“Disanguk Dia Kusambish”—disadikin Katat!

“Antu awonsu afa amwitiyija Kristu, awiy akez kusambelaku kuvumbuk.”—1 TESALONIKA 4:16, MM.

1, 2. (a) Ruchingej ik ridiaku mulong wa antu afa kal? (b) Yom ik yikwitiyishina disanguk? (Tal mazu madia kwishin kwa paj)

“ANTU aom ij anch, kwisudiel tukez kufa.” Mazu minam mikadil kal makin, kudiosh pasalay Adam chitil. Mu rusangu rawonsu ra muntu, muntu uvadikina wij anch chakin kamu ukufa, ni antu avud ashikedin kal ku kwipul anch: ‘Chom ik chidinga kwinyim kwa rufu? Afu adi mu mwikadil ik?’ Bibil wakwil anch: “Antu afu kijap chom.”—Mulej 9:5.

² Ov, kudi ruchingej, mulong wa antu afa kal? Inge. Chakin kamu, rifanyidin kwikalaku anch rutong ra kusambish ra Nzamb mulong wa antu rikuwanyin. Mu kusut kwa yitot ya mivu, atushalapol ashinshamena a Nzamb itiyija kal kushilamu kwa Yehova piur pa Mbut yikeza kumushesh Satan ni kudiosh uyimp wasalay. (Disambishil 3:15) Avud au afa kal. Anch asotil kuman kuwanyin kwa kushilamu kwinoku ni kukwau kwashilayimu Yehova, afanyidin kuyisangul. (Hebreu 11:13) Ov, chom chinech chitwishikin? Inge, chitwishikin. Mupostol Paul walonda anch: “Kukez kikal disanguk ni kudi ayingila ni kudi afila nich.” (Midimu 24:15) Dichuku dimwing Paul wamusangula nsand ikundj Eutikus, waturikina pa dididish pansh kudiokal pa chikumbu cha kasatu cha piur ni “kumuzambul wafang kal.” Dined didi disanguk dia nsudiel dia chidivu disambidinau mu rusangu ridia mu Bibil.—Midimu 20:7-12.a

3. Rongoj ik utanidinamu mu mazu ma Yesu mafundau mu Yohan 5:28, 29, ni mulong wak?

³ Kusanguk kwinoku chidivu kutwinkishin diyingishin dia kwitiyij yalonday Paul. Kukat kukasikesh ruchingej retu mu ukinakin wa mazu ma Yesu malonday anch: “Muten ukat kwez ukeza kateshau awonsu adia mwi nzay chidjimin cha dizu diend [Yesu], ni kubudik.” (Yohan 5:28, 29) Mazu minam masangareshina muchim mudi ik! Mayikasikeshin kand tunan twa antu afishina kal akatish nau!

4, 5. Disanguk ik kushalijan disambidinay Bibil, ni disu tukwisambina mu rusangu riner?

⁴ Antu avud akezau kusangul akez kushakam pa divu didia mu chisambu mu Want wa Nzamb. (Kuseng 37:10, 11, 29; Isay 11:6-9; 35:5, 6; 65:21-23) Pakwez, kudi antu akwau afanyidinau kusangul kurutu kwa disanguk dined disadika. Cha kusambish, Yesu Kristu amusangula mulong wa kupan usey wa yakupesh yend kudi Nzamb mulong wetwetu. Yesu wafa ni amusangula mu muvu wa 33 C.C.

⁵ Cha kaad, yid yizizidilau many ya “Isarel [wa] Nzamb” yifanyidin kumulondul Nsalejetu Yesu Kristu mu uyaj wa mwiur, kukezau “kwikal nend Mwant.” (Galatia 6:16; 1 Tesalonika 4:17) Chinship chinech achitazukining anch “disanguk dia pa budid” ap anch “disanguk dia kusambish.” (Filipoi 3:10, 11, Les Saintes Écritures—Traduction du monde nouveau; Kuburik 20:6) Anch disanguk dined diapwa, chisu chikez kuwanyin cha kuyisangwil pa divu mamiliyon ma antu akweta ruchingej ra kutambul mwom wa chikupu mu Paradis. Chawiy lel, ap anch ruchingej retu rikala ra kuya mwiur ap ra kushal panap pansh, tukat kusanger nakash “disanguk dia kusambish.” Dined didi disanguk dia mutapu ik? Disadikin chisu ik?

