetu. Ndinguril umwing wa Bibil ulondin anch: “Kwikepish udi mutapu wa kwijik anch tudi akemp kurutu kwa Nzamb.” Anch tudi chakin kamu ikepishina kurutu kwa Nzamb, tukulik kwizambwish kurutu kwa akaritiy netu. (Rom 12:3) Chiswapelap kudi antu akad kuwanyin kukudish mwikadil wa kwikepish. Pakwez tukutwish kwilej kwikepish anch twijik chitudia kurutu kwa Nzamb ni anch twalondul mwi nzau ja Mwanend.

5, 6. (a) Ov, Nany udia Mikayel mwant wa aruw a mwiur? (b) Ov, mutapu ik wamekeshay Yesu mwikadil wa kwikepish?

⁵ Ov, mutapu ik wamekeshay Yesu kwikepish? Mwan a Nzamb wamekesha kwikepish mu chisu chilemp nakash, wamekesha kwikepish chisu chadingay chitang cha muspiritu chikweta usu mwiur ni wamekesha kand kwikepish chisu chadingay pa divu mudi muntu uwanyidina. Shinshikin amboku yilakej yikemp.

⁶ Mwikadil wend. Jud mwin kufund wa Bibil umwing wafunda chilakej cha kwikalaku kwa Yesu kurutu kwa kwez pa divu. (Tang Jud 9.) Yesu, Mikayel mukurump wa aruw a mwiur ‘watadikijana nend Sakudimban’ ni ‘wapwitijana’ nend muyimp. Apwitijana piur pa mulong wa “mujimb wa Moses.” Vurik anch kwinyim kwa rufu ra Moses, Yehova wajika mujimbu wend ndond yakad muntu kwijik. (Kuv. 34:5, 6) Pamwing ap Djabul wasota kusadil mujimbu wa Moses mulong wa kusal difukwil dia makasu. Ap anch Djabul wading ni rutong riyimp mu manangu mend, Mikayel watakamana mulong wa kumukangesh. Buku umwing wa mudimu ukweta mazu ma Grek ulondin “patadikijanay” ni ‘papwitijanay’ anch movijadin “kand nich kusadin kupwitijan kwa patok” ni makutwish kurumburik anch “Mikayel wakangesha want ipau wa Djabul wa kusend mujimbu wa mujimb Moses.” Pakwez, mukurump wa aruw a mwiur wading wij anch kadingap ndiy wading ukweta usu wa kulet dirumburish. Chad, ndiy wapana mulong winou kudi Nkalansambu Mujim, Yehova. Mikayel kakatap kumatik mwimbu wend piur pa umutakel, ap anch amusarumun. Kwikepish mudi ik!

7. Ov, mutapu ik wamekeshay Yesu kwikepish kwend mu yalondangay ni mu yisal?

⁷ Mu mudimu wend wa kulejan wa pa divu, Yesu walondanga ni kusal yom yading kumekesh kwikepish kwakin. Mu yom yalondangay. Kitonginap ching amwinend. Pa ndond pa kusal mwamu, wapananga katumb piur pa yawonsu kudi Tatukwend. (Mar. 10:17, 18; Yoh. 7:16) Kayilondap nayimp in kwilejend ni kayimanap mudi antu akad usey. Pakwez, wayisendanga ni usey, wayishimanang mulong wa yom yiwamp yadingau kusal ni wading kuyichingejin. (Luka 22:31, 32; Yoh. 1:47) Mu yisal. Yesu watonda kwikal nich mashakamin ma kwikepish makad kwikal nich yom yivud ya kumujimbu. (Mat. 8:20) Kwa kwisotil, Yesu wikepisha mulong wa kusal midimu yawonsu. (Yoh. 13:3-15) Wamekesha kwikepish kwakin kusutil ku kuziyil kwend. (Tang Filip 2:5-8.) Chinyim ni in kwitutul akisina kuziyil, Yesu, nich kwikepish waziyila ku umutakel wa Nzamb, “waziyil djat kamu ku rufu.” Ov, chom chinech chimekeshinap anch Yesu, Mwan a muntu, wading ‘mwin kwitudish’?​—Mat. 11:29.

