Wa Panrend Pakwez Kamuvuramedinap
KAMBUY Paul wayidimwisha ambay nend in Kristu: “Tuyisadilany antu awonsu nawamp tupandikesh kuyisadil in ritiy retu nawamp.” (Gal. 6:10) Ilel, tuchilondwil umutakel winou wapepilau ni tukimbin jinjil chakwel tuyisadila nawamp ambay netu akaritiy. Mukach mwa antu asotila ni itufanyidina kubangin nakash mu chikumangen cha Ukristu mudi akadivar ni anambaz netu akatish amapal ashicha mu yikumbu ya kuyilamin amapal.
Chakin, mu jingand jimwing, chiding chaku cha majuku kuyilam anvaj au amapal kol kwau. Pakwez, mu jingand jikwau, amapal avud chisu ni chisu engamidin ching pa ukwash wa ku yikumbu ya kuyilamin amapal. Chad chikwikal nchik piur pa in Kristu amapal ashicha mu yikumbu ya kuyilamin amapal? Yikokujol ik yikwetau? Mutapu ik ukutwishau kura nich anch kakwetap anamakwau akuyikwasha? Chikumangen cha Ukristu chikutwish kuyikwash nchik? Mu jinjil ik twisakidina mu kuyendil chisu ni chisu?
Yikokujol Yidia mu Yikumbu ya Kuyilamin Amapal
Payilingau in Kristu amapal kushakam mu yikumbu ya kuyilamin amapal, akutwish pamwingap kwikal mu teritwar wa chikumangen mwakadiau kwijikan. Mudi chibudikin, Atuman adia kwinikwa kakutwishap pamwingap atongin kuyendilang. Chikwau, mu yikumbu ya kuyilamin amapal, akutwish ayombamu kudi antu akweta yitiyij yindjing. Yom yiney yikat kuyishichik ambay netu Atuman amapal mu mwikadil ukash.
Chilakej, mu materitwar mamwing, yikumbu ya kuyilamin amapal arijekining chakwel kulondul malejan ma chirelijon. Muntu mwin kupan walonda anch: “Atuman amwing amapal akad kutwish kulond nawamp ayitwala ku malejan ma chirelijon pakad kuyipul yovil ya michim yau.” Chikwau, in kusal mudimu atadila yikumbu ya kuyilamin amapal chisu ni chisu akat kusadil machuku ma kuvadik, Nowel, ap Pasak mulong wa kwipuwangesh pamwing ni antu ashichamu. Atuman amwing adia mu yikumbu ya kuyilamin amapal ayidisha kal yakudia yimwing yilikina kom kend kudia. (Mid. 15:29) Anch wayendilany akadivar ni anambaz netu amapal chisu ni chisu, tukez kutwish kuyikwash ara nich yikokujol yiney.
Ukwash wa Chikumangen
In Kristu a kusambish adinga ij chisend chau pantaliken nau amapal anch kakwetap ukwash wa majuku mau. (1 Tim. 5:9) Chilik chimwing, atulam ilel ij kushinshikin anch amapal ashicha mu yikumbu ya amapal yidia mu teritwar wau ayidiwurilap.a Robert, kalam, ulondil anch: “Chikwikal chiwamp anch atulam in Kristu ayendidin ayinau amapal kuyital mu mikadil mushichau ni kulembil nau. Chikumangen chikutwish kusal nawamp mulong wa kubangin maswir mau.” Anch twitekin chisu cha kuyendil amapal, tukumekesh anch tuteshin mudi muchidia cha usey ujim ku mes ma Yehova kuyibangin ni kuyilam antu adia mu maswir.—Yak. 1:27.
Pichiswirikena, amakurump akutakel ukwash wa usey mulong wa akadivar ni anambaz adia mu yikumbu ya kuyilamin amapal yidia piswimp. Robert ulondil chikutwisha kwikal maswir mamwing, “Tufanyidin kuyikasikesh akadivar ni anambaz amapal akumanganang ku yikumangan ya Ukristu anch chitwishikin kusal mwamu.” Pakwez, kudi in akangenya kwend kuya ku Chot cha Want, amakurump afanyidin kusal yitenchik yikwau. Jacqueline, wadinga ni mivu 80 ni kusut ni wadinga ni mayej ma mu tubwokas, wasadila telefon mulong wa kutesh yikumangan. Ulondil anch: “Yankwasha nakash kutesh yikumangan pa chisu chin chiyisadilau kamu. Kwikil chom mu mangand chankangesha kuyitesh!”
