Dichuku Dia Yehova Dikez Kumekesh yik

“Dichuku dia Mwant [Yehova] dikwez mudi mwij, . . . Mangand ni midimu yau yidiamu yikez kashikidil kutem.”​—2 PITA 3:10.

1, 2. (a) Mutapu ik ukeza kusul ditenchik diyimp dia yom ya katat? (b) Yipul ik tukeza kushinshikin?

DITENCHIK dia yom diyimp dia katat ditekin mufulandal pa antu atwishina kutakel mangand pakad kumuchingejin Yehova. (Kus. 2:2, 3) Ov, chitwishikin chom chin chawonsu chikweta mufulandal wa makasu kushal chikup? Bwat kwau! Ni katat, tukatap kuchingel mulong wa mangand ma Satan kusheshik aminau. Pakwez, akumashesh kudi Nzamb pa chisu chashay kal amwinend ni mu mulad wend amwinend. Chisal cha Nzamb pantaliken ni mangand minam mayimp chikez kumekesh kutentam ni rukat rend mu mutapu uwanyidina.​—Kus. 92:7; Jinsw. 2:21, 22.

² Kambuy Pita wafunda anch “Dichuku dia Yehova dikwez mudi mwij, ni maur makez kusut nich dipumb dijim, ni yom ya mwiur yikez kengurik, mangand ni midimu yau yidiamu yikez kashal patok.” (2 Pita 3:10, NW) Ov, “maur” ni “mangand” majimbwilau pinap yom ik? Ov, yisu “yom ya mwiur” yikeza kengurik? Ni yik yasotay kulond Pita pafunday anch “mangand ni midimu yau” yidiamu yikez “kashal patok”? Kwijik yakul ku yipul yiney kukez kutukwash chakwel twirijeka mulong wa chinship chovishena wom chikushikena mu machuku makemp kurutu oku.

Maur ni Mangand Makeza Kusut Nich Dipumb Dijim

3. Ov “maur” majimbwilau mu 2 Pita 3:10 chom ik, ni mutapu ik makeza kusut?

³ Pasadidilau yijingidij mu Bibil, dizu “maur” disambiding yisu yivud makand mayikedila, madia piur pa antu ikedilau. (Isay 14:13, 14; Kuj. 21:1, 2) “Maur makez kusut” mafanikeshin anyikel antu, ayikedila antu akad kumuziyil Nzamb. Kusut kwam nich “dipumb dijim” kumekeshin pamwing ap anch akuyijiyish swa.

4. Ov, “mangand,” chom ik ni mutapu ik makeza kusheshik?

⁴ “Mangand” mafanikeshin mangand ma antu iyaurila kudiokal kudi Nzamb. Mangand mudi minam madingaku pa chirungu cha Nowa ni, kusutil ku chiyul cha Nzamb amajiyisha ni mabeb. “Chawiy maur ni divu, mangand ma katat, ayilamidin kand ku dizu dia Nzamb chakwel yez yisheshik nich kasu. Ayilamin mulong wa kuchingel dichuku dia dikurumburishay Nzamb ni kuyishesh antu amubwambwidila ndiy.” (2 Pita 3:7, MN) Ap anch mabeb mayijiyisha antu ayimp awonsu kapamp kamwing, disheshik diezina dikushiken mu yikunku ni yikunku pa chirung cha “mar makash.” (Kuj. 7:14, MN) Mu chikunku cha kusambish cha mar minam, Nzamb ukuyibachik anyikel a chipolitik a mangand minam chakwel amushesha “Babilon mujim,” chawiy lel akumekesh rukis rau mulong wa difukwil dined dia mband wa kusochik. (Kuj. 17:5, 16; 18:8) Kupwa, pa njit ja Armagedon, chikunku cha nsudiel cha mar makash, Yehova ukumutum mwanend Yesu Kristu chakwel ayishesha antu awonsu akushalaku a mangand ma Satan.​—Kuj. 16:14, 16; 19:19-21.

“Yom ya Mwiur Yikeza Kengurik”

5. Mu yom ya mwiur ya chifanikesh mudi kand yom ik?

⁵ Ov, yisu “yom ya mwiur yikeza kengurik”? Ndinguril umwing wa Bibil urumburil “yom ya mwiur” mudi “mifulandal ya kusambish,” ap “yom yisadila mufulandal.” Ulondin anch dizu dined, “ading ni kudisadil pantaliken ni mamuny ma alufabe, mudi mufulandal wa kulond.” Chawiy lel, “yom ya mwiur” yijimbwilau kudi Pita yirumburikin yom ya kusambish yisadila anch mangand mikala mutapu madia nich yisalijok yend, jintong jend, ni milad ya kusal yend. Mu “yom ya mwiur” mwiwejidin “mwiku wa mangand,” wawiy “ukat kusadil mudimu katat mu an in kubwambul.” (1 Kor. 2:12; tang Efes 2:1-3.) Mwiku, ap “chipepil,” chikwatina mangand minam ma Satan. Chiyibachikin antu chakwel atonga, atenchika yom, alonda, ni asala kwambatan nich yitongijok ya Satan, mwin chibud, ni kubwambwil “mwant wa usu wa chipepil.”

