Ov, Chitwishikin Kwikal Mwin Kashinsh Mu Mangand Mijondila?
“Tukat kusot kushakam ni kashinsh mu yom yawonsu.”—HEBEREU 13:18.
CHIKALAP nchik mwikadil wetu wa ukayitil, mangand mutudia, ni Djabul yikutwish kwikal ni chibachikin chikash padi etu, tukutwish kurish nich chibachikin chau! Mutapu ik? Mu kumushejin Nzamb piswimp ni kusadil yany twilejina nakash mu Dizu diend, Bibil. Shinshikin yilakej yiney yaad.
CHANY CHA BIBIL: “Kangal wifanakeshany ayinen nich yaku ya antu a mangand minam.”—Rom 12:2.
Yom yashikena mu mwom: Guilherme udi mwin kwisak usadila nawamp mijikit yend mu Brésil. Ndiy ulejen anch chiswapelap kwikal mwin kashinsh. Ulondin anch: “Muntu usadila mudimu wa kwisak ukutwish kuwil swa mu mupit wa kuburen kashinsh, pamwing ap mulong wa chibachikin cha kuwanyish ntong ja arund ap anch mulong amumana ni ndiy mu mangand minam ma kubambel. Antu avud amening anch kukatulan milam ap kuyikatul milam chidi kwau chom chiwamp. Anch utakedil mudimu nich yisend ya nfalang jivud, chikasikening kwikal mwin kashinsh.”
Ap mwamu, Guilherme watwisha kurish nich chibachikin cha kuburen kashinsh. Ndiy ulondin anch: “Ap mu mwikadil wa kwisak mulikidilau wij, chitwishikin kwikal mwin kashinsh. Ufanyidin kwikal nich yany yikash ya mwikadil. Bibil wankwasha kuman yiyukish ya kwikal mwin kashinsh. Muntu wa kashinsh ukwet kom kishitwila, zoong mu muchim wend, ni kalimish. Ukutwish kwikal nich chibachikin chiwamp kudi antu adia nend.”
CHANY CHA BIBIL: “Antu asotila kwikal ampich akat kuwa mu yoziu, ni kufa mu mupit wa maku mayimp ma usup, makata kuyishikij antu ku kujiy ni ku kushadik. Mulong rukat ra nfalang diawiy disambishil dia yom yawonsu yiyimp.”—1 Timote 6:9, 10.
Yom yashikena mu mwom: André ukwet sosiyete wend ukata kutek ma mashin ma kuking nich chikumbu. Pakach pa yikumbu yikatay kutekang ma mashin mend kudi chisak chimwing cha in kusengan ndundu. Dichuku dimwing, kupwa kwa masengan mamwing makash, André waya ku mabiro mamwing chakwel alejana mudimu wasalay. Departement utadina milong ya nfalang wading ni midimu yivud ya kuchind nfalang pinatambula tiket ku ma biro. Mulong chisu chading chasutin kal, mukurump wa mudimu wayisutishina antu nfalang, ni André pa chisu chinicha.
André urumburil anch: “Pinashika kwol kwam, namana anch mukurump wa mudimu wansutishina nfalang, Namana anch ndiy kakutwishap pamwing ap kwijik nany watambwila nfalang jipandakenamu. Pakwez nijika anch muntu winou washadisha nfalang jinej wela kujifut amwinend! Nakwata mupak wa kuchirish nfalang. Nasala usu chakwel nisuta pakach pa antu adinga kwinikwa chakwel nichirisha nfalang jansutishinau. Mukurump wa mudimu washimoka nakash. Kwikil muntu mukwau wamuchirishinap kal nfalang.”
André ulejen kand anch: “Chisal chinech cha win kashinsh chasala anch mukurump winou wa mudimu asambisha kumulimish. Pasutil kal mivu yivu, pakach pa antu awonsu adinga pakusambish mu chisak chinech, nidi muntu umwing kusu udandamedina kusal. Nijikitishin mulong wa kusadil yany ya piur yidia mu Bibil yasala anch nikala nich katumb kawamp.”
Chidi chom chikasikeshina pa kwijik anch tukutwish, nich ukwash wa Nzamb kurish nich yibachikin yiyimp. Pakwez, usu usadilau antu ukutwishap dichuku ap dimwing kudiosh rawonsu uyimp. Mayingish madi makash—madi makash mulong antu akad kuwanyin kakutwishap kupwish milong yau ayinau. Ov, chinech chirumburikin anch uyimp ukezap kwikal ni nsudiel? Mutu wa mulong wa nsudiel udia pakach pa mitu yiney ushinshikidin pa chakul chikasikeshina chidiokila mu Bibil.