Uyakin Ukutwish Kukarumun Mwom Wey

CHITWISHIKIN wateshap kal ap akulejap kal mamwing ma makasu piur pa Nzamb mudi mulejenau mu mitu ya milong yiney yilondulijadina. Chikwau kand, ukutwish kwidjidjek kuswimp yitiyij yey, pakampwil mulong wayitiyija pasutin kal mivu yivud.

Kwidjidjek kwinoku kwoviken. Ma egliz mamwing malikishin chitongijok cha kwilikej malejan mau ni yilejenay Bibil. Antu akwau akat kupakish kukasikesh malejan ma makasu mu kulond anch Bibil ukasiken, ni kwikil muntu ukutwisha kutesh yidiamu. Pakwez, in kwilej a Yesu avud ading antu amwamu akad kwilej shikol ya piur, pakwez awiy atesha nawamp malejan mend.—Midimu 4:13.

Ukutwish kutong pamwing ap anch chidi kuburen kwa ritiy anch wasambish kushinshikin yitiyij yey chakwel umana anch yidi yakin. Ov, chinech chirumburikin anch Nzamb ukez kwov kuyip anch wasambish kukimbijol mu Bibil, rusangu rend rapanay kudi antu, chakwel wijika yom yitinay kudi ey? Dizu diend dikukasikeshin kushinshikin Bibil amwiney anch: “Chakwel en wijikangany yiwapila ni yirijekina ni yiwanyidina ku rusot ra Nzamb.”—Rom 12:2, TMK.

Kwilej uyakin piur pa Nzamb kupandakenamu kwilej nich manangu metu—kukutwish kukarumun mwom wey chakwel wikala uwamp. (Yohan 8:32) Deanne, wisambinau mu mutu wa mulong wa kusambish, utekin katat ritiy rend mu Dizu dia Nzamb. Ndiy ulejen anch: “Kinadingap nitongina anch Bibil wading ulejen yom patok kushik ni pinasambisha kwilej Bibil. Katat nimwij Yehova, kangal mudi muntu wakad kwikalaku, pakwez nij anch udi Tatuku wa mwiur wa rukat. Natana rutong rakin mu mwom.”

Wasambisha kwilej pamwing ap Bibil pakad kuman anch mudi yiyukish. Anch chidi mwamu, kangal walik. Kupakish kutesh malejan ma Bibil pakulejinau yamakasu piur pa Nzamb chidi mudi kupakish kuchirish chom chapalangeshau kachom pa kachom chakwel kuchitek kand pamwing nich kusadil chipich chiyimp mudi referans. Ukutwish kukumangej nawamp yikunku yikemp ni kupwa ukutwish kulik ni kwov kuyip anch waman anch chambatenap nich chipich chakwinkishau. Ufanyidin kusambish bil kutal chipich chiwamp, chawiy lel ukutwish kutek kachom pa kachom pa ndond yifanyidina.

Ov, usotin kutal ku chipich chiwamp ni kwilej uyakin piur pa Nzamb? Sal usu wa kuyikimb Atuman a Yehova adia mu ul wey ap fund ku adres udia pa paj wa 4 wa gazet winou chakwel wileja Bibil ku chikumbu pakad kufut.

[Tablo wa jinsangu udia pa paj wa 9]

“Chakwel en wijikangany yiwapila ni yirijekina ni yiwanyidina ku rusot ra Nzamb.”—ROM 12:2, TMK.