Kushinshaman Kwey Kusangareshin Muchim Wa Yehova

“Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.”—JINSW. 27:11

1, 2. (a) Mukand wa Yob wisambidin kufundan ik kwafundanay Satan? (b) Chom ik chilejena anch Satan wadandamena kumusal Yehova kwinyim kwa machuku ma Yob?

YEHOVA wamulika Satan chakwel apaka kushinshaman kwa Yob kashalapol ushinshamena wa Nzamb. Mudi chibudikin, Yob washadisha yivam yend, anend, ni ukash wend wa mujimbu. Pakwez chisu chadingay Satan ni kutadik piur pa kushinshaman kwa Yob, ndiy wadinga nich mu manangu mend yom yivud kadingap umwedina kusu padiay Yob. Satan walonda anch: “Yom yawonsu yakwetay muntu ukuyipan mulong wa kuchidij mom wend!” Ntand jinej jalangwisha mulong ukash kupandakanamu pa Yob mudi muntu umwing ni wadandamena ni kwinyim kwa rufu rend.—Yob 2:4.

² Kupwa kwa mivu 600 kudiosh pamupakinau Yob, Salomon amupepila ni wafunda anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.” (Jinsw. 27:11) Chimeken patok anch pa chisu chinicha Satan wadinga ni kumutadik Yehova. Chikwau kand, mu chishimushimu chamanay kambuy Yohan, Satan wamekana udandamedin kuyifund atushalapol a Nzamb pa chisu chamwopatau mwiur kachisu kakemp kurutu kwa kuudish Want wa Nzamb mu muvu wa 1914. Mwaning, djat ni ilel unou, kulemp nakash mu machuku ma kwisudiel ma dirijek dined diyimp, Satan udandamedin ni katat kutadikijan piur pa kushinshaman kwa atushalapol a Nzamb.—Kubur. 12:10.

3. Malejan ik ma usey mitukutwisha kwilejin mu mukand wa Yob?

³ Tushinshikinany malejan majim masatu mitwilejidina mu mukand wa Yob. Dia kusambish, yoziu ya Yob yimumekeshin patok mukankuny wa antu ni musul wa rupompat pantaliken nau antu a Nzamb. Mukankuny winou udi Satan Djabul. Dia kaad, chikalap nchik yoziu yikutwisha kutushiken, kwikal nich urund wa piswimp ni Nzamb kukez kututwishish kulam kushinshaman kwetu. Dia kasatu, chisu chezininga yoziu ni anch twapakiu mu mutapu kanang, Nzamb ukutukwash mudi mwamukwashay Yob. Ilel, mwamu musadilingay Yehova kusutil ku Dizu diend, ku dirijek diend, ni ku mwiku wend utumbila.

Ijikany Chisu Chawonsu Mukankuny Wakin

4. Ov, nany ufanyidinau kufish nich mulong wa mikadil yidia mu mangand?

⁴ Antu avud kitiyijinap anch Satan udiaku. Chawiy, ap anch akat kwiyakamish mulong wa mikadil ya mangand, kijap musul wakin: Satan Djabul. Chakin kamu, chisend chijim cha mar mamenau antu chidi pa mitu yau ayinau. Anvaj etu akusambish, Adam ni Eve, atonda wan ipau pantaliken nend Sakatang wau. Ni kudiosh kamu pinipa, yizaz yalondula yasala yom pakad manangu. Chikalap nchik mwamu, Djabul ndiy wamudimba Eve wakamwandjik mu kumubwambwil Nzamb. Ndiy watenchika mu chisak cha antu afilinga, akayitil ditenchik dia mangand diyikedilay. Mulong Satan udi ‘nzamb wa mangand,’ chisak cha antu chimekeshin mikadil yawiy yimwing mudi yendend: chibud, kuratutaku, mukau, kanvundangesh, makasu ni wintombuj. (2 Kor. 4:4; 1 Tim. 2:14; 3:6; tang Yakob 3:14, 15.) Mikadil yiney yaleta mafef ni kuratutaku mu marelijon, rukis, kubwikan mukan ni ris, yiyiletidin antu mar makash.

5. Ov, chom ik tusotina kusal nich ronganyin ra usey ritukweta?

⁵ Etu atushalapol a Yehova tukwet ronganyin ik ra usey ujim! Mwaning, tumwij ufanyidina kufish nich mulong mikadil yiyimp yidia mu mangand. Ov, twovilap musangar wa kusal mudimu wa chingand mulong wa kuyijikish antu chakwel amwijika musul wa kanvundangesh? Ov, kitusangerap kwiman ku mutambu wa Nzamb wakin, Yehova, ni kuyirumburil akwetu mutapu ukezay kumushesh Satan ni kupwish mar mamenau antu?