“Akwikal Nich Mujimbu wa Mutapu ik?”

6, 7. (a) Kurutu in Kristu azizidilau many akandama mwiur, chom ik chifanyidina kuyishiken? (b) Akez kuyisangul mu mujimbu wa mutapu ik?

⁶ Mu mukand wend wa kusambish wayifundilay in Korint, Paul wipula chipul chinech piur pa disanguk dia kusambish: ‘Pakwez antu amwing akwipul anch, Afu akusanguk nchik, akwikal nich mujimbu wa mutapu ik?’ Kupwa wachakula anch: “Yawonsu yiukata kukun, kiyikukulangip ching yafa bil . . . Pakwez Nzamb ukat kuyink mijimbu mudi usotilay ndiy . . . uyaj wa mutapu wa mwiur udi umwing, ni uyaj wa mutapu wa pansh udi ukwau.”—1 Korint 15:35-40. 

⁷ Mazu ma Paul mamekeshin anch in Kristu azizidilau many ma spiritu utumbila afanyidin kufa kurutu kwa kutambul difut dia mwiur. Ku rufu rau, mijimbu yau ya mavu yikat kuchirik ku rufunfut. (Disambishil 3:19) Pa chisu chatonday kal Nzamb, akuyisangul ni mujimbu wa “mutapu” ufanyidina mulong wa mwom wa mwiur. (1 Yohan 3:2) Nzamb ukuyinkish kand mwom wakad kufa. Chom chinech kachikwetingap pakatau kuvadik, mudi kulond anch ayiteka mupim wakad kufang. Paul ulondil anch: “Mujimbu ukata kufa, ufanyidin kudjal mujimbu wakad kand kufa.” Mwom wakad kufa chidi chipan cha Nzamb, chikezay ‘kuyidjik’ antu akezau kusangul mu disanguk dia kusambish.—1 Korint 15:50, 53; Disambishil 2:7; 2 Korint 5:1, 2, 8.

8. Ov, mutapu ik twija anch Nzamb kayitondinap antu 144000 mu yid ya marelijon kushalijan?

⁸ Ching kusu antu 144000 awiy akusanguka mu disanguk dia kusambish. Yehova wasambisha kuyitond pa Pentekot mu muvu wa 33 C.C., kachisu kakemp kupwa kwa kumusangul Yesu. Awonsu akwet “dijin diend [Yesu] ni dijin dia Tatukwend amafundil pa mpal pau.” (Kuburik 14:1, 3) Chawiy, kayitondinap mu marelijon kushalijan. Awonsu adi in Kristu, ni awonsu itapidil dilau dia kwikal nich dijin dia Tatuku—Yehova. Pakatau kuyisangul, akat kuyinkish mudimu wa kusal mwiur. Kwikal nich ruchingej ra kumusadil ching kusu Nzamb mu mutapu winou kukat kuyisangaresh nakash.

Ov, Disanguk Dined Disadikin Katat?

9. Mutapu ik Kuburik 12:7 ni 17:14 utukwashina kwijik chisu chisambishina disanguk dia kusambish?

⁹ Chisu ik chasambisha disanguk dia kusambish? Kudi uman ukash ulejena anch disadikin katat. Chilakej, twisikeshany bil mashapitre maad ma Kuburik. Cha kusambish, tutala Kuburik shapitre wa 12. Tutangin mu shapitre winou anch Yesu Kristu wadishinau want katat kamu ak, pamwing ni angel end, asin njit nend Satan ni ayilembil end. (Kuburik 12:7-9) Mudi mwalejanay gazet winou, njit jinej jasambisha mu muvu wa 1914.b Pakwez, tal anch, kwikil chilejena anch in Kristu azizidilau many adi pamwing ni Yesu mwi njit jinej ja mwiur. Katat, tushinshikinany shapitre wa 17 wa Kuburik. Tutangin mu shapitre winou anch kwinyim kwa kusheshik kwa “Babilon Mujim,” Mwan a Mukoku ukez kuyiwin michid. Kupwa, uwejidinaku anch: “Ni awiy adiay nend, atazukau ni atondilau ni in kujijaman, akez kapandikan kand.” (Kuburik 17:5, 14) Antu “atazukau ni atondilau ni in kujijaman” afanyidin kwikal asanguka kal anch adi pamwing ni Yesu mu kuwin kapamp ka nsudiel mangand ma Satan. Komb, choviken kamu anch, antu azizidilau many afila kurutu kwa Armagedon ayisangwil chisu chimwing pakach pa muvu wa 1914 ni kushik kwa Armagedon.

