Chom Ik Chikadishina Mwom Wa Usey?

“Mulimisha Nzamb, ziyil ku malejan mend.” —MUL. 12:13.

1, 2. Tukutaninamu ik mu kushinshikin buku wa Mulej?

TONGINANY ikundj ukweta yawonsu. Udi nyikel wijikena kwawonsu, umwing wa ampich ajim a pansh, wileja nakash mu chizaz chend. Pakwez, chikalap nchik yawonsu yisadinay, chakin kamu wiyipul anch, ‘Chom ik chikadishina mwom wa usey?’

² Chakin kamu ikundj winou wadingaku—pasutil kal mivu tunan tusatu ni kusut. Dijin diend diadinga Salomon, ni mu buku wa Mulej, mwawiy tutanina mutapu urumburilay kukimbijol kwend kwa musangar. (Mul. 1:13) Kudi yom yivud yitukutwisha kwilejin ku yamanay Salomon. Chakin kamu, manangu madia mu buku wa Mulej makutwish kutukwash twitekin jintong jikeza kutwinkish kurumburik kwa mwom wetu.

“Kulondul Rinkind”

3. Chom ik chakin piur pa mwom wa muntu tukata kurish nich etu awonsu?

³ Salomon warumburila anch Nzamb watang yom yiwamp yivud yidia pa divu—musul wakad kupwang ni wamushena wa yom yisangareshina wa twakad kulik kusanger. Pakwez, tukutwishap chakin kamu kusand yitang ya Nzamb mulong wa kwiswip kwa mwom wetu. (Mul. 3:11; 8:17) Mudi mulondilay Bibil, machuku metu madi makemp ni masutiling swa. (Yob 14:1, 2; Mul. 6:12) Chom chinech chakin chifanyidin kutubachik tusadila mwom wetu nich manangu. Chiswapelap, mulong mangand ma Satan makutwish matupumbwil mwi njil yiyimp.

4. (a) Dizu “yamwamu” dirumburikin ik? (b) Yom ik yilondwilau mu mwom yitukushinshikina?

⁴ Chakwel akasikeshin ubaj wa kushesh mwom wetu, Salomon usadidil dizu “yamwamu” tupamp 30 mu Mulej. Dizu dia Hebereu diakarumunau “yamwamu” disambidin chom chamwamu, chakad usey, chakad kurumburik, chakad chom mukach, ap chakad kulabang. (Mul. 1:2, 3) Yisu yimwing Salomon usadidil dizu “yamwamu” chilik chimwing nich dizu “kulondul rinkind.” (Mul. 1:14; 2:11) Chakin kamu, kupakish kwin kwawonsu kukwat rinkind kudi kwa chamwamu. Muntu win mwawonsu ukupakisha kusal mwamu kakukwatap chom. Kulondulang jintong jakad manangu kukez kwikal kwau kwa chamwamu. Mwom mu ditenchik dia katat wiswimpin nakash chawiy kangal kuusheshin kwau mu yom yamwamu. Chawiy, chakwel kutukwash twiyepa kurumbuk, el tushinshikinany yilakej yiletinay Salomon piur pa yom yilondwilau mu mwom. Cha kusambish, tukushinshikin kulondul kwisangarish ni mapit. Kupwa, tukwisambin usey wa mudimu.

Ov, Kusurab Kwisangaresh Kutuletidining Musangar?

5. Ku yom ik kwasotinay Salomon kwisangareshin?

⁵ Mudi antu avud ilel, Salomon wasota kutan mazang kusutil ku kulondul mwom wa kwisangaresh. Ulondil anch: “Kinakanganyap kuman chom cha kwinsangarish.” (Mul. 2:10) Kwisu kwakimbinay ya kwisangaresh nich? Kukwatijan nich Mulej shapitre wa 2, ndiy ‘wausangaresha mujimbu wend ni nviny’—pa chisu chawiy chimwing wasota kwikal wisikena—ni wasala mijikit mudi kuya kutal yikunku ya mangand yiwamp, jindond jatenchikau, kutesh miminy, ni kudia yakudia yitadila.

6. (a) Ov, mulong wak chidiap kurumbuk kusanger yom kanang yiwamp mu mwom? (b) Pa mulong wa kwiswedish, kwisikan ik kuswiridikina?

