Mutapu Ukutwisha Kupandakan mu Mwom
MUDI kamu mukatau anvaj kuyibangin anau ni kuyisotil anch apandakana mu mwom, mwamu kand mukatay Tatukwetu wa mwiur kutubangin ni kutusotil anch tupandakana mu mwom. Mudi uman wa kutubangin kwend kwa ranaken, utwinkishin jinsangu jivud piur pa kupandakan ni kukangany. Chakin kamu, pisambidinay piur pa muntu utila matu ku yilondilay Nzamb, Bibil ulondil mazu makasikeshina anch: “Yawonsu yikusalay yikez karumburik.”—Kuseng 1:3.
Chad, anch mwamu chidia, ov, mulong wak lel antu avud akangeny kupandakan, musangar, ni kuwanyish yisotilau mu mwom? Kushinshik piswimp nakash verse winou wa Bibil kukutwinkish chakul ni kutulej mutapu tukutwisha niyetu kupandakan mu mwom.
“Mpung ya Antu Ayimp”
Nfund-a-kuseng ubabeshin piur pa ubaj wa kwendil mwi “mpung ya antu ayimp.” (Kuseng 1:1) ‘Muntu muyimp’ mujim udi Satan Djabul. (Mateu 6:13) Bibil utulejin anch ndiy “nyikel wa mangand” ni anch “ngand ya kabuj yidi mu chikas cha Satan.” (Yohan 16:11; 1 Yohan 5:19) Chawiy lel, chidiap cha kukashimuk anch yiyul yivud yituteshina mu mangand yimekeshin yitongijok ya muntu muyimp winou.
Yiyul ya mutapu ik yikatau kulet antu ayimp? Chisu chivud, muntu muyimp ‘kakatap kumulimish Nzamb.’ (Kuseng 10:13) Chiyul chau, chimudiwila Nzamb ap chakad kumulimish, chitwombilamu kwawonsu-kwawonsu. Chisak cha katat chikasikeshidin “maku ma mujimbu wa mbij, maku ma mes, kwibaz kwa yom.” (1 Yohan 2:16) Yisaj ya kulejan jinsangu yituletidin jinsangu jivud ja filozofi ja maku ma mapit anch “pit yawonsu ukutwisha mu mwom.” Mu mangand ma kabuj, yapu yikat kusadil ma ma madolar 500 (U.S.) pa muvu mulong wa kusutish ku yisaj ya jinsangu, jinsangu ja kuyipwit nich antu chakwel alanda yom yau—ayiswirikena ap bwat. Ni propagand winou usadil yom yivud kupandakanamu kwau kuyibachik antu aswimpa yaku yau ya kuland yom. Washeshin kal kuman kwa mangand piur pa kupandakan mu mwom.
Mudi chibudikin, ap anch antu avud akwet yom yadingau ni kutongin pa mivu ya pakur, achikwet ni katat impu yakad kupwang ya kwikal nich yom ya ku mujimbu yivud. Yitongijok yiding anch, anch ukwetap yom yiney, ukutwishap kwikal nich musangar ap kupandakan. Yitongijok yiney yidi ya makasu ni “kiyidip ya Tatuku, pakwez yidi ya mangand.”—1 Yohan 2:16.
Sakatang Wetu wij yikutwisha kutupitish. Chiyul chend chishalijadin kulemp ni “mpung ya antu ayimp.” Chawiy lel, kusot kutambul chiyukish cha Nzamb oku tukat kwendil mwi njil ya mangand chakwel kupandakan kudi mudi kupakish kwendil mu jinjil jaad jishalijadina pa chisu chawiy chimwing. Chitwishikinap kusadik. Chakin, Bibil ubabeshin anch: “Kangal wilikejany mu chaku cha mangand”!—Rome 12:2.
Kangal Walikin Mangand Makutakela
Mangand madia mu winyikel wa Satan masotin kumekan mudi masangareshina mu mwom wey. Pakwez, tufanyidin kubabal. Vurik anch Eve, mband wa kusambish amudimba kudi Satan, mulong wasota kuwanyish maswir mend ma choy. Kupwa wamusadila mulong wa kumushikij Adam ku kusal chitil. Ilel Satan ukat kuyisadil kand antu chakwel apana chiyul chend chiyimp.
