Kupandakan Ov, Ukwisikining Nchik?

JESSE LIVERMORE wijikana mulong wa kukwat mipak ya manangu ya winsak, wamekana kudi antu amwing mudi ngend-a-mushing umwing wa mu Wall Street upandikenamu nakash. Mudi chibudikin, wapita mapit mavud nakash. Amuchimina masun ma kudjal ma pa chilik chend, washakama mu chikumbu chijim cha tupalikany 29, ni amwendisha mu motak ujal utazukinau anch Rolls-Royce.

Davida niyend walondula njil yawiy yimwing. Chadingay ntakel nkwash ni mukurump wa chapu chijim cha kutenchik ma plan, wadinga mu chilik cha kwikal ntakel wa chikunku cha chapu. Wapwichika ku chitong cha kwikal nich dipit ni ntumb. Pakwez, David wakwata mupak wend amwinend wamushikija ku kulik mudimu. David walonda anch: “Nij anch kinikezap kand kutan mudimu wa nfalang mudi winou.” Ov, utongin anch David warumbuka palikay mudimu?

Antu avud itiyijin anch mu kupandakan mudi kwikal ni mapit, kwijikan nakash, ap ntumb. Pakwez, antu akweta mapit akat kov kuburen kukash ni aburedin rutong mu mwom. Wawiy mwikadil mwadingay Mr. Livermore. Chikalap nchik mapit mend, mwom wend wadinga wa runeng chisu ni chisu, wa yishiken ya mar, ni wova ushon nakash. Wova runeng rikash, uruw wend wafa, ni kovijanap nawamp ni anend. Kupwa, pashadishay mapit mend mavud, dichuku dimwing Mr. Livermore washakama mu kapalikany ka kunin maar ni kudia ka diladikij (hotel) diwamp ni winana mulong wa yom yashadishay. Wita maar, wabudisha buku wa kufundin wa yibur ya chikit, ni wamufundina mukajend mulong wa kumuladik. Chapwishay kuna, wandama mu kapalikany ka misalany mujadila ni wijipa kwa chisum.

Ap anch mayingishin mijipinay mijikenap nawamp, uman winou ulejen uyakin wa mazu ma Bibil malondila anch: “Antu asotila kwikal ampich . . . Michim yau yikat kutem nich yakamish yivud.”—1 Timoteu 6:9, 10, Manswik Masu.

Ov, chitwishikin anch antu akata kwisik kupandakan nich mapit makwetau, mwaz, ap ntumb akat kusadil chisik cha makasu cha kwisik nich? Ov, wimen amwiney anch upandaken? Ov, mulong wak wimena mwamu? Chisik ik usadidila mulong wa kushiken ku mupak winou? Chom ik chitakedila kuman kwey kwa kupandakan? Mutu wa mulong wambakedinap ou ushinshikidin chiyul chiwamp chatwishishina kal tunan ni tunan twa antu kushiken ku kupandakan. El tushinshikina mutapu ukutwisha niyey kupandakan.

[Mazu madia kwishin kwa paj]