Kalimish ni Katumb mu Ranaken ra Nzamb

PADINGAY pa divu, Yesu wamekesha untu wa Tatukwend wa mwiur mu mutapu uwanyidina ni mutapu wend wa kusal yom. Ndiy walonda anch: “Kinikat kusalap chom ku ulabu wam amwinam, pakwez nikat kulond kusu ching yom yanlejay Tatukwam kulond . . . yisu yawonsu nikat kusal yom ya kumusangarish ndiy.” (Yohan 8:28, 29; Kolosay 1:15) Chawiy lel, mu kushinshikin pa mutapu wayisadilay Yesu amband ni chitongijok chend pantaliken nau, tukutwish kuman ni kwijik chitongijok cha Nzamb piur pa amband ni pa yichingejinay mulong wa awiy.

Kwambatan ni yom yafundau mu Rusangu ruwamp, in kwilej Bibil avud itiyija chitongijok cha Yesu piur pa amband mudi anch chading chishalijadin nakash kamu ni mutapu wadingau ni kutong amband. Ov, chishalijadin mutapu ik? Ni chidia cha usey nakash, ov, malejan mend machidandamedin kwikal ni chibachikin cha want ipau padiau amband nlel?

Mutapu Wayisadilay Yesu Amband

◼ Yesu kadingap ni kuyiman mudi yom kusu ya kusangaresh nich maku ma masandj. Mu chitongijok cha antakel amwing a relijon wa in Yuda, kushej piswimp ni muntu wa mujimbu ukwau kukushikij kusu ku maku makash ma masandj. Mulong amband ading ayovil wom mudi musul wa kupakiu, kadingap ni mbil ya kulond kurutu kwa amakundj avud ap kubudik pol pakad kudjal chitambal. Ku mutambu ukwau, Yesu wayiyula amakundj kulam maku mau ma ku mujimbu ni kuyisadil amband nich kalimish pa ndond pa kwiyauril nau.—Mateu 5:28.

Yesu walonda kand anch: “Ikundj mwawonsu ukujipa uruw ni mukajend, chad wat mband mukwau, ikundj winou wamurumbukin kal.” (Marko 10:11, 12) Chawiy lel wadjibwila kulemp malejan ma relijon wa in Yuda masala anch amakundj ajipa uruw ni akajau mulong wa ‘chom chin chawonsu.’ (Mateu 19:3, 9) Malejan piur pa kumurumbukin mukajend wa kusambish madingap mijikena kudi in Yuda avud. Antakel a relijon wa in Yuda alejana anch ikundj kelap kusal masandj dichuku ap dimwing pantaliken ni mukajend—ching kusu mband ndiy wela kwikal wakad kushinshaman! Mudi kamu mwalonday mwin kurumburil Bibil umwing anch, “Yesu, pamutekay ikundj yisend ya mikadil ya chilik chimwing ni mband, wazambwisha piur mwikadil wa kalimish wafanyidinau kuyinkish.”

Usu wa malejan mend nlel unou: Mu chikumangen cha in Kristu cha Atuman a Yehova, amband akat kukumangan nich want ipau pamwing ni amakundj ku yikumangan. Pakwez, kakwetap kuswir kwa kwov wom wa kuyital nayimp ap wa kushakam nau nayimp, mulong in Kristu amakundj akat kusal usu wa kushakam ni “amband amakurump mudi amaku, ayangadim mudi anambaz nich muchim udia zwang.”—1 Timote 5:2.

◼ Yesu wading ni chisu cha kuyilej amband. Chinyim ni amakurump a relijon wa in Yuda adinga ni chitongijok cha kuyisha amband mu mwikadil wakad kwijik chom, Yesu wayileja ni kuyikasikesh kumekesh yitongijok yau. Palikay anch kangal amukangesh Mariy kutesh malejan mend, Yesu wamekesha anch mband kakwetap ching kusu mudimu wa kwisuk ku chikumbu bwat. (Luka 10:38-42) Mpanyend a Mariy, Marta, watambula niyend ukwash wa mafundish mend, mudi kamu mulejena mutapu wamwakulay Yesu nich manangu kupwa kwa rufu ra Lazar.—Yohan 11:21-27.