Chilakej, David, twisambinang mu mutu wa mulong wasambelang ou, amuchingejinanga kusal mudimu asaa avud kusutish pa saa ya mudimu ni wendangana nakash mulong wa wingend a mushing. David walonda anch: “Nadinga ni kulank pamanch pa fwe Diamond ni kuchirik urel Diakanying.” Chateshau anch chadinga chimwitin kusal mwamu chakwel apandakana mu mangand, arund akashinsh, yid ya dijuku, ni ambay a mudimu amukasikesha David anch: “Sal mwamu mulong wa dijuku diey.” Atonga anch chimufanyidin kudandamen kusadil program winou mu mivu yikemp kusu djat ni pakutwishinay. David warumburila anch: “Awiy atonga anch chikwikal chipandikena kuwap mulong wa dijuku diam mulong nadinga ni kulet nfalang jivud kwol kwam—natwisha mu mwom. Ap anch nadingap pamwing ni dijuku diam, arund nam angitiyijisha anch nadinga chakin kamu ni kusadil dijuku diam yom yivud.” Mudi chibudikin, antu avud mudi David asadining mudimu nakash mulong wa kwinkish majuku mau yom yawonsu yitonginau anch yawiy yisotinau akatish nau. Ov, kulondul yiyul mudi yiney kushikijining ku kupandakan mu mwom? Chom ik chakin kamu chiswiridina dijuku diey?
David wajingunina chiswiridina dijuku diend padingay mu weny wa wingend-a-mushing. David walonda anch: “Nading nambambin ni mwanam mband Angelica ku mond, wangipula anch: ‘Tatuku, ov, mulong wak ukatap kushakam netu ku chikumbu?’ Chanenganesha nakash.” Dizu diamwelau kudi mwanend mband diakasikesha chiyul chend cha kupan mukand wa kwijikish kulik mudimu. David wakwata mupak wa kupan ku dijuku diend chadinga chiswiridinau chakin kamu—ndiy amwinend.
Kusadil Yiyul ya Nzamb Kuletining Kupandakan
Ov, mutapu ik ukutwisha kukangesh jinsangu jiyimp jipalangena mu mangand am? Nfund-a-kuseng utulejin anch muntu upandakena nakash ni mwin musangar udi muntu ukata kusanger “mu yijil ya Nzamb, ni pa yijil yend pawiy pakatay kutongilay muten ni uchuku.”—Kuseng 1:2.
Chisu chamutondau Yoshua kudi Nzamb mudi ntakel wa muchid wa Isarel, Ndiy wamwela anch: “Ukez kutongijokang [Dizu dia Nzamb] muten ni uchuku.” Mwaning, kutang ni kutongijokin pa Dizu dia Nzamb kwadinga kwa usey ujim, pakwez Yoshua wadinga uswiridin kand “kubabal kulam yawonsu yifundilaumu.” Mwawiy, kutang Bibil kusu kukezap kusal anch utwisha mwom kapamp kamwing. Ufanyidin kusadil yiutangina. Yoshua amuleja anch: “Chad ukez kuyukil mu yisalijok yey yiwamp, ni kukolik.”—Yoshua 1:8.
Tongin bil mwan umwemwetina pashichay pa mend ma anvaj akarukat patanginau awonsu rusangu rimwing risangareshina. Chikalap nchik tupamp tuvud twatanginau kal rusangu riner, akat kusanger nakash yisu yiney yiwamp. Chilik chimwing, muntu umukatina Nzamb umening kutang Bibil pichuku-pichuku kwikal kusangareshina—chisu chimwing chipandikena kuwap cha kusutish pamwing ni Tatukwend wa mwiur. Kusutil ku kulondul chiyul ni umutakel wa Yehova, muntu mudi winou ukwikal “mudi mutond ukunyinau kuns kwa mem, ukat kusong mabuj mu chirung chau, mayij mau kand kimakulipangip; ni yawonsu yikusalay yikez karumburik.”—Kuseng 1:3.
Mutond wisambidinay nfund-a-kuseng ukatap kwiminyin awinau. Aukunyin nawamp kuns kwa mem ni aulamin nawamp kudi nfachingand. Mwi njil yawiy yimwing, Tatukwetu wa mwiur ukat kutenchik ni kupup yitongijok yetu kusutil ku yiyul yidia mu Bibil. Mudi chibudikin, tukat kusong mabuj ma ngikadil yambatena nich yiyul ya Nzamb.
Pakwez, “antu ayimp kadip mwamu.” Chakin, akutwish kumekan mudi anch atwishin mu mijikit yau mu kachisu kanang, pakwez, chakin kamu adi mu chak chiyichingedina. Chawiy “kakez kimanip mu dirumburish.” Pakwez, “njil ya ayimp yitwalen ku kujiy.”—Kuseng 1:4-6.
Chawiy kangal walikin mangand matakela ntong ni yany yey. Ap anch ukwet ukaliweny ni mutapu wa kushiken ku kupandakan mu mangand minam, babel mutapu usadidila ukaliweny wey ap mutapu mangand masadidila ukaliweny wey. Kusot mapit ma ku mujimbu kwa chamwamu, kukutwish kumushikij muntu ku ‘kuziy.’ Ku mutambu ukwau, kwikal nich urund uwamp ni Nzamb kuletining masamun ni musangar.
