Mwin Kutakel Wetu Usadina Mudimu Nlel Unou

“[Ndiy] waya mudi mwin kupandakan uyila ni kupandakan.”​—KUJ. 6:2.

1, 2. (a) Ov, mutapu ik ulejenay Bibil piur pa mudimu wa want wa Kristu wasalay mu muvu wa 1914? (b) Ov, chom ik chasambishay kusal Kristu kudiosh pikalay mwant?

KRISTU amuteka mudi Mwant wa Want wa Umesia wa Yehova mu muvu wa 1914. Ov, mutapu ik tukutwisha kumuman katat mu manangu metu? Ov, tukutwish kumuman mudi mwant ushicha pa nkwas yend, utadin pa divu chisu ni chisu mulong wa kusop mashakamin ma chikumangen chend? Anch chidi mwamu, tufanyidin kuswimp mutapu wetu wa kutong. Kuseng ni buku wa Kujingunik umumekeshin ndiy mudi mwant umwing ukweta usu nakash wendina pa kabar, uyil kurutu mudi “mwin kupandakan uyila ni kupandakan,” udandamedina djat ni ku “kupandakan” kwend kwa nsudiel.​—Kuj. 6:2; Kus. 2:6-9; 45:1-4.

² Chasalay Kristu chakusambish kupwa kwa kwikal mwant chading kupandakan kwend piur pa “nnak mujim ni angel end.” Chadingay Mikayel mukurump wa angel uyitakedina, Kristu wayidjibula Satan ni ayilembil end kudiokal mwiur mutumbila ni kuyidjibwil pa nsulangen ya divu. (Kuj. 12:7-9, TMK) Chawiy lel, mu mudimu wend wa ‘muruu wa kulejan manswik’ ma Yehova, Yesu weza ni Tatukwend mulong wa kusop tempel wa muspiritu. (Mal. 3:1) Ndiy wamurumburisha Kristendom, chikunku chifishinau nich nakash cha “Babilon musumb ujim,” wamutana nich mash mamwangay ni masandj ma muspiritu pamwing ni ditenchik dia chipolitik dia mangand minam.​—Kuj. 18:2, 3, 24.

Kristu Ukat Kuyitokish Atushalapol End Adia pa Divu

3, 4. (a) Ov, mudimu ik wasalay Kristu mudi “muruu” wa Yehova? (b) Ov, kusop kwa tempel kwamekesha chom ik, ni chidiay Mutu wa chikumangen, Yesu wakana yom ik?

³ Kusop kudi Yehova ni “muruu” wend kwamekesha kand mu chipang cha tempel wa muspiritu kwikalaku kwa chisak cha in Kristu akin, alika kwikal chikunku mu maegliz ma Kristendom. Pakwez, ap in Kristu inay azizidilau many, ap ‘an a Levi,’ ading aswiridina kuyitokish. Chidi mudi mwasambelay kulejan muprofet Malaki anch: “Ndiy [Yehova] ukez kuyirumburish antwend mudi muntu ukata kushitwish utad wa argent mu kasu. Mudi mukata kushitwish mwin kuchil utad wa argent ni wa or, mwamu kand mukez kayishitwishay in kupesh kudi muruu wa [Yehova] chakwel awiy akez kamuletil [Yehova] milambu ya mitapu yiwamp.” (Mal. 3:3) Yehova wamusadina ‘muruu wa kulejan manswik,’ Kristu Yesu, mulong wa kuyitokish in Isarel inay a muspiritu.