10, 11. (a) Amakurump 24 adi anany, ni umwing wau wamuleja Yohan chom ik? (b) Chom ik tukutwisha kwilejin ku chom chinech?

¹⁰ Ov, tukutwish kwijik chakin kamu chisu chin chasambisha disanguk dined dia kusambish? Kudi chom chimwing cha usey ujim chidia mu Kuburik 7:9-15, parumburilay mupostol Yohan chishimushimu chend cha “chisak chipandikena kujimb, chakad kutwish kuchind kudi muntu.” Kujingunin kwa chisak chinech chipandikena kujimb amujinguninaku Yohan kudi umwing wa amakurump 24, ni amakurump inay afanikeshin answan 144000 pamwing ni Kristu mu uyaj wau mwiur.c (Luka 22:28-30; Kuburik 4:4) Yohan amwinend wadinga nich ruchingej ra kuya mwiur; pakwez, mulong wadinga uchidi muntu pansh mwamulejau kudi mukurump, mu chishimushimu Yohan wafanyina kuyifanikesh antu azizidilau many adia pansh akad kal kutambul difut diau dia mwiur.

¹¹ Chom ik kand, tukutwisha kwilejin kusutil ku chisal cha kwel anch umwing wa amakurump 24 wamujingunina Yohan chisak chipandikena kujimb? Chimeken anch antu asangulau a chisak cha in amakurump 24 akwatiken mu mudimu wa kulejan uyakin wa Nzamb nlel. Ov, mulong wak chom chinech chidi chijim? Chidi mulong kujingunin kwakin kwa chisak chipandikena kujimb akulejana kudi atushalapol a Nzamb azizidilau many adia pansh mu muvu wa 1935. Anch amusadila umwing wa amakurump 24 mulong wa kulejan uyakin winou, chimeken anch amusangula kuya mwiur kurutu piswimp nakash ni muvu wa 1935. Chom chinech chikutwish kulejan anch disanguk dia kusambish diasambisha pa chisu kanang pakach pa muvu wa 1914 ni 1935. Ov, tukutwish kujimbul muvu win kamu nich kashinsh?

12. Rumburil mulong wak kapepil ka muvu wa 1918 katwishikin kwikal chisu chasambisha disanguk dia kusambish.

¹² Pinap, chikutwish kwikal cha usey nakash kushinshikin chitukutwisha kuman mudi kwisikesh kwa Bibil. Yesu Kristu amuzizila many mudi Mwant wa machuku ma kurutu wa Want wa Nzamb pakach pa muvu wa 29 C.C. Kupwa kwa mivu yisatu ni chikunku, pa kapepil ka muvu wa 33 C.C., wasanguka mudi muntu wa mu spiritu mwin dikand. Ov, chikutwish kwikal chovikena kulond anch kudiosh pamudishinau Yesu want pa chang cha muvu wa 1914, disanguk dia in kwilej end azizidilau many diasambisha kupwa kwa mivu yisatu ni chikunku, pa kapepil ka muvu wa 1918? Pamwing ap chitwishikin kwikal mwamu. Ap anch chitwishikinap kapamp kamwing kulond anch mwawiy chidia mu Bibil, chidiap chinyim kukwatijan nich mifund yikwau yimekeshina anch disanguk dia kusambish diasambisha kachisu kakemp kusu kwinyim kwa kusambish kwa kwikalaku kwa Kristu.

