Ringany Ra 1: Mupim Ufilingap

Kwisu ku radiokala?

“In Kristu afilozof a kusambish in Grek itiyija yitongijok yadinga yilondila anch mupim ufilingap ni atongina anch Nzamb watanga mupim ni wauteka mu mujimbu wa muntu pa chisu chamutangay.”—The New Encyclopædia Britannica (1988), Volim wa 11, paj wa 25.

Bibil ulondil ik?

“Mupim ukusala chitil—wawiy ukez kufa.”—Ezekiel 18:4, Segond (1910); Cardinal Liénart.

Piur pa mutapu wautangau mupim wa kusambish, Bibil ulondil anch: “Nzamb wamutanga muntu nich rufunfut ra divu, wamupimina mwiku wa mwom mu mazur mend, chad muntu wikala mupim wa om [mu Hebereu, nèphèsh].”—Disambishil 2:7, Ostervald.

Dizu dia Hebereu nèphèsh, diakarumunau anch, “mupim,” dirumburikin ‘chitang chipimina.’ Chisu Nzamb chamutangay Adam muntu wa kusambish, kamutekap mupim wakad kufang pakwez wamuteka usu wa mwom ukata kudandamen nich kupim. Chawiy lel, mu kulond kwa Bibil, “mupim” udi chitang chawonsu cha kabuj chikweta mwom. Anch adioshamu usu wa mwom watekayimu Nzamb, mupim ukufa.—Disambishil 3:19; Ezekiel 18:20.

Malejan ma mupim wakad kufang malangwishin yipul yiney: Kwisu kuyilinga mupim kupwa kwa rufu? Yom ik yikata kuyishiken mipim ya antu ayimp? Pitiyijau in Kristu a dijin ringany ra mupim wakad kufang, chom chinech chayishikija ku kwitiyij ringany rikwau—piur pa malejan ma karung wa kasu.

Isikesh maverse manam madia mu Bibil: Mulej 3:19; Mateu 10:28; Midimu 3:23