Ov, Usotil Wikala Muntu wa Mutapu Ik?

MUKURUMP wa ampurish wa mu musumb umwing wa mu Philippines wamwipula chibol umwing anch: “Ov, chom ik wasadila chakwel ikundj winou akarumuna mashakamin mend?” Wamuleja nich muny muruzu wa mapaper madinga pa tebur wend, ni walonda anch: “Ov, wading wij anch mapaper minam mawonsu afundinap milong yadingau ni kumufund pakur? Wadi kany-a-milong mu musumb unou pakwez katat wamutwishishany kal alika mashakamin mend mayimp.” Ikundj winou wadinga mwin kukwachik maar ni mwin matend wadinga ni kulet kanrumbangesh chisu ni chisu. Ov, chom ik chamushikija ku kukarumuk kukash mu mwom wend? Wadinga uruu wapepilau udia mu Bibil, Dizu dia Nzamb.

Antu avud atesha ni kusadil chiyul chaletay kambuy Paul cha ‘kumudjol muntu mukur pamwing ni yaku yend chakwel amudjala muntu musu watangau mu chifu cha Nzamb.’ (Efes 4:22-24) Kukarumuk kutuswirikedina kwikala kujim ap kukemp, kumudjal muntu musu kudi chikunku cha kwitiyij win Kristu.

Kukarumuk kwetu ni kuya kwetu kurutu djat ni mu chilik cha kuwanyish yitinau chakwel kubabatishiu, pakwez, kudi kwau disambishil. Pa chisu twezininga ayinetu chakwel atubabatisha mu mem, tuding mudi chikunku cha mutond wasambishau kal kusong. Ukutwish waman anch asot kuusong wikala chom kanang, pakwez kuchidi yom yivud yifanyidina kusal. Nsong uchiswiridin kuwejinaku yom yivud chakwel aliza chom chisonginay. Pa chisu cha kubabatishiu, tukweting ngikadil ya kusambish yitinau chakwel muntu ikala kashalapol wa Nzamb. Pakwez, untu wetu usu uchidi kwisambishil kwin kamu. Tufanyidin kudandamen kuuwapish nich kukarumuk mu yom yivud.

Ap Paul niyend wamana usey wa kukarumuk. Ndiy walonda patok anch: “Chawiy natan chijil chinech anch, pinikusota kusal yiwamp, tuyimp twamekan.” (Rome 7:21) Chakin kamu Paul wadinga wij chadingay pasak ni chadinga chisotilay ikal. Ov, chidi nchik kudi etu? Niyetu tuswiridin twiyipula anch: ‘Tuyimp ik tumekena? Nidi muntu wa mutapu ik? Ni nisotil nikal muntu wa mutapu ik?’

‘Tuyimp ik Tumekena’?

Pitukata kutunguril chikumbu chikur, kichifanyidinap kwau kusu kuchipent pol anch mukach mudi mikambu yavundina kal. Kuvuramen kurijek musong, yibamb ni yom yikwau kukulet chak kurutu. Chawiy chimwing, kumekan ku mes kwa kutentam kuwanyidinap. Tufanyidin twipaka mu untu wa muchim wetu chakwel tujingunina milong yitufanyidina kupwish. Chamwamu, yaku ya muntu mukur yikupempam kand. Chakin kamu, chidi cha usey anch twipaka ayinetu. (2 Kor. 13:5) Tuswiridin tujingunin yaku yakad kufanyin chakwel tuyitenchika. Yehova watwinkisha kal ukwash chakwel tutwisha kusal mwamu.

