Ov, Chisu Ik Chikeza Kwez Njit ja Harmagedon?

“Natala, chad naman runtu ruvud rakad kutwish kuchind kudi muntu. Antu inay adiokala ku mangand mawonsu, ni ku michid yawonsu, ni ku antu awonsu, ni ku jindim jawonsu . . . adiokila mu mar makash mapandakena.”​—KUJINGUNIK 7:9, 14.

KATAT chidi chisu cha njit ja Harmagedon. Ov, mutapu ik?

Kuding chisak cha antu a mu mangand mawonsu akata kumusadil Yehova ni kuziyil ku yany yishitwila ya Bibil. Nich ukwash wa Nzamb, mamiliyon ma antu a michid, tubil, ni jindim jawonsu akat kukumangan pamwing mu ukadivar wa rukat. Ukadivar winou udi pakach pa Atuman a Yehova.—Yohan 13:35.

Piswimp ap Satan ukez kukumangej yisak yend ni kusambish kuyas njit jikash antu inay amekena mudi antu akad diking. (Ezekiel 38:8-12; Kujingunik 16:13, 14, 16) Mutapu ik ukutwisha kwikal nich kashinsh anch yom yiney yikez kusadik? Bibil ulejen yinship ya pakampwil yitukwashina kwijik chisu ik jikeza kwez njit ja Harmagedon. Yinship yivud yilejinay yasadikin kal.

Yinship Yisadikina mu Mes Mey

In kwilej a Yesu amwipula anch mutapu ik ukezau antu kwijik anch “disudiel dia mangand” didi piswimp. (Mateu 24:3) Yesu wakula kusutil ku kulejan piur pa chirung chinech, palonday anch, “muchid ukez kurish ni muchid ukwau, want ukez kurish ni want ukwau. Kukez kwikal kamungun ni kunyikek kwa ngand ku jindond jivud.” Kupwa ndiy walejana anch: “Yom yiney yawonsu yidi disambishil dia mar.” (Mateu 24:7, 8) Kambuy Paul wisambina piur pa chirung chinech anch “machuku ma kwisudiel,” ni kulejan anch machuku minam makez kwikal “ma mar nakash.” (2 Timote 3:1) Ov, umenap anch uprofet winou wawonsu wisambidin piur pa yinship yikata kushiken nlel unou?

Ov, mulong wak chirung chinech chidi chikash? Kambuy Yohan ulejen mulong wak. Ndiy watakela kulejan anch kukez kwikal “chisu . . . chikemp” mijikit ya Satan ni ya ayilembil end yikez kusadik ching kusu pa divu. Alejen anch Satan “ujimen nakash” mu chirung chinech. (Kujingunik 12:7-12) Ov, umenap anch kudi spiritu wa ujim ni wa chisum pakach pa antu nlel unou, kadiap ching kusu mu jindond jimwing pakwez mu mangand mawonsu?

Yesu walonda kand anch mu chisu chinech cha mar makash, mudimu wamushena ukez kusadik. Ndiy walonda anch: “Rusangu Ruwamp ra Want wa Nzamb [akez kurilejan] bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” (Mateu 24:14) Nlel unou, mu jingand 235 ni kusut, Atuman a Yehova alejen rusangu ruwamp ra Want wa Nzamb mu jindim 500 ni kusut. Afundin majurnal maad mimedina pa Bibil, Chinong cha Kalam ni Réveillez-vous !, madi magazet mapalangeshinau nakash mu mangand mawonsu. Atuman akarumwin kand Bibil mu jindim piswimp ni 100. Mudimu wau udi kwipan ni wimedin pa milambu yipaninau kwa kwisotil. Ov, kampany winou wa kulejan kukash umekeshinap kuwanyin kwa uprofet wa Yesu?

Bibil ulejen kand yinship yikeza kushikij kapamp kamwing kwinjit pakach pa Yehova Nzamb ni akankuny nend. Shinshikin uprofet winou usatu ukeza kuwanyin ku mes mey.

Yinship Ukeza Kuman Piswimp Ap

Uprofet wa 1. Bibil ulejen anch michid yikusambish kulond anch kudi “chisambu ni kwikang.” Akez kutong anch apwish kal milong yawonsu yikash. Pakwez, yinship yikeza kulondul yikez kwikal chinyim ni chisambu.​—1 Tesalonik 5:1-3.

Uprofet wa 2. Chikwau kand, winyikel kushalijan ukez kukwat mupak wa kupompat yirijek ya marelijon madia mu mangand. Mu Bibil, winyikel winou akat kuwilikej nich nnam wa chidiany; ni marelijon ma makasu madia mu mangand akat kumilikej nich mband ushicha pa nnam. (Kujingunik 17:3, 15-18) Nnam winou wa mu chifanikesh ukez kusal yom yisotinay Nzamb kusal mu kushesh marelijon makata kudimban anch madi ma Nzamb.

Kambuy Yohan ulejen yom yiney mu yifanyikesh anch: “Misengu dikum yiwamana ni nnam wa chidiany, akez kumukis mband wa kusochik. Akez kumubuu yom yawonsu, amusha kanzikis. Akez kudia mbij jend, chad akumwosh kasu. Nzamb wayinkisha michid ya kusal mudi mwatenchikay, mulong awiy itiya kupan ulabu wau wa kuyikel kudi nnam wa chidiany, kushik djat ni pakuwanyishay Nzamb mazu mend.”—Kujingunik 17:16, 17.

Uprofet wa 3. Pakezay kutwish kushesh marelijon ma makasu, Satan ukez kukumangej michid mulong wa kuyishesh antu akata kumwifukwil Yehova Nzamb.​—Kujingunik 7:14; Mateu 24:21.

Ov, Chinech Chikwikal Nich Usu ik Padi Ey?

Anch kandikal umana mutapu wa kwilej Bibil nakash, chikutwish kukukasiken kwitiyij anch milong yilejenau yikez kusadik. Pakwez kudi diyingish diwamp dia kuchingejin anch yawonsu yikez kuwanyin kachom ni kachom ni yinship yiney yikez kusadik piswimp ap mu machuku ma kurutu. Kuwanyin kwa yom yivud yatakelau kulejan mu Bibil kutwinkishin kashinsh anch ni yom yiney yikez kusadik.a

Mulong wak ukutwishap kusha chisu chimwing chakwel ujingunina chom chisadila anch Atuman a Yehova ikala nich kashinsh anch “njit pa Dichuku dijim dikurumburishay Nzamb Mwin Dikand Diawonsu” jidi piswimp ni mulong wak ufanyidinap kwov wom wa njit jinej? Isamba nau piur pa yilondinay Bibil yiufanyidina kusal chakwel wikala pakach pa antu akezay Yehova Nzamb kulam. (Kujingunik 16:14) Yiukeza kwilej yikutwish kukarumun yitongijok yey piur pa machuku ma kurutu.

[Dizu didia Kwishin kwa paj]

[Tablo wa jinsangu udia pa paj wa 8]

Ov, mudimu wa Atuman a Yehova ukutwish kuwanyish uprofet wa Bibil?