IMBURIJ KWIKEPISH KWA YESU

8, 9. Ov, mutapu ik tukutwisha kumekesh kwikepish?

⁸ Ov, mutapu ik tukutwisha kulondul chilakej cha Yesu pa kumekesh kwikepish? Mu mikadil yetu. Kwikepish kutukangeshining kulik kumatik mimbu yetu mu umutakel. Anch tukwet kashinsh anch tukwetap usu wa kurumburish, tufanyidinap kuswapal kuyilond antu akwau nayimp mulong wa kurumbuk kwau ap yibachikin yau. (Luka 6:37; Jak. 4:12) Kwikepish kukat kutukwash kulik kwikal ‘apandikeshina kutentam,’ kulik kuyikwat nich usey ukemp antu akad kwikal ni ukaliweny ap yisend tukweta. (Mul. 7:16) Atulam in kwikepish kafanyidinap kuman anch ayipandikenamu akaritiy nau. Pakwez, atulam inay akat ‘kuyiman akwau mudi ayipandiken’ ni akat kwimekesh mudi antu akep.​—Fil. 2:3; Luka 9:48.

⁹ Shinshikin yasalay J. Walter. Thorn, wasala mudi kalam wa munyingumuku, kudiosh mu muvu wa 1894. Kwinyim kwa kusal mivu yivud mu mudimu, amutazuka ku Ferme du Royaume mu New York ni wasambisha kulam anzol. Walonda anch: “chisu nikata kwiyov anch nikwatin nich usey nakash, Nikat kusal usu wa kwikepish, ni kulond anch: ‘Ey karufunfut ka mwamu, ov, mulong wak ukat kwitutul?’” (Tang Isay 40:12-15.) Mwikadil wa kwikepish mudi ik!

10. Ov, mutapu ik tukutwisha kumekesh mwikadil wa kwikepish mu mazu ni mu yisal yetu?

¹⁰ Mu mazu metu. Anch tudi chakin kamu in kwitudish mu muchim, mazu metu makez kumekesh kwikepish. (Luka 6:45) Pitwambambina ni akwetu, tufanyidin kwipuk kwimen piur pa yom tusadina ni pa yisend yetu. (Jinsw. 27:2) Mwamu, tukez kuman kudiau akadivar ni anambaz yom yiwamp yisadinau ni kuyijikitish mulong wa mikadil yau yiwamp, ukaliweny wau, ni yisend yikatau kuwanyish. (Jinsw. 15:23) Mu yisal yetu. In Kristu ikepishina kipaniningap nakash mu kukimb katumb ka yom ya mu mangand minam. Pakwez asadining usu wa kwikal nich mashakamin ma mu mwom maswapela, ap anch asadining midimu yimeningau in mangand anch yidi yakad usey, mwamu akutwish kumusadil Yehova mu mitapu yiwanyidina. (1 Tim. 6:6, 8) Kupwa, tukutwish kand kumekesh kwikepish kwetu kusutil ku kuziyil. Tufanyidin kwikal in kwitudish mulong wa ‘kuziyil kudi in kutakel’ mu chikumangen ni kwitiy ni kulondul umutakel wa dirijek dia Yehova.​—Heb. 13:17.

MWIN RANAKEN

11. Ov, ranaken chom ik?

¹¹ Ov, ranaken chom ik? Dizu “ranaken” adirumburila mudi “mwikadil uwamp ap kuyibangin akwau.” Ranaken chidi chikunku cha mwikadil wa rukat ni yidi yovil ya rukat ni ya kwikal nich riy. Bibil ulondin nakash piur pa “ranaken,” “riy,” ni “rukat.” (Luka 1:78; 2 Kor. 1:3; Fil. 1:8) Piur pa chitazukinay Bibil anch ranaken, buku umwing wisambina piur pa Bibil ulondin anch: “Kwikal nich ranaken kutwitin kumutongijokin muntu ni maswir mend. Chitin kusal usu nakash mulong wa kubangin pa milong ya antu akwau ni kusal chom kanang chikutwisha kuyikwash, chakwel ikala nawamp.” Usu wawiy ukata kusal anch muntu ikala nich ranaken. Muntu ukweta ranaken ukat kusal usu wa kwikal ushalijadina mu mashakamin ni antu akwau.