13. Mutapu ik 1 Tesalonika 4:15-17 ulejenay anch disanguk dia kusambish diasambisha kwisambishil kwin kamu kwa kwikalaku kwa Kristu?

¹³ Chilakej, Paul wafunda anch: “Etu tudia aom ni ku kwez kwa Mwant, kakez kuyap kurutu kwa awiy alela mu tul. Mulong Mwant amwinend ukez kashirik mwiur, ukez kabarik ni dizu dikash dia mwangel mujim, ni mwi mpuny ya Nzamb; ni afu a mu Kristu akez kasambil kulank; chawiy etu tudia aom tushala tukez kakumangan nau, ni tukwandam nau mu madj, ni kumusankan Mwant mwiur; chawiy etu awonsu tukez kwikal nend Mwant.” (1 Tesalonika 4:15-17) Chawiy lel, in Kristu azizidilau many afa kurutu kwa kwikalaku kwa Kristu ayisangwila ku mwom wa mwiur kurutu kwa in adinga achidi aom pa chisu cha kwikalaku kwa Kristu. Chom chinech chirumburikin anch disanguk dia kusambish diafanyina kusambish kwisambishil kwin kamu kwa kwikalaku kwa Kristu, ni kukudandamen pa chirung cha ‘kwikalaku kwend.’ (1 Korint 15:23) Pa ndond pa kusadik kapamp kamwing kamu, disanguk dia kusambish disadikin pa chirung kanang cha chisu.

“Ayinkisha Umwing ni Umwing Nkandj Mulemp Mutok”

14. (a) Chisu ik chawanyina yishimushimu yafundau mu Kuburik shapitre wa 6? (b) Chom ik chisambidinau mu Kuburik 6:9?

¹⁴ Tushinshikinany kand uman udia mu Kuburik shapitre wa 6. Mu shapitre winou, Yesu umeken anch uyil kurutu mudi Mwant mwin kuwin. (Kuburik 6:2) Michid yandjikin mitu mwi njit jimwing jijim nakash. (Kuburik 6:4) Kudi kamungun mukash kwawonsu. (Kuburik 6:5, 6) Yipupu ya kujipan yijiyishin antu. (Kuburik 6:8) Yishiken yiney yawonsu ya uprofet chakin kamu yikwatijadin nich mikadil yidia mu mangand kudiosh mu muvu wa 1914. Pakwez kudi chom chikwau chisadikina. Manangu metu amapwitidin ku chintamb cha kupeshil. Mwishin mwach mudi “mipim ya awiy ajipilau mulong wa dizu dia Nzamb, ni mulong wa uman wapanau.” (Kuburik 6:9) Mulong “mwom [ap mupim] wa mujimbu ushiching mu mash,” chom chimekena kwikal mwishin mwa chintamb chidi mash ma atushalapol ashinshamena a Yesu ajipau mulong wa kujijaman ni mushiku wau wa kupan uman.—In Levi 17:11.

15, 16. Rumburil mutapu misambidina mazu madia mu Kuburik 6:10, 11 disanguk dia kusambish.

¹⁵ Mudi mash ma Abel muntu utentamina, mash ma in Kristu inay afa makat kubarok mulong wa kutentam. (Disambishil 4:10) “Awiy abaroka nich dizu dijim anch: ‘Nsalejetu Sakatang, utumbila ni mwin yakin, ov, chisu ik chiukuyirumburisha antu a mangand ni kuyifundakeshin mash metu?’” Chom ik chambakedinap? “Ayinkisha umwing ni umwing nkandj mulemp mutok, chad ayilej kuchingel chisu chikemp, kushik djat ni pakuwanyishinau kuvul kwa anamakwau ni atushalapol akwau akez kujipau mudi mwayijipau awiy.”—Kuburik 6:10, 11, MM.

