Yikwashany Antu Chakwel ‘Alanka Pa Tul’
“Wijany nawamp anch, chirung chinech chidi chijim kudi etu. Katat chisu cha kulank pa tul chawanyin kal.”—ROM 13:11.
OV, UKUTWISH KURUMBURIL?
․․․․․
Mulong wak chidi cha usey kudi in Kristu kucha ku mes muspiritu?
․․․․․
Mulong wak in kulejan afanyidin kulank ni kutal nawamp?
․․․․․
Ov, kalimish ni kwitudish yikwet usey ik mu mudimu wa kulejan?
1, 2. Ov, antu avud aswiridin kulank mu mutapu ik?
MUVU ni muvu, tunan twa antu tukat kufang mulong wa kuzel tul ap kulal pakatau kwendish mwoto. Tunan tukwau tushadishin midimu yatu mulong wa kuburen kulank pa chisu chifanyidina mulong wa kuya ku mudimu ap mulong wa kulal tul pa chisu cha mudimu. Pakwez tul twa muspiritu tukutwish kwikal nich yibudikin yiyimp nakash. Chidi mulong wa mwikadil winou wa usey palejenay Bibil anch: “Wayuk muntu uchishina ku mes.”—Kuj. 16:14-16.
2 Pasejidina piswimp dichuku dijim dia Yehova, antu avud alel mu spiritu. Ap antakel amwing a in Kristendom alejana anch yisak yau yidi mudi ‘ayifuvu alela tul.’ Ov, tul twa muspiritu chom ik? Mulong wak kudandamen kucha ku mes kudi kwa usey kudi in Kristu akin? Ov, mutapu ik tukutwisha kuyikwash antu akwau chakwel alanka mu tul twa muspiritu?
OV, TUL TWA MUSPIRITU—CHOM IK?
3. Ov, mutapu ik ukutwisha kurumburil piur pa muntu wakad kulank mu muspiritu?
3 Antu alela ading yisu yivud akad kusal. Pakwez, antu alela muspiritu akutwish kwikal nich yom yivud ya kusal—pakwez yakad kwikal ya muspiritu. Akutwish kushadish chisu chau mu yakamish ya mwom ya dichuku ni dichuku, ap mu kukimb kwisangaresh, katumb, ni ukash wa kumujimbu. Nich mijikit yiney yawonsu, akat kumekesh yom yikemp nakash piur pa kuwanyish maswir mau ma muspiritu. Antu alankina muspiritu, ap anch ij anch tudi “mu machuku ma kwisudiel,” awiy asadil usu wau wawonsu mulong wa kusal rusot ra Nzamb.—2 Pita 3:3, 4; Luka 21:34-36.
4. Ov, chiyul chilejen anch: “Etu kitufanyidinap kulal tul mudi antu akwau” chikwet usey ik?
4 Tang 1 Tesalonik 5:4-8. Pinap kambuy Paul kayikasikesha ambay nend akaritiy chakwel ‘alala tul.’ Ov, chom ik chafilay kulond? Mutapu umwing utukutwisha “kulal tul” udi kuvuramen kwijik yany ya mashakamin ma Yehova. Mutapu ukwau tukutwisha kulal tul udi kuvuramen kwijik chisu chinech chishejina piswimp chikezay Yehova kushesh mangand minam mayimp. Tufanyidin kwikal nich kashinshikin chakwel anch antu inay ayimp kangal atubachik kulondul yisal ni yaku yau.
5. Ov, mitapu ik ya mikadil yilejena antu alela tul twa muspiritu?
5 Antu amwing atongining anch kwikil Nzamb ukeza kuyit kuchind. (Kus. 53:1) Akwau akat kutong anch Nzamb kakatap kutubangin etu antu, chawiy lel kwikil mutapu wa kumubangin ndiy. Chikwau kand, akwau amen anch kwandam mu egliz kampand kukez kusal anch ikala arund nend a Nzamb. Antu inay awonsu alel tu twa muspiritu. Aswiridin kulank. Ov, mutapu ik tukutwisha kuyikwash?