12. Ov, chom ik chimekeshina anch Yesu wayovila antu akwau riy, ni ranaken rend ramubachika kusal ik?

¹² Ov, mutapu ik wamekeshay Yesu ranaken? Ranaken rend mu yovil ni mu yisal. Yesu wading kumekeshang ranaken kudi antu akwau. Chisu chamumanay murund nend Mariy ni antu akwau adil lel mulong wa rufu ra Lazar mwanamakwau wafa, “Yesu wadila.” (Tang Yohan 11:32-35.) Kupwa, riy ramubachika kumulangwish mwan a mwadiamufu rawiy ramubachika kand kumuvumbul Lazar. (Luka 7:11-15; Yoh. 11:38-44) Kusutil ku ranaken rend, Yesu, wamuteka Lazar pakach pa antu akutambula mwom mwiur. Mu chisu chikwau, Yesu ‘wovang riy’ mulong wa yisak ya antu yezanga kudi ndiy. Mulong wa ranaken, “ndiy wasambisha kuyilej yom yivud.” (Mar. 6:34) Chisal chinech chayikwasha mudi ik antu amutesha chakwel aswimpa mikadil yau! Chikwau kand ranaken ra Yesu radingap rimedina ching pa yovil; ramubachika kand kuyikwash antu akwau.​—Mat. 15:32-38; 20:29-34; Mar. 1:40-42.

13. Ov, mutapu ik walondangay Yesu nich ranaken kudi antu akwau? (Tal chipich cha kwinsambishil.)

¹³ Mazu mend ma ranaken. Ranaken ra Yesu ramubachika ku kuyilond antu akwau nich rukat, pakampwil kudi ayimanamar. Kambuy Mateu wasadila mazu mafunday Isay piur pa Yesu anch: “Kakez kabukunap mushiy udia piswimp ni kubukuk, ap kakez kajimishap kasu kadia piswimp ni kujim.” (Isay 42:3; Mat. 12:20) Yesu kayiswingishangap antu, pakwez wading kulond mazu mawamp makasikeshina. Walejana rusangu ra ruchingej kudi antu “akweta michim ya runeng.” (Isay 61:1) Yesu wayitazuka antu adinga ‘akweta yisend yilimina’ chakwel eza kudi ndiy, ni wayikasikesha anch ‘mipim yen yikwiswedish.’ (Mat. 11:28-30) Wayikasikesha in kwilejend anch Nzamb ukweting ranaken kudi muntu mwawonsu, kuyiwejaku ni “an akemp”​—antu amekena anch kakwetap usey mu mangand minam.​—Mat. 18:12-14; Luka 12:6, 7.

IMBURIJANY RANAKEN RA YESU

14. Ov, mutapu ik tukutwisha kwikal ni yovil ya ranaken kudi antu akwau?

¹⁴ Ov, mutapu ik tukutwisha kumwimburij Yesu ni kumekesh ranaken? Yovil yetu ya ranaken. Yovil yimwing yikutwishap kwikal yiwanyidina kudi etu, pakwez Bibil utulejin anch tufanyidin kusal usu wa kukudish mwikadil wa ranaken. “Riy, ni kudimuk,” yidi yikunku ya wuntu usu yikutwishau in Kristu awonsu kwikal nich. (Tang Kolosay 3:9, 10, 12.) Ov, mutapu ik tukutwisha kwikal nich ranaken mulong wa antu akwau? Anzuril muchim wey nakash. (2 Kor. 6:11-13) Tesh nawamp anch muntu ukulejin milong ni yovil yend. (Jak. 1:19) Tongijokin bil amwiney ni iyipula anch: ‘Anch nading mu mashakamin minam, ov, nelang kwiyov nchik? Ov, nikuswiriken ik?’​—1 Pita 3:8.