Paul wafunda anch: “Dizu dia Nzamb didi diom, ni usu, ni kutwa kupandiken mpak ya musamun yitwila mitambu yaad, dikubuz mu mupim ni mu muchim, dikat kubaril manungun ni usongisong, dikutwish kujingunin yitongijok ni rusot rawonsu ridia mu muchim wa muntu.” (Heb. 4:12) Uruu udia mu Dizu dia Nzamb diafundau, Bibil, ukutwish wikal nich usu ukash mu mwom wetu. Ukat kutwandam mukach mwin kamu—mu chifanikesh utwandamining djat ni mu usongisong mukach mwin kamu mwa mafup. Ukat kujingunish rusot retu ni yidia mu michim yetu, ukat kulejan patok chitudia chakin kamu mu muntu wetu wa mukach nich kuufanikesh nich mutapu utumekena pol ap mutapu ututongidina anch mwamu mutudia. Dizu dia Nzamb ditukwashining chakin kamu tujingunina milong yitukweta!

Piturijekina chikumbu chikur, chisu chimwing chiwapiningap kwau kuswinkesh yom yivundila. Kwijik chom chiyivundishina kukutwish kwatukwash chakwel tusala anch milong yiney kangal yikalaku kand. Chawiy chimwing, kichidiap kwau kusu kujingunin yaku yetu yiyimp pakwez kand chifanyidin kujingunin chisadila anch tuyikala nich kukutwish kwatukwash tuyikela kuziy kwetu. Kudi yom yivud yikata kusadish untu wetu. Yimwing yidi mwaz wetu mu chisak ni nfalang jitukweta, mwi ndond mu tushicha, chinshakur chetu, anvaj etu, arund netu, ni pamwing ni malejan ma relijon wetu. Ap maprogram masutina ku televizion ni mafilim mitutadininga, pamwing ni milad yimwing ya kwipuwej, yikweting usu wa untu wetu. Kuyijingunin yom yikweta usu uyimp pa untu wetu kukutwish kwatukwash kutudish usu way pa untu wetu.

Kupwa kwa kwipak kwetu ayinetu, tukutwish twalond anch, ‘Mwamu munidinga.’ Kwinoku kudi kutong kuyimp. Pisambidinay piur pa antu adinga mu chikumangen cha in Korint adinga pasak in kwimik dis, in utum, in kukwachik maar, ni in kusal yom yikwau yiyimp yidia mudi yiney, Paul walonda anch: “Mwamu mwadingau amwing pakach pen; pakwez en akutokishilany kal . . . mu [s]piritu wa Nzamb wetu.” (1 Kor. 6:9-11) Nich ukwash wa spiritu utumbila wa Yehova, niyetu tukutwish twapandakan mu kukarumuk mu mutapu wakin.

Tushinshikinany chilakej cha ikundj umwing dijin diend Marcos,a ushichinga mu Philippines. Pisambinay piur pa mutapu wamulilau, Marcos walonda anch: “Anvaj am adinga ching ni kupwitijan chisu ni chisu. Chawiy chinikala ntombuj pinawanyisha mivu 19.” Marcos wijikana mulong wa kusengan masengan ma nfalang, wij, ni kubwitan yom. Ndiy pamwing ni antu akwau asota kupumbul kajil wa yikung, ap anch rutong riner kirasadikap bwat. Yisal yiyimp ya Marcos yadandamena ni patanay. Yom yadingay nich yashadikanga mu masengan ma nfalang. Kupwa kwa kachisu kakemp, Marcos winunga pamwing ni mukajend mu kwilej Bibil kwadingay ni kwilej ni Atuman a Yehova. Pa kusambish, wiyova anch kakutwishap wikal Kaman. Pakwez, kusadil yom yadingay ni kwilej ni kukumangan ku yikumangan kwamukwasha Marcos alika mashakamin mend ma pasak. Katat udi mwin Kristu wababatishau kal ukata kuyilej antu akwau chisu ni chisu mutapu ukutwishau ni awiy kukarumuk.

Ov, Usotil Wikala Nchik?

Kukarumuk ik tuswiridina kusal chakwel tuwapisha ngikadil yetu ya Ukristu? Paul uyiyudil in Kristu anch: “Yidjibulany yawonsu: ujim, kuswej, jinkuny, mboj, ni mazu ma usany makata kubudik mukan mwen. Kangal wadimbijanany muntu ni mukwau; italany anch wadjibwilany kal muntu mukuru ni yisalijok yend.” Kambuy udandamedin kand anch: “[Mudjalany] muntu musu, ufanakena ku ronganyin, ukweta chifu chendendiy wamutanga.”—Kol 3:8-10.