TUFANYIDIN AYINETU KUDANAMEN KULANK
6. Ov, mulong wak in Kristu afanyidin kusal usu wa kushal alankina muspiritu?
6 Chakwel tutwisha kuyilangwish antu akwau, tufanyidin kulank ayinetu. Ov, chinech chitin ik? Dizu dia Nzamb difanikeshin tul nich “yom yikat kusalau antu mu mididim”—kwisangaresh kuyimp, kukwachik kwa maar, masandj, kwijond, ni matend, ni mukau. (Tang Rom 13:11-14.) Kwipuk mwikadil mudi winou kukutwish kwikal chikangesh. Kucha ku mes kudi kwa usey. Mwin kwendish motak wakad kuman uyimp wa kuzel tul pakatay kwendish ukutwish kushesh mwom wend. Chidi cha usey mud ik kudi mwin Kristu kwijik anch tul twa muspiritu tukutwish kumujip!
7. Ov, mutapu ik kuyitongin nayimp antu kukutwish kwikal nich usu padi etu?
7 Chilakej, mwin Kristu ukutwish kutongin anch antu awonsu adia mu teritwar wend kakezap kwitiy kutesh rusangu ruwamp. (Jinsw. 6:10, 11) Ndiy ukutwish kutong ‘Anch kwikil muntu ap umwing uteshina, ov mulong wak chifanyidin kusal usu wa kupakish kuyikimb ni kuyikwash antu?’ Chakin, antu avud akutwish kulal muspiritu nlel unou, pakwez mikadil ni yaku yau yikutwish kukarumuk. Antu amwing akat kulank ni kwitiyij. Tukutwish kand kuyikwash anch ayinetu tudandamedin kulank, kusutil ku kupakish mitapu yivud ya kusadil mu kulejan uruu wa Want mu mutapu usangareshina. Mu kushal alankina mudi kand kuvurik mulong wak mudimu wetu wa kulejan udi wa usey.
CHOM IK CHILETINA USEY KU MUDIMU WETU WA KULEJAN?
8. Ov, mulong wak mudimu wetu wa win Kristu udi wa usey nakash?
8 Kulam mu manangu anch chikalap nchik kulik ap kwitiyij, kulejan kwetu kukat kumutumbish Yehova ni kusadil chakwel rutong rend risadika. Piswimp ap, antu akad kuziyil ku rusangu ruwamp akez kuyirumburish. Antu akez kuyirumburish kwambatan ni mutapu witiyinau ku kulejan kwetu. (2 Tes. 1:8, 9) Chikwau kand, mwin Kristu kafanyidinap kutong anch kulejan nich mushiku kudiap kwa usey mulong “antu awamp ni antu ayimp akez kavumbuk kwikal kand aom.” (Mid. 24:15) Twateshin mu Dizu dia Nzamb anch antu arumburishau mudi “ampemb” akez “kuyitwal mulong wa kuyilej kadimu ka chikupu.” Mudimu wetu wa kulejan umekeshin riy ra Nzamb, uyikwashin antu chakwel akarumuka ni atambula “mwom wa chikupu.” (Mat. 25:32, 41, 46; Rom 10:13-15) Anch tusadinap mudimu wa kulejan, ov mutapu ik ukezau antu kwikal nich chisu cha kutesh uruu ukutwisha kulet mwom?
9. Ov, kwipan mu mudimu wa kulejan rusangu ruwamp kukuyukishin mutapu ik ey ni antu akwau?
9 Kulejan rusangu ruwamp kudi kand kwa ukwash kudi etu. (Tang 1 Timote 4:16.) Ov, wamenap anch kulejan piur pa Yehova ni ruchingej ra Want kukat kukasikesh ritiy rey ni rukat retu kudiay Nzamb? Ov, mudimu winou wakukwashap chakwel ukudisha mikadil ya win Kristu? Ov, kumekesh kwipan kwey kudi Nzamb kusutil ku kusal mu mudimu wa kulejan kukatap kukuletin musangar? Antu avud asenda chisend cha kulejan uyakin kudi antu akwau ikala nich musangar wa kuman mutapu uyikwashinau antu inay kudi spiritu wa Nzamb chakwel ikala nich mwom usangareshina.
