Ikalany Piswimp Ni Nzamb

Ov, Yehova Ukwet Yovil?

ANCH chidi mwamu, chipul chikwau chawiy ech: Ov, mwikadil wetu ukwet usu pa yovil ya Nzamb? Ov, tukutwish kumusangaresh Nzamb ap kumwovish kuyip kusutil ku yisal yetu? In kwilej filozofi amwing a pasak alonda anch bwat. Awiy alonda anch kwikil muntu ukutwisha kumubachik Nzamb ni Nzamb kakutwishap kwikal ni yovil. Pakwez Bibil kalejenap mwamu, ulejen anch Yehova ukwet yovil yiwamp ni utubangidin nakash mulong wa yom tusadina. Tal mazu madia mu Kuseng 78:40, 41.

Kuseng 78 ulejen yisal ya Nzamb yayisadilay in Isarel a pasak. Kupwa kwa kudiosh muchid winou mu uswik mu Idjibit, Yehova wayikwasha chakwel ikala arund nend a pakampwil. Ndiy washilamu anch ang adandamen kuziyil ku yijil yend akez kwikal ‘endendiy’ ni akez kuyisadil mu mutapu umwing wamushena mulong wa kuwanyish rutong rend. Antu itiyija ni andama mu manswik ma Chijil. Ov, awiy ashakama kwambatan nich kwitiyij kwau?—Kubudik 19:3-8.

Nfund a Kuseng ulondin anch: “Amubwambwila mwi mpay tupamp tuvud, amunenganesha tupamp tuvud!” (Verse wa 40) Verse mukwau ulondin anch: “Amupaka Nzamb tupamp tuvud.” (Verse wa 41) Pinap mwin kufund ulejen mwikadil wa kubwambwil. Mwikadil winou uyimp wamekana kwisambishil—mwimpay kupwa kwa kuyikol kwau mu Idjibit. Antu asambisha kununganijan kudi Nzamb, ni kwipul anch ndiy wela kutwish kuyilam ap bwat. (Kuch. 14:1-4) Buku umwing ukatau kusadil kudi in kukarumun ulejen anch dizu “amubwambwila” akutwish “kudikarumun kand anch ‘awiy achinchikisha michim yau pantaliken ni Nzamb’ ap amuleja Nzamb anch ‘Bwat.’” Chikwau kand, mu riy rend, Yehova wayilikishina antwend pakarumukau. Pachirikidinau ku mwikadil wau uyimp wa pasak ni kumubwambwil kapamp kakwau, ni mwikadil ou wadandamena.—Kuseng 78:10-19, 38.

Ov, mutapu ik wiyovay Yehova yisu yawonsu yadingau ni kubwambwil antwend a chibud? Verse wa 40 ulondin anch: “Amunenganesha tupamp tuvud.” Mu Bibil mukwau akarumwin anch awiy ‘amwovisha ndiy kuyip.’ Buku umwing wisambina piur pa Bibil ulejen anch: “Mazu minam marumburikin anch mwikadil wa in Hebereu wading ukat kumwovish Nzamb kuyip nakash,—mudi mudinga mwikadil wa mwan udia mbwambol ni wakad kuziyil.” Mudi mukutwishay mwan wakad kalimish kuyovish anvajend kusansan ku muchim, in Isarel ambwambol “amusarumuna Nzamb Utumbila wa in Isarel.”—Verse wa 41.

Ov, chom ik tukutwisha kwilej kusutil ku kuseng winou? Chidi chom chikasikeshina nakash pa kwijik anch Yehova uyibangidin nakash in kumwifukwil end ni kakutwishap kuyilik. Chawiy lel chiwapidil kwijik anch Yehova ukwet yovil ni mwikadil wetu ukutwish kwikal ni usu pa yovil yend. Ov, mutapu ik ukutwisha kwijik anch chinech chikwet usu pa mwom wey? Ov, chinech chikubachikin kusal yom yitentamina?

Pa ndond pa kudandamen kusal yitil ni kovish muchim wa Yehova kuyip, tufanyidin kusal yom yitentamina ni kusangaresh muchim wend. Chidi kamu chom chitinay chakin kamu kudi in kumwifukwil end anch: “Mwanam ikundj, ikal mwin manangu chakwel wez usangarish muchim wam.” (Jinswir 27:11) Kwikil chom cha usey nakash tukutwisha kupan kudi Yehova chipandikena kushakam mu mutapu usangareshina muchim wend.

[Tablo wa jinsangu udia pa paj wa 32]

Kwikil chom cha usey nakash tukutwisha kupan kudi Yehova chipandikena kushakam mu mutapu usangareshina muchim wend