Kurish Nich Mar ma Katat Nich Mushiku

“Nzamb ndiy kwikang kwetu ni usu wetu, nkwash wetu udi piswimp mu yakamish.”—KUS. 46:1.

OV, UKUTWISH KWAKUL?

Ov, mutapu ik tukutwisha kwipuk kwikal akwachikina nakash nich yinship ya mar?

Ov, mayingish ik tukweta matubachikina kumekesh mushiku?

Ov, ukwash ik uletinay Yehova chakwel tutwisha kurish nich mar?

1, 2. Ov, mar ik mayishikena antu avud, pakwez chom ik chisotinau atushalapol a Nzamb?

TUDI pa chisu cha mar. Mar mapandiken pa divu. Kuzal kwa divu, rinkind mukash upidilau anch tsunamis, kasu, mabeb, volkan, ruval mukash, rinkind mukash upidilau anch typhons, ni chipepil yashesha antu avud. Chikwau kand, milong ya dijuku ni ya muntu ni muntu yikat kulet wom ni yakamish. Chidi chakin mulong “chisu cha mar chikat kushik kudi antu awonsu.”—Mul. 9:11.

² Atushalapol awonsu a Nzamb atwisha kurish nich mikadil yiney yawonsu ya mar. Ap mwamu, tusotin kwikal tayad chakwel tutwisha kurish nich yikokujol yawonsu yikutwisha kutushiken mu machuku ma kurutu pashikina ditenchik dined kwinsudiel. Ov, mutapu ik tukutwisha kurish nich yikokujol yiney yawonsu ni kwipuk kusal anch yitupandakana? Ov, chom ik chikeza kutukwash kurish nich mar ma katat nich mushiku?

IlEJINA KUDI ANTU ARISHA MU MWOM WAU NICH MUSHIKU

3. Mudi mulejenau mu Rom 15:4, mutapu ik tukutwisha kutambul dikasikesh pitukata kurish nich mikadil ya mar?

³ Ap anch mikadil ya mar yikat kuyishiken antu avud kupandakanamu pasak, mar masambishinap nlel unou mu mangand. Talany amboku yitukutwisha kwilej kusutil kudi atushalapol a Nzamb atwisha kurish mu mwom wau nich mushiku.—Rom 15:4.

4. Ov, mar ik mamushikenay David, ni chom ik chamukwasha?

⁴ Shinshikin yamushikena David. Pakach pa yom yikwau, ndiy wafanyidina kurish nich ujim wa mwant, rupompat ra akankuny, kuyikwat akajend, kumutungun kudi antu asadila nend, ni kunenganan. (1 Sam. 18:8, 9; 30:1-5; 2 Sam. 17:1-3; 24:15, 17; Kus. 38:4-8) Rusangu ra Bibil rilejen anch mwom wa David wamekesha patok mar mamanay kusutil ku yikokujol yiney. Pakwez, mar minam mamusheshap muspiritu. Nich ritiy rawonsu, ndiy walonda anch: “[Yehova] udi usu wa mwom wam, ov, nany ukeza kangovish am wom?”—Kus. 27:1; tang Kuseng 27:5, 10.

5. Ov, chom ik chamukwasha Aburaham nenday Sara kurish nich mar mayishikena mu mwom?

⁵ Aburaham nenday Sara asutisha mwom wau wawonsu mu kushakam mu antent mudi angendj mwi ngand yayen. Mwom wadingap uswapela kudi awiy. Chikwau kand, awiy arisha kand nich yom mudi nzal ni ubaj wa michid yiyinyingumwokina. (Dis. 12:10; 14:14-16) Ov, mutapu ik watwishau kusal mwamu? Dizu dia Nzamb ditulejin anch Aburaham “wading uchingedil musumb ushichinga chikupu wabolay Nzamb ni kuutung ndiy amwinend.” (Heb. 11:8-10) Aburaham nenday Sara adandamena kushinshikin pa yom yidia kurutu, kaziyap ap pakemp mulong wa mangand mwadingau.

6. Ov, mutapu ik tukutwisha kumwimburij Job?

⁶ Job wamana mar makash. Tongin bil mutapu wiyovay pamanay anch yom yend yawonsu yasambisha kuyip. (Job 3:3, 11) Pamanay kupandakan kwa mar, ndiy kateshap kurumburik kwa yom yawonsu yamushikena. Chikwau kand, ndiy kaziyap. Ndiy walama kushinshaman ni ritiy rend mudi Nzamb. (Tang Job 27:5.) Chidi chilakej chiwamp chitufanyidina kwimburij!