SHINSHIKIN NAWAMP
10, 11. (a) Ov, mutapu ik wamekeshay Yesu nenday Paul anch ading ayinau achila ku mes? (b) Lejan mutapu ik kwikal achila ku mes ni in kushinshikin nawamp kukutwisha kuwapish mudimu wetu.
10 Antu asangaredina rusangu ruwamp akutwish kulank mu mitapu yivud. Chawiy lel, in kulejan in Kristu afanyidin kushinshikin nawamp. Yesu udi chilakej chetu. Mulong wadinga muntu uwanyidina, ndiy wajingunina kuyip kwovay Mufaris umwing, kukarumuk kwa kashinsh kwa mband mukayitil, ni mwikadil wa kwipan wa mwadiamufu umwing. (Luka 7:37-50; 21:1-4) Yesu wela kuwanyish maswir ma muspiritu ma muntu ni muntu. Pakwez, kashalapol wa Nzamb kafanyidinap kwikal uwanyidina chakwel ikala mwin kushinshikin muwamp. Kambuy Paul wisambina pa chinech. Ndiy wasala anch mazu mend mambatana ku yisak kushalijan ni kudi antu akweta yaku yishalijadina.—Mid. 17:22, 23, 34; 1 Kor. 9:19-23.
11 Anch twasal usu wa kucha ku mes mudi mwadingay Yesu ni Paul, tukutwish kujingunin mutapu ik tukutwisha kulangwish kusanger mu muchim wa antu tukata kusankan nau. Chilakej, piwambambina ni antu, shinshikin nawamp pa yom yimekeshina yaku yau, yikatau kusanger, ap mwikadil wau wa dijuku. Ukutwish pamwing ap kujingunin yikatau kusal katat ni kwisambin nich kalimish chakwel utwisha kusambish mambamb.
12. Pitukata kwipan mu mudimu wa kulejan, ov mutapu ik tufanyidina kushinshikin nawamp piur pa mambamb metu?
12 Mwin kushinshikin nawamp usadining usu wa kwipuk kuzuwol. Pitudia mu mudimu wa kulejan, minsamb pamwing ni mukwetu yikutwish kwikal yikasikeshina. Chikwau kand, tufanyidin kuvurik anch pitukata kwipan mu mudimu wa chingand rutong retu ridi ra kulejan kudi antu akwau. (Mul. 3:1, 7) Chawiy lel, tufanyidin kusal usu chakwel kangal mambamb metu mikala makad kwambatan nich mudimu wetu pitulejena ku chis ni ku chis. Kwisambin pa yitongijok tukeza kwambamb ni antu asangaredina udi mutapu uwamp wa kutek manangu metu pa rutong retu. Chikwau kand, ap anch telefon ukutwish yisu yimwing kutukwash chakwel tusala nawamp mudimu wetu wa kulejan, tufanyidin kusal usu chakwel kangal kutazuk ku telefon kuyipisha mambamb metu ni mwin chikumbu.
MEKESH KUSANGER KWA PAKAMPWIL
13, 14. (a) Ov, mutapu ik tukutwisha kujingunin yom yimusangareshina muntu? (b) Chom ik chikutwisha kulangwish kusanger kwa antu mu yom ya muspiritu?
13 In Kulejan achila ku mes ni akad kuzel tul akat kuyiteshang nawamp antu asankenau. Ov, yipul ik ukutwisha kwipul chakwel muntu udia mu teritwar wetu alejana yitongijok yend? Ov, ndiy ukat kutongin piur pa uvud wa marelijon, wa chisum chidia mu mangand, ni kuwa kwa maguvernema? Ov, ukutwish kulangwish kusanger pa yom ya muspiritu kusutil ku kwisambin yom yamushena yatangau yikweta mwom ap mu kulejan mutapu yidia ya usey yany ya Bibil? Malembil makat kuyisangaresh antu a mikadil yawonsu, ap antu akad kwitiyij kwikalaku kwa Nzamb. Antu avud akat kushimok anch kudi muntu uteshina malembil. Antu akwau akat kwiyipul yipul mudi yiney: Ov, Nzamb uteshining malembil mawonsu? Anch bwat, chom ik tufanyidina kusal chakwel Nzamb atesha malembil metu?
