‘Tudjalany Untu Usu’
1 In Kristu akweting musangar wa kwijik uyakin! Twilejin kulik kushakam mud antu a mangand minam. ‘Chaurikinau ku kupand kwa Nzamb,’ adi ‘mu mididim ya manangu.’ (Efe. 4:18) Atufundishin kusot manangu masu mapandikena yitongijok ya mangand kusutin kudjibul yaku ya untu ukuru ni kudjal untu usu.—Efe. 4:22-24.
2 Yaku ya untu ukuru yitwadining chakin ku ngikadil umwing wa masandj, wijondila, ni rufu. Chawiy lel tukata kuyikasikesh antu akata kutesh uruu wa Want kudjibul ujim, kuswej, jinkuny, masal, ni mazu ma usany. Awiy asotina kwitapil dilau dia Nzamb afanyidin kamu kudjibul pakad kwikak yaku yawonsu ya untu ukuru, mud kamu antu adjodila maswin ma buchafu.—Kol. 3:8, 9.
3 Usu wa Manangu Masu mu Muchim: Chakwel kudjal untu usu chifanyidin kwikal ni usu wa manangu masu mu muchim wetu. (Efe. 4:23) Mutapu ik ukutwishay muntu kwikalish usu winou usu (wa katat), ap ditenchik dia manangu, chakwel kuzendjik manangu mend ku mutambu uwamp? Kusutin kwilej kwakad kujing Dizu dia Nzamb nich mushiku ni kutongin yidimufundishina. Chad lel, mulad usu wa manangu ukat kukul mwi ndiy, ni muntu ukat kuman yom mud muyimenay Nzamb ni Kristu. Mwom wa muntu ukat kukarumukang anch wadjal yizwish yivud ya Kristu, mud riy, uwamp, kwikepish, kwitudish, kushimpish muchim ni rukat.—Kol. 3:10, 12-14.
4 Kusutin kudjal untu usu, tukat kwiyauril ni mangand. Mwom wetu ukat kutushalijadish. Tulondining uyakin ni kusadil mazu mawamp mayitungina akwau. Tukat kuyikel ujim wetu ni kuswinkesh ubaj, kuswej, masal, ni uyimp wawonsu nich yizwish yiwamp ya winzamb. Tukat kushiken palemp kupandikan yitwitinau mu kwikal in kulikishin. Yawonsu yiney tuyisadil nich muchim wetu wawonsu.—Efe. 4:25-32.
5 Kangal twadjol ap dichuku dimwing untu usu. Tukutwishap kumusadil Yehova mutapu witiyidinay pakad kudjal untu usu. Tulikany untu usu winou utukwash kupwitin antu ku uyakin, ni umutumbisha Yehova, Sakatang wau.—Efe. 4:24.