Chawiy lel, rutong rend ra kusambish, ridi ra kumudjol kamu muntu mukur ni kupwa kumudjal muntu musu. Ov, ngikadil ik tufanyidina kukudish chakwel tutwisha kusal mwamu? Paul ulondil anch: “Djalany mudi kanitondilanyau kudi Nzamb, atumbila ni akatijadina, ni michim ya kwovijan, ni kudimuk, kwikepish ni kwitudish, ni kushimpish michim; kangal wajimanijadinany muntu ni mukwau, likishijadinany anch kudi muntu ukweta mulong ni mukwau; mudi Mwant chakulikishilanyay en ni yen salany kand mwamu. Ni piur pa yom yiney yawonsu djalany rukat, wawiy mwoj uwanyidina ukasila yawonsu pamwing mu kwovijan.” (Kol. 3:12-14) Kusal usu ujim mulong wa kukudish ngikadil yiney kukutukwash twitapila “dilau kudiay Yehova ni kudi antu.” (1 Sam. 2:26, Les Saintes Écritures — Traduction du monde nouveau) Padingay Yesu panap pansh, ndiy wamekesha mu mutapu ujim ngikadil ya Nzamb. Kusutil ku kwilej ni ku kwimburij chilakej chend, tukutwish twikal mudi Kristu, in kulondul “mu chilik cha Nzamb.”—Efes 5:1, 2.

Njil yikwau ya kujingunin yom yitufanyidina kukarumun yidi kusutil ku kwilej yaku yadingau nich antu isambidinau mu Bibil, kushinshikin yisal yiwamp yadingau nich ni yakad kwikal yiwamp. Chilakej, tongijokin bil padiay Yosef, mwan wenday nshankur Yakob. Chikalap nchik yisal yiyimp yamusadilau, Yosef wadinga nich manangu mawamp ni kuwap kwa muchim. (Dis. 45:1-15) Ku mutapu ukwau, Absalom mwan wenday Mwant David wasala mudi anch uyibangidin nakash antu ni amusangaredina mulong wa kuwap kwa muchim wend. Pakwez, chakin kamu, ndiy wadinga mwin rubabek ni mpongirik. (2 Sam. 13:28, 29; 14:25; 15:1-12, NW) Kuwap kwa kadimb-a-dimb ni kuwap kwa mujimbu kukatap chakin kamu kumwikadish muntu, muntu muwamp.

Tukutwish Twapandakan

Chakwel anch tuwapisha untu wetu ni twikal awamp ku mes kwa Nzamb, tuswiridin kumubangin nakash muntu wetu wa mu muchim. (1 Pita 3:3, 4) Chakwel anch tutwisha kukarumun untu wetu kwitining tujingunin yisal yetu yiyimp ni yom yikata kuyikasikesh, pamwing nich kukudish ngikadil ya Nzamb. Ov, tukutwish twikal nich kashinsh anch tukutwish twapandakan nich usu wetu utusadila chakwel tukarumuka?

Inge, tukutwish twakarumuk nich ukwash wa Yehova. Mudi nfund a kuseng, tukutwish twalembil anch: “Ntanga muchim usu, A Nzamb, wingedisha muchim wam wikala wakad kushemunik.” (Kus. 51:10) Tukutwish twamwit Nzamb chakwel spiritu wend asala mudi etu, akudisha maku metu ma kusot kwambatanish mwom wetu nich rutong rend muchifanyidina. Chakin kamu, tukutwish twapandakan mu kwikal asangareshina ku mes kwa Yehova!

[Mazu madia kwishin kwa paj]

[Chipich chidia pa paj wa 4]

Ov, chiwapidil kwau kupent pol pa chikumbu chinech chawang mulong wa rinkind?

[Chipich chidia pa paj wa 5]

Ov, untu wey udi mudi wa Kristu?