14 Tukutwish kwilej yom yivud pa mutapu wa kusambish mambamb kusutil ku kutal mutapu usadilau in kulejan aswila kal. Tal mutapu ukata kwipuk mulad kanang wa kwipul ap kulembil. Mutapu ik mazu ni yifu yau yimekeshina kusanger pateshinau yitongijok ya mwin chikumbu?—Jinsw. 15:13.
KALIMISH NI UKALIWENY
15. Mulong wak tufanyidin kwikal nich kalimish pitupakishina kulejan?
15 Ov, ukatishin kulank mu tul tukash? Antu avud kakatiningap kuyilangwish kapamp kamwing pa tul. Asotining kuyilangwish nawamp. Chilik chimwing ni usu tufanyidina kusal mulong wa kuyilangwish antu muspiritu. Chilakej, anch muntu wajiman nakash mulong wa kumwendil kwey, ov chom ik chiwapidila kusal? Ufanyidin kwitiyij nich kalimish yovil yend, ni mujikitisha mulong usadil yom yidiokila ku muchim wend, ni kumusha kwey pakad kupwitijan. (Jinsw. 15:1; 17:14; 2 Tim. 2:24) Kalimish key kakutwish kumubachik muntu winou chakwel itiyija chisu chikwau chikezay kwez Kaman mukwau.
16, 17. Ov, mutapu ik tukutwisha kusadil njingunin mu mudimu wetu wa kulejan?
16 Yisu yikwau, ukutwish kupandakan kwakul kuyimp. Muntu umwing ukutwish kulond anch: “Nakujikitish amboku. Nikwet niyam relijon wam amwinam” ap, “Yinsangareshinap” mulong amening anch udi mutapu uswapela kukangesh mambamb. Chikwau kand, nich ukaliweny ni kalimish, ukutwish kulangwish chipul chisangareshina ni chikutwisha kulangwish kusanger kwa mwin chikumbu pa yom ya muspiritu.—Tang Kolosay 4:6.
17 Yisu yimwing anch twatan antu ovila anch kakwetap chisu cha kutesh mulong akwatiken nakash nich midimu, chiwapidil kwitiyij mwikadil winou ni kuyisha. Ap mwamu, pa chisu chinech ukutwish kujingunin anch ukutwish kulond chom chimwing cha usey mu wiswimp. Akadivar amwing ijing nawamp kuburil Bibil, kutang verse ulangwishina impu, ni kumusha mwin chikumbu nich chipul—yiney yawonsu mu minit umwing. Minsamb yau ya mu wiswimp yalangwisha kusanger kukash ni mwin chikumbu wamana anch kwikil chom chikutwisha kumukangesh kutesh mambamb minam makemp. Ov, ukutwishap kupakish kusal mwamu anch chitwishikin?
18. Ov, chom ik tukutwisha kusal chakwel tulejana nawamp pitupanina uman wa kukashimwish?
18 Anch twasankan ni antu mu mijikit yetu ya dichuku ni dichuku, tukutwish kulangwish yisu yivud kusanger kwau mu rusangu ruwamp anch twirijek mulong wa kupan uman wa kukashimwish. Akadivar ni anambaz avud asendining mikand mu dibeng ap mu kasakosh ka ku chikas. Akutwish kand kulam mazu mamwing ma Bibil mu manangu chakwel isamba ni antu akwau anch mikadil yimwing yashiken. Ukutwish kumulej kalam wa mudimu ap ayibol adia mu chikumangen chey piur pa mutapu ukutwisha kwirijek chakwel utwisha kusal mwamu.
YILANGWISHANY ANAMAKWETU NICH KALIMISH
19. Mulong wak tufanyidinap kulik kusal usu wa kuyikwash ambay netu?
19 Chimeken anch, tukutwish kusot kuyikwash anamakwetu chakwel itiya rusangu ruwamp. (Jos. 2:13; Mid. 10:24, 48; 16:31, 32) Anch twakangany kapamp ka kusambish, chinech chikutwish kukepish chirungul chetu cha kusambish kand. Tukutwish kutong anch kudi pamwing ap chom tukeza kusal ap kulond chikeza kuswimp mwikadil wau. Chikwau kand, yinship yikutwish kuswimp mwom ap chitongijok cha mwanamakwey. Ap ukutwish kukudish ukaliweny wey wa kurumburil uyakin chakwel wikala katat nich yibudikin kushalijan.
