Aburaham Muntu Utakamena

Aburaham utadil dijuku ni atushalapol end pakatau kwirijek mulong wa kuya mwingand ya Kanan. (Disambishil 12:1-5) Patadilay ku chisak chinech chijim cha antu akata kumuchingejin chakwel awanyisha maswir mau, Aburaham umen kamu anch ukwet chisend chikash cha kuyilam. Ov, mutapu ik ukeza kuwanyish maswir mau mwingand yakad kwijik nawamp? Ov, chisend chinech chela kwikal chiswapela anch wachirik mu Ur, ngand yikweta mapit mavud, yakudia yivud ya anam, divu dibudishina yakudia yivud, ni mem mavud? Ov, chela kwikal nchik anch wayel ap wafil mwingand ya wingendj? Nany ukeza kulam dijuku diend? Anch Aburaham wading ni yakamish yiney, ndiy kasalap anch yakamish ya mutapu winou yiziyisha ritiy rend. Ndiy witekina mupak wa kusal, kuziyil ku yijil ya Nzamb, ni kumekesh—chijingidij cha kutakaman kwakin.

OV, KUTAKAMAN CHOM IK? Kutakaman kurumburikin kwikal ni usu, kwikal mukash, ni chifuvu—chinyim ni kwikal nich usany wa kulond ap wom. Kutakaman kurumburikinap anch tukutwishap kwov wom. Pakwez, muntu ukweta kutakaman kudiokila kudi Nzamb ukat kusalang yom pa ndond pa kwov wom.

OV, MUTAPU IK WAMEKESHAY ABURAHAM KUTAKAMAN? Aburaham wasala rusot ra Nzamb pakad kwov wom wa antu. Aburaham wapamina mwingand mwadinga antu in kwifukwil anzamb ni akish avud. Chikwau kand, ndiy kalikidinap anch wom wa antu akwau kumukangesh kusal chadinga chimenay anch chidi chom chitentamina. Pakwez, Aburaham walondula mwikadil ukwau wa mwom, wa kutond kumwifukwil ching Nzamb umwing kusu—Yehova “Nzamb Upandakena Piur.”—Disambishil 14:21, 22.

Aburaham wateka difukwil diend dia Nzamb wakin kurutu kwa yisakin yend ya kumujimbu. Ndiy witiya kulik mwom uwamp mu Ur ni kuya mwi mpay, mulong wading nich kashinsh anch Yehova ukez kuwanyish maswir mend ma kumujimbu. Pakwez, mu kusut kwa mivu, Aburaham wela kusambish kutongijokin piur pa mwom uwamp wadingay nich mu Ur. Pakwez Aburaham wading wij anch Yehova ukez kudandamen kuwanyish maswir mend ni ma dijuku diend. Mulong wamwitiyija Yehova mudi Muntu wa usey nakash mu mwom wend, Aburaham wikala nich kutakaman chakwel aziyila ku yijil ya Nzamb.

CHOM IK TWILEJINA PA MULONG WINOU? Tukutwish kumwimburij Aburaham mu kukudish kutakaman chakwel kumuziyil Yehova, ap anch antu akwau kasadilap mwamu. Chilakej, Bibil ulejen anch antu akata kulejan yitiyij yau mudiay Yehova Nzamb akutwish kuyipompat, pamwing ap kudi arund ap anamakwau amekena kwikal nich muchim uwamp. (Yohan 15:20) Pakwez, anch tukwet kashinsh piur pa yom twileja piur pa Yehova, tukulejan yitiyij yetu, anch twasal mwamu nich kalimish.—1 Pita 3:15.

Tukutwish kand kuchingejin mu kushilamu kwa Nzamb kukezay kuwanyish kudi antu atekina ritiy rau mudiay ndiy? Ruchingej riner ritwinkishin ukash wa kutek mwom wetu pa yom ya muspiritu pa ndond pa kuyitek pa yisakin ya kumujimbu. (Mateu 6:33) Talany mutapu wasala dijuku dimwing mwamu.

Ap anch ading ni an aad, Doug nenday Becky asota kuya kwi ngand kwadinga kuswir kwa in kulejan rusangu ruwamp ra Bibil. Kupwa kwa kukimbijol nawamp ni malembil makash, awiy akwata mupak wa kuwanyish rusot rau. Doug ulejen anch: “Chafanyidina kwikasikesh pa kuyisend an ni kuya, pakad kwijik yibudikin yikeza kutushiken. Pakwez pitwasambisha kukwat mupak wetu, twisambina piur pa chilakej cha Aburaham nenday Sara. Kutongijokin pa mutapu wamuchingejinau Yehova—ni mutapu kayilikap dichuku ap dimwing—kwatukwashin chakin kamu.”