Anch mwin Kristu ipal kakutwishap kand kutesh yikumangan ku telefon, amakurump akutwish atenchik chakwel amukwatinay pa makaset. Muntu ukumutwadila mukadivar ap nambaz ipal udia mu chikumbu cha kuyilamin amapal ukutwish wasadil chisu chinech kand mulong wa kwisamb nend nich kumukasikesh. Kalam umwing ulondil anch: “Kuyilejang akadivar ni anambaz amapal jinsangu jisu ja akadivar adia mu chikumangen kuyovishining anch komb adi yid ya dijiku dia muspiritu.”
Kwisamb Nau Chisu ni Chisu
Choviken patok, amapal avud amening anch kuya mu chikumbu cha kuyilamin kuyinenganeshining nakash ni kuyirumbangesh. Mudi chibudikin, amwing asotiling ishakamina kwau panrau. Pakwez, anch twayendil akadivar ni anambaz netu amapal pashemunikinau kamu ni kuyilej anch tukuyikwash, tukuyikwash chakin kamu kulam chisambu chau cha mu muchim ni chilik cha chisambu.—Jinsw. 17:22.
Anch akadivar ni anambaz amapal asambish kushadish manangu mawamp ap anch kateshinap kand nawamp ni ap anch akwet yikokujol yikwau yikangeshina kwisamb nau, amwing au akutwish alond anch chikwetap usey kuyendil. Pakwez, usu wetu wa kudandamen kuyendil, chikalap nchik chikangesh cha kwisamb chikwetau, kulejen anch tudandamedin kwikal ‘akusambish kuyilimish’ akadivar netu amapal. (Rome 12:10) Anch usu wa kuvurik wa mukadivar ipal wasambish kukemp, tukutwish kumukwash asambish kurumburil jinsangu ja pakur—ap ni ja mu wanikanch—ap atuleja mutapu washikenay ku uyakin wa Bibil. Tukusal nchik anch wikasol pa kukimb mazu mafanyidina? Tesh nawamp, ni anch chifanyidin, lond mazu maad ap masatu miumena anch mawiy masotilay kulond, lond mu uwiswimp yisotilay kulond ni mukwasha chakwel adandamen. Pakwez anch urumbangen ni anch katwishinap kulond ni katwishinap kand kutesh, tufanyidin kusal usu wa kutesh yilondilay kusutil ku kuta nakash matu ku kujimb kwa dizu diend.
Anch kulond kukasiken, kudi jinjil jikwau jikutwishau kusadil. Laurence, chibol, wadinga ni kumwendil chisu ni chisu Madeleine, nambaz mwin Kristu wa mivu 80 wakad kutwish kand kulond. Laurence ulondil mutapu wadingay ni kwisamb nend: “Namulamanga Madeleine ku chikas mudi anch tusot tulembil. Niyend wadinga ni kulam fe ku chikas cham ni wabwik kupwa waburil nakash mes mend mulong wa musangar wadingay ni kwov pa yisu yiney.” Kuyilamang ku makas arund netu amapal ap kuyibwikat nich chirungul kukutwish chakin kamu kuyikasikesh.
Kwikalaku Kwey Kudi kwa Usey
Kuyendil kwey chisu ni chisu amapal kukutwish kwikal nich usu pa mutapu umenau kuyibangin. Danièle, wadinga ni kuyendilang ambay Atuman adinga asala kal mivu 20 mu yikumbu ya kuyilamin amapal, ulondil anch, “In kusal mudimu a kwinikwa padingau ni kuman anch muntu amwendidil nakash, adinga ni kumubangin nakash.” Robert, ujimbwilau kwiur oku, ulondil anch: “Chisu chivud in kusal mudimu kwinikwa amuteshining nakash muntu ukata kumwendil ipal chisu ni chisu. Kakutwishap amulikish chilik chimwing muntu wezininga pa chipatu.” Mulong anlij niyawiy arishining nich majuku makash, asangaredining nakash kuyijikitish kudi in ezina kuyital. Chikwau kand, anch twakudishany urund uwamp nau in kusal mudimu kwinikwa, akutwish ikal tayad kulimish yijil ni ngikadil ya Kaman ipal muyej ulaminau.
Tukutwish kand kukudish urund uwamp nau in kusal mudimu kusutil ku kwipan kuyikwash nich midimu yiswapela. Mu materitwar mamwing, kuburen kwa antu awanyishina yitinau kukepishining ngikadil ya kuyibangin. Rébecca, nlij, ulondil anch: “Yisu ya kudia yidi yikash. Komb yawiy yisu yiwamp ya kumwendil murund chakwel kumukwash adia.” Kitufanyidinap kwidjidjek kuyit chisak cha asadila mudimu yiyul piur pa mutapu wa kuyikwash.