20. Mulong wak nkeu jidi ja usey pitwisambina ni anamakwetu?
20 Tufanyidinap kwipuk kutesh yovil ya anamakwetu. (Rom 2:4) Ov, tukutwishap kuyilej nich kalimish, mudi tukata kuyilej antu tusankena nau mu mudimu wa kulejan? Lond nich kwitudish ni kalimish. Pakad kulondol, let chilakej chimekeshina mutapu wakarumuna uyakin mwom wey. (Efes 4:23, 24) Lejan patok mutapu wayukishay Yehova mwom wey, ni ‘kukulej mulong wa kukukwash.’ (Isay 48:17) Sal anch mwanamakwey akumana kwikal chilakej cha mwom wa mwin Kristu.
21, 22. Lejan yom yashikena yimekeshina usey wa kudandamen kusal usu wa kuyikwash anamakwetu mu muspiritu.
21 Nlel unou, nambaz umwing wafunda anch: “Nikat kupakishang chisu ni chisu kupan uman kudi akadivar nam 13 ni anambaz kusutil ku mazu mam ni ku yaku yam. Nalika kusutish muvu pakad kumufundin umwing pakach pau. Chad pasutin kal mivu 30, nidi Kaman umwing kusu mu dijuku.”
22 Nambaz winou ulejen kand anch: “Dichuku dimwing namutazuka ku telefon yayam mband wadinga ku yitot ya ma kilometre. Ndiy wanleja anch wamuleja mwin kulejan wend chakwel ileja nend Bibil, pakwez kandikal ileja nend. Pinamuleja anch nikez kusanger kumukwash, ndiy walonda anch: ‘Mwaning, pakwez nakulej kal anch: Nikezap kwikal kaman wa Yehova dichuku ap dimwing.’ Kupwa kwa kumutumin buku Chom ik Chakin Kamu Chifundishinay Bibil?, Nasambisha kumutazuk ku telefon dichuku ni dichuku. Pakwez kasotap kuburil buku winou. Kupwa, namuleja chakwel asenda buku wend, ni ku telefon piswimp mu minit 15, twatanga ni twisambina piur pa maverse madinga mu buku. Kupwa kwa kumutazuk yisu yivud, ndiy wasota kwilej chisu chilemp kupandakanamu minit 15. Kupwa ndiy wasambisha kwintazuk ku telefon mulong wa kwilej nend, wasambisha kutazuk yisu yimwing pamanch nakash kurutu nilanka ni yisu yikwau tupamp twaad pa dichuku. Muvu walondulaku, ndiy watambula dibatish, ni muvu umwing kupwa kwa chinech, wasambisha mudimu wa uchibol.”
23. Mulong wak tufanyidinap kuziy kupakish kuyilangwish antu mu tul twa muspiritu?
23 Kuyikwash antu chakwel alanka mu tul twa muspiritu udi mudimu witina ukaliweny ni kudandamen kusal usu. Chikwau kand, antu itudishina akat kwitiyij anch twasal usu wa kuyilangwish. Kudi uvud wa antu piswimp ni 20 000 atambwilinga dibatish muvu ni muvu mudi Atuman a Yehova. Chawiy lel, lamany amboku mu muchim chiyul chapanay Paul kudi mukadivar netu Ariship wa mu chitot chakusambish cha mivu anch: “Wanyish mudimu nawamp wakwinkishau ku mudimu wa Nsalejetu.” (Kol. 4:17) Mutu wa mulong ulondwilaku ukez kutukwash etwawonsu chakwel tusangera kurumburik kwa kulejan nich chitongijok cha kuswapej.
[Kamushet kadia pa paj wa 13]
MUTAPU UKUTWISHA AMWINEY KULANK
▪ Dandamen kusal nakash rusot ra Nzamb
▪ Ipuk midimu ya mididim
▪ Jingunin ubaj wa tul twa muspiritu
▪ Lam chitongijok chiwamp pantaliken ni antu adia mu teritwar wey
▪ Pakish mitapu yisu ya kulejan kudi antu akwau
▪ Vurik usey wa mudimu wey wa kulejan