MUTU WA PA CHIBUR: OV, CHISU IK CHIKEZA MANGAND KWIKAL—MAKAD KASOLIKANY?

Kasolikany—Mulong Udia pa Mangand Mawonsu

JONATHAN, mwin Corée umwing wavadikina mu Amerik, wamana mar ma kasolikany ka chikit padingay mwanikanch. Papamay, wasambisha kukimb kwisu kwadinga antu akad katond, chikalap nchik chifu chend ap chikit chend. Ndiy wikala dokiter mu musumb wa kwindum kwa Alaska, mu États-Unis, pakwez mwikadil wa mujimbu wend wading wa chilik chimwing ni antu avud pakach pa ayej end. Ndiy wachingejina pamwing ap anch kwinikwa, mukach mwa rinkind ra mashik mapandikena mu cercle arctique, wela kwipuk rinkind ra mashik ma kasolikany.

Ndiy washadisha ruchingej riner rawonsu pasambishay kumwok mband umwing wadinga mwin Eskimo wa mivu 25. Pasambishay muyej winou kudiokal mu tul twa koma, ndiy wasambisha kumutal Jonatan pa chifu chend ni kumwel mazu mayimp nich dizu dia piur, mamekeshina anch uyikisin in Corée. Kudi Jonathan, chinech chamuvurisha nich kusansan mu muchim anch chikalap nchik usu wasalay mulong wa kuya kulemp, ndiy katwishap kwiyep ku kasolikany.

Yom yamushikena Jonathan yidi ya ushon nakash. Kasolikany kadi pa mangand mawonsu. Chimeken anch kwawonsu kudia antu, kudi kasolikany.

Chikalap nchik kupandikan kwa kasolikany, antu avud akat kukafish nich. Pakwez, yisal yau yidi yindjing. Ov, mutapu ik chikutwisha kupalangan mwamu chom chikisinau? Chimeken patok anch, antu avud alikina kasolikany akangeny ayinau kukalik. Ov, chinech chikutwish kwikal chakin kud ey? Ov, mutapu ik ukutwisha kwakul ku chipul chinech?

MULONG WA MUNTU IPEND

Ap anch twij ap bwat, chitukasikedin kujingunin anch tukwet kasolikany mu muchim wetu. Bibil urumburil mulong wak chidi mwamu palondinay anch: “Kwikil chom chikata kudimban mudi muchim wa muntu.” (Jeremiy 17:9) Chawiy lel, tukutwish kwidimb anch twatong anch tukat kuyitiyij antu a mitapu yawonsu. Ap tukutwish kutong anch tukwet mayingish makash ma kwikal nich yitongijok yiyimp piur pa antu a chisak kampand.

[Chipich chidia pa paj wa 4] — Ov, mutapu ik ukutwisha kwiyov anch yom mudi yiney yakushikena?

Mulong wa kumekesh anch chikasiken kujingunin anch ukwet kasolikany mu muchim wey, tongin bil pa chilakej chinech: Uyil mu balibal amwiney uchuku mu mididim yikash. Ansand aad akad ey kwijik asejin piswimp ney. Ameken anch akwet usu nakash, ni umwing pakach pau umeken mudi ukwet chom chimwing mu chikas chend.

Ov, ukulond anch ansand inay asotin kukusal nayimp? Yom yakushikena pasak yikutwish kukulej anch ufanyidin kubabal, pakwez, ov, yom yiney yakushikena yimekeshin chakin anch ansand inay aad adi ubaj kudi ey? Chipul chimwing ukutwisha kwiyipul chawiy ech, ov, ansand inay akutwish kwikal ni ulomb wa chikit ik ap adi a chisak ik? Chakul chey ku chipul chinech chikutwish kumekan patok. Chikutwish kumekesh anch, ukweting kasolikany mu muchim wey.

Anch twidimbinap mu michim yetu, tufanyidin kwitiyij anch tukweting etu awonsu kasolikany ka mutapu umwing ap ukwau. Ap anch Bibil witiyijin mutapu umwing wa kasolikany palejenay anch: “Muntu ukat kutal yimenay nich mes mend.” (1 Samwel 16:7) Etu awonsu twawila mu chibachikin chiyimp cha ukauntu—tukwet yisu yivud yibudikin yiyimp—ov kudi ruchingej kanang ra kwel anch chitwishikin kupandakan ap kudiosh kasolikany mu mwom wetu? Ov, tukez kuman chisu chikeza mangand minam kwikal makad kasolikany?

KASOLIKAY KADI PA MANGAND MAWONSU

Canada: “Kupwitijan kwashikena [mwi ngand] pakach pa kutenchik yijil ni ampurish mulong wa kulam mbil ya yisak kushalijan, katond ka chikit kadandamena kwikal njit jikash kudi antu.”—Amnesty International watekau mu Canada, mu muvu wa 2012.

Mwimputu: “[Makum manying ni chinan] pa chitot ma in Mwimputu mitiyijin anch asalap kwau usu wa kupwish kasolikany mwi ngand yau.”—L’intolérance, les préjugés et la discrimination: Rapor umwing wa Mwimputu, wa 2011.

Afrik: “Chisum ni katond pantaliken ni amband yimeken mu mangand mavud.”—Amnesty International Report 2012.

Népal: Antu atazukinau anch a “Dalits” (“akad kushejin”) amen mar ma katond mu milong ya nfalang, ya chisak ni ya yaku.”—Human Rights Watch World Report, 2012.

Mwimputu wa Kwingangel: “In Roumanie wa Mwimputu wa Kwingangel amening mar ma kasolikany ku yikumbu, milong yakad mwin politik ap umwing kupwish.”—The Economist, Mwinses 4, 2010.