Anch twaya chisu ni chisu kuyendil ku chikumbu chawiy chimwing cha kuyilamin amapal, tukutwish kuman yiswiridinau akadivar ni anambaz etu amapal, ni nich mbil ya in kusal mudimu a kwinikwa, tukutwish kusal mutapu wa kuwanyish maswir mau. Chilakej, tukutwish kutek yisalamb ni yipich yiwamp ya antu akatishena ap yifatul yafatwilau an mu chikumbu chend. Nich kutongin ukash wa muntu ushichamu, tukutwish kumuletin chindjal cha mashik ap tuyom mudi many ma kwipan, ni sabang. Anch ku chikumbu kushichau kudi ndond yiwamp mu rupang, ov, tukutwish twaya nend murund netu pol apwitaku rinkind muwamp? Laurence, wajimbulangu kwiur oku, ulondil anch: “Madeleine wadinga ni kuchingejin kand pinikweza kumwendil. Paneza ni an, kapamp kamwing wasipa ni mes mend masangara nakash!” Kusal mwamu kukutwish kwikal nich usu ukash padi antu adia mu chikumbu cha kuyilamin amapal.—Jinsw. 3:27.
Kutaninamu kwa Awonsu
Kumwendilang ipal chisu ni chisu kutekining “rukat [retu] . . . ra kashinsh” mu choziu. (2 Kor. 8:8) Mwi njil ik? Chikutwish chatukasiken kumutal murund uyila mu kuziy. Laurence witiyijin anch: “Pa kusambish, mwikadil wa kuziy wa Madeleine wankwata ku muchim nakash ni nadinga ni kudil chisu chin chawonsu chinadinga nikuya kumutal. Pakwez nileja anch malembil ma usey makutwish matukwash tupandakan wom wetu ni kupwa twikal in kukasikesh nakash.” Mu kusut kwa mivu, Robert wadinga kuya ni kumutal mukadivar mwin Kristu wa dijin dia Larry wadinga uyedila musong wa Parkinson. Robert ulondil anch: “Larry uziyil nakash mulong wa mayej mend ni nitwishinap kutesh dizu ap dimwing dilondilay. Pakwez anch twalembil pamwing, nikwov rukat rend.”
Pituyendidila ambay akaritiy amapal, kitukatap kusu kuyikwash pakwez niyetu tukat kutaninamu. Kujijaman kwau kushakam piswimp ni Yehova pashichau mukach mwa antu akweta yitiyij yindjing kutulej mutapu wa kwikal nich ritiy ni kukapuk. Mushiku wau wa kutambul yakudia ya muspiritu chikalap nchik kuburen kutesh ni kukangany kuman kukasikeshin anch “Muntu kakwikalap mwom ku mabot kusu, pakwez ching ku dizu diawonsu dikubudika mukan mwa Nzamb.” (Mat. 4:4) Kusutil ku kusanger yom yikemp-yikemp, mudi masip ma mwan ap kudia nau pamwing, amapal akat kutuvurish tusangera yin yikemp yitukweta. Kukat kwau yom ya muspiritu kukutwish kwatukwash tutenchik nawamp yom yetu ya usey.
Chakin kamu, chikumangen cha kabuj chitanidinamu mu ukwash tuyikwashina amapal. Ov, mulong wak chidia mwamu? Mulong antu aziyila ku mujimbu akungamen nakash pa rukat ra akadivar, achinkishin chikumangen mitapu ya kukul mu ranaken. Chawiy lel, etu awonsu tufanyidin kuman anch kuyibangin amapal, ap mu chisu chilemp, mudi chikunku cha mujikit wentu padi muntu ni mukwau. (1 Pita 4:10, 11) Anch amarump asambelaku mu mujikit winou, akez kuyikwash yid yikwau ya chikumangen amana anch mutambu winou wa mujikit wetu wa Ukristu kiufanyidinap kuudiul. (Ezek. 34:15, 16) Kusutil ku ukwash wetu wa kwikatin, tukuyilej ambay netu in Kristu amapal anch kituyivuramedinap!
[Mazu madia kwishin kwa paj]
a Anch kalerik wa chikumangen wij anch mukadivar ap nambaz udia mu chikumangen wayil kal kushakam mu chikumbu cha kuyilamin amapal chidia mu teritwar mukwau, chikwikal cha ukwash ni cha rukat kapamp kamwing kuyifundil amakurump adia mu chikumangen cha teritwar winiwa.
[Tablo wa jinsangu udia pa paj wa 28]
“In kusal mudimu a kwinikwa padingau ni kuman anch muntu amwendidil nakash, adinga ni kumubangin nakash”
[Chipich chidia pa paj wa 26]
Malembil metu madiokila ku michim makutwish mamukwash mbay Kaman ipal achirisha chisambu chend cha mu muchim
[Chipich chidia pa paj wa 26]
Mazu metu ma ranaken ni rukat makuyikasikesh ambay netu akaritiy