⁴ Chikwau kand, Kristu wayitana in Kristu inay azizidilau many ashinshamena akat kusal usu wau wawonsu mulong wa kupan yakudia ya muspiritu pa chisu chiwanyidina ku chikumbu cha ritiy. Kusambishin pa muvu wa 1879, pa chisu chiwamp ap chiyimp, awiy apalangesha uyakin wa Bibil piur pa Want wa Nzamb mu ma paj ma gazet winou. Yesu wabwaka anch “pakuchirikay” mulong wa kuyisop atushalapol end mu “chisu cha disudiel dia mangand,” ukez kumutan kashalapol ukat kupan “yakudia pa chisu chiwanyidina.” Ndiy ukez kamulej kashalapol winou anch wayuk kwend ni ukez “kumwinkish . . . ukurump wa kulam yom yend yawonsu” pa divu. (Mat. 24:3, 45-47) Mudi Mutu wa chikumangen cha win Kristu, Kristu wamusadila “kashalapol ushinshamena ni kubabal [winou], TMK” chakwel atakela yisakin yend ya Want. Ndiy wasambisha kuyitakel “atushalapol” azizidilau many ni “amikoku akwau” arund nau kusutil ku Chisak Chitakedila.​—Yoh. 10:16.

Kwangul pa Mangand

5. Ov, mudimu ik wa mwant wamanay kambuy Yohan mu chishimushimu?

⁵ Kambuy Yohan wamana chishimushimu cha chom chikwau chikezau kusal kudi Mwant wa Umesia “pa dichuku dia Nsalejetu,” kupwa kwa kumwikadish mwant mu muvu wa 1914. Yohan wafunda anch: “Najikisha kutal, chad namana didj ditok. Pa didj dinidia pading pashich chom chifanakena mudi Mwan a muntu. Ndiy wading udjit chibangul cha utad wa or ku mutu wend, wading ukwet kand mpak yitwila ya kwangul nich mu chikas chend.” (Kuj. 1:10; 14:14) Yohan watesha mwangel umwing udiokila kudi Yehova umulejin mwin kwangul anch anona mpak yend mulong “yakwangul yaswa kal pa mangand.”​—Kuj. 14:15, 16.

6. Ov, chom ik chalejanay Yesu anch chikez kuya kurutu mu machuku ma kurutu?

⁶ “Kwangul kwa divu” kwinoku kutuvurishin chishimu cha Yesu cha tidiku ni yinfananfan. Yesu wiyilikeja amwinend nich muntu wakuna mu chir chend mbut ja tidiku mulong wa kwangul tidiku jiwamp jikezau kutek pamwing jilejenau mudi “an a mu want,” in Kristu akin azizidilau many akeza kutakel nend mu Want wend. Pakwez uchuku, mukankuny, “Satan,” wakuna yinfananfan mu chir, “an a muntu muyimp.” Mwin kukun wayileja antwend a mudimu anch alika tidiku ni yinfananfan yidandamen kukul pamwing djat ni pa chisu cha kwangul, pa “dichuku dia kusul kwa mangand.” Pa chisu chinicha ndiy ukez kuyitum angel end kwauril tidiku ni yinfananfan.​—Mat. 13:24-30, 36-41, TMK.

7. Ov, mutapu ik usadinay Kristu mudimu wa “kwangul pa divu”?

⁷ Mu kuwanyin kwa chishimushimu chamanay Yohan, Yesu washikena ku kutakel mudimu wa kwangul mu mangand mawonsu. “Kwangul pa divu” kwasambisha nich kuyikumangej ashadilap a “an a mu want” 144 000, “tidiku” ja mu chishimu cha Yesu. Kushalijan pakach pa in Kristu akin ni amakasu kwasambisha kumekan patok kupwa kwa Njit ja Mangand Mawonsu ja I, ni kwashikena ku kukwash chikunku cha kaad cha “kwangul pa divu”​—kukumangej kwa amikoku akwau. Inay kadap “an a mu want” pakwez, adi “chisak chipandakena kujimb” cha antu asotina kushakam mu Want winou. Ayangula pakach pa “antu a michid yawonsu, ni a mitapu yawonsu, ni a jindim jawonsu.” Akat kuziyil ku Want wa Umesia, wa Yesu Kristu ni “antu atumbila” 144 000 akeza kutakel pamwing nend mu wintakel wa mwiur.​—Kuj. 7:9, 10; Dan. 7:13, 14, 18.

