Tumwimburijany Yesu Tumwifukwilany Nzamb Mutapu Witiyijinay
Nzamb uyitazukin nich rukat rawonsu antu a “michid yawonsu ni majuku mawonsu, antu a mangand mawonsu ni jindim jawonsu” amwifukwila. (Kubur. 7:9, 10; 15:3, 4) Antu itiyijina diladikij dined akutwish “[asokin] mu chikumbu cha [ Yehova, NW] machuku mawonsu.” (Kus. 27:4; 90:17) Mudi mwin kuseng, azambwil mazu mau mu kushiman Nzamb, end alond anch: “twasany manungin pansh kurutu kwa [ Yehova, NW] watutanga.”—Kus. 95:6.
Difukwil Dimusangareshina Yehova
Chidiay Mwan kapokal wa Nzamb, Yesu wadinga nich chisu chijim cha kwilej yitongijok, yijidik, ni yijil ya Tatukwend. Chawiy lel, Yesu wadinga nich mbil ya kutwish kuyilej antu akwau mutapu wakin wa kumwifukwil. Yesu walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.”—Yoh. 1:14; 14:6.
Yesu washa chilakej chiwanyidina cha kwitudish ni cha kumuziyil Tatukwend. Ndiy walonda anch: “Kinikat kwisadilip chom amwinam, pakwez ching mudi mwalejay Tatuku, yawiy yom yinikata kulond.” Wawejinaku kand anch: “Nikat kusal machuku mawonsu yom ya kumushimek ndiy.” (Yoh. 8:28, 29) Ov, mu mitapu ik Yesu wamushimeka Tatukwend?
Cha kusambish, Yesu wadinga wipanin nakash kudi Tatukwend, ni chawiy chirumburikina kumwifukwil Nzamb. Yesu wamekesha anch udi muntu ushinshamena kudi Tatukwend ku kumuziyil, ku kusal rusot Rend, ni ap mu chilik cha kumwit apana mulambu ukash. (Filip. 2:7, 8) Chom chijim mu difukwil dia Yesu chadinga kusal mudimu wa kuyikadish in kwilej pakad kujing, mu chilik chakwel anch adinga ni kumutazuk kudi akaritiy ni akad kumwitiyij anch Mulej. (Mat. 22:23, 24; Yoh. 3:2) Chikwau, Yesu wipana nakash mulong wa kuyisadil antu akwau. Spiritu wend wa kwipan wamusenda chisu chend chawonsu, pakwez wadinga nich musangar wa kuyisadil antu akwau. (Mat. 14:13, 14; 20:28) Chikalap nchik mutapu wadingay ukwatiken, Yesu wadinga ni kwitekinang chisu cha kwisamb ni Tatukwend mu malembil. (Luka 6:12) Difukwil dia Yesu diadinga dia usey ujim mudi ik ku mes kwa Nzamb!
Kumusangaresh Nzamb Kudi Njit
Yehova wadinga ni kushinshik kachom ni kachom mu mwikadil wa Mwanend ni Wamwitiyija. (Mat. 17:5) Pakwez, Satan Djabul niyend wamana mwom ushinshamena wa Yesu. Chawiy lel, Yesu wikala diloz dia pakampwil dia Satan. Mulong wak? Mulong kwadinga kandikal kwikalaku muntu umuziyidina kamu Nzamb, ni kumwifukwil kamu mukatinay. Ni Djabul wasota amukojika Yesu ku kumwifukwil Yehova mu mutapu ufanyidinay.—Kubur. 4:11.
Satan wasala usu chakwel amujondisha Yesu, wamushejina piswimp nich choziu. Wamukandjika Yesu “pa mukandu ulengalela kamu nakash, wamuleja mant mawonsu ma mangand ni uyaj wau.” Kupwa wamwela kand anch: “Yom yiney yawonsu nikukwinkish kwey, anch wawa pansh wangifukwil am.” Mutapu ik wasalay Yesu? Yesu wamwela anch: “Diokal kwa Satan; mulong achifunda kal: Ukamwifukwil Mwant Nzamb wey, ukamusadilang ndiy kusu.” (Mat. 4:8-10) Inge, Yesu wajingunin anch kumwasin Satan manungun chidi kwifukwil akish chikalap nchik chom chitaninayimu. Walika kumusadil muntu ap wisu chisal cha kwifukwil ching kusu Yehova.
Ku mutambu wetu, Satan kakutwishap watwinkish mant mawonsu ma mangand ni uyaj wau chakwel tumwifukwila. Pakwez uchidandamedin ni katat kujondish difukwil diakin dikatau in Kristu kumwifukwil Nzamb. Djabul utusotin anch tumwifukwila muntu windjing ap chom chindjing.—2 Kor. 4:4.
