Dizu dia Yehova Didi Diom

Manans Majim ma Mikand ya Yohan ni wa Yuda

CHIMEKEN anch wayifundina ku Efes mu muvu wa 98 C.C., mikand yisatu ya kambuy Yohan achindin kumwing nich mikand ya nsudiel yidia mu Mifund yapepilau. Mikand yaad ya kusambish yiyikasikeshin in Kristu chakwel adandamena kwendil mu chitokish ni kura nich kubwambwil kwadinga kulankina. Mu wa kasatu, Yohan kalondidinap kusu pa kwendil mu uyakin pakwez uyikasikeshin kand in Kristu chakwel asadilang mu kwovijan.

Mu mukand wend wafunday padingay mu Palestine, chimeken pamwingap chadinga mu muvu wa 65 C.C., Yuda mwanamakwend a Yesu, uyibabeshin ambay nend in Kristu piur pa antu ayimp andamina kal mu chikumangen, uyinkishin yiyul piur pa mutapu wa kujijamen yibachikin ya usu uyimp. Kutesh ni kusadil uruu udia mu mikand yiney yisatu yafunday Yohan ni mukand wa Yuda kukutwish kwatukwash tushala ashinshamena mu ritiy ap anch kwikal yikangesh.—Heb. 4:12.

DANDAMENANY KWENDIL MU KUTOK, MU RUKAT NI MU RITIY

(1 Yoh. 1:1–5:21)

Ayifundinau antu awonsu adia mu uumwing ni Kristu, mukand wa kusambish wa Yohan uletin yiyul ya manangu mulong wa kuyikwash in Kristu chakwel atwisha kutaliken kubwambwil kwa ritiy ni chakwel ashala ajijamena ku mutambu wa uyakin ni mulong wa kutentam. Ndiy wakasikeshina nakash maswir ma kwendin mu chitokish, mu rukat ni mu ritiy.

Yohan ufundil anch: “Anch tukat kwendil mu kutok, mudi [Nzamb] chidiay ndiy mu kutok, twabwaliken kal lel muntu ni mukwau.” Ni Nzamb ndiy Musul wa rukat, chawiy chilondinay kambuy anch: “El tukatijanany.” Mulong “rukat ra Nzamb” rawiy ritubachikina “chakwel tukulam yijidik yend,” chawiy tupandakena mangand nich “ritiy retu” mudiay Yehova Nzamb, kusutil ku Dizu diend, ni Mwanend.—1 Yoh. 1:7; 4:7; 5:3, 4.

Yipul Yipwilau Piur pa Mifund:

1 Yoh. 2:2; 4:10—Mutapu ik mudiay Yesu “yakupesh [ya riy, NW] ya yitil yetu”? Kovil riy kurumburikin “kutudish,” ap anch “kunenetish.” Yesu wapana mwom wend mudi chakupesh cha riy pasalay mwamu, charumburik anch watudisha, ap anch wawanyisha, yitinau mulong wa kutentam kuwanyidina. Nich kwengamin pa yakupesh yiney, chawiy chikutwishay Nzamb kujimbish riy rend, ni ukutwish kulikishin yitil ya antu amwitiyijina Yesu.—Yoh. 3:16; Rome 6:23.

1 Yoh. 2:7, 8—Chijil ik chisambidinay Yohan mudi anch “chikuru” ni kand anch “chisu”? Yohan wisambidin piur pa chijil chitadila piur pa rukat ra kwipan mulong wa akadivar. (Yoh. 13:34) Uchisambidin mudi anch “chikuru” mulong Yesu wachileta ni padinga pasutil kal mivu 60 ni kusut kushik pa chisu chafunday Yohan mukand wend wa kusambish. Chawiy lel, akaritiy adinga nich kudiosh kamu “pakusambish” kwa mwom wau wa Ukristu. Chijil chinech chidi kand “chisu” mulong chiyil kulemp kusut pa ‘kumukat mukwetu muntu mudi ey amwiney’ ni chitin rukat ra kwipan.—Lev. 19:18; Yoh. 15:12, 13.

1 Yoh. 3:2—Chom ik chadinga kandikal ‘achimekesha’ kudiau in Kristu azizidilau many, ni nany ukez kuman “mudi mudiay”? Chom chakadiau kal kuyimekeshinau chidi mutapu ukezau kwikal pakatau kuyisangul aya mwiur nich mijimbu ya muspiritu. (Filip. 3:20, 21) Pakwez, awiy ij anch: “Anch [Nzamb] wez wamekan [akez] kwikal mudi mudiay ndiy; mulong [akez] kumutal ndiy mudi mudingay,” mulong ndiy, “udi Spiritu.”—2 Kor. 3:17, 18.