Yesu wasanger piur pa yitongijok ya amband. Pa chisu chinicha, amband avud in Yuda itiyija anch pakwikal nich musangar mu mwom chifanyidin kuval mwan ikundj muwamp, ap muprofet. Chisu chabarikay umwing wa amband anch: “Diayuk divumu diakuvala ey,” Yesu wasala usu chakwel amuleja chom chimwing cha usey nakash. (Luka 11:27, 28) Mu kulejan anch kumuziyil Nzamb kwading kwa usey nakash kupandakanamu yisend ya chishankur yatenchikau mulong wa amband.—Yohan 8:32.

Usu wa malejan mend nlel unou: Alej adia mu chikumangen cha in Kristu akat kwitiy yakul ya amband ku yikumangan ya chikumangen. Akat kuyilimish amband amakurump mulong wa kwikal kwau “alej akulejan yom yiwamp,” mu ujindj ni kusutil ku chilakej. (Titus 2:3, TMK) Akat kuyichingejin kand mulong alejen patok rusangu ruwamp ra Want wa Nzamb.—Kuseng 68:11; tal mushet “Ov, Kambuy Paul Wayijidika Amband Kulond?”

◼ Yesu wayibangina amband. Pa chirung chafundau Bibil, mwan mband kadingap ni kumwinkish usey nakash mudi mwan ikundj. Talmud ulejen chitongijok chinech, ulondin anch: “Wayuk kwend ukweta an amakundj, ni riyind kudi ndiy ukweta an amband.” Anvaj amwing ading amumen mwan mband mudi chisend chilimina—afanyidin kumukimbin mbay wa uruw ni kumwinkish mbay winou chipan, ni kakutwishap kutambul ukwash kudiay ndiy pakezau kunanap.

Yesu wamekesha anch mwom wa mwan mband mukemp udi wa usey chilik chimwing ni wa mwan ikundj—wamuvumbula mwan mband wa Yayirus mudi kamu mwasalay piur pa mwan ikundj wa mwadiamufu wa ku Nayin. (Marko 5:35, 41, 42; Luka 7:11-15) Kupwa kwa kuyeril mband umwing wading urumbangeshinau kudi “chilembil mivu dikum ni chinan,” Yesu wamutazuka anch “mwan wa Aburaham,” dizu dimwing diakad kwijikan nakash mu mifund ya in Yuda. (Luka 13:10-16, TMK) Mu kusadil dizu dined dia kalimish ni rukat, witiyija anch ukwet chakin usey mudi muntu win mawonsu ni wamana ritiy rend rijim.—Luka 19:9; Galatia 3:7.

Usu wa malejan mend nlel unou: Jinswir jimwing ja in Aziy jilondin anch: “Kumulil mwan mband kudi mudi kumimin mem mu chir cha nsulangen.” Kulemp ni kwikal abachikinau kudi yitongijok ya mutapu winou, Atatuku in Kristu akweta rukat ayilamin nawamp anau awonsu, amakundj ni amband. Anvaj in Kristu akat kushinshikin nawamp anch anau awonsu atambwil malejan mafanyidina ni kuyanaken mulong wa ukash wa mujimbu.

◼ Yesu wayichingejina amband. Mu dirumburish dia in Yuda, uman wa mband ading aumen mudi wa muswik. Josef, mwin kwilej rusangu ra pasak wa mu chitot cha kusambish cha mivu, walejana anch: “Kadingap ni kwitiyij uman wa amband, mulong ading kusu amband.”

Chinyim ni chinech, Yesu wayitonda amband chakwel apana uman piur pa kuvumbuk kwend. (Mateu 28:1, 8-10) Amband inay in kushinshaman adinga atuman amana ni mes pamujipau ni kumujik Mwant wau, chayikasikena atwimbuy kwitiyij yayilejau kudi amband. (Mateu 27:55, 56, 61; Luka 24:10, 11) Pakwez, pamekanay chakusambish kudi amband, Kristu wavumbulau wamana anch awanyidin kupan uman chilik chimwing ni in kwilej akwau.—Midimu 1:8, 14.