6. Mwiku wa mangand umekening mutapu ik?

⁶ Chawiy lel, antu akwachikina nich mwiku wa mangand amulikidil Satan chakwel atakela manangu ni michim yau, chawiy chiyibachikina ku kumekesh yitongijok ni yaku yend. Mudi chibudikin, akat kusal yisotilau, pakad kulimish rusot ra Nzamb. Asadin yom nich chibud ni choy, akat kubwambwil pantaliken ni umutakel, ni kuwa swaa mu “maku ma mujimbu wa mbij, maku ma mes.”​—Tang 1 Yohan 2:15-17.a

7. Mulong wak tufanyidin “kulam muchim [wetu]”?

⁷ Kupwa, chidi cha usey mudi ik “kulam muchim [wetu]” kusutil ku kusadil manangu ma Nzamb mu kutond kwetu kwa arund, kwa yom tutangina, kwa kwipuwangesh, ni kwa ma sit tukutwisha kutal ku Internet! (Jinsw. 4:23) Kambuy Paul wafunda anch: “Babalany, chakwel kangal muntu wakukwatany mu mupit wa manangu ma antu ma kudimban makad usey. Yom yiney yikat kudiokal ku malejan makat kutambulau antu mu majuku ma angakau, ni ku miku yiyimp yikata kuyikel pa mangand, pakwez kiyikat kudiokalap kudi Kristu.” (Kol. 2:8) Chiyul chinech chikadil kal cha kuswapej nakash mulong dichuku dia Yehova diashej kal piswimp nakash, ni “yom ya mwiur” ya ditenchik dia Satan, yakad kutwish kukangesh chirungul chikash cha dichuku dined, yikusheshik. Mazu minam ma Paul matuvurishin mazu ma Malakiy 4:1, malondina anch: “Dichuku dikat kwez dikez katemau in kwibaz awonsu ni antu ayimp awonsu mudi mukata kutem tent jam yir. Pa dichuku dinidia akez katem shitit wakad kushal chom.”

“Mangand ni Midimu Yau Yidiamu Yikez Kashal Patok”

8. Mutapu ik ukeza “kashal patok” mangand ni midimu yau yidiamu?

⁸ Yom ik yasotay kurumburil Pita pafunday anch “mangand ni midimu yau yidiamu yikez kashal patok”? Dizu “kashal patok” akutwish kand kudikarumu anch “kutan” ap “kutek patok.” Pita wasota kulond anch, pa chirung cha mar makash, Yehova ukumatek patok mangand ma Satan, ukumekesh anch mangand minam mamulikin Ndiy ni Want wend, ni chifanyidin kumashesh. Pa chinech, Isay 26:21 ulondin mazu ma uprofet anch: “[Yehova] udiokil mwiur ukat kwez kuyilej antu a pansh kadimu mulong wa yitil yau. Kujipan kwajipanau ku ujindj pa mangand kukez kumekan patok, chawiy divu kidikez kajindjikap kand antu ajipau.”

9. (a) Yom ik tufanyidina kudjibwil kulemp, ni mulong wak? (b) Yom ik tufanyidina kukudish, ni mulong wak?

⁹ Pa chirung cha dichuku dia Yehova, antu akarumwinau kudi mangand ni mwiku uyimp wa mangand minam akumekesh chidiau chakin kamu, ap kand kujipijan umwing ni mukwau. Chawiy lel, chikutwish kumekan patok anch milad yivud ya masengan ma chisum yikasikeshinau antu avud nlel unou yitakedil manangu ma antu avud mulong wa pa chisu chinicha chikas cha muntu ni muntu chikez “kamukwat ni kumurishish mukwau udiay nend piswimp.” (Zak. 14:13) Chidi cha usey mudi ik kudjibwil kulemp​—mafilm min mawonsu, mikand, masengan ma video, ni yom yikwau—​yikutwisha kutuletin yovil yikisinay Nzamb, mudi chibud ap rukat ra chisum! (2 Sam. 22:28; Kus. 11:5) Tukudishany ngikadil ya dibuj dia spiritu utumbila wa Nzamb, mulong ngikadil mudi yiney yikutukwash kupand ku kasu ka chifanikesh ka dichuku dia Yehova.​—Gal. 5:22, 23.

