Ov, Udi ‘Kalam Wa Ranaken Rijim Ra Nzamb’?
“Katijanany mudi divar, ulimishijanany muntu ni mukwau.”—ROME 12:10.
1. Kashinsh ik tutanina mu Dizu dia Nzamb?
DIZU DIA NZAMB dituvurishining chisu chawonsu anch Yehova ukutukwash pa chisu tuziyila ap pa chisu tubukukina mu muchim. Chilakej, mazu manam mongojina: “[ Yehova, NW] ukat kukasikesh asotila kuwa, ukat kulangwish ifumba kal.” “Ukat kwok abukukina mu muchim, ukat kukas yitat yau.” (Kus. 145:14; 147:3) Chikwau, Tatukwetu wa mwiur amwinend ulondil anch: “Am [ Yehova] Nzamb wen. Nikez kakukasikeshany ni kukulejany anch: ‘Kangal wovany wom, nikukukwashany.’”—Isay 41:13.
2. Mutapu ik ukatay Yehova kuyikwash atushalapol end?
2 Ov, mutapu ik lel, ‘utukwashiningay Yehova,’ oku ndiy udi wakad kumekan ni ushiching mwiur? Mutapu ik ‘utukasikeshiningay pitusotila kuwa’ mulong wa musong wa muchim? Yehova utukwashining mu mitapu kushalijan. Chilakej, uyinkishin antu end “ukash upandakena ukash wawonsu” kusutin ku spiritu wend utumbila. (2 Kor. 4:7, MM; Yoh. 14:16, 17) Atushalapol a Nzamb atanining usu kudiokal mu Dizu dia Nzamb diapepilay, Bibil, kusutil ku jinsangu jidiamu. (Heb. 4:12) Ov, kudi kand mutapu ukwau usadidinay Yehova mulong wa kutukasikesh? Chakul tukuchitan mu mukand wakusambish wa Pita.
‘Ranaken Rijim ra Nzamb Risadil mu Mitapu Kushalijan’
3. (a) Yom ik yalonday kambuy Pita piur pa yoziu? (b) Yom ik yisambidinau mu chikunku chansudiel cha mukand wa Pita wa kusambish?
3 Payifundinay in kristu azizidilau many, kambuy Pita wayifunda anch ayingin kwau kusangar mulong wa difut dipandakena kuwap diyichingedina. Kupwa wawejaku kand anch: “Ap anch wamananyap nchik mar ma mitapu ni mitapu.” (1 Pita 1:1-6, MM) Talany mazu “mitapu ni mitapu.” Mamekeshin anch yoziu yidi ya mitapu yivud. Pakwez, Pita kimanyinap kusu pinipa, kuyilik akadivar nend chakwel asambisha ayinau kutongin anch akutwish kuyijijamen yoziu. Chinyim nich, Pita walonda anch in Kristu akutwish ikal nich kashinsh anch Yehova ukuyikwash kurish nich Yoziu yikuyishikena, yikalap ya mutapu ik. Kashinsh kinak eza kukijikish mu chikunku cha nsudiel cha mukand wa Pita, kwisambidinay kambuy piur pa milong ya “kwisudiel kwa yom yawonsu.”—1 Pita 4:7.
4. Ov, mulong wak mazu madia mu 1 Pita 4:10 matwongojin nakash?
4 Pita walonda anch: ‘Muntu ni muntu mudi mwatambulay kal chamwamu, akwashan nich, mudi atulam awamp, a ranaken rujim ra Nzamb, rimekena mu mitapu ni mitapu.’ (1 Pita 4:10) Pita wasadina kand mazu “mitapu ni mitapu.” Chakin kamu, ndiy wading ulondil anch, ‘Yoziu yizening mu mitapu yivud kushalijan, pakwez ranaken ra Nzamb ni rawiy rezining mu mitapu yivud kushalijan.’ Ov, mulong wak mazu minam matwongojin? Mamekeshin anch choziu chikalap mu mutapu ap wisu, ku kwikal kand mutapu kanang wa ranaken ra Nzamb ukukwatijana nich. Ov, umenany mu mazu ma Pita, mutapu ukatay kutwanaken Yehova? Kusutin kudiau anamakwetu in Kristu.
‘Kukwashijan Muntu ni Muntu’
5. (a) Chom ik chifanyidinay kusal mwin Kristu win mwawonsu? (b) Chilangwishin yipul ik?