6, 7. (a) Ov, nany ukweta chisend cha mar mamenau in kwifukwil akin? (b) Ov, mutapu ik tukutwisha kwimburij chilakej cha Elihu wa pasak?

⁶ Satan kakwetap kusu ching chisend cha mar mavud madia mu mangand pakwez ukwet kand chisend cha kuyipompat antu a Nzamb. Mupak wend udi ching wa kutupak. Yesu Kristu wamuleja kambuy Pita anch: “Simon, Simon, tal kwa, Satan witang kukutambul, chakwel akuzikisa ey mudi tidiku.” (Luka 22:31) Chawiy chimwing, umwing ni umwing wetu ulondwila mu jinzau ja Yesu akez kumupak mu mutapu umwing ap ukwau. Pita wamufanikesha Djabul mudi ‘ntambu ukata kwonang, wend uzomb ni kusot uwapidialay kudia.’ Ni Paul walonda anch: “awonsu asotila kwikal antu a Nzamb mu Kristu Yesu akez kinkok.”—1 Pita 5:8; 2 Tim. 3:12.

⁷ Ov, mutapu ik tukutwisha kumekesh anch tumwij nawamp mukankuny wakin anch mbay netu mu ritiy wikal mu mar? Pa ndond pa kumuchin mukadivar udia mu mar, tufanyidin twikala mudi Elihu wa pasak, wisamba ni Yob mudi murund wakin. Tukwinung ni mukadivar netu mu kurish nend mukankuny netu etwawonsu, Satan. (Jinsw. 3:27; 1 Tes. 5:25) Rutong retu ridi ra kumukwash mbay netu kashalapol chakwel alama kushinshaman kwend, ap anch kwikal nchik, ni chakwel ausangaresha muchim wa Yehova.

8. Chisu chikatay Satan kupak kushinshaman kwa atushalapol a Yehova, chom ik chisotiningay kusal?

⁸ Dipit dia kusambish diasalay Satan chakwel Yob ashadisha diadinga yivam yend. Annam inay adinga nich usey, amukwashang mu mwom wend. Pakwez Yob wadinga ni kuyisadil kand mu difukwil. Tutangin anch: “Anch kwacha pamanch wading ni kulambulang yakupesh ya kwosh ya umwing ni umwing wau. Pamwingap anam amakundj asadil chitil ni kumusaal Nzamb mu michim yau! Mwamu mwadingay ni kusal Yob pa chisu ni chisu.” (Yob 1:4, 5) Chawiy, Yob wadinga ni kumulambul Yehova annam chisu ni chisu. Pa chisu chasambisha yoziu, katwishap kand kulambul. Yob kadingap nich kand “yom” ya usey ya kumulimish nich Yehova. (Jinsw. 3:9) Pakwez watwisha—ni wasala—kumulimish Yehova nich milamu yend!

Tangany Urund wa Piswimp ni Yehova

9. Dipit ik dia usey tukweta?

⁹ Wikala mpich ap kazweny, nsand ap ipal, ukweta mujimbu ukash ap muyej, tukutwish twata urund wa piswimp ni Yehova. Chikalap nchik yoziu yikutwisha kututan, kuta urund wa piswimp ni Nzamb kukututwishish tulama kushinshaman kwetu ni tuusangaresha muchim wa Yehova. Ap antu amwing akweta ronganyin rikemp ra uyakin akutwish akwat mupak ukash chakwel alama kushinshaman kwau.

10, 11. (a) Ov, mutapu ik wasalay umwing wa anambaz etu papakau kushinshaman kwend? (b) Chakul ik cha usu chamwakulau Satan kudi nambaz umwing?

¹⁰ Tushinshikinany chilakej cha Nambaz Valentina Garnovskaya, umwing wa atuman avud a mu Russie wadinga mudi Yob mukaritiy wa pasak walama kushinshaman kwend kwikalap nchik yoziu yikash. Mu muvu wa 1945, padingay ni mivu 20, mukadivar umwing wamuleja uman. Kupwa kwa asaa aad ndiy wachirika chakwel akisambina piur pa Bibil, kupwa pinipa kamumanap kand kakwau. Chikalap nchik mwamu, Valentina wasambisha kuyilej amutej nend. Mudi chibudikin, amukasa ni amukatwila mivu chinan mu kompony. Mu muvu wa 1953 amulika ni kapamp kamwing wasambisha mudimu wend wa kulejan. Amukasa kand kakwau ni amuteka mu rukan—kapamp kinak amukatwila mivu dikum. Kupwa kwa kusal mivu mu kompony umwing, amutwala mu kompony mukwau. Mu kompony winou, mwadinga anambaz avud adinga ni Bibil umwing. Dichuku dimwing nambaz umwing wamuleja Valentina Bibil. Chisu cha musangar mudi ik! Tongin bil, Bibil mukwau wadinga wamanay kal Valentina wadinga win wadingay nich mukadivar wamuleja uman mu muvu wa 1945!