“Maur Masu ni Mangand Masu”

10, 11. Ov, “maur masu” ni “mangand masu” yom ik?

¹⁰ Tang 2 Pita 3:13. “Maur masu” udi Want wa mwiur wa Nzamb, watekay mu muvu wa 1914 pa chisu chapwa ‘yisu yatenchikau ya akamichid.’ (Luka 21:24) Mu winyikel winou wa want mudi Yesu Kristu ni antu 144000 akuyikela nend pamwing, avud au aya kal mwiur. Mu mukand wa Kujingunik, antu inay atondau ayifanikeshin nich “musumb utumbila, ndiy kamu Yerusalem Musu, wadinga ni kushirik, udiokil mwiur kudi Nzamb. Musumb winiwa wading uwanyidin mudi ngachik wirijekang kal nawamp mulong wa kuya kudi nfumwend.” (Kuj. 21:1, 2, 22-24, MN) Mudi kamu mwadingay Yerusalem musumb wa wintakel mu Isarel wa pasak, Yerusalem Musu ni ngachik wend asadil winyikel wa ditenchik disu dia yom. Musumb winou wa mwiur ukez ‘kushirik kudiokal mwiur’ kusutil ku kupwitin manangu mau pa mangand.

¹¹ “Mangand masu” marumburikin chisak chisu cha antu amekesha ayinau kuziyil ku Want wa Nzamb. Paradis wa muspititu mudiau antu a Nzamb katat ukez kashiken ku kumutek mwindond yend yiwamp yimufanyidina “mangand makez kez.” (Heb. 2:5) Mutapu ik tukutwisha kwandam mu ditenchik dined disu dia yom?

Irijeka Mulong wa Dichuku Dijim dia Yehova

12. Mulong wak dichuku dia Yehova dikwikal chinship chikash mulong wa mangand?

¹² Paul ni Pita awonsu aad asambela kulejan anch dichuku dia Yehova dikwez “mudi mwij”​—mu ujindj, ni kukashimwish. (Tang 1 Tesalonik 5:1, 2.) Ap in Kristu akin, achingedila dichuku dined, akukashimuk kushiken kudia kwa kapamp kamwing. (Mat. 24:44) Pakwez, mangand makuman yom yivud kupandakanamu kukashimuk. Paul wafunda anch: “Pakez kalondau [antu adia kulemp ni Nzamb] anch: ‘tukwet chisambu ni kwikang,’ pawiy pinipa kamu kusheshik kukez kayikashimwish, mudi misong yikata kumukashimwinsh mband ukweta divumu. Chad kwikil umwing ukeza kakwasanik.”​—1 Tes. 5:3, MN.

13. Mutapu ik tukutwisha kwipuk kwikal adimbinau nich kutoy “chisambu ni kwikang”?

¹³ Kutoy anch “chisambu ni kwikang” makwikal kand makasu mabachikinau kudi ayilembil. Paul wafunda anch “Kiudianyap mu mididim chakwel dichuku dined dikukashimwishany mudi mwij. En awonsu udiany antu ija yom ya kutok, ukat kwendilany mu muten.” (1 Tes. 5:4, 5, MN) Chawiy lel tushakamany mu chitokish, kulemp ni mididim ya mangand ma Satan. Pita wafunda anch: “Arund nam, en wijikanya kal yom yiney, chawiy babalany, kangal akupumbulany nich kanrumbangesh ka [alej a makasu mu chikumangen] antu ayimp, chakwel ushadishany ndond yen yiwiminyanya daang.”​—2 Pita 3:17, NW.

14, 15. (a) Mutapu ik utuyukishinay Yehova? (b) Mazu ik mapepidilau tufanyidina kuta muchim?

¹⁴ Ijik anch Yehova katulejinap kusu ‘tubabala.’ Utuyukishin nich kutukwash ‘kwijik kurutu,’ ni mu mutapu ujim, yom yezina mu machuku madia kurutu oku.

¹⁵ Cha ushon, antu amwing ashikedin ku kusend nich usey ukemp kubabesh kwa kucha kumes ni ashikedil ku kwikal akad ritiy. Akutwish kulond anch ‘Atulejin yom yawiy yimwing mivu ni mivu.’ Pakwez, antu mudi inay afanyidin kuvurik anch palondinau mazu mudi minam, akat kumutadik Yehova ni Mwanend, chidiap kusu chisak cha kashalapol. Yehova walonda anch “chingel.” (Aba. 2:3) Chilik chimwing,Yesu walonda anch: “Chawiy, babalany, mulong kiwijanyap dichuku dikez kashikay Nsalejen.” (Mat. 24:42) Chikwau kand, Pita wafunda anch: “En ukwikalany antu a mutapu ik? Chifanyidin en kwikalany nich mwom utumbila, wikalany kand in kudandamen kudi Nzamb, piuchingedilany dichuku dikurumburishay Nzamb.” (2 Pita 3:11, 12) Chisak cha kashalapol ni Chisak Chitakedil chikutwishap ap pakemp kusend nich usey ukemp yiyul yikash mudi yiney!