Umutakel wa Yikumangen

8, 9. (a) Ov, chom ik chimekeshina anch Kristu kakatap kushinshikin ching kusu mashakamin ma chikumangen chawonsu pakwez ushinshikidin kand mashakamin ma muntu ni muntu pakach pa yid yidiamu? (b) Mudi mulejenau pa paj wa 26, Ov, “ujindj [wisu] uyimp wa Sakudimban” utufanyidina kwipuk?

⁸ Mu mutu wa mulong wasutina twamen mutapu ulondwilay Kristu piswimp nakash mwikadil wa muspiritu wa antu a mu chikumangen cha mu chitot cha mivu cha kusambish C.C. Mu chirung chetu, chidiay Mwant uyikedila winkishau kal “ulabu wawonsu wa mwiur ni wa pansh,” Mwin Kutakel wetu Kristu usadidila umutakel piur pa yikumangen yidia mu mangand mawonsu ni atulam awonsu. (Mat. 28:18; Kol. 1:18) Yehova “wamuteka . . . piur pa yom yawonsu, ni kwikal mwin kutakel wa chikumbu cha Nzamb” cha azizidilau many. (Efes 1:22) Ndiy umen yom yawonsu yisadikina mu yikumangen ni yikumangen ya Atuman a Yehova 100 000 ni kusut.

⁹ Yesu watuma uruu wend ku chikumangen cha pasak cha Tiatir anch: “Minam mawiy mazu ma mwan a Nzamb ukweta mes mazazina mudi kasu, . . . ‘Nij yisalijok yey yawonsu.’” (Kuj. 2:18, 19) Ndiy wayibabesha yid ya chikumangen chinicha mulong wa mashakamin mau ma masandj ni ma kwisangaresh, wayileja anch: “Yam nikata kwijik yitongijok ni rusot yidia mu muchim ya muntu ni muntu. Nikez kamufut muntu ni muntu mudi mudia yisalijok yend.” (Kuj. 2:23) Mazu minam mamekeshin anch Kristu kakatap kushinshikin ching kusu pa mashakamin ma chikumangen ni chikumangen, pakwez ushinshikidin kand pa mashakamin mu yid yidiamu. Yesu wayibabesha in Kristu a mu Tiatir ‘akad kujingunin ujindj uyimp wa Sakudimban.’ (Kuj. 2:24) Chilik chimwing kand nlel unou, ndiy uyitiyijin antu, ansand ap amapal, alikina kujingunin mu “ujindj uyimp wa Sakudimban” kusutil ku Internet ku masengan mayimp ma video ap ku kwipan mu malejan ma antu alikidila uyimp. Chidi chom chisangareshina mudi ik pa kuman usu ni kwipan kwipaninau in Kristu avud nlel unou asadina usu wau wawonsu wa kulondul umutakel wend mu mikadil yawonsu ya mwom wau!

10. Ov, umutakel wa Kristu pantaliken ni amakurump a chikumangen wafanikesha chom ik, pakwez ditenchik ik difanyidina kwitiyij?

¹⁰ Kristu uchilamin chikumangen chend chidia pa divu nich rukat kusutil kudi amakurump atekay. (Efes 4:8, 11, 12) Mu mivu chitot ya kusambish, atulam awonsu ading in kuvadik mu spiritu. Ayifanikesha mu Kujingunik nich atutumbu adia mu chikas cha katatuku cha Kristu. (Kuj. 1:16, 20) Nlel unou, atulam a yikumangen yivud adi amikoku akwau. Ayitondin kusutil malembil ni umutakel wa spiritu utumbila; chawiy lel akutwish kulond anch adi mu wintakel wa Kristu, ap ayitakedil kudi chikas chend. (Mid. 20:28) Pakwez, itiyijin anch Kristu usadidil kachisak kakemp ka antu in Kristu azizidilau many asadila Chisak Chitakedila chakwel kuyitakel in kwilej end pa divu.​—Tang Midimu 15:6, 28-30.

“Ez, Nsalejetu Yesu!”