Mutapu Ukutwisha Kupandakan mu Mwom
Ov, mulong wak anch muntu ukat kusadil yiyul ya Nzamb, yawonsu yikusalay yikez kurumburik? Nfund-a-kuseng kadingap ni kwisambin piur pa kupandakan mu mangand minam. Kupandakan kwa muntu wa Nzamb akunungin ku kusal kwend rusot ra Nzamb—ni rusot ra Nzamb riding ching ripandikena nakash. Tushinshikinany katat mutapu kusadil yijil ya Bibil kukutwisha kutupitish nakash.
Mu Dijuku: Bibil uyikasikeshin angatan anch “ayikata akajau mudi mijimbu yau ayinau,” ni mband mwin Kristu amulejin anch ‘amulimisha nfumwend.’ (Efesus 5:28, 33) Anvaj ayitin kwikal pamwing ni anau, kusip nau, ni kuyilej piur pa yom ya usey mu mwom. (Kuvurik Yijil 6:6, 7; Mulej 3:4) Dizu dia Nzamb diyiyudil kand anvaj anch: “Kangal wayisudishany anen ku michim.” Anch asadil chiyul chinech, chikat kuyiswapel an ‘kuyiziyil anvaj au’ ni ‘kuyilimish atatukwau ni amakwau.’ (Efesus 6:1-4) Kusadil yiyul yiney ya Nzamb kuletining kupandakan nakash mu mwom wa dijuku.
Arund: Antu avud akatining kwikal ni arund. Tukwet ngikadil ya manangu ni yovil ya kukat ni kwikal akatinau. Yesu wayileja in kwilej end anch ufanyidinany “ukatijanany . . . muntu ni mukwau.” (Yohan 13:34, 35) Pakach pau, mudi arund tukutwisha kukat ni kuyichingejin—ap ni kuyichingejin nakash mu manangu ni yovil yetu. (Jinswir 18:24) Cha kusambish, kusutil ku kusadil yijil ya Bibil, tukutwish kusejin “piswimp kudi Nzamb” ni mudi muchadinga ni Aburaham, akutwish kututazuk anch “Murund wa Nzamb.”—Yakob 2:23; 4:8.
Rutong mu Mwom: Pa ndond pa kwikal ni mwom wakad rutong pichuku-pichuku, antu apandakena chakin kamu akat kutan kurumburik ni rutong mu mwom. Mwom wau wimedin pa ngikadil yakad mufulandal wa ditenchik dined dia yom. Ntong jau jikat kuyitwal chakin ku musangar wakin ni wa chikupu, patilau muchim nakash pa rutong rakin ra mwom. Chom ik chikata kumwinkish muntu rutong mu mwom? “Mulimisha Nzamb, ziyil ku malejan mend, mulong wa chom chinech chawiy chamutangilau muntu.”—Mulej 12:13.
Ruchingej: Kwikal murund nend Nzamb kutwinkishin kand ruchingej ra machuku ma kurutu. Kambuy Paul wayikasikesha in Kristu anch: ‘Kulik . . . kuchingej mu mapit mau, pakwez amuchingej Nzamb.’ Mwamu, akutwish ‘kurijek yipau yau yikeza kwikal dishin diwamp ku chirung chikeza kwez. Chawiy mwamu akez kutambul mwom udia wakin.’ (1 Timoteu 6:17-19, MM) Mwom udia wakin winou ukwez swa anch Want wa mwiur wa Nzamb wachirish Paradis pa divu.—Luka 23:43.
Kusadil yijil ya Bibil kukezap kukwiyepish ku yikokujol, pakwez ukutwish kwiyep misong yivud ya rudung ni runeng yikatau kwiletin antu ayimp ayinau. David, twisambinang kwisambishil, ni mamiliyon ma antu adia mudi ndiy ilejin kal usey wa kusadil yijil ya Bibil mu mwom wau. Kwinyim pamanay mudimu ukweta program muwamp, David walonda anch: “Nijikitishin mulong wa urund wam ni mukajam ni anam pamwing ni chisend cham cha kutwish kumusadil Yehova Nzamb mudi mukurump mu chikumangen.” Pakad kwidjidjek nfund-a-kuseng ulondil piur pa muntu utila muchim ku chiyul cha Nzamb anch: “Yawonsu yikusalay yikez karumburik”!
[Tablo udia pa paj wa 6]
YOM YITAN YITWADILA KU KUPANDAKAN
1 Jijaman kangal ngikadil ya mangand minam yikutakela.
Kuseng 1:1; Rome 12:2
2 Tang ni tongijokin pa Dizu dia Nzamb dichuku ni dichuku.
Kuseng 1:2, 3
3 Sadil yiyul ya Bibil mu mwom wey.
Yoshua 1:7-9
4 Mwikadisha Nzamb murund ney.
Yakob 2:23; 4:8
5 Mwova Nzamb wom, ni ziyil ku malejan mend.
Mulej 12:13
[Chipich chidia pa paj wa 7]
Ov, usadidil yom yitwadila ku kupandakan?