16. Yisal ik yitufanyidina kwipuk, ni mulong wak?

¹⁶ Chakin kamu, udi “kashalapol muyimp” ulondina anch Mwant walab kal. (Mat. 24:48) Kashalapol winou muyimp udi chikunku cha chirund chisambidinau mu 2 Pita 3:3, 4. Pita wafunda anch: “Mu machuku ma kwisudiel kukez kamekan in kukudiwolany en,” awiy adi, “atakedilau kudi maku mau,” akuyisip antu alamina nich kuziyil dichuku dia Yehova mu manangu. Mwawiy, pandond ya kutek manangu mau pa yisakin ya Want, ayisup mudi inay akat kutek manangu mau pa yom yiyitadila ayinau ni pa maku mau ma kumujimbu. Kangal twakudishany ap pakemp yitongijok mudi yiney ya kubwambwil ni ya ubaj! Pakwez, tukutwish kuman ‘kushimpish kwa muchim kwa Nsalejetu . . . mudi kuyipandish antu’ kusutil ku kudandamen kukwatikan mu kulejan Want ni mudimu wa kwikadish in kwilej ni kulik kwiyakamish piur pa yisu ni yinship yimutadila Yehova Nzamb.​—2 Pita 3:15; tang Midimu 1:6, 7.

Muchingejina Nzamb Mwin Kupandish

17. Ov, chom ik chasalau in Kristu ashinshamena kwambatan nich chiyul cha Yesu cha kuchin mu Yerusalem, ni mulong wak?

¹⁷ Kupwa kwa amasalay a in Rom kwadam kuwombamu musumb wa Yudeya mu muvu wa 66 C.C., in Kristu ashinshamena asadila chiyul cha Yesu cha kuchin mu musumb wa Yerusalem pa chisu chakusambish chamekana. (Luka 21:20-23) Mulong wak asadila kapamp kamwing ni pakad kuchirik kwinyim? Chakin kamu, alama nakash chiyul cha Yesu mu manangu. Chakwel kwikal nich kashinsh, ading ij anch mupak wau ukuyiletin yikokujol, mudi kamu mwasambelay Kristu kuyilej. Pakwez pa chisu chawiy chimwing, ading ij anch Yehova kakatap ap pakemp kuyivuramen antu end ashinshamena.​—Kus. 55:22.

18. Ov, mutapu ik ukweta mazu ma Yesu madia mu Luka 21:25-28 usu pa chitongijok chey cha kwez kwa mar majim?

¹⁸ Niyetu tufanyidin kumuchingejin sens Yehova, mulong ndiy kusu ukutwisha kutupandish pakeza ditenchik dia katat kuman mar majim ma mu rusangu rawonsu ra antu. Pa chisu kanang kupwa kwa nsambishil ya mar majim, pakwez kurutu kwa dirumburish dia Yehova piur pa mangand mashadilaku, antu akez “kafa mutentu pakuchingelau yom yikeza kashik pa mangand.” Pakwez, povilau akankuny a Nzamb wom, atushalapol ashinshamena a Yehova kakwovap wom ap pakemp. Pakwez, akusangar mulong ij anch dipandish diau didi piswimp.​—Tang Luka 21:25-28.

19. Yom ik tukushinshikina mu mutu wa mulong ulondwilaku?

¹⁹ Mwaning, machuku ma kurutu mapandikena kuwap mayichingedil antu aurikina ni mangand ni “yom ya mwiur”! Pakwez, mudi kamu mukurumburilau mu mutu wa mulong ulondwilaku, anch tusotin kutambul mwom, tufanyidin kusal yom yivud kupandakanamu kusu kwipuk yom yiyimp. Tuswiridin kukudish ngikadil yimusangareshina Yehova ni kusal yom yitiyikina kudi ndiy.​—2 Pita 3:11.

[Dizu didia kwishin kwa paj]

Ov, Ukutwish Kurumburil?

• Yom ik yifanikeshinau nich . . .

‘maur ni mangand ma katat’?

“yom ya mwiur”?

‘maur masu ni mangand masu’?

• Mulong wak tumuchingejidin sens Nzamb?

[Chipich chidia pa paj wa 17]

Mutapu ik ukutwisha “kulam muchim wey” ni kushal waurikina ni mangand?

[Chipich chidia pa paj wa 18]

Mutapu ik tukata kumekesh anch tumen ‘kushimpish kwa muchim kwa Nsalejetu mudi kuyipandish antu’?