Kwikil Mar ma Chitangil!

ANCH muntu kanang wakulej anch, “Kukwikalap kand mar ma chitangil,” ov, chom ik ukusala? Ukutwish kulond anch, “Ukat kulat. Mar ma chitangil makat kushiken yisu yawonsu mu mwom wa antu.” Ap ukutwish kutong amwiney anch, ‘Ov, nany utonginay kwikal chakwel asala maswimbu mwamu?’

Ap anch chimeken anch mar ma chitangil makez kudandamen kwikalaku, kudi ruchingej rakin rimekeshin anch yom yikez kukarumuk. Pakwez, kukarumuk kwinoku kukezap kusadik nich usu wa antu. Mulong antu kakutwishap kwijik nawamp mutapu ik ni mulong wak yom yikat kushiken mu chitangil, kuyitakel ap kuyikangesh. Mwant Salomon wa mu Isarel wa pasak wijikena kusutil ku manangu ni mutapu wamanay yom, ndiy wafunda anch: “Ap anch wapakishap nchik kwijik, kakutwishap kujingunin yisalijok ya Nzamb. Antu in mangand akat kulond anch: ‘Twij yom yiney,’ pakwez awiy kayijap kwau.”—Mulej 8:17.

Anch antu kakutwishap kukangesh mar ma chitangil, ov, nany ukutwisha kumakangesh? Bibil ulejen anch Sakatang wetu ukutwish kukarumun yom. Ndiy watenchika yom yatangay, mudi kubudik kwa mem ku misul ni kuya kand mu karung. (Mulej 1:7) Chinyim ni antu, Nzamb ukwet usu wakad mupak. Mulong wa kulejan chinech, muprofet Jeremiy walonda anch: “[Yehova] Nsalejam, yey watanga diur ni divu ku ukash wey ni ku dikand diey. Kwikil chom chikukasikedina.” (Jeremiy 32:17) Mulong Nzamb watanga divu ni yom yidiamu, chimeken patok anch ndiy wij mutapu wa kurijek yom chakwel antu ashakama mu chisambu ni mu diking.—Kuseng 37:11; 115:16.

Ov, mutapu ik ukezay Nzamb kukarumun yom? Ukez kuvurik anch mutu wa mulong wakaad pakach pa mitu ya milong yiney wisambina piur pa yom yivud yamushena yikata kushiken pa divu nlel unou ni yimekeshina “chijingidij” cha “disudiel dia mangand.” Yesu walonda anch: “anch wamanany yom yikat kushik, ukez kwijikany anch, Want wa Nzamb udi piswimp ni kushik.” (Mateu 24:3; Luka 21:31) Want wa Nzamb, ap winyikel wa mwiur watenchikau kudi Nzamb, ukez kukarumun yom pa divu, ap kupwish mar ma chitangil. Ap anch Yehova Nzamb ukwet usu wa kusal yom yiney amwinend, ndiy wamwinkisha Mwanend mudimu winou. Pisambinay piur pa mwan winou, muprofet Daniel walonda anch: “Amwinkisha usu wa kuyikel ni uyaj, ni want, chakwel antu a michid yawonsu, ni a mitapu yawonsu, ni a jindim jawonsu amusadil ndiy. Kuyikel kwend kikukez kupwap, ni want wend ukez kwikal wa mivu ni minang.”—Daniel 7:14.

Yesu Kristu, Mwan a Nzamb, watambula usu ukash chakwel atwisha kukarumun yom chakwel divu dikala ndond yisangareshina kushakam. Pasutin kal tunan twa mivu, padingay Yesu pa divu, ndiy wamekesha mu mutapu ujim ukaliweny wend wa kupwish mar ma chitangil. Chisu chimwing, padingay ndiy ni in kwilej end mu wat pa Dijiy dia Galalia, “kweza rinkind mukash, mambek masambisha kwizwish waat nich mem.” In kwilej end ova wom. Akama mulong wa mwom wau, akarumuka kudiay Yesu. Ov, chom ik chasalay Yesu? Ndiy “wamubarikin rinkind, wamwel mambek anch: ‘Ikuchika kamu kwey zong!’ Chawiy rinkind waneneta, kwikal kamu pukupuku zong.” In kwilej end akashimuka ni ipula anch: “Ov, winou nany, uziyidilau kudi rinkind ni mambek?”—Marko 4:37-41.