7. Ov, yom ik yamushikena Paul padingay ni kumusadil Nzamb, pakwez yom ik yamwinkisha usu wa kudandamen?

⁷ Shinshikinany kand, chilakej cha Paul. Ndiy wamana ‘ubaj mu misumb, mu jimpay, ni mu karung.’ Ndiy wisambina piur pa ‘kufa chipuku ni impu ya mem, [kuburen] ndond ya kulal ni yidjal yiwanyidina.’ Paul wisambina kand piur pa kusutish ‘kujingil mu mem dichuku diakabuj, muten ni uchuku,’ mulong waat umwing mwadingay wajiya. (2 Kor. 11:23-27) Chikalap nchik yiney yawonsu, tal mwikadil wamekeshay padingay dichuku dimwing piswimp ni rufu mulong wa kumusadil Nzamb: “Pakwez yom yiney yashika chakwel kangal twichingej ayinetu, pakwez tumuchingej Nzamb ukat kuvumbul afu kwikal kand aom. Ndiy watukamunina ku ubaj ukash wa rufu, chad ukez kutukamunin kand kakwau kurutu.” (2 Kor. 1:8-10) Kwikil antu avud amana mar makash mudi marishay nich Paul. Pakwez, antu avud pakach petu akutwish kurumburil yovil yau ni akutwish kutaninamu dikasikesh mu chilakej chinech cha mushiku.

KANGAL ATUZIYISHA KUDI YOM YIYIMP

8. Ov, milong yikata kushiken nlel unou yikwet usu pad etu mutapu ik? Let chilakej.

⁸ Mu mangand mizwila mar nlel unou, yikokujol ni yakamish, antu avud akat kuziy. Ap in Kristu amwing niyawiy iyova mwamu. Lani,a wading mu mudimu wa chisu chawonsu ni nfumwend mu Australie, ulejen anch, patanau kanser wa mayel ku mujimbu wend, chinech cha muziyisha ni kumwovish kuyip nakash. Ndiy urumburil anch, “Mon wapandikesha mayej mam, chinech chasala anch niburena kwiyovil amwinam kalimish.” Kupwa, ndiy wamulama mfumwend wabarilau mu mwingong. Anch mwikadil wa mutapu winou watushiken, ov, chom ik tukutwisha kusal?

9, 10. (a) Chom ik tufanyidinap kumulikidil Satan kusal? (b) Ov, mutapu ik tukutwisha kurish nich uyakin ulejenau mu Midimu 14:22?

⁹ Tufanyidin kuvurik anch Satan usotin kushesh ritiy retu kusutil ku mar makash turishina nich. Pakwez, kangal twamulikidil chakwel ashesha musangar wetu mwamu. Jinswir 24:10 ulejen anch: “Anch walengumwok pa dichuku dia yakamish, usu wey ukepil.” Kutongijokin pa yilakej yidia mu Bibil, mudi yitwisambinang, kukez kutukwash kwikal ni usu pa chisu cha mar.

¹⁰ Chiwapin kand kuvurik anch tukutwishap kudiosh milong yawonsu. Pakwez, tukutwish kuchingejin anch yikutwish kutushiken. (2 Tim. 3:12) Midimu 14:22 utulejin anch: “Chifanyidin etu awonsu kuman mar nakash mulong wa kwandam mu Want wa Nzamb.” Pa ndond pa kushadish musangar, mulong wak tukutwisha kuyiman mudi mutapu wa kumekesh mushiku wen wimedina pa ritiy ren mu ukaliweny wa Nzamb wa kukukwashany?

11. Ov, mutapu ik tukutwisha kwipuk kwikal akwachikina nakash nich mar ma mwom?

¹¹ Tufanyidin kushinshikin pa yom yiwamp. Dizu dia Nzamb ditulejen anch: “Muchim wa musangar ukat kuwapish mpal, pakwez ushon wa mu muchim ukat kujip mupim.” (Jinsw. 15:13) In kukimbijol mu umwingang itiyija anch yitongijok yiwamp yikutwish kumwok muntu. Ayej avud inkishau mabuj ma mwon wa sukad (mwon wa chifanikesh) ayerika mulong atonga anch yiney yikutwish kuyikwash. Chinyim chamekana patok. Mulong ukash wa mujimb wa ayej amwing wayipa nakash mulong ayileja anch mwon wasadilau ukwet yibudikin yiyimp. Chawiy lel, kudandamen mu mikadil tumena anch tukutwishap kuswimp kukutwish kutuziyish nakash. Kumutambu ukwau, Yehova kakatap kutwinkish “sukad” bwat. Pakwez, ap mu yisu ya mar, utwinkishin ukwash wakin kusutil ku dikasikesh didiokila mu Dizu diend, ukwash wa akadivar netu, ni usu upaninau kusutil ku spiritu utumbila. Kushinshikin pa yom yiney kukez kutukwash. Pa ndond pa kushinshikin pa yom yiyimp, salany yom yikutwisha chakwel kurish nich mulong ni mulong, ni kushinshikin pa mikadil yiwamp ya mwom wey.—Jinsw. 17:22.

