Ov, Chakin Kamu Kudi Muntu Utubangidina?

Ov, wiyovap kal anch udi kwey amwiney ni ukwetap wa kukukwash, mudi anch kwikil muntu ap umwing uteshina kurumburik kwa yikokujol urishina nich? Ni anch ayij, wiyovil mudi kakatap chakin kamu kuyibangin.

PA CHISU kudinga yikokujol, mwom wetu ukutwish wikal mudi rinkind mukash ututina pakad kulik. Pa yisu yimwing, tukutwish ap twashiken ku kutongin anch yom yitushikedina yikutushesh nakash ni yakad kutentam mu chilik chakwel anch tukutwishap kuyipwish. Mwamu chidinga chisu chivud anch manangu maturumbangen, runeng ratukwat, anch twikal ni ulim udiokila ku aksident, mayej ma mivu, ap chom chikwau chidia mudi chinech. Tukutwish twiyov anch tukwetap wa kutukwash, tukwetap ruchingej ni kutongijokin anch kwisu kunikutwisha kuya chakwel nitana rongoj. Ov, kudi chakin kamu muntu ukutwisha kutumbangin?

“Nzamb wa Kwongoj Kwawonsu” Utubangidin

Bibil ulondil anch Nzamb udi mudi “Tatuku wa riy ni Nzamb wa kwongoj kwawonsu.” (2 Korint 1:3) Nzamb, ukweta dijin dia Yehova, wij anch tuswiridin rongoj. Bibil usadidil dizu “rongoj” mu mitapu kushalijan piswimp tupamp chitot ni kusut, utwinkishin kashinsh anch Nzamb kakatap kusu kutesh yiturishina nich pakwez uswiridin kand kutwongoj. Kwijik mwamu kutwinkishin kashinsh anch ap anch antu akwau ameken mudi kamenap kwau, mudi kateshinap kwau, ni kabangidinap kwau milong yetu, pakwez Yehova umen ni uteshin.

Uyakin umekeshina anch Yehova umubangidin muntu ni muntu umeken patok mu Mifund. Bibil ulondil anch: “Mes ma [Yehova, NW] mamen jindond jawonsu, makat kuyital antu ayimp ni antu awamp.” (Jinswir 15:3) Chawiy chimwing, tutangina kand mu Yob 34:21 anch: “Mes mend matadil kwawonsu kuyilay muntu ni muntu.” Yehova umening yom yitusadila—yikala yiwamp ap yiyimp—ni wij nawamp mikadil yetu, chawiy ukutwish wasal chawonsu chimenay anch chawiy chifanyidina. Chawiy chom chilejenau mu mazu mamulejau Mwant Asa wa in Yuda kudiay profet Hanani anch: “[ Yehova, NW] wendishil mes mend pansh pawonsu, chakwel ayimekeshina usu wend antu apanyina michim yau yawonsu kudi ndiy.”—2 Jinsangu 16:7, 9.

Yehova ukat kutal kand mulong wa diyingishin dikwau. Yesu uchirumburil anch: “Pikil muntu ukutwisha kwiyezil kudi am, ching Tatuku wantuma am wamukak.” (Yohan 6:44) Yehova ukat kupapat muchim wa muntu chakwel amana yitonngijok yend. Anch chidi mwamu, ndiy ukutwish kwakul mu mutapu wakin usangareshina. Chilakej, mu République Dominicaine, mband umwing wadinga mu rupital mulong wa mayej ma ruvundish. Nzamb wamukwasha chakwel atana relijon wakin. Kapamp kamwing, nfumwend wamubudishina broshir wadinga ni mutu wa mulong ulondila anch: Nzamb Witin Etu Tusal Ik?a Watambulay pamanch kudiay kaman wa Yehova umwing watazukay ku chikumbu. Mband winou watanga broshir ni wajingunina anch chadinga chakul ku malembil mend kudiay Yehova. Ndiy witiyija kwilej Bibil ni Kaman, ni kupwa kwa angond musamban, wapana mwom wend kudiay Yehova pamwing ni kubabatishiu.