⁶ Ov, Bibil ufishin nich kwisangaresh ni arund? Bwat kwau. Chilakej, Salomon ulondil anch, kudia yakudia yitadila pa chisu cha kwisangaresh kupwa kwa dichuku dia mudimu ukash chidi chipan cha Nzamb. (Tang Mulej 2:24; 3:12, 13.) Chikwau, Yehova amwinend uyilejin ansand chakwel ‘asangara ni michim yau yiyisangaresha’ mwi njil ya usey. (Mul. 11:9) Tuswiridin kwiswedish ni kwipuwangesh kuwamp. (Isikej Marko 6:31.) Pakwez, kwipuwangesh kufanyidinap kwikal rutong ra kusambish mu mwom. Pakwez, kwiswedish kufanyidin kwikal mudi yisakol kupwa kwa kudia, yidiap yakudia yin. Ukwitiyij anch chikalap mutapu ukusangaredina yisakol, yikukudjikam kwey anch kiudilap chom chikwau, ni yikukwinkishap usu ukash mu mujimbu. Chawiy chimwing, Salomon wajingunina anch mwom wengamidina pa kwisangaresh wadinga “mudi kumulondul rinkind.”—Mul. 2:10, 11.

7. Ov, mulong wak tufanyidin kutond nawamp kwipuwangesh kwetu?

⁷ Chikwau, kwipuwangesh kwawonsu kudiap kuwamp. Kuvud kudi kuyimp—muspiritu ni ku ngikadil. Tutikit twinch twa antu twamana mar mu mwom yau mulong kwau ‘asota kwisangaresh,’ ana mon ya kulewishan, afufula mar, ap asengana masengan ma nfalang? Nich ranaken Yehova utubabeshin anch, ang twalikidil muchim wetu ap mes metu matutakela ku yom yiyimp, tufanyidin kuchingejin anch tukuman mar.—Gal. 6:7.

8. Ov, mulong wak chidi cha manangu anch tutongijokina pa mwom wetu?

⁸ Chikwau kand, kulondul kwisangaresh pakad kwisikan kukutuchirish kwinyim ni tukutwishap kuta muchim pa yom ya usey ujim. Vurikany anch, mwom uyil swa ni kwikil chizu chilejen anch mwom wetu wiswimp ukwikal ching usangareshina ni wakad yikokujol. Chawiy, mudi mwalonday kand Salomon, tukutwish kutaninamu nakash anch twaya ku chidil—pakampwil cha mukadivar ap nambaz ushinshamena—pa ndond pa kuya mu “chikumbu cha musambu.” (Tang Mulej 7:2, 4.) Ov, mulong wak chidia mwamu? Pitukutesha diskur dia chidil ni kutongijokin pa mwom wa kashalapol ushinshamena wafang kal wa Yehova, tukwikal abachikinau tushinshikin mwom wetu ayinetu. Mudi chibudikin, tukutwish kukwat mupak anch tuswiridin kutenchik jintong jetu chakwel tusadil nawamp mivu yishadilaku ya mwom wetu.—Mul. 12:1.

Ov, Mapit Makutuletin Musangar?

9. Chom ik chajinguninay Salomon piur pa kwikal nich mapit?

⁹ Salomon wadinga umwing wa amakundj ampich adinga pa divu pa chisu chafunday Mulej. (2 Jins. 9:22) Wadinga ni nfalang ja kuland nich chawonsu chasotay. Ndiy wafunda anch: “Yom yawonsu yinasota nayimana.” (Mul. 2:10) Ap mwamu, weza kujingunin anch mapit minam kimakatap kulet musangar. Ndiy walonda anch: “Ukatila nfalang, kajikwetap jiwanyidina, ni ukatila mapit mavud kakumawanyishap.”—Mul. 5:10.

10. Yom ik yiletininga musangar ni mapit makin?

¹⁰ Ap anch mapit makutwish mashadish usey wau, pakwez makweting usu ukash. Mu kwipujol kwasadikina mu États-Unis, antu 75 pa chitot a mu muvu wa kusambish ku iniversite alonda anch rutong rau ra kusambish ridi “kwikal nich mapit mavud.” Ap anch ashiken ku rutong rau, ov, chakin kamu ading asangera? Kichidingap mwamu chisu chawonsu. Kukimbijol kwajingunishin kal anch kwasin nakash ching pa mapit kudi, chakin kamu, kuburen kwa musangar ni mazang. Pasak, mwamu mwashikenay Salomon kulond. Ndiy wafunda anch: “Naruzuka miril ya utad wa argent, ni ya utad wa or yinatambula ku yipau ya mangand minayikela . . . Chad namana anch, yawonsu yidi kwau yamwamu, yidi mudi kumulondul rinkind.”a (Mul. 2:8, 11) Chinyim ni chinech, anch twasadil mwom mulong wa kumusadil Yehova nich muchim wawonsu ni kutambul chiyukish chend, tukez kupit mapit makin.—Tang Jinswir 10:22.