¹¹ Mu muvu wa 1967, Valentina amulika ni watwisha kutambul dibabatish mulong wa kumekesh patok kwipan kwend kudi Yehova. Wasadila wan ipend wend nich mushiku mulong wa kusal mudimu wa chingand djat ni mu muvu wa 1969. Pakwez, mu muvu winou, amukasa kand kakwau, ni kapamp kinak amukatwila mivu yisatu mu rukan. Chikalap nchik mwamu, Valentina wadandamena kulejan. Kurutu afa mu muvu wa 2001, wadinga wayikwashin kal antu 44 kwilej uyakin. Wasutisha mivu 21 mu rukan mu makompony. Wadinga tayad kulik yom yawonsu, pamwing nich wan ipau wend, chakwel alama kushinshaman kwend. Kwisudiel kwa mwom wend, Valentina walonda anch: “Nadinga kandikal nikala ni chikumbu cham cha kushakam. Mapit mam mawonsu madinga mu mushet umwing, pakwez nadinga nich musangar wa kumusadil Yehova.” Chakul cha usu mudi ik chamwakulau Satan kudiay Valentina, ap anch Satan walonda anch antu kakutwisha ikala ashinshamena kudi Nzamb anch ayitek mu yoziu! (Yob 1:9-11) Tukutwish twikal nich kashinsh anch ndiy wausangaresha muchim wa Yehova ni ukwet impu yikash chakwel ukez kurutu oku kumuchirish Valentina ni antu akwau afa ashinshamena ku mwom kusutil ku kuyisangul.—Yob 14:15.

12. Rukat rikwet usey ik mu urund wetu ni Yehova?

¹² Urund wend ni Yehova ushindamedin pa kumukat kwetu. Tukatining ngikadil ya Nzamb ni tusadiling yawonsu yitukutwisha chakwel tushakama kukwatijan nich jintong jend. Chinyim nich yilondilay Djabul, tumukatin Yehova cha kwisotin ni pakad kuchingejin chom. Rukat riner ridiokila ku michim ritukasikeshin chakwel tulama kushinshaman kwetu ap anch twikal mu choziu. Pa chinech, Yehova “ukat kulam jinjil ja antwend amwitiyila.”—Jinsw. 2:8; Kus. 97:10.

13. Ov, mutapu ik wisikiningay Yehova yom yitukata kumusadil?

¹³ Rukat ritubachikining tulimisha dijin dia Yehova, ap anch twikal nich yikangesh ya mutapu ik. Ndiy umening yitongijok yetu yiwamp ni kakatap kuturumburish anch kitutwishinap kusal yawonsu yitwadia tusotila kusal. Cha usey chidiap kusu yitusadila pakwez chidi mulong wak utuyisadila. Ap anch Yob wadinga nich ushon nakash ni wajijamana nakash, wayileja in kufund mutapu ukatiningay jinjil ja Yehova. (Tang Yob 10:12; 28:28.) Mu shapitre wa nsudiel wa mukand wa Yob, Nzamb wamekesha ujim wend pantaliken nend Elifaz, Bildad ni Zofar mulong awiy kalondap uyakin. Pa chisu chawiy chimwing, Yehova wamekesha anch umwitiyijin Yob pamutazukay tupamp tunying anch “kashalapol wam” ni wamuleja chakwel alembila mulong wa kurumbuk kwau. (Yob 42:7-9) Tukutwish niyetu twasal yom chakwel Yehova atwitiyija.

Yehova Uyikwashin Atushalapol End Ashinshamena

14. Yehova wamukwasha Yob mutapu ik chakwel atenchika yitongijok yend?

¹⁴ Yob walama kushinshaman kwend ap anch wadinga mukayitil. Pa yisu yimwing, padingay mu mar makash, wadinga nich yitongijok yiyimp. Chilakej, wamwela Yehova anch: “Nikat kudidil kudi Ey, A! Nzamb, niyey kwingakul, bwat . . . Chikas chey cha usu chinmeshin mar.” Chikwau, Yob wipana nakash pa kusot kwichidij amwinend palonday anch: “Kinikwetap mulong,” ni “Kand kal nisalap chom chiyimp chikash, ni kulembil kwam kudi zwang.” (Yob 10:7; 16:17; 30:20, 21) Ap mwamu, Yehova wamukwasha Yob nich ranaken. Nzamb wipula yipul yamushikija Yob atwala manangu mend ku yom yindjing ni wamutwishisha amana nawamp kujimb kwa Nzamb ni kukep kwa muntu. Yob witiyija umutakel ni witenchika amwinend.—Tang Yob 40:8; 42:2, 6.