Mu mukand wa Kuseng udia mu Bibil, tutaninamu mazu mavud masangareshina muchim mafundau in kufund kuseng a pakur in Hebereu, mudi Mwant David, mamekeshina mutapu ukatay Yehova kuyibangin atushalapol end nich rukat. Mu Kuseng 56:8, Mwant David wamwilembila Nzamb anch: “Tekip mansoj mam mu mulond wey. Kayifundilip mu mukand wey anchi?” Mudi mulejena chifanikesh chinech, David wadinga wij anch Yehova kadingap wija ching kusu mar mend pakwez wadinga wij kand ni yibudikin ya yovil yend. Yehova wadinga wij mar ma David ni wavurika yom yadinga ni kumuletin kusansan ku muchim chadi lel ashikena ku kudil mansoj. Chakin kamu, Sakatang wetu uyimen antu awonsu asadila usu wa kusal rusot rend, “apanina michim yau yawonsu kudi ndiy.”

Rusangu rukwau ridia mu Bibil rilejena rukat ra kubangin kwa Nzamb ridi Kuseng wa 23 wijikena nakash. Mazu ma kusambish mamufanikeshin Nzamb ni kafung mwin rukat malondil anch: “[Yehova, NW] Ndiy kafung wam, kinikusotip kwam chom.” Kafung wa mu Aziy wa Kwingangel ukat kumubangin mukoku ni mukoku, ap ni kuyipil majin umwing ni umwing. Dichuku ni dichuku ukumutazuk mukoku ni mukoku, kumulembijek ni kuyital anch akwet yitat. Anch wachiman, ukupanap many chakwel ayerika swa. Anch mukoku uyedin, kafung ukumukwat pa rubang wamwazuril mukan chakwel amunisha mon ni ukumutumbwish chakwel kangal ashala pansh afilap. Chakin kamu chinech chidi chifanikesh chipandakenamu kuwap chilejena mutapu ukatay Yehova kuyibangin antu akarumukidina kudi ndiy.

Malembil ni Kuvumbuk—Uman Ulejena Anch Nzamb Utubangidin

Miminy yiney ni yikwau ya kuseng kayifundap mu Bibil mulong wetwetu kuyitangang kusu ni kuyisanger. Yitulejin mutapu wamulejau Yehova kudi atushapol ashinshamena a pasak a Nzamb yom yadinga mu michim yau mulong wa kulejan kuswiriken kwau ukwash wend ni kujikitish kwau mulong wa umutakel ni yiyukish yend piur pau. Mazu minam malejen patok anch atushapol in a pakur a Nzamb adinga itiyijin kamu anch Nzamb wadinga ni kuyibangin. Kutang ni kutongijokin pa mazu minam mashikina ku muchim kukutwish kwatukwash twiyova chilik chimwing piur pa Nzamb. Chipan cha malembil chidi uman ulejena anch Nzamb ukat kutubangin.

Pakwez, pa yisu yimwing, tukat kura nich milong yikash yikata kutukangesh ap ni kulembil kwin. Ov, chom chinech chikat kumukangesh Yehova kwijik mar metu? Rome 8:26 wakwil anch: “Chawiy chimwing kand spiritu ukat kutukwash mu kuziy kwetu; mulong etu kitwijip kulembil mudi muchifanyidina; pakwez [spiritu] amwinend ukat kutulembidil etu nich kunungan kwakad kwovakan.” Verse winou utulejin anch malembil mapepilau ma atushalapol a pasak a Nzamb makutwish mamekesh kamu yovil yetu ni chawiy chikumubachik Yehova atutesha, mulong ndiy “ukat kutesh kulembil.”—Kuseng 65:2.

Ruchingej ra kuvumbuk udi uman ukwau ulejena anch Nzamb ukat kumusanger muntu ni muntu. Yesu Kristu walonda anch: “Mulong muten ukat kwez ukeza kuteshau awonsu adia mwi nzay chidjimin cha dizu diend [ Yesu], ni kubudik.” (Yohan 5:28, 29) Dizu dia Grek diasadilau panap adikarumwin nawamp anch: “jinzay ja chivurikish” ni kidirumburikinap ching kusu “majam.” Dikwet kand chitongijok cha rusangu ra mwom wa muntu wafa kal rivurikinay Nzamb.