Piur pa mashakamin mau mwingand ya wingendj, Doug ulejen anch: “Atuyukisha mu mutapu wamushena.” Ndiy ulejen kand anch: “Mulong mashakamin metu mading maswapela, twatwisha kushakam yisu yivud pamwing mu dijuku—kulejan, kwambamb ni umwing ni mukwau, kusengan pamwing ni ansangarum. Chidi chovil cha want ipau chikasikena kulejan ku kan.”

Chakin kamu, kadap muntu mwawonsu ukutwisha kusal yom yikash mudi yiney. Pakwez, etwawonsu tukutwish kwilikej chilakej cha Aburaham mu kutek difukwil dietu kudiay Nzamb pa ndond ya kusambish, ni kwikal nich kashinsh anch ukez kutukwash. Anch twasal mwamu, tuteshin chiyul chidiokila mu Bibil cha “kulond patok, wakad wom, anch: ‘[Yehova] Nsalejam, ndiy mwin kwinkwash, kinikez kwovap wom.’”—Hebereu 13:5, 6.

[Kamushet/​Chipich chidia pa paj wa 7]

Mband Umwovila Nzamb Wom ni wa Usey Nakash

Sara amwata kudi muntu mwin ritiy ra pakampwil. Pakwez mband winou umwovila Nzamb wom utwinkishin amwinend chilakej chiwamp nakash. Chakin kamu, Bibil umujimbwil tupamp tusatu pa dijin diend mudi chilakej cha kwimburij cha mband umwovila Nzamb wom. (Isay 51:1, 2; Hebereu 11:11; 1 Pita 3:3-6) Ap anch Bibil kalejenap yom yivud piur pa mband winou muwamp, pakwez tukutwish kuman anch ndiy wading ni ngikadil yiwamp nakash.

Chilakej, tongin bil pa mutapu wasalay Sara chakusambish pamulejau kudi Aburaham piur pa umutakel wa Nzamb wa kudiokal mu Ur. Ov, wading ukat kwiyipul kwisu kuyilau ni mulong wak? Ov, wading utongin pa maswir mau ma kumujimbu? Ov, wova kuyip mulong wa chitongijok cha kuyilik arund ni dijiku diend, pakad kwijik chisu ik—ap anch ukez—kuyiman kand dichuku dimwing? Chimeken anch wikala pamwing ap ni yitongijok yiney. Ap mwamu, ndiy witiyija kudiokal, ni ruchingej anch Yehova ukez kumuyukish mulong wa kuziyil kwend.—Midimu 7:2, 3.

Kupwa kwa kwikal kashalapol wa Nzamb uziyidila, Sara wading kand mband muwamp nakash. Pa ndond pa kurish ni nfumwend pa mutapu wa kutakel milong ya dijuku, Sara wakudisha kalimish kadiokila mu muchim kudi nfumwend, ni kumukwash nich rukat padingay ni kutakel dijuku diend. Mu kusal mwamu, wirijeka amwinend—wiyikadisha ntas—kusutil ku ngikadil yadinga mu muchim wend.—1 Pita 3:1-6.

Ov, mikadil yiney yikutwish kuyikwash amband nlel unou? Mband umwing utazukinau anch Jill washakama mu chisambu mu uruw mu mivu 30, ulejen anch: “Chilakej cha Sara chanleja anch nifanyidin kwikal nich want ipau wa kumulej nfumwam yitongijok yam,” ulejen kand anch: “Pa chisu chinicha mudi mutu wa dijuku, nfumwam wading nich chisend cha kukwat mupak wa nsudiel. Padingay ni kusal mwamu, wading mudimu wam wa kusal usu wam wawonsu chakwel mupak wend usadika.”

Pamwing ap dilejan dikash twilejina kusutil kudiay Sara diawiy ed: Ap anch ndiy wading ntas nakash, Sara kalikidinap anch ufun wend wa ku mujimbu umubachika ku kwitutul. (Disambishil 12:10-13) Pakwez, ndiy wamukwasha Aburaham nich kwitudish mu mar ni mu yisu ya musangar mu mwom wau pamwing. Aburaham nenday Sara ading chakin kamu ambay a uruw ashinshamena, itudishina, ni akatijadina umwing ni mukwau—ambay a uruw asala anch umwing aleta yiyukish kudi mukwau.