15. Ov, chom ik tukutwisha kusal mulong wa kuyikwash antu amena mar ap ayedina?

¹⁵ Mu yisal yetu ya ranaken. Ranaken ritubachikining kuyikwash antu akwau, nakash kamu antu amena mar. Ov, mutapu ik tukutwisha kuyikwash? Rom 12:15 ulondin anch: ‘dilany nau antu akata kudil.’ Yisu yivud antu akweting kuswir kwa ranaken kupandakanamu kuyipwishin milong. Nambaz umwing wakasikeshau kudi akaritiy kupwa kwa kufish mwanend changadim, walonda anch: “Nasangara chisu chadingau arund kwez kudi am ni kudil pamwing niyamam.” Tukutwish kand kumekesh ranaken anch twamekesh yisal yiwamp. Ov, wijap mwadiamufu ukweta kuswir kwa ukwash ku chikumbu chend? Ov, wijap kand mwin Kristu wapamina kal ukweta kuswir kwa ukwash mulong wa kuya ku yikumangan ni kuya mu mudimu wa chingand, ap kuya kwiyokish? Ap yisal yikemp yidia yiwamp ya riy yikutwish kumusangaresh nakash mukaritiy ukweta kuswir. (1 Yoh. 3:17, 18) Mwamu, tukutwish kumekesh ranaken kudi antu akwau anch twipan nakash mu mudimu wa chingand. Kwikil kand mutapu ukusutamu mashakamin mudi minam ma mwom!

16. Ov, chom ik tufanyidina kulond mulong wa kuyikwash antu anenganena?

¹⁶ Mazu metu ma ranaken. Rukat tukweta mulong wa antu rikat kutubachik ‘kulond mu mutapu uwamp kudi antu ovila runeng.’ (1 Tes. 5:14) Ov, chom ik tufanyidina kulond mulong wa kuyikasikesh antu inay? Tufanyidin kuyilej yom yikutwisha kumekesh mutapu tuyimena. Tukutwish kuyijikitish kamu chakwel ijika anch akwet mikadil ni ukaliweny uwamp. Tukutwish kuyivurish anch Yehova uyipwitin piswimp ni Mwanend, mwamu akutwish kwijik anch akwet usey. (Yoh. 6:44) Tufanyidin kuyilej anch Yehova udi piswimp ni atushalapolend akweta “michim yinenganena” ap ‘akweta ushon.’ (Kus. 34:18) Mazu metu ma ranaken makat kuletang usu kudi antu akweta kuswir kwa ukwash.​—Jinsw. 16:24.

17, 18. (a) Ov, mutapu ik uchingejinay Yehova amakurump kulam amikoku? (b) Ov, chom ik tukwisambina mu mutu wa mulong ulondwilaku ou?

¹⁷ Amakurump, Yehova ukuchingejidinany anch ulamany amikoku end nich rukat. (Mid. 20:28, 29) Vurikany anch, mudimu wen udi wa kuyidish, kuyikasikesh ni kuyikwash amikoku end chakwel aya kurutu. (Isay 32:1, 2; 1 Pita 5:2-4) Chawiy lel, mukurump ukweta ranaken kafanyidinap kuyisop amikok, kuyitekin yijil yikash ap kuyishindil kusal yom yakad kuwanyin pa chipim chau. Pakwez, mukurump ukwikasikesh kusangaresh michim yau, chakwel ikala nich kashinsh anch musangar wau mulong wa Yehova ukez kuyibachik kusal anch amusadila nich ukaliweny wau wawonsu.​—Mat. 22:37.

¹⁸ Anch twatongijokin pa kwikepish kwa Yesu ni ranaken rend, chikutwish chakin kamu kutubachik kulondul mwi nzau jend. Mu mutu wa mulong ulondwilaku ou, tukwisambin piur pa mutapu tukutwisha kwimburij kutakaman ap mushiku ni ronganyin ya Yesu.