Tong bil, chakwel kumuvumbul muntu, chimufanyidin Nzamb ijika kachom ni kachom piur pend, pamwing ni chifu chend, pamwing ni yaku yaswanay, ni manangu mend mawonsu ma kuvurik yom! (Marko 10:27) Manangu ma kuvurik ma Nzamb ma muntu winou kimakushadikap ap anch pasut tunan twa mivu. (Yob 14:13-15; Luka 20:38) Chawiy lel, jinsangu jawonsu ja tutikit twa antu afa kal jidi mu manangu ma kuvurik ma Yehova Nzamb—winou ni wawiy udi uman ujim ulejen anch Nzamb ukat kutubangin muntu ni muntu!

Yehova Ukat Kufutan

Ov, chom ik tufanyidina kusal chakwel Nzamb atubangina nich rukat? Cha kusambish, tufanyidin kumekesh anch tumuchingejidin ni kumuziyil, anch tumwitiyijin. Kambuy Paul walonda patok urund udia pakach pa kwikal nich ritiy ni kutubangin kwa musangar kwa Nzamb. Ndiy wafunda anch: “Wakad ritiy muntu kakutwishap kumusangarish Nzamb, mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.”—Hebereu 11:6, MM.

Ijikany anch mulad wa ritiy rimusangareshina Nzamb rikwet yom yaad. Cha kusambish, tufanyidin “kwitiy anch, Nzamb udiaku,” chirumburikin anch, tufanyidin kwitiyij anch Nzamb udiaku ni anch ndiy Mukaleng Mwant, utufanyidina kuziyil ni kumwifukwil. Cha kaad, tufanyidin kwitiyij anch ndiy “ukat kufutan kuwap kudi antu awonsu akata kumusurab.” Mu ritiy rakin mudi kwitiyij anch Nzamb ubangidin kuwap kwa antu awonsu akata kusot chakin kamu kusal rusot rend ni anch ukuyifut. Kusutil ku kwilej Dizu dia Nzamb ni kwikal mu urund ni antu amuziyidila, niyey ukushiken ku kwikal nich mutapu wa ritiy ufanyidina difut ni kubangin kwa rukat kwa Nzamb.

Ilel antu avud itiyijin anch Nzamb kakatap kubangin milong ya antu. Pakwez mudi mutwamana kal, Bibil ulejen patok anch Nzamb uyibangidin nakash antu amekeshina ritiy rakin mudiay ndiy. Ap anch ilel mwom udi wa mar makash, jinjit, kurumbuk ni kusansan, kituswirikedinap kushadish ruchingej. Yehova Nzamb ukat kutubangin. Chakin kamu, ututazukin etu awonsu nich rukat chakwel tukarumukina kudiay ndiy chakwel atukwasha. Mwin kufund kuseng ulondil anch: “Tek chisend chey kudi Nzamb, Ndiy ukukutuliku; Ndiy kakumulikip mwin kutentam kushemunik, ap pakemp kusu.”—Kuseng 55:22.

[Mazu madia kwishin kwa paj]

[Kamushet/​Chipich chidia pa paj wa 29]

Mifund Yikutwisha Kukukwash Chakwel Ukasikesha Ritiy Rey mu Rukat ra Nzamb ra Kukubangin

“Mulong [Yehova, NW] wendishil mes mend pansh pawonsu, chakwel ayimanyin apanyina michim yau yawonsu kudi ndiy.”—2 JINSANGU 16:9

“Tekip mansoj mam mu mulond wey. Kayifundilip mu mukand wey anchi?”—KUSENG 56:8

“[Yehova, NW] Ndiy kafung wam.”—KUSENG 23:1

“Mbij jawonsu jikez kudi Ey anch yitil yapandikena, Ey ukat kutesh kulembil.”—KUSENG 65:2

“Ukez katazuk, niyam nikez kakwakul. Ukez kaswir kwinman kand, yam kamu mudimu wa makas mey.”—YOB 14:15

“wawonsu ukwez kudi Nzamb uwapidil kwitiy anch uding kwaku, ni ndiy ukez kayifut uruu kudi awiy akata kumusot.”—HEBEREU 11:6

“Tek chisend chey kudi Nzamb, Ndiy ukukutuliku; Ndiy kakumulikip mwin kutentam kushemunik, ap pakemp kusu.”—KUSENG 55:22