Ov, Niyey Akudimbap Kal?

KWIJIK anch muntu kanang utekidina muchim wakudimbang kwovishening kuyip nakash kupandakanamu yom yikwau yikemp yikata kutushikenang mu mwom. Ukutwish kwiyov upwishinau kalimish, ujim, ap kand urumbukidinau. Makasu majipining urund ni uruw; makat kuyiy antu ma miliyon ma madolar.

Pa chinech, tong bil, ukwiyov nchik anch wajingunin anch akudimba piur pa Nzamb. Anch udi mwin kwipan nakash, ukwov nayimp nakash, mudi kamu mwiyovau in kwifukwil inay:

● DEANNE walonda anch: “Niyova anch relijon wanrumbukina nakash.”

● LUIS walonda anch: “Nova ujim. Niyova anch andimbin—anch ruchingej ram ni ntong jam jakarumuka kwikal jamwamu.”

Ukutwishap kutong anch chitwishikin akudimba piur pa Nzamb. Yom wija chitwishikin akulejay kudi muntu kanang uchingejidina ni wakad chitongijok cha kukusal nayimp—anvaj ey, mwimpel, paster, ap murund wa piswimp. Chitwishikin witiyija mafundish kampand mu mwom wey wawonsu. Pakwez, ov, Ukutwishap kwitiy anch ap chitongijok chitiyijinau kwawonsu chikutwish kwikal cha makasu? Franklin D. Roosevelt mwant mukuru wa États-Unis witiyija uyakin winou, mulong walonda anch: “Kuchirikinamu kukatap kukarumun makasu mikala uyakin.”

Mutapu ik ukutwisha kujingunin anch akudimbang? Chisu chimwing Yesu wamuleja Nzamb mu malembil anch: “Dizu diey diawiy uyakin.” (Yohan 17:17) Mwaning, Dizu dia Nzamb, Bibil, dikwet yom tuswiridina chakwel kutek kushalijan pakach pa uyakin ni makasu.

Ov, tukulikap Bibil atuleja makasu matan mijikena piur pa Nzamb? Ukuman mutapu ukeza uyakin kukarumun mwom wey mu mutapu uwamp.