Mudimu ik Uletininga Musangar Wakin?

11. Bibil ulejen ik in piur pa usey wa mudimu?

¹¹ Yesu walonda anch: “Tatukwam uchikat kusal mudimu ni katat ou, ni yam nikat kusal mudimu.” (Yoh. 5:17) Kwikil cha kwidjidjekin anch Yehova ni Yesu atanin musangar mu kusal mudimu. Bibil ulejen anch Yehova usangaredin mudimu wend wa kutang palondilay anch: “Nzamb wamana yom yawonsu yatangay, ni kuyital yading yiwamp kamu.” (Dis. 1:31) Angel “atupula disok dia musangar” pamanay yawonsu yasalay Nzamb. (Yob 38:4-7) Chawiy chimwing, Salomon wasangera usey wa mudimu ukash.—Mul. 3:13.

12, 13. (a) Mutapu ik antu aad isambidin pa musangar watanau mu mudimu wakin-akin? (b) Ov, mulong wak yisu yimwing mudimu wa ku mujimbu uletining runeng?

¹² Antu avud ateshin usey wa mudimu wakin-akin. Chilakej, José, mwin kufwatul upandakena, ulondil anch, “Anch watwish kufatul chipich pa diswin dikash utongidina mu manangu, ukwiyov mudi wakandam kal pa musong wa mukandu ulemp.” Miguel,b mwin kwisak, ulondil anch: “Mudimu uletining musangar anch ukutwishishin kuwanyish maswir ma dijuku diey. Ukutwish kand kukwovish musangar wa kutwish.”

¹³ Ku mutambu ukwau, midimu yivud yidi kwau yawiy yimwing-yimwing ni kiyiletinap chisu cha kusal yom yikwau yisu. Yisu yimwing ndond yin ya mudimu yawiy yidia musul wa runeng ni pamwing kwikal ndond ya kasolikany. Mudi mulondilay Salomon, muka usweral—pamwing ap walonda mwamu payimanay antu adinga ayikedila—akutwish kwangul yibudikin ya kusal mudimu ukash. (Mul. 2:21) Yom yikwau yikutwish kuletish runeng. Chikata kusambish mudi winsak uwamp chikutwish chapwa mu kuburen mulong wa kuwa kwa usey wa nfalang ap mulong wa yishiken yakad kuchingejin. (Tang Mulej 9:11.) Yisu yivud, antu arila nakash chakwel atwisha akat kuwa nayimp ni kwov usany, nich kujingunin anch adandamena “kulondul rinkind.”—Mul. 5:16.

14. Mudimu ik uletininga musangar wakin?

¹⁴ Ov, kudi mudimu wakad kuletishang runeng? José, mwin kufatul yipich ujimbwilau kwiur oku, ulondil anch: “Mu kusut kwa mivu, kufwatul kwasambisha kushadish usey wau. Kimwawiyap chidinga nich yom ya muspiritu yitusadila. Kusutil ku kumuziyil Yehova mu kulejan rusangu ruwamp, nakwasha kutung chom chikushala chikupu—in Kristu awamp amwovila Nzamb wom. Mudimu winou upandakenamu usey.” (1 Kor. 3:9-11) Miguel niyend chilik chimwing ulondil anch kulejan uruu wa Want kumuletidin musangar ujim upandakenamu wa mudimu wend wa ku mujimbu. Ndiy ulondil anch: “Kwikil chom chikutwisha kuswinkan pa musangar ukwova pa chisu ulejena uyakin udia mu Bibil kudi muntu kanang ni anch wajingunin anch wamushik kal ku muchim.”

“Pan, Ujindjik”

15. Chom ik chakin kamu chikadishina mwom wa usey?

¹⁵ Kwinsudiel, chom ik chakin kamu chikadishina mwom wa usey? Twoviling musangar wakin anch twasadil mwom wetu wiswimp wa mu ditenchik dined dia yom chakwel tusala yom yiwamp ni kumusangaresh Yehova. Tukutwish kuta urund wa piswimp ni Nzamb, tukutwish kuyilej anetu usey wa yom ya muspiritu, tukutwish kuyikwash antu akwau amwijika Yehova, ni tukutwish kukwat urund wa chikupu ni akadivar ni anambaz. (Gal. 6:10) Yom yiney yawonsu yidi ya usey wa chikupu ni yiletining musangar kudi antu ayiwanyishina. Salomon wasadila kufanikan kwa usey mulong wa kurumburil usey wa kusal yom yiwamp. Ndiy walonda anch: “Pan, ujindjik, chakwel wez utambul kand.” (Mul. 11:1) Yesu wayikasikesha in kwilejend anch: “Panany, ni yen akez kakwinkishany.” (Luka 6:38) Chikwau kand, Yehova amwinend ushidilamu kuyiyukish antu ayisadidila akwau yom yiwamp.—Jinsw. 19:17; tang Hebreu 6:10.

