MUTU WA PA CHIBUR: CHITWISHIKIN KWIKAL NICH MWOM WA USEY
Ov, Chitwishikin Chakin Kamu Kwikal ni Mwom wa Usey?
“Mivu ya kupand kwetu yidi mivu makum sambwad, ap anch usu uwanyin makum chinan, pakwez kwibaz kwau kwawiy mar ni ushon kusu.”—Kuseng 90:10.
MAZU minam madi makin mudi ik! Mudizu dined nakash-nakash mwom wizwil sens nich “mar ni ushon kusu.” Pamwingap ukat kwiyipulapang anch, ‘ov, chitwishikin chakin kamu kwikal nich mwom nlel?’
Send, chilakej, cha Maria. Wading usadin chisu chin chawonsu, pakwez lel, ukwet mivu 84, katwishiningap kand kubudik mu chikumbu amwinend. Mu manangu usadin, pakwez mujimbu wend, umekeshin mudi anch, kakutwishap kand kwambamb. Ov, mutapu ik ukutwishay kwiyov anch mwom mudi winou udi wa usey?
Ov, chidi nchik piur pey? Watwisha chisu chimwing kwiyipul amwiney anch mwom wey ukwet usey. Mudimu wey ukutwish kukutambul chisu chivud, kukuziyish, ni kukuswedij nakash. Chitwishikin anch antu avud kawijap ap kubang piur pa mudimu ukash usu usadila. Ap anch mwom wey uwapil nlel, ukutwish kudandamen kwakam piur pa yom yifanyidina kukushiken mu machuku ma kurutu. Yisu yimwing, ukutwish kwiyov amwiney ap kunenganan. Mwom wa dijuku diey ukutwish kwizul too nich kupwitijan ni matend. Ukutwish kushadish mukatish wey umwing ku rufu. Ikundj umwing utazukinau anch Andre wading piswimp nakash ni tatukwend, kapamp kamwing wawa mayej ni wafa. Chamutapa nakash André ku muchim, ni wiyova anch kakutwishap kupandakan mwikadil winou ukash wa runeng.
Wikalap nchik ushon ukutwisha kutushiken, kudi chom chijim tuswiridina kwijik: Ov, chitwishikin chakin kamu kwikal ni mwom wa usey? Tukutwish kutan chakul kusutin ku mwom wa muntu weza pa divu kwasutin kal mivu 2 000—Yesu Kristu. Chikalap nchik yikokujol yawonsu yamushikena, chakin kamu Yesu wading nich mwom wa usey. Chawiy lel, tukutwish niyetu anch twalondul chilakej chend.