5 Payilejay yid yawonsu ya chikumangen cha Ukristu, Pita walonda anch: “Piur pa yom yawonsu lamatinany mu rukat ren mukach mwen ayinen.” Kupwa wawejaku kand anch: “Muntu ni muntu mudi mwatambulay kal chamwamu, akwasha nich” muntu ni mukwau. (1 Pita 4:8, 10) Chawiy komb, muntu ni muntu udia mu chikumangen ukwet chisend cha kuyitung ambay nend in Kristu. Atwinkisha kal chisend cha chom chipandakena usey, chayen cha Yehova, ni etu tukwet chisend cha kuchipan kudi antu akwau. Chawiy lel, chom ik chinech cha usey chatwinkishau? Pita walonda anch chidi ‘chiyukish.’ Chiyukish ik chinech? Mutapu ik ‘tukata kuchisadil mulong wa kukwashijan muntu ni muntu’?
6. Yiyukish ik yimwing yayinkishau in Kristu?
6 Dizu dia Nzamb dilondil anch “Yom yawonsu yiwamp ni yiwanyidina yikat kudiokal mwiur.” (Yak.1:17) Chakin, yom yin yawonsu yiwamp yiyikinshinay Yehova antu end yidi uman wa ranaken rend. Chom chimwing chiwamp chitwinkishiningay Yehova chidi spiritu wend utumbila. Chipan chinech chitutwishishining tukudisha ngikadil ya Nzamb mudi rukat, kuwap, ni kwishimpish. Ngikadil yiney yikat kutubachikang, chakwel niyetu tuyimekeshinang ambay netu akaritiy rukat ridiokila ku muchim ni tuyikwasha. Manangu makin ni ronganyin ni yawiy yid pakach pa yiyukish yiwamp tukutwisha kutambul nich ukwash wa spiritu utumbila. (1 Kor. 2:10-16; Gal. 5:22, 23) Chawiy, usu wetu wawonsu, ukaliweny wetu, ni tutok twetu tufanyidin tuyimana mudi anch yidi yiyukish yitufanyidina kusadil mulong wa kumushiman ni kumutumbish Tatukwetu wa mwiur. Tukwet chisend chatwinkay Nzamb cha kusadil ukaliweny wetu ngikadil yetu mudi njil ya kupanin mitapu kushalijan ya ranaken ra Nzamb mulong wa ambay netu akaritiy.
Mutapu ik wa ‘Yisadilany Mulong wa Kukwashijan Muntu ni Muntu’?
7. (a) Dizu “mudi” dilejen ik? (b) Yipul ik tufanyidina kwiyipul ayinetu, ni mulong wak?
7 Pita niyend ulondil kand piur pa yiyukish yitwatambula anch: ‘Muntu ni muntu mudi mwatambulay kal chiyukish, cha kusadil.’ Dizu ‘mudi’ dimekeshin ngikadil ni ukaliweny yikutwish yashalijan mu yidinga ni mu uyijimbina. Chiyukish chikala ap cha mutapu ik, muntu ni muntu amukasikeshin chakwel ‘achisadila mulong wa kukwashijan muntu ni muntu.’ Chikwau, mazu ‘yisadilany . . . mudi atulam awamp’ madi mbil. Chawiy, tufanyidin kwiyipul ayinetu anch: ‘Ov, nikat chakin kamu kusadin yiyukish yangikishau mulong wa kuyikasikesh ambay netu akaritiy.’ (Isikej nich 1 Timote 5:9, 10.) ‘Ap anch nikat kusadin ukaliweny wangikishay Yehova ching mulong kwau wakutaninamu amwinam—mudi kutan mapit ap mulong wa kwikal mwaz mu mashakamin ma untu?’ (1 Kor. 4:7) Anch twasadin yiyukish yetu ‘mulong wa kukwashijan nich,’ tukumusangaresh Yehova.—Jinsw. 19:17; tang Hebereu 13:16.
8, 9. (a) Mu jinjil ik jimwing mukatau in Kristu a pa mangand mawonsu kusal mudimu wa kuyikwash ambay nau akaritiy? (b) Mutapu ik ukatau kukwashijan akadivar ni anambaz adia mu chikumangen chen umwing ni mukwau?
8 Dizu dia Nzamb dilejen jinjil kushalijan jasadilau in Kristu a mu mivu chitot ya kusambish mulong wa kukwashijan muntu ni muntu. (Tang Rome 15:25, 26; 2 Timote 1:16-18.) Mutapu kand umwing ilel, mbil ya kusadil chiyukish mulong wa ambay netu akaritiy ayisadidin nich muchim umwing kudi in Kristu akin. Tushinshikinany jinjil jimwing mwadingau ni kusadil mwamu.