12, 13. (a) Ov, yom ik yayikwasha atushalapol a Nzamb chakwel ajijamana yibudikin ya mar? Let chilakej. (b) Mu yisu ya mar, ov, mutapu ik yikutwisha kumekan patok yom yidia ya usey nakash mu mwom wa muntu?

¹² Nlel unou, ngand jimwing jimen mar makash. Pakampwil, akadivar avud adia mwi ngand jinej amekesha ritiy rikash. Chinech chirumburikinap anch chading chiswapel. Kwinsambishil kwa muvu wa 2010, kuzal kukash kwa divu ni rinkind mukash utazukiningau anch tsunami watuta mu ul wa Chili washesha yikumbu yivud ni yom ya akadivar netu, ni washesha kand midimu yau. Chikalap nchik mwamu, akadivar adandamena kuya kurutu muspiritu. Samwel washadisha chikumbu chend chawonsu ulejen anch: “Ap mu mikadil yiney yikash, mukajam ni am twadandamena kukumangan ni kulejan. Nitiyij kal anch yaku yiney yatukwasha chakwel twipuka kushadish ruchingej.” Pamwing ni antu akwau avud, awiy ateka mar kuns ni ipana mu mudimu wa Yehova.

¹³ Mu Mwinses 2009, antu 80 pa chitot a mu Manila, musumb wa mu Philippines, ayishesha kudi mabeb makash. Mpich umwing washadisha yom yivud walonda anch: “Mabeb masala anch antu awonsu ikala chilik chimwing, mulong mar mayishikena ampich ni atuzwendj.” Chinech chituvurishin chiyul chinech chibabeshina cha Yesu: “Pakwez kumangejinany mapit men mwiur mwakad musu ni ankal akata kushesh, ap aij akata kwandam ni kwiy.” (Mat. 6:20) Kutungin mwom pa yom ya kumujimbu, yikutwisha kusheshik swa, kukat kunenganeshan yisu yivud. Chidi cha manangu mud ik kutungin mwom wetu pa urund wetu ni Yehova, ukutwisha kushal daang, chikalap nchik yom yikeza kutushiken!—Tang Hebereu 13:5, 6.

MAYINGISH MATUBACHIKINA KUMEKESH MUSHIKU

14. Ov, mayingish ik masadila anch tumekesha mushiku?

¹⁴ Yesu wading wij anch kukez kwikal mar pa chisu cha kwez kwend, pakwez ndiy walonda anch: “Kangal wovany wom.” (Luka 21:9) Nich ukwash wend mudi Mwant wetu ni Sakatang wa mangand mawonsu, tukwet mayingish makin ma kwikal nich ruchingej. Paul wamukasikesha Timote palonday anch: “Nzamb katwinkishap muchim wa kubwatanan, bwat, pakwez watwinkisha mwiku utumbila wa ukash, ni rukat, ni mutapu wa kwilam muntu amwinend.”—2 Tim. 1:7.

15. Let yilakej piur pa ruchingej rikash ra atushalapol a Nzamb, ni rumburil mutapu tukutwisha kwikal nich mushiku wa chilik chimwing.

¹⁵ Tal mazu mamwing mamekeshina ruchingej rikash ra atushalapol a Nzamb. David walonda anch: “[Yehova] ndiy usu wam ni rukimbu ram, muchim wam wakungamen kudi ndiy, inge, winkwashil kal. Chawiy muchim wam wasangara nakash.” (Kus. 28:7) Paul wamekesha ruchingej rend rikash, palonday anch: “Mu yom yiney yawonsu yikata kutushiken, etu tukat kupandakan nakash mulong wa ukash wa Kristu watukata.” (Rom 8:37) Chilik chimwing, pamanay anch udi mu ubaj, Yesu wayivurisha pakad ntad in kumutesh end anch ndiy wading mu urund ukash ni Nzamb, palonday anch: “Kinidiap kusu amwinam, mulong Tatuku udi ni yamam.” (Yoh. 16:32) Ov, mazu minam mamekeshin chom ik? Mazu minam mawonsu mamekeshin ruchingej rikash mudiay Yehova. Kukudish kwetu kwa ruchingej ra chilik chimwing mudiay Nzamb kukutwish kutwinkish mushiku wa kurish ni yikokujol yawonsu yikutwisha kutushiken nlel unou.—Tang Kuseng 46:1-3.