Mulong Yesu wayil mwindond ya muspiritu ni amwinkishin usu ni uyaj ukash. Mudi Mwant wa Want wa Nzamb, ndiy ukwet chisend ni ukaliweny wa kukarumun yom chakwel antu ashakama mu chisambu ni mu diking pa divu.

Pakwez, mudi mutwamena, milong yivud ni mar ma chitangil yidiokiling ku yisal yiyimp ya antu mulong wa choy ni ris rau. Ov, chom ik chikeza Want kusal mulong wa antu akata kudandamen mwinjil yiney ni alikina kukarumuk? Bibil ulejen anch Mwant Yesu wezin “kudiokal mwiur, pamwing nau aruu end a mwiur akweta dikand. Ukez kwezil mu kasu ka muzwizu mulong wa kulejan kadimu kudi antu akata kumulik Nzamb, ni kulik kuziyil ku Rusangu Ruwamp ra Nsalejetu Yesu.” Mwaning, ndiy ukez “kuyishesh awonsu akata kushesh mangand!”—2 Tesalonik 1:7, 8; Kujingunik 11:18.

Kupwa, “Mwant wa ant” winou Yesu Kristu, ukez kukangesh mar mawonsu ma chitangil. (Kujingunik 19:16) Ndiy ukez kusal anch antu akuyikelau kudi Want kakezap kuman kand mar ma chitangil. Ndiy ukez kusadil usu wend mulong wa kutenchik yom yatangau chakwel chisu chikala chiwamp chakwel antu ashakama nawamp. Kupwa yom yawonsu yashilayimu Yehova Nzamb kudi antwend yikez kusalik: “nikwez kukwinkishany ruvul mu yirung yend, ni divu dikez kusong yakudia yau, ni mitond ya mu yir [yikez kusong] mabuj mau.” (In Levi 26:4) Antu akez kutung yikumbu pakad wom wa kuyishadish mu mar ma chitangil chawiy lel: “Awiy akez katung yikumbu ni kushakamamu ni ayinau. Akez kadim yir ya mitond ya nviny ni kudia mabuj mau.”—Isay 65:21.

Ov, Chom ik Ufanyidina Kusal?

Pakad ntad, ukutwish mudi antu akwau kusot kushakam mu mangand mwakad mar ma chitangil. Chaad, chom ik ufanyidina kusal chakwel wandama mwinimwa? Mulong Nzamb walejen anch “antu akata kumulik Nzamb,” ni “[alikina] kuziyil ku Rusangu Ruwamp” kakezap kwandam mu mangand mwakad mar ma chitangil, choviken patok anch ufanyidin kwilej katat piur pa Nzamb ni kwitiyij ku yitenchik yirijekinay mulong wa kuyikel mangand. Nzamb witin kumwijik ni kuziyil ku rusangu ruwamp ra Want rilejena anch ndiy wamuteka Mwanend.

Mutapu uwamp tukutwisha kusal mwamu chidi kusutil ku dilejan dia kashinsh dia Bibil. Bibil ukwet yany yitukwashina kuwanyish yitinau mulong wa kushakam mu mangand mawamp makeza kwikalaku mwishin mwa umutakel wa Want. Mulong wak tukutwishap kuyit Atuman a Yehova chakwel atukwasha kwilej yifundishinay Bibil? Adi tayad mulong wa kukukwash mu mitapu yawonsu. Chakin kamu—anch wasal usu wa kumwijik Nzamb ni kuziyil ku rusangu ruwamp, mazu minam madia mu Jinswir 1:33 makez kwikal makin ku mutambu wey: “Pakwez ukwintesha ukushakam wakad kwakam, ndiy ukwikal zong wakad wom wa kuyip.”