1 Yoh. 5:5-8—Mutapu ik mem, mash, ni spiritu yawonsu yiletin uman anch: “Yesu udi Mwan a Nzamb”? Men maleta uman, mulong pa chisu chamubabatishau Yesu mu mem, Yehova amwinend Wamwitiyija mudi Mwanend. (Mat. 3:17) Mash ma Yesu, ap anch mwom, mapanau mulong wa “kuyikol awonsu” ni mawiy mamekesha anch Yesu udi Mwan a Nzamb. (1 Tim. 2:5, 6) Ni spiritu utumbila wamekesha anch Yesu udi Mwan a Nzamb, pamushirikinay pamubabatishau, ni wamutwishisha aya “ni kusal nawamp, ni kuyok awonsu ameshilau mar kudi Satan.”—Yoh. 1:29-34; Mid. 10:38.

Malejan Kudi Etu:

1 Yoh. 2:9-11; 3:15. Anch mwin Kristu walikin chom chisu ap muntu wisu ashesha rukat rend ra ukadivar, wendidin mu mididim ya muspiritu, kijap ni kuyilay kwin.

DANDAMENANY KWENDIL “MU YAKIN”

(2 Yoh. 1-13)

Yohan usambishin mukand wend wa kaad nich kulond anch: “Am mukurump, nikat kufund kudiay mband nlij ni anend.” Ndiy umekeshin musangar wovay pa kutan anch: “[Anend] amwing akat kwendil mu yakin.”—2 Yoh. 1, 4.

Kupwa kwa kuyikasikesh chakwel akudisha rukat, Yohan ufundil anch: “Riner rawiy rukat chakwel tuwapidil kwendil mu yijidik yend.” Yohan ubabeshin kand pantaliken nend “mukamakasu ni mwin kumukangesh Kristu.”—2 Yoh. 5-7.

Yipul Yipwilau Piur pa Mifund:

2 Yoh. 1, 13—Nany “mband nlij”? Chimeken mudi anch Yohan wamufundina mband umwing wadinga ni dijin dia Kyria, dirumburikina mu Grek anch “mband.” Ap chimeken anch wadinga usadidil kulond kwa chifanikesh mulong wa kufundin pakampwil chikumangen mulong wa kuyirumbangesh manangu in kuyizengol. Anch chakin kamu wafundina chikumangen, komb anend afanyidin ikal yid ya chikumangen chinech ni “an a [mwanamakwend] mband” afanyidin ikal yid ya chikumangen chikwau.

2 Yoh. 7—‘Kwez’ ik kwa Yesu kudia piswimp kwisambidinay Yohan, ni mutapu ik ulikinau akamakasu ‘kukwitiyij’? Kudiap ‘kwez’ kwa Yesu kudia kurutu, kwakad kumekan ku mes. Pakwez, kudi kwez kwend mu mujimbu wa mbij ni ku kumupan many mudi Kristu. (1 Yoh. 4:2) Akamakasu kitiyijinap kwez kwinoku mu mujimbu wa mbij. Pamwingap atadikin anch Yesu kadingakwap ni ap alikin kulond anch kamuzizilapu kwend many ma spiritu utumbila.

Malejan Kudi Etu:

2 Yoh. 2, 4. Kushiken kwetu ku kwijik “yakin”—malejan mawonsu ma Ukristu madia mu Bibil—ni kulamat ku malejan minam kudi kwa usey mulong wa dipandish dietu.—3 Yoh. 3, 4.

2 Yoh. 8-11. Anch kitusotilap tushadisha “ranaken, ni riy, ni chisambu yidiokila kudi Nzamb Tatuku ni kudi Yesu Kristu,” pamwing ni urund wa rukat ni ambay netu akaritiy, tufanyidin ‘twitalijola’ ayinetu muspiritu ni kuyilikin kulemp antu akad “kushakam mu dilejan dia Kristu.”—2 Yoh. 3, MM.

IKALANY “IN MUDIMU WAKIN”

(3 Yoh. 1-14)

Mukand wa kasatu wa Yohan wamufundinau murund nend Gaus. Ndiy ufundin anch: “Kwikil musangar ujim unikweta mudi winou, kutesh anch anam akat kwendil mu yakin.”—3 Yoh. 4.

Yohan umujikitishin Gaus mulong wa “kusal mudimu wa kashinsh” mu kuyikwash adinga aeny. Kambuy ulondil anch: “Etu tufanyidin kuyikwash antu adia mwamu, chakwel tukwikal in mudimu wakin.”—3 Yoh. 5-8.