9 Akadivar avud asutishining asaa avud ngond ni ngond mulong wa kurijek yikumangan. Ku yikumangan, palejeningau jinsangu jimwing ja usey ja muspiritu jajinguninau chisu chitanginau Bibil, mazu mau ma manangu makat kuyibachik antu in awonsu mu chikumangen chakwel ajijaman. (1 Tim. 5:17) Akadivar ni anambaz avud ijiken mulong wa chirungul chau ni riy rau piur pa ambay nau akaritiy. (Rome 12:15) Amwing ayiling yisu yivud kuyital antu anenganena ni akat kulembil nau pamwing. (1 Tes. 5:14) Akwau akat kuyifundinang ambay nau in Kristu arishina nich yoziu, mazu ma rukat madiokila ku michim ni masangareshina. Akwau kand nich kudimuk akat kuyikwash antu akweta yikangesh ya ku mujimbu chakwel akumangan ku yikumangan ya chikumangen. Tunan twa Atuman akat kusal mudimu wa kukwashan, akat kuyikwash ambay nau akaritiy kutunguril yikumbu yiwila pikudia yak ya chitangil. Rukat ritandurikina ni ukwash umekena mulong wa kuyikwash akadivar ni anambaz, yawonsu yiney yidi uman wa ‘ranaken ra Nzamb mu mitapu kushalijan.’—Tang 1 Pita 4:11.
Yom ik Yipandikena Usey?
10. (a) Paul wading ukwatiken nich yom ik yaad mu mudimu wend wa Nzamb? (b) Mutapu ik tukumwimburija Paul ilel?
10 Atushalapol a Nzamb kayinkishap ching kusu chiyukish chikutwishau kusadil mulong wa kuyikwash ambay nau akaritiy pakwez kand ayinkisha uruu wa kuyilej akwau antu. Kambuy Paul wajingunina yom yiney yaad mu mudimu wend wamusadinay Yehova. Wafundina chikumangen cha ku Efes piur pa “katumb ka mudimu wa ranaken ra Nzamb” wamwinkishau mulong wa kutaninamu kwau. (Efes 3:2) Walonda kand anch: “Pakwez mudi Nzamb mwasambishay kututond etu kututek kulam rusangu ruwamp.” (1 Tes. 2:4) Niyetu mudi Paul, twij kamu anch atwinkisha mudimu wa kusal mudi in kulejan a Want wa Nzamb. Mu kwipanang kusal mudimu winou nich mushiku, tusadiling usu wa kwimburij chilakej chashay Paul mudi mwin kulejan rusangu ruwamp wakad kuziyang. (Mid. 20:20, 21; 1 Kor. 11:1) Twij anch kulejan rusangu ra Want kukutwish kwapandish mwom. Pakwez, pa chisu chawiy chimwing, tukusal usu wa kumwimburij Paul ku kushinshikinang yisu yidia yiwamp ya ‘kuyinkish chiyukish chidiokila ku mwiku wa Nzamb’ ambay netu akaritiy.—Tang Rome 1:11, 12; 10:13-15.
11. Mutapu ik tufanyidinap kuman mudimu wetu wa kulejan ni wa kuyitung akadivar netu?
11 Wisu mudimu upandakenamu usey pa midimu yaad ey ya Ukristu? Kwipulang chipul mudi chinech kudi mudi kwiyipulang piur pa kajil anch, Pa mapur mend maad disu dimwing dikweta usey nakash? Chakul chiswapel. Kajil uswiridin kusadil mapur mawonsu maad chakwel atwika. Chilik chimwing, tuswirikedin kusal midimu yetu yawonsu yaad mu mudimu wetu utumusadidina Nzamb chakwel tuuwanisha kamu mudi in Kristu. Chawiy lel, pa ndond pa kutongin anch mudimu wetu wa kulejan rusangu ruwamp ni wa kuyitung ambay netu akaritiy mudi yakad kuyang pamwing, chawiy tuyimeninga mudi mwayimanay kambuy Pita ni Paul—mudi yisend yikwashijadina chimwing ni chikwau. Mu mutapu ik?
12. Mutapu ik tukata kusadil mudi chamu cha mudimu mu chikas cha Yehova?
12 Chitudia in kulejan, tukutwish kusadin mulad wawonsu wa kulejan nich utukweta chakwel tupukuna michim ya akwetu antu nich uruu usangareshina wa Want wa Nzamb. Mwi njil yiney, tuchingejin kuyikwash chakwel ikala in kwilej a Kristu. Pakwez, tukat kusadilang kand ukaliweny wetu ni yiyukish yikwau yitukweta chakwel tusangaresha michim ya ambay netu akaritiy nich mazu makasikeshina ni yisal ya kuyikwash—mazu ma ranaken ra Nzamb. (Jinsw. 3:27; 12:25) Mwi njil yiney, tukuchingejin tuyikwasha ashala kamu in kwilej a Kristu. Mu midimu yiney yawonsu yaad—wa kuyilej antu ni wa ‘wa kukwashijan muntu ni muntu’—twitapidil dilau dipandakenamu dia kusal mudi chamu cha mudimu mu chikas cha Yehova.—Gal. 6:10.
