Chakusambish 1

Yikata Antu, Kangal Wakat Nfalang ni Yom Ukweta

OV, CHOM IK CHIFUNDISHINAY BIBIL? “Mulong rukat ra nfalang diawiy disambishin dia yom yawonsu yiyimp.”​—1 Timote 6:10.

OV, CHISU CHIKOKUJOL? In kupalangesh jinsangu ja winsak atubachikin kulik kusanger yom tukweta. Asotin anch twikala aswik akutan nfalang mulong wa kujiland nich yom yisu, yiwamp, ni yijim nakash. Nfalang jikat kudimban, ni tukutwish kuwa swa mu rukat ra nfalang. Pakwez Bibil utubabeshin anch muntu ukatininga nfalang kakezap kusanger yom yikwetay. Mwant Salomon wafunda anch “Ukatila nfalang, kajikwetap jiwanyidina, ni ukatila mapit mavud kakumawanyishap.”​—Mulej 5:9.

OV, CHOM IK UKUTWISHA KUSAL? Mwimburijany Yesu, ni ilejany kuyikat antu kupandakanamu yom. Yesu wasota kupan yom yawonsu yadingay nich​—ap mwom wend—​mulong wayikata antu. (Yohan 15:13) Ndiy walonda anch: “‘Chiyukish cha mwin kupan chipandakenamu cha mwin kutambul.’” (Midimu 20:35) Anch twapan chisu ni mapit metu kudi antu akwau, antu akez kutusadil niyawiy yom yiwamp. Yesu walonda anch: “Panany, ni yen akez kakwinkishany.” (Luka 6:38, TMK) Antu awonsu akimbina nfalang ni mapit akat kwimesh mar ayinau. (1 Timote 6:9, 10) Chikwau kand, kusanger kwakin kwa yom tukweta kudiokil ku kuyikat antu akwau ni kwikal ukatilau kudi antu akwau.

Ov, mulong wak ukutwishap kushishikin anch ukutwish kupipesh mashakamin mey? Ov, ukutwish kukepish uvud wa yom yiukweta ap yiukimbina kuland? Anch wasal mwamu, ukutwish kuman anch ukwikal nich yisu yivud ni usu wa kukimb yom ya usey nakash mu mwom​—kuyikwash antu ni kumusadil Nzamb, wakwinkisha yom yawonsu ukweta.​—Mateu 6:24; Midimu 17:28.

[Chipich chidia pa paj wa 4]

“Panany, ni yen akez kakwinkishany”