11. Ov, mulong wak tukwet musangar wa kumuman Ntakel wetu wezin swaa?

¹¹ Mu kujingunik kwapanau kudi kambuy Yohan, yisu yivud Yesu wading ulondin anch ndiy wezin swaa. (Kuj. 2:16; 3:11; 22:7, 20) Ndiy wading wisambidin chakin kamu piur pa chisu chikezay mulong wa kumurumburish Babilon Mujim ni akeza kushal a dirijek diyimp dia Satan. (2 Tes. 1:7, 8) Mulong wasangara pa kuman kuwanyin kwa yom yiney yawonsu yamushena, kambuy ipal Yohan walonda anch: “Amen. Ez, Nsalejetu Yesu!” Etu tudia pa chisu cha nsudiel cha dirijek dined diyimp dia yom, niyetu tusangaredin kumuman Mwin Kutakel wetu ni Mwant kwez mu uyaj wa Want mulong wa kutumbish dijin dia Tatukwend ni kuchidij ukaleng Wend.

12. Ov, mudimu ik ukezay kupwish Kristu kurutu kwa kulikidil rinkind ra kusheshik?

¹² Kurutu kwa Yesu kwez mulong wa kushesh dirijek dia Satan dimekena ni mes, yid ya 144 000 yikushalaku pa divu ya in Isarel a muspiritu yikez kutambul chijingidij cha nsudiel. Bibil ulejen patok anch kakezap kulikidil rikind ra kuyishesh dirijek dia Satan kurutu kwa kupwish kutek chijingidij pa mpal ja antu 144 000.​—Kuj. 7:1-4.

13. Ov, mutapu ik ukezay Kristu kumekana patok kwez kwend mu chikunku cha kusambish cha “mar”?

¹³ “Kwez” kwa Kristu kudiosh muvu wa 1914 kwamekanap patok kudi antu avud adia pa divu. (2 Pita 3:3, 4) Pakwez, piswimp ap, ndiy ukez kumekesh kwez kwend kusutil ku kuwanyish yirumburish ya Yehova pa yom kushalijan ya ditenchik dia yom dia Satan. Kusheshik kwa “muyimp,” amakurump a marelijon a Kristendom, kukez kwikal ‘kuchirik’ kwend kumwing kwakin. (Tang 2 Tesalonik 2:3, 8.) Kukez kulet uman wakin anch Kristu wasambisha kal kusal mudimu mudi mwin kurumburish watekau kudi Yehova. (Tang 2 Timote 4:1.) Kusheshik kwa chikunku chijim cha Babilon Mujim kukez kumekesh disambishil dia kusheshik kwa marelijon mawonsu ma makasu. Yehova ukez katek mu michim ya antakel a chipolitik chitongijok cha kumushesh mband winou mwin kusochik. (Kuj. 17:15-18) Chawiy chikeza kwikal chikunku cha kusambish cha “mar.”​—Mat. 24:21.

14. (a) Ov, mulong wak chikunku chakusambish cha mar akez kuchikepish? (b) Ov, “chijingidij cha mwan a muntu” chikez kurumburik ik kudi antu a Yehova?

¹⁴ Yesu walonda anch machuku ma mar minima akez kumakepish “mulong wa antwend atonday,” atushal a in Kristu azizidilau many achidia pa divu. (Mat. 24:22) Yehova kakezap kulikidil anch relijon wa makasu ayishesha in Kristu azizidilau many ni arund nau amikoku akwau. Yesu walonda kand anch “anch machuku minam ma mar mapwa,” kukez kumekan yijingidij mu muten, mwi ngond, ni mu atutumbu, chawiy lel “chijingidij cha mwan a muntu chikez kamekan mwiur.” Chinech chikez kusal anch michid yidia pa divu yikez “kadil.” Chikwikalap mwamu kumutambu wa azizidilau many, akweta ruchingej ra kuya mwiur, ni arund nau akweta ruchingej ra kushakam pa divu. Awiy akez ‘kwiman piur ni kuzambul mes mulong dipandish diau diez kal piswimp.’​—Mat. 24:29, 30; Luka 21:25-28.