Usu wa malejan mend nlel unou: Mu chikumangen cha Atuman a Yehova, amakundj akweta yisend amekeshining kalimish pantaliken ni amband kusutil ku kusend nich usey yitongijok yau. Ku mutambu wau, amakundj in Kristu akat ‘kuyilimish’ akajau mu kuyitesh nawamp.—1 Pita 3:7; Disambishil 21:12.

Yany ya Bibil Yiletin Musangar Kudi Amband

Anch amakundj amwimburij Kristu, ayinkishin amband kalimish ni want ipau wadinga mu rutong ra kusambish ra Nzamb mulong wa awiy. (Disambishil 1:27, 28) Pa ndond pa kwitiyij yitongijok yiyimp ya amakundj, amakundj in Kristu itiyijin chakwel yany ya Bibil yiyitakela, ni kulet musangar kudi ambay nau a uruw.—Efes 5:28, 29.

Pasambishay Yelena kwilej Bibil, wading umen mar nakash mulong wa mar ma mumeshau kudi nfumwend. Ndiy wapamina mwi ndond ya chisum, mwadingau ni kuyisend amband asotilau kwat ku usu ni mwading chaku cha kuyimesh amband mar. Ndiy walonda anch “Yom nileja mu Bibil yankasikesha, natesha anch kwading muntu kanang winkatila nakash ni wikwatina nich usey ni mwin kwinganaken. Natesha kand anch nfumwam wileja Bibil wela kuswimp chitongijok chend piur pamam.” Chilat chend chashikena kwikal uyakin pitiyay nfumwend kwilej Bibil ni kupwa watambula dibatish mudi umwing wa Atuman a Yehova. Yelena walonda anch: “Wikadil kal chilakej cha kwilam ni kushimpish muchim. Twileja kulikishin muntu ni mukwau.” Ndiy wapwisha nchik mazu mend? “Yany ya Bibil yankwasha chakin kamu kwiyov ukatinau ni ukinginau mu uruw wam.”—Kolosay 3:13, 18, 19.

Yelena kadiap kusu amwinend wamana yom yiney. Mamiliyon ma amband in Kristu makwet musangar mulong awiy ni anfumwau asadil usu pamwing chakwel asadila yany ya Bibil mu uruw wau. Amen kalimish, zoong, ni want ipau mu urund wa akadivar in Kristu.—Yohan 13:34, 35.

Amakundj in Kristu ni amband awonsu itiyijin anch chidiau akayitil ni antu akad kuwanyin, adi pakach pa chitang cha Nzamb yafishau “nich kwikal yakad usey.” Pakwez, kusutil ku kushejin piswimp ni Nzamb wau mwin rukat ni Tatuku, Yehova, akwet ruchingej ra “kudiokal kand [ayinau] mu uswik wa yom yivundila” ni kusanger “kwikol kwa uyaj wa an a Nzamb.” Ridi richingej ramushena mud ik mulong wa amakundj ni amband mwinshin mwa ranaken ra Nzamb!—Rom 8:20, 21.

[Kamushet kadia pa paj wa 9]

Ov, Kambuy Paul Wayijidika Amband Kulond?

Kambuy Paul wafunda anch “chifanyidin amband anenet zong mu kukumangan.” (1 Korint 14:34) Ov, chinech chirumburikin ik? Ov, ndiy wading upipeshin manangu mau? Bwat. Pakwez, wisambina yisu yivud piur pa malejan mawamp ma amband. (2 Timote 1:5; Titus 2:3-5) Mu mukand wend wayifundinay in Korint, Paul kayiyulap kusu amband pakwez wayiyula kand antu ading ni chipan cha jindim ni cha uprofet anch “anenet zong” pakatau kulond akaritiy akwau.a (1 Korint 14:26-30, 33) Chawiy lel, in Kristu amwing adinga ni mushiku wa kulejan ritiy rau risu ading akat kuyinenetish in kulond chakwel kwipul yipul mudi muchadinga chaku ku mutambu winou wa mangand. Mulong wa kwipuk kanvundangesh kinak, Paul wayikasikesha anch “chifanyidin ayipul anfumwau ku yikumbu.”—1 Korint 14:35.

[Dizu didia Kwishin kwa paj]

[Chipich chidia pa paj wa 10]

Yesu wamukwata nich usey Mariy Mandalen pamulejay kuya akayileja atwimbuy piur pa kuvumbuk kwend