Kristu Yesu wimekesha ushinshamena djat ni ku rufu. Kusutil ku kushinshaman kwend kudi Nzamb, Yesu wamushimeka Yehova mu mutapu umwing kandikal ausalap kudi muntu ap umwing. Chitudia in Kristu akin ilel, tusadiling usu wa kwimburij mwom wa kushinshaman kwa Yesu kusutil ku kutek pa ndond ya kusambish difukwil diend dia Sakatang. Chakin kamu, urund uwamp ni Nzamb wawiy dipit dietu dipandakenamu kujimb.
Yiyukish Yidiokilinga ku Difukwil Diakin
Kukasikeshin “wi-Nzamb udia zwang ni kuwanyin” ku mes kwa Nzamb kuletining yiyukish yivud. (Yak. 1:27) Chilakej, tushich pa chirung chimwing chidiau antu avud adi “in kwikat ayinay, in kukat nfalang, in kwibaz,” ni “in kukis kuwap.” (2 Tim. 3:1-5) Pakwez, mu chikumbu chin cha Nzamb, twitapidil dilau dia kwikal pamwing ni antu ishitwila, inangina asadila usu wa kushakam kukwatijan nich yijil ya Nzamb mulong wa kumwifukwil. Ov, winou kiudiap musul wa dikasikesh?
Kusutil ku kushakam pakad kwijondish nich mangand manam, tukwet chiyukish cha kwikal nich kom katokina. Tuswiridin kwikal nich kom kishitwila kusutil ku kuziyil ku yijil yitentamina ya Nzamb ni ku kuziyil ku yijil ya Kaisar yakad kupwitijan nich yijil ya Nzamb.—Marko 12:17; Mid. 5:27-29.
Kwifukwil nich mupim wawonsu kuletining ni kwawiy yiyukish ya mutapu windjing. Anch twasin pa kusal rusot ra Nzamb kupandakanamu retwetu ayinetu, mwom wetu ukwikal urumburikina ni usangareshina. Pa ndond pa kulond anch: “Lik tudiany kwetu, tunany lel kwetu, mulong diamashik tufil,” tukwikal nich ruchingej rakin ra mwom wa chikupu mu paradis panap pansh.—1 Kor. 15:32.
Buku wa Kuburik wisambidin pa chisu chikezau antu ishitwila ku mes ma Yehova kudiokal mu “mar makash.” Rusangu riner rilondil anch: “Ni yend ushicha pa nkwas ukez kuyilam mwishin mwa ntent wend.” (Kubur. 7:13-15) Muntu winou ushicha pa nkwas kadiap windjing udi ching kamu Yehova Nzamb, Muntu utumbila nakash mu mangand mawonsu. Pakish kutongijokin, ukeza kwikal musangar nich pakezay kukwitiyij mudi ngendj mwi ntent yend, ukukuchidij ni kwikil uyimp ap umwing ukeza kukushiken! Ni mu chilik kanang, tukutwish kwikal mu diking diend ni kutubangin ap katat unou.
Chikwau kand, antu awonsu amwifukwidila Nzamb mu mutapu witiyijinay ayisambidin mudi anch ayitwadil “ku musul wa dijiy dia mem ma kupand.” Misul yiney yitudishina yifanikeshin yitenchik yin yawonsu ya Yehova yisadikina mulong wa kutwishik kwetu kutan mwom wa chikupu. Mwaning, kusutil ku mulambu wa difut dia Kristu, “ni Nzamb ukez kayikuswol mansoj ku mes mau.” (Kubur. 7:17) Antu akez kikal kand awanyidina, kuyiletidin musangar ujim antu akweta ruchingej ra kutambul mwom wa chikupu panap pansh. Ap ni ilel unou, in kwifukwil akweta musangar a Nzamb akat kubarok nich musangar, amekesh lel yovil ya muchim wau usangera mulong wa Yehova ni amwifukwidil pamwing nau antu awangina adia mwiur anch: “A Mwant Nzamb wa dikand diawonsu, midimu yey yipandiken ni ya kushimokish, jinjil jey jitentamin ni ja kashinsh yey mwant wa michid yawonsu. Nany wakad kukwov ey wom, A Mwant, ni kutumbish dijin diey? Mulong yey kusu utumbila; michid yawonsu yikez kez ni kukwifukwil kurutu kwey, mulong midimu yey ya kutentam yamekan kal.”—Kubur. 15:3, 4.
[Chipich chidia pa paj wa 27]
Chom ik chikatay kutwinkish Satan mulong wa kutusheshin difukwil dietu?