Ov, Uvurikin?

Ov, wasangaredin kutang ma nimero ma katat ma Chinong cha Kalam? Mwaning, tal bil anch ukutwish kwakul ku yipul yilondwila ey:

• In manangu ilejina yom ya atutumbu eza chisu ik kumutal Yesu?

Dichap dimwing dia Bibil dilondil anch: “In Manangu kezap kumutal Yesu pandingay mu madil pa uchuku wavadikay mudi mwayau atufung. Eza kwinyim kwa angond.” Pakwez pa chisu chinicha Yesu wadinga “mwan” ni wadinga ushich mu chikumbu. (Mat. 2:7-11) Anch Yesu amwinkisha milambu ya or ni yipau yikwau ya usey pa uchuku wavadikay, ov, Mariy walambula atujil aad kwinyim kwa machuku 40 ku tempel?—1/1, paj wa 31.

• Chom ik chikutwishau antu avud kusal chakwel apitisha mwom wau?

Muntu ukutwish wiyipul anch, ‘Ov, nikutwish natenchik mikadil yam ni kuswapesh mwom wam?’ Mwamu mwasalay Amy. Wadinga ni nfalang jivud pakwez kadingap ni musangar. Washikena ku kwijik anch kulondul mudimu wa mwom mu mangand minam kwatwala piswimp ni kupumbukin kulemp ni ritiy. Chawiy, wakwata mupak wa kutek yisakin ya Want pa ndond ya kusambish ni watwisha kusal mudi chibol mu angond kanang. Amy ulondil anch, “Katat novil musangar nakash unadinga kandikal novap” panadinga ni kulondul jintong ja ku mujimbu.—15/1, paj wa 19.

• Chom ik chikutwisha kuyikwash amaku amwing iyova chakin kamu anch asanger?

Amaku avud asadiling mudimu pol pa dijuku. Amwing asadiling mwamu mulong wa kuwanyish maswir ma dijuku, ni akwau, chidi mulong ikala ni nfalang jau ap chakwel alanda yom yiwamp yisangareshina. Pakwez kudi amwing, chidi mulong akatining mudimu wau. Amaku in Kristu akwet ndond ya usey mu dijuku—pakampwil pachidiau an anikanch. Amwing niyawiy atondining kukepishaku ap kulik kamu kusal mudimu chakwel abangina nakash majuku mau, chawiy chikata kuyisangaresh nakash.—1/4, paj wa 26-28.

• “Dijuku” ik disambinay Yesu mu mazu mend madia mu Mateu 24:34?

Chisu chivud Yesu wasadila dizu “dijuku” mu uyimp pisambinay piur pa antu ayimp. Pakwez kalondap mwamu pisambay nau in kwilej end, adinga piswimp ni kuyizizil many ma mwiku utumbila. Awiy adinga tayad kamu kutesh kurumburik kwa Mateu 24:32, 33. Chawiy chimeken anch Yesu wadinga wisambidin in kwilej end azizidilau many, a mu mivu chitot ya kusambish ni kusadik kwa katat kwa mazu minam.—15/2, paj wa 23-24.

• Yijil yikala kalam mutapu ik, mudi muchifundilau mu Galatia 3:24?

Chisu chivud kalam wadinga muswik wadinga uchingejinau, wadinga mudi nkwash wa kushinshikin diking dia an ni kushinshikin anch yisotilay tatuku mulong wa an yisadikin. Chilik chimwing, Chijil chadinga kand kalam pantaliken nich mausu mayimp, mudi kwatijan ni apagan. Pakwez mudi kalam wa mwan, Chijil nichawiy chadinga mu kachisu kanang mudi kalam djat ni pashikay Kristu.—1/4, paj wa 18-21.

• Kukwatijan nich Yakob 3:17, ngikadil ik yitufanyidina kusadil?

Chakwel twikala ishitwila, tuswiridin kudjibwil kwa yom yiyimp kapamp kamwing. (Dis. 39:7-9) Tufanyidin kand kwikal in chisambu, kwipuk chisum ni yisal yikutwisha kushesh chisambu. Chawiy umwing ni umwing wetu ukusal nawamp iyipula anch: ‘Ov, nijiken mudi mwin chisambu bil ap mudi mwin kushesh chisambu? Ov, chisu ni chisu nikat kurish ni antu akwau? Ov, niding mwin kujiman swa, ap kuyovish antu akwau ujim? Ap anch nikat kulikishining ni kinikatap kuyishindil ching antu akwau itiyij ching yitongijok yam?’—15/3, paj wa 24-25.

• Ov, mulong wak Yesu wamwoka ikundj mputames pakemp-pakemp? (Marko 8:22-26)

Bibil karumburilap nawamp pa chom chinech. Pakwez, chitwishikin anch pa chisu chinech anch, kusutil ku kumwok mputames pakemp-pakemp, Yesu wamushilamu chisu chakwel ijidina yovil yisu ya kutwish kuman. Chom chinech chamekesha rukat ra Yesu ra kumubangin ikundj mputames.—15/2, paj wa 29.