16. Chisu ik chiwamp cha kutenchik yitusotila mu mwom wetu?

¹⁶ Bibil utukasikeshin tukwata mipak ya manangu pitudia ansand piur pa mutapu tukusadila mwom wetu. Mwi njil yiney, tukez kutwish kwiyep kwinan mu mivu ya upal. (Mul. 12:1) Chidi cha ushon mudi ik anch twashesh mivu yetu yiwamp ya mwom wetu mulong kwau wa kupwichik ni mangand, mulong wa kutan kwau kusu yom yamwamu mudi rinkind!

17. Chom ik chikeza kukukwash utonda mwom uwamp?

¹⁷ Mudi tatuku mwawonsu mukarukat, Yehova ukusotidin anch usangar mu mwom wey, usala yom yiwamp, ni wiyepa kusansan ku muchim chamwamu. (Mul. 11:9, 10) Chom ik chikeza kukukwash usala mwamu? Itekina jintong ja muspiritu ni kupwa sal usu ukash chakwel ujiwanisha. Pasutil kal piswimp mivu 20, Javier wadinga ufanyidin kutond pakach pa kusal mudimu wa ku mujimbu ni kusal mujikit wa chisu chawonsu. Ndiy ulondil anch: “Ap anch mudimu wa udokiter ukutwish walet musangar, kwikil chom chilikena nich musangar unova panayikwasha antu kanang kwijik uyakin. Mudimu wa chisu chawonsu wantwishisha nisangera mwom muchifanyidina. Kwinan kwam kudi ching anch, mulong kinausambishap panadinga nsand.”

18. Ov, mulong wak mwom wa Yesu padingay pansh wadinga wa usey nakash?

¹⁸ Chom ik kand, chidia cha usey nakash chituswiridina kwikal nich? Buku wa Mulej ulondil anch: “Muntu muwamp wijikena upandakenamu malash ma usey, ni dichuku dia kufa dipandakenamu dichuku dia kuvadik.” (Mul. 7:1) Kwikil chom chirumburila nawamp kupandakanamu mwom wa Yesu. Chakin kamu ndiy wipidila dijin dijim ku mes kwa Yehova. Pafay Yesu ushinshamena, wachidija ukaleng wa Tatukwend ni wapana mulambu wa difut, wanzurila njil ya dipandish. (Mat. 20:28) Pa mivu yikemp yasutishay pansh, Yesu washa chilakej chiwamp nakash—chitusadila usu twimburija—cha mwom wa usey chakin kamu.—1 Kor. 11:1; 1 Pita 2:21.

19. Chiyul ik cha manangu chaletay Salomon?

¹⁹ Niyetu tukutwish kwipil dijin diwamp ku mes kwa Nzamb. Kwikal nich ntumb yiwamp ku mes kwa Yehova chawiy chom cha usey kudi etu chipandakenamu mapit. (Tang Mateu 6:19-21.) Dichuku ni dichuku, tukutwish kutan mitapu ya kusal yom yiwamp ku mes kwa Yehova, yikeza kupitish mwom wetu. Chilakej, tukutwish kuyilej antu indjing rusangu ruwamp, kukasikesh uruw wetu ni dijuku dietu, ni kutenchik mwom wetu wa muspiritu kusutil ku dilejan dietu ni kukumangan ku yikumangan. (Mul. 11:6; Heb. 13:16) Chawiy lel, ov, usotil wikala nich mwom wa usey chakin kamu? Anch inge, dandamen kulondul chiyul chinech cha Salomon: “Mulimisha Nzamb, ziyil ku malejan mend, mulong wa chom chinech chawiy chamutangilau muntu.”—Mul. 12:13.

[Mazu madia kwishin kwa paj]

Ukwakul Nchik?

• Chom ik chifanyidina kutubachik tutongijokina nawamp pa jintong ja mwom wetu?

• Mutapu ik tufanyidina kuman kulondul kwisangaresh ni mapit?

• Mudimu wa mutapu ik ukeza kulet musangar wa chikupu?

• Chom ik cha usey chitufanyidina kusal usu twikala nich?

[Chipich chidia pa paj wa 23]

Kwipuwangej kufanyidin kwikal pa ndond ik mu mwom wetu?

[Chipich chidia pa paj wa 24]

Chom ik chikata kuusal mudimu wa kulejan wikal wa usey nakash?