“Katijanany Mudi Divar”
13. Chom ik chikutwisha kutushiken anch twakangany ‘kukwashijan muntu ni muntu?’
13 Paul wayikasikesha ambay nend akaritiy anch: “Katijanany mudi divar, ulimishijanany muntu ni mukwau.” (Rom. 12:10) Chakin kamu, kuyikat akadivar netu kutubachikining tusala nich muchim wetu wawonsu mudi atulam a ranaken rijim ra Nzamb. Twij anch, anch Satan watwish kutuchirish kwinyim chakwel tulika ‘kukwashijan muntu ni muntu,’ ukutwish waziyish uumwing wetu. (Kol. 3:14) Chikwau kand, kuburen kwa uumwing kukutushikij ku kuburen mushiku mu mudimu wa kulejan. Satan wij kamu nawamp anch uswiridin atubukuna dimwing dia dipur dietu, mu kulond kwa chifanikesh.
14. Nany ukata kutaninamu ku ‘kukwashijan kwetu muntu ni muntu’? Let chilakej.
14 ‘Kukwashijan muntu ni muntu’ kukatap kuyikwash ching kusu atambwila ranaken rijim ra Nzamb pakwez kuyikwashining kand in akat kurilet. (Jinsw. 11:25) Talany bil mudi chilakej, Ryan ni Roni, ambay atijadina adinga mu Illinois, États-unis. Chateshau anch rinkind utazukinau anch Katrina wabumonang yitot ya yikumbu ya anamakwau atuman, rukat ra ukadivar rayibachika kusha midimu yau, ni yikumbu yau, alanda ditemb, aditenchik dikal chikumbu cha kushakam, aya weny wa akilometre 1400 djat ku Louisiana. Ashakamaku muvu umwing ni angond ni asadila chisu chau, usu wau, ni mapit mau mulong wa kuyikwash akadivar nau. Ryan ukweta mivu 29 walonda anch: “Kusal mudimu winou kwanshejisha piswimp ni Nzamb. Namana mutapu ukatay Yehova kuyilam antu end.” Ryan wawejaku kand anch: “Kusal mudimu pamwing ni akadivar apamina kal kwanleja yom yivud piur pa mutapu wa kuyilam akadivar. Nileja kand anch kudi yom yivud mu dirijek dia Yehova yitufanyidina etu ansand kusal.” Roni, ukweta mivu 25, wafunda anch: “Nijikitishin nakash mulong wa kwipan kwam kuyikwash antu akwau. Nisanger nakash, ni kandikal novangap mwamu mu mwom wam. Nij kamu anch mivu yezinaku, nikez kutaninamu yiyukish ku ronganyin riner ramushena.”
15. Mayingishin ik mawamp mitukweta chakwel tudandamena kusal mudi atushalapol a ranaken ripandakena kujimb ra Nzamb?
15 Chakin kamu, kuziyil kwi mbil ya Nzamb ya kulejan rusangu ruwamp ni ya kuyitung ambay netu akaritiy kuyiletidin antu awonsu yiyukish. Antu tukwashina akukasikan muspiritu, oku niyetu tukwov musangar mu muchim udiokilinga ku kupan. (Mid. 20:35) Chikumangen chawonsu chikukudish spiritu wa kwakan ni chid ni chid chikubangin muntu ni muntu. Chikwau, rukat ritukata kwimekeshin muntu umwing ni mukwau rikat kutwijikish anch tudi in Kristu akin. Yesu walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yoh. 13:35) Chipandakenamu yawonsu, ntumb yiyiling kudiay Tatukwetu mwin kutubangin, Yehova, mulong rusot rend ra kuyikasikesh antu adia mu maswir rimekedin kusutil kudi atushalapol end adia pansh. Mayingishin mawamp mudi ik mitukweta, ma kusadil yiyukish yetu mulong wa ‘kukwashijan muntu ni muntu mudi atushalapol a ranaken ripandakena kujimb ra Nzamb’! Ov, ukudandamen kusal mwamu?—Tang Hebereu 6:10.
Ov, Uvurikin?
• Yehova ukat kuyikasikesh atushalapol end mu mutapu ik?
• Mudimu ik wa kusal watwinkishau?
• Mu jinjil ik jimwing mutukutwisha kuyisadin ambay netu akaritiy?
• Chom ik chikutubachika chakwel tudandamena kusadin chiyukish chetu mulong wa ‘kukwashijan muntu ni muntu’?
[Chipich chidia pa paj wa 17]
Ov, ukat kusadil “yiyukish” yey mulong wa kuyisadin akwen bil anch mulong wa kwisangaresh amwiney?
[Chipich chidia pa paj wa 19]
Tukat kuyilej antu akwau rusangu ruwamp ni kuyikwash ambay netu in Kristu
[Chipich chidia pa paj wa 20]
Chifanyidin kuyijikish in kusal mudimu wa kukwashan mulong wa kwipan kwau ayinau