¹⁶ Ov, ankandj inay atok ayinkishau ayidiosha mu majiy ma mash madia mwishin mwa chintamb? Bwat! Ankandj ayinkishau antu akweta mash michilau, mudi muchadinga, pa chintamb. Apesha mwom wau mulong wa dijin dia Yesu ni katat ayisangul kal mudi antu a mu spiritu. Ov, mutapu ik twija chom chinech? Kwisambishil kwa buku wa Kuburik, tutangining anch: “Ndiy ukupandakana akez kumudjik yidjal yitok mwamu; kinikez kujimangiship dijin diend difundilau mu mukand wa aom.” Vurik kand anch amakurump 24 adinga “adjit yidjal yitok, ni pa mitu yau adjit yibangul ya or.” (Kuburik 3:5; 4:4) Chawiy kupwa kamu kwa njit, kamungun, ni yipupu yasambisha kushesh divu, yid ya antu 144000 afa, afanikeshau kudi mash madia mwishin mwa chintamb, ayisangwila ku mwom wa mwiur ni ayidjika ankandj atok a chifanikesh.

17. Mutapu ik ufanyidinau “kuchingel” antu atambula ankandj atok?

¹⁷ Antu asangwilau katat afanyidin “kuchingel.” Chiyifanyidin kuchingel nich kushimpish dichuku dia kufundakesh dia Nzamb. “Anamakwau,” in Kristu azizidilau many achidia pansh, kand kal amekesha kujijaman kwau mu yoziu. Pichikushika chisu cha dirumburish dia Nzamb, “kuchingel” kukez kupwa. (Kuburik 7:3) Pa chisu chinicha, antu akezau kusangul akez kusal pamwing ni Nsalejetu Yesu Kristu mulong wa kuyishesh antu ayimp, pamwing ni in ichila mash ma in Kristu akad mulong.—2 Tesalonika 1:7-10.

Chirumburikin ik Kudi Etu?

18, 19. (a) Mulong wak ukutwisha kulond anch disanguk dia kusambish disadikin katat? (b) Ov, kutesh kwey disanguk dia kusambish kukwinkishin yovil ik?

¹⁸ Dizu dia Nzamb dijimbwilap dichuku din kamu diasambisha disanguk dia kusambish, pakwez dilejen anch disadikin mu chirung kanang, pa chirung cha kwikalaku kwa Kristu. A kusambish kusangul adi in Kristu azizidilau many afa kurutu kwa kusambish kwa kwikalaku kwa Kristu. Kwikalaku kwa Kristu chikudandamedina, in Kristu azizidilau many afila mu kushinshaman akat kuyikarumun “mu kufet kwa dis” ikal yitang ya mu spiritu yikweta dikand. (1 Korint 15:52) Ov, antu awonsu azizidilau many akez kutambul difut dia mwiur kurutu kwa njit ja Armagedon? Twijap kwetu. Pakwez, twij anch, pa chisu chatenchikay kal Nzamb, awonsu a in 144000 akez kikal awonsu pa Mukandu wa Zion wa mwiur.

¹⁹ Twij kand anch antu avud a pakach pa 144000 ayikumangejin kal pamwing ni Kristu. Ching kusu akemp awiy achidia pa divu. Udi uman wa usu umekeshina anch chisu cha dirumburish dia Nzamb chidi piswimp nakash! Piswimp ap kamu, ditenchik diawonsu dia mangand ma Satan akudishesh. Satan amwinend akez kumudjibwil mu dibuku diakad musul. Kupwa, disanguk dia antu awonsu dikez kusambish, ni antu ashinshamena akutwish kuyishikij ku kuwanyin mudi kwashadishay Adam, pa dishin dia yakupesh ya difut dia Yesu. Uprofet wa Yehova ufundilau mu Disambishil 3:15 ukez kuwanyin nawamp nakash. Kudi kwitapil dilau dijim mudi ik kwikal mwom mu yisu yetu yiney!

[Mazu madia kwishin kwa paj]

Ov, Ukutwish Kurumburil?

Maverse malondwila am matukwashin nchik kujingunin chisu chasambisha “disanguk dia kusambish”?

• Kuburik 12:7; 17:14

• Kuburik 7:13, 14

• 1 Korint 15:23; 1 Tesalonika 4:15-17

• Kuburik 6:2, 9-11

[Chipich chidia pa paj wa 31]

Disanguk ik dikusambela kusadik kurutu kwa kuyisangul antu awonsu?