Yipul Yipwilau Piur pa Mifund:

3 Yoh. 11—Ov, mulong wak ukatau antu amwing kusal yom yiyimp? Chidi mulong aburedining mwikadil wa muspiritu, akwau ni yawiy katwishiningap kumuman Nzamb nich mes mau ma muspiritu. Mulong katwishinap kumuman ni mes mau ma mbij, akat kusal yom mudi anch ndiy kayimeningap kwau.—Ezek. 9:9.

3 Yoh. 14—Anany ajimbwilau mudi “arund”? Mu dizu “arund” didia pinap mudi antu avud kupandakanamu ching in akweta urund wa piswimp. Yohan wadisadila mulong wa kwisambin piur pa ambay akaritiy awonsu.

Malejan Kudi Etu:

3 Yoh. 4. Antu aswila muspiritu adia mu chikumangen akweting musangar ujim nakash payimeningau ansand adiamu “akat kwendil mu yakin.” Ni anvaj akweting musangar mudi ik patwishiningau kuyikwash anau ikala nich ngikadil ya muspiritu!

3 Yoh. 5-8. Pakach pa antu asadilinga mudimu ukash mulong wa kuyikwash akadivar nau nich rukat mulong wau ni mulong wa Yehova mudi atulam in kwendangan, amishoner, antu asadidila ku mabiro ma mitiy ya Bethel ni antu asadila mudimu wa uchibol. Chifanyidin kwimburij ritiy rau, ni tufanyidin kuyikwash.

3 Yoh. 9-12. Tufanyidin kwimburij chilakej cha Demetrius muka ritiy ni kangal twamwimburij Diotref muntu wadinga mukamakasu.

“ILAMANY AYINEN MU RUKAT RA NZAMB”

(Yuda 1-25)

Yuda ujimbwil antu awonsu andamina mu ujindj mu chikumangen nich yitongijok yiyimp mudi “in kwinan, adi in kuchirilan, akat kwendil mu maku mau ayinau.” Akat “kulond mazu makash ku milamu yau, ni kuyibaz antu.”—Yuda 4, 16.

Ov, mutapu ik ukutwishau in Kristu kujijamen yipwichik yiyimp? Yuda ufundin anch: “En, akarukat, vurikany mazu malondau kal pasak kudi apostol a Nsalejetu Yesu Kristu.” Kupwa wawejinaku anch: “Ilamany ayinen mu rukat ra Nzamb.”—Yuda 17-21.

Yipul Yipwilau Piur pa Mifund:

Yuda 3, 4—Ov, mulong wak Yuda wayikasikesha in Kristu chakwel ‘arishina ritiy’? Mulong ‘antu akad Nzamb andamin kal mu chikumangen.’ Antu inay akat ‘kukarumun ranaken ra Nzamb ku yaku yiyimp.’

Yuda 20, 21—Ov, mutapu ik tukutwisha twilamin ayinetu mu “rukat ra Nzamb”? Tukutwish twasal mwamu mu jinjil jisatu: (1) Kusutil ku kwitungin ayinetu pa “ritiy . . . ritumbila” kusutil ku kwilej nakash-nakash Dizu dia Nzamb ni kusal mudimu wa kulejan nich mushiku; (2) kusutil ku kulembil nich ‘spiritu utumbila,’ ap anch kukwatijan nich usu wa spiritu utumbila; ni (3) kusutil ku kwitiyij ditenchik ditwishishina mwom wa chikupu—mulambu wa difut wa Yesu Kristu.—Yoh. 3:16, 36.

Malejan Kudi Etu:

Yuda 5-7. Ov, antu ayimp akutwish iyep dirumburish dia Yehova? Kukwatijan nich yibabesh yisatu yisambinay Yuda, chitwishikinap ap pakemp.

Yuda 8-10. Tufanyidin kulondul chilakej cha mwangel mujim Mikael ni kulimish umutakel wa Nzamb.

Yuda 12. In kupumbuk akat kudimban rukat pakwez adi ubaj ku ritiy retu mudi mudinga mayal majingamena mu mem ku maat ni kudi in kwisay. Alej a makasu akutwish imekesh mudi in kupan, pakwez adi kwau mudi madj makad mem mulong adi a chamwamu muspiritu. Antu inay adi mudi mitond yakad mabuj, yifila. Achingejin disheshik, mudi mudinga mitond yiumina yakad mij. Tukusal cha manangu anch twayichinin kulemp in kupumbuk.

Yuda 22, 23. In Kristu akin akisining yom yiyimp. Pa kusal usu wa kusot kuyipandish “akweta ntad” mu kasu ka disheshik dia chikupu, antu aswila adia mu chikumangen—pakampwil amakurump atondau kal—akat kuyikwash muspiritu.

[Chipich chidia pa paj wa 28]

Mem, mash, ni spiritu yawonsu yiletin uman anch: “Yesu udi Mwan a Nzamb”