15, 16. Mu jinjil ik mukatay Yehova kuyinkish atushalapol end ilel ukwash?

¹⁵ Yehova uyinkishin ilel atushalapol umutakel wa ranaken ni ujijamena, chakwel tutaninamu. Chilakej, Yesu Kristu wapana mulambu wa difut ni chawiy wateka mufulandal wa dilikishin dia yitil. Pa dishin dia mulambu winou, tukutwish twata urund wa piswimp ni Nzamb chikalap nchik kuburen kuwanyin kwetu. (Yak. 4:8; 1 Yoh. 2:1) Pa chisu turishina nich yoziu, tukat kulembil chakwel atukwasha ni atwinkisha ukwash wa mwiku utumbila wa Nzamb. Chikwau, tukwet Bibil mwawonsu wa kabuj, ni anch twamutang ni anch twatongijokin pa jinsangu jidiamu, twirijekin ayinetu mulong wa kupakiu kwa ritiy retu. Kwilej tukukwash tutesha mulong wa ukaleng wa mangand ni wa kushinshaman kwetu.

¹⁶ Chikwau kand, tukat kutaninamu chipandakena ku kwikal kwetu chid cha ukadivar wa pa mangand mawonsu winkishinau kudi Yehova yakudia ya muspiritu kusutil kudiay “kashalapol ushishamena ni kubabal.” (Mat. 24:45-47) Mu yikumangen yawonsu piswimp 100000 ya Atuman a Yehova, kuding yikumangan yisadilingau mulong wa kutulej ni kutukasikesh mulong wa kujijamen yoziu yikutwisha kwikalaku. Chom chinech tukutwish twachifanikesh nich yom yamushikena Sheila, Kaman ukweta dikum dia mivu ushiching mu Allemagne.

17. Let chilakej chilejena manangu ma kushal ulamatina ku malejan ma dirijek dia Yehova d’ilel.

¹⁷ Dichuku dimwing ku shikol, kalas ka Sheila kadingap ni muntu wa kukalam. Arund nend asota kusadil disalet dia Wija. Kapamp kamwing Sheila wadiokala mu kalas, ni yom yezay kutesh kwinyim, wasangar mulong ndiy kayisalap. Padingau ni kusadil disalet dia Wija, ansand a shikol amwing atesha anch ayilembil ez kal ni atwitwita mau nich wom. Ov, chom ik chamukwasha Sheila akwata mupak winou wa kudiokal mu kalas swa? Sheila urumburil anch: “Kachisu kakemp kurutu kwa chom chinech chisadika, twisambina ku chikumangan ku Chot cha Want ubaj wa masalet ma Wija. Chawiy nijika cha kusal. Nasota niusangaresha muchim wa Yehova, mudi mulondila Bibil mu Jinswir 27:11.” Chadinga chiwamp mudi ik kudi Sheila kwikal ku chikumangan ni kuta matu ku program!

18. Ov, wakwatin kal mupak wa kusal ik?

¹⁸ El umwing ni umwing wetu alamata ba ku dirijek dia Nzamb. Kusutil ku kukumanganang chisu ni chisu, ku kutang Bibil, ku kwilej mikand yengamidina pa Bibil, ku kulembil, ni ku kuta urund ni in Kristu aswila, tukutan umutakel ni ukwash utuswiridina. Yehova usotil anch tupandakana, ni uchingejin anch tukudandamen kwikal ashinshamena. Kudi kwitapil dilau mudi ik dia kutumbish dijin dia Yehova, dia kulam kushinshaman, ni dia kusangaresh muchim wa Yehova!

Ov, Uvurikin?

• Satan ukwet chisend cha mikadil ni yoziu ik?

• Dipit ik dia usey tukweta?

• Ov, wisu mufulandal wa urund wetu ni Yehova?

• Mu jinjil ik jimwing mukatay Yehova kutukwash ilel?

[Chipich chidia pa paj wa 15]

Tukutwish twayikwash ambay in kwifukwil chakwel alama kushinshaman kwau