TANANY YIYUKISH YIDIOKILA MU YOM YITUKWASHINA KULAM MUSHIKU

16. Ov, mulong wak kwilej Dizu dia Nzamb kudi kwa usey kudi etu?

¹⁶ Mushiku wa mwin Kristu urumburikinap kwichingejin amwinend. Pakwez, udiokil ku kumwijik Nzamb ni kumuchingejin. Tukutwish kusal mwamu kusutil ku kwilej Dizu diend diafundau, Bibil. Nambaz umwing wading umena mar ma yakamish ulejen piur pa chom chamukwasha anch, “Natanga ma verse makasikeshina tupamp tuvud.” Ov, twasadila chiyul cha kwikal nich difukwil dia dijuku pakad kujing? Kusal yom yiney kukez kutukwash chakwel twikala nich mwikadil wadinga ni nfund a Kusend walonda anch: “A, mudi nikatila yijil yey! Nikat kuyitong mu yisu yawonsu.”—Kus. 119:97.

17. (a) Ov, yom ik yitukwashina kulam mushiku wetu? (b) Let chilakej chimekeshina mutapu wakukwasha rusangu ra mwom wa antu rafundau.

¹⁷ Tukwet kand mikand yimedina pa Bibil yikweta jinsangu jikasikeshina ritiy retu mudiay Yehova. Akadivar avud amana anch jinsangu ja mwom wa antu akwau jilejenau mu magazet metu jamukwasha nakash. Nambaz umwing wa mu Aziy wading wovila mayej ma mutu, wasangara patangay rusangu ra mwom wa mukadivar umwing wadinga mishoner pasak watwisha kurish nich mayej minam. Nambaz wafunda anch, “rusangu riner rankwasha kutesh kurumburik kwa mulong wam ni ra nginkisha ruchingej.”

18. Ov, mulong wak tufanyidin kusadil malembil?

¹⁸ Malembil makutwish kutukwash mu mikadil yawonsu. Kambuy wapwitina manangu metu piur pa usey wa malembil palonday anch: “Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya. Chad chisambu cha Nzamb chisutila ronganyin ra antu chikulam michim yen ni yitongijok yen mu Kristu Yesu.” (Fil. 4:6, 7) Ov, tukat kusadil nawamp yom yiney chakwel yitukasikesha mu yisu ya mar? Alex, mukadivar udia mu Grande Bretange wamana mar ma yakamish, walonda anch: “Kwambamb ni Yehova mu malembil ni kumutesh mu kutang Dizu diend kwading kwa ukwash nakash kudi am.”

19. Ov, chom ik tufanyidina kutong piur pa kukumangan ku yikumangan ya win Kristu?

¹⁹ Kukumangan ku yikumangan chidi chom chikwau cha usey chiletinau mulong wa kutukwash. Nfund a Kuseng wafunda anch: “Mupim wam winana kuman dibur dia [Yehova].” (Kus. 84:2) Ov, twiyovil chilik chimwing? Lani, ajimbulangau kwinsambishil, urumburil piur pa mutapu umenay urund wa in Kristu anch: “Kukumangan kuyikumangan kwadingap kwa kwisotil bwat. Namana anch chifanyidin kuya kwinikwa anch nisotin anch Yehova ankwasha kujijaman mu mar.”

20. Ov, mutapu ik kukata kutukwash kwipan mu mudimu wa kulejan?

²⁰ Tutambuiling kand mushiku kusutil ku mudimu wa kulejan Want. (1 Tim. 4:16) Nambaz umwing mu Australie wamana milong yivud ulejen anch: “Kulejan chading chom cha nsudiel nasota kusal, pakwez mukurump umwing wanleja anch tuya nend mu kulejan. Nitiyija kuya nend. Yehova wasambisha kwinkwash; mulong yisu yawonsu nasota kuya mu kulejan, nova musangar nakash.” (Jinsw. 16:20) Antu avud amana anch mu kuyikwash antu akwau, atunga ritiy rau mudiay Yehova, akasikesha kand ritiy rau ayinau. Mu kusal mwamu, avuramena milong yau ni adandamena kushinshikin pa yom ya usey.—Fil. 1:10, 11.

21. Ov, ruchingej ik tukweta piur pa mar makata kutushiken?

²¹ Yehova watwinkisha yom yivud chakwel yitukwasha kurish nich mar ma katat nich mushiku. Anch twasadil yom yiney, twatongijokin ni kwimburij yilakej yiwamp ya atushalapol a Nzamb, tukwikal nich kashinsh anch tukutwish kurish ni mar minam. Ap anch yom yiyimp yivud yikutwish kushiken mu ditenchik dined didia piswimp ni nsudiel, tukutwish kwiyov mudi Paul, walonda anch: “Akat kutwasol pansh, pakwez katusheshinap shutit. . . . Michim yetu kiyiziyinap.” (2 Kor. 4:9, 16) Nich ukwash wa Yehova, tukutwish kurish nich mar ma katat nich mushiku.—Tang 2 Korint 4:17, 18.

[Dizu didia Kwishin kwa paj]

[Chipich chidia pa paj wa 14]

Piurishina nich mar, tusadilany ukwash upaninau kudi Yehova