15. Ov, mudimu ik ukezay Kristu kusal pa chisu chikwezay?

¹⁵ Kurutu kwa kupwish kupandakan kwend, Mwan a muntu ukez kwez mu mutapu ukwau kand. Ndiy wasambela kupan uprofet anch: “Pakwezay Mwan a muntu mudi mwant pamwing aruwend awonsu a mwiur, ukez kashakam pa ditand diend dia uyaj. Antu a michid yawonsu akez kakumangan kurutu kwend. Chad ukez kayauril mu yisak yaad, mudi mukata kuyauril kafung amikoku ni ampemb. Ukez katek antu adia mudi amikoku ku chikas chend cha katatuku, pakwez antu adia mudi ampemb ukez kayitek ku chikas chend cha kamaku.” (Mat. 25:31-33) Yiney yisambidin piur pa kwez kwa Kristu mudi Mwin Kurumburish mulong wa kwauril antu a “michid yawonsu” mu yisak yaad: “amikoku,” antu ayikwasha nakash akadivar nend a muspiritu (in Kristu azizidilau many adia pa divu) ni “ampemb,” antu akata “kulik kuziyil ku rusangu ruwamp ra Nsalejetu Yesu.” (2 Tes. 1:7, 8) Amikoku, amekeshinau mudi “antu atentamina,” akez kutambul “mwom wa chikupu” pa divu, pakwez ampemb “akez kayitwal mulong wa kuyilej kadimu ka chikupu,” ap kusheshik kwa chikupu.​—Mat. 25:34, 40, 41, 45, 46.

Yesu Uyil ni Kupandakan

16. Ov, mutapu ik ukezay Kristu Mwin Kutakel wetu kuwanyish kupandakan kwend?

¹⁶ Nich ant ni in kupesh awonsu akeza kutakel nend atambula chijingidij ni amikoku amekana ni kuyitek ku chikas chend cha katatuku mulong wa kupand, Kristu ukutwish kuya “kupandakan.” (Kuj. 5:9, 10; 6:2) Chidiay ku Mutu kwa chisak cha amasalay angel akash, ni chakin kamu akadivar nend avumbulau, ukez kashesh yirijek yawonsu ya chipolitik, ya amasalay ni ya kwisak ya Satan yidia pa divu. (Kuj. 2:26, 27; 19:11-21) Kupandakan kwa Kristu kukez kuwanyin pakezay kushesh dirijek diyimp dia Satan. Chawiy lel akez kumudjibul Satan nau ayilembil end mu dibuku diakad musul mu mivu kanan.​—Kuj. 20:1-3.

17. Ov, kwisu kukezay Kristu kuyitwal amikoku end akwau mu Mivu Kanan ya Winyikel, ni chom ik chitufanyidina kusal?

¹⁷ Pisambinay piur pa “chisak chipandakena kujimb” cha amikoku akwau, akeza kupand ku mar makash, kambuy Yohan wabwaka anch “Mwan a Mukoku udia mukach mwa ditand ukez kikal kafung wau. Ndiy ukez kayitwal ku misul ya mem wa mwom.” (Kuj. 7:9, 17) Mwaning, mu Mivu Kanan ya Winyikel wend, Kristu ukez kudandamen kuyitakel amikoku akwau, ateshina chakin kamu dizu diend ni ukez kuyitwal ku mwom wa chikupu. (Tang Yohan 10:16, 26-28.) Mulondulany amboku nich kushinshaman mwant Mwin Kutakel wetu​—katat ni mu mangand masu ma kushilamu ma Yehova!

Yipul ya Kuchirikin

• Ov, chom ik chasalay Kristu kupwa kwa kumwikadish mwant?

• Ov, yom ik yimekena ni mes yisadidinay Kristu mulong wa kutakel yikumangen?

• Ov, mu mutapu ik udiay Kristu Mwin Kutakel wetu?

• Ov, mutapu ik ukezay Kristu kudandamen kututakel mu mangand masu?

[Chipich chidia pa paj wa 32]

Kusheshik kwa ditenchik diyimp dia Satan kukez kumekesh patok kwez kwa Kristu