Ov, Chisu ik Chikeza Mangand Kwikal​—Makad Kasolikany?

“NIKWET chilat.” Kwinyim kwa mivu makum matan, pa Kafumpul 28, 1963, mwan a ngand wa mu Amerik, mwant Martin Luther King, Jr., walonda mazu minam majim mu diskur diend dia pakampwil. Nich mazu mapwitina manangu, King walejana chilat chend, nich ruchingej, anch dichuku dimwing antu akez kasanger mwom wakad kasolikany ka chikit. Pakwez chitongijok chend wachilejana kudi antu amwing adinga mu États-Unis, chitongijok cha usey cha chilat chinech achitiya kudi antu a michid yivud.

Angond asatu kupwa kwa diskur dia King, pa Kalang 20, 1963, michid piswimp 100 yitiya Mazu ma Nations unies mulong wa Kushesh kwa mitapu yin yawonsu ya kasolikany ka chikit. Akwata mipak yikwau piur pa kasolikany ka chikit mu makum ma mivu yalondula. Usu winou wawonsu wasalau chakin kamu walangwisha chipul ech, ov, chom ik chashikena?

Pa Rish 21, 2012, Kalerik Mujim wa ONU Ban Ki-moon walonda anch: “Kudi manswik mavud ni yom ya mudimu ya usey​—pamwing nich plan wakabuj ufanyidina wa mudimu—​mulong wa kukangesh ni kujiyish kasolikany, kikala ka chikit ap ka yom yikwau, yikatau kulikidil. Pakwez, kasolikany kadandamedin kulet mar nakash ku ma miliyon ma antu mu mangand mawonsu.”

Ap mu jingand jayila kal kurutu mu kurishikish kasolikany ka chikit ni mitapu yikwau ya kasolikany, chipul chashala kal chidi ech: Ov, kuya kurutu kwinoku kwadiosha yovil yikash ya antu ap anch ayifundishin antu kulik kumekesh kasolikany kau? Antu amwing itiyijining anch kuya kurutu kwa kashinsh kukwashin kwau mulong wa kukangesh katond, pakwez kukutwish kuburen usu wa kudiosh kasolikany. Mulong wak? Mulong katond akat kukalikish kudi chijil, pakwez kasolikany kading mu yitongijok ni mu yovil ya antu, chiswapelap kukakangesh.

Chawiy lel, antu awonsu apakishina kudiosh kasolikany kafanyidinap ching kusu kulik yisal ya katond pakwez afanyidin kand kukarumun yitongijok ni yovil pantaliken ni antu a chisak chikwau. Ov, chinech chikutwish kusadik chakin kamu? Anch chidi mwamu, ov, mutapu ik? Talany amboku yom yivud yashikena yikeza kutukwash chakwel tumana anch antu akutwish kukarumuk ni kuyikwash kand antu akwau.

BIBIL WAYIKWASHA KUPWISH KASOLIKANY

Linda: Navadikina mu Afrique du Sud. Nayimana antu awonsu akad kwikal ayindel mu Afrique du Sud mudi antu a pansh, akad kwilej, akad kuchingejin, ni afanyidina kuyisadil ayindel. Nawila mu yitongijok ya kwikal nich kasolikany pakad kwijik amwinam. Mwikadil winou wasambisha kukarumuk, pinasambisha kwilej Bibil. Nileja anch “Nzamb kakwetap kasolikany” ni anch muchim udi wa usey kupandakanamu ulombu wetu wa chikit ap ridim tulondina. (Midimu 10:34, 35; Jinswir 17:3) Mu mukand wa in Filip 2:3, Bibil wankwasha kuman anch antu awonsu adi piur pam, ni nikutwish kupwish kasolikany. Kulondul yany ya Bibil mudi yiney kwankwasha chakwel nitwisha kuyisanger antu akwau chikalap nchik ulombu wa chikit chau. Pinap nimen anch nidiap kand mu uswik wa kasolikany.

Michael: Napamina mwi ndond yimwing mwadinga ayindel in Australie avud nakash, Nakudisha nakash kasolikany pantaliken ni in Aziy, nakash a Chinois. Mu kwendish motak anch naman muntu udia mudi mwin Asie nikufung madidish ni kulond mazu mayimp mudi “Yang kwol kwey, mwin Aziy ey!” Kupwa, pinasambisha kwilej Bibil, nasambisha kuyiman antu mu mutapu uyimenay Nzamb. Ndiy uyikatin chikalap nchik ndond yidiokilau ap mutapu umekenau ku mes. Rukat riner ranshika ku muchim wam, ni rikis ram rakarumuka rikal rukat. Chidi chom chamushena pa kuman kukarumuk kwinoku kukash. Chinech chakarumuna mutapu wam wa kuman mwom ni chasala anch nikala ni musangar ukash.

Sandra: Makwam wading wa ku musumb wa Umunede mwi Ngand ya Delta, mu Nigéria. Pakwez dijuku dia tatukwam didi dia kwi ngand ya Edo ni dikat kulond rudim ritazukiningau anch Esan. Mulong wa kushalijan kwinoku, makwam wamana mar ma kasolikany kakash ku dijuku dia tatukwam djat ni pa dichuku diafay. Kupwa nalonda anch nikezap kwovijan ap kwatijan dichuku ap dimwing ni muntu ulondina rudim ra Esan ap udiokila kwi ngand ya Edo. Pakwez pinadandamena kwilej Bibil, nasambisha kuman yom mu mutapu windjing. Pakwez Bibil ulejen anch Nzamb kakwetap kasolikany pakach pa antu, bwat ni mwawonsu umwovila wom ndiy umwitiyijin, ov, am nidi nany pa kukis antu mulong wa muchid wau ap rudim? Naswimpa chitongijok cham ni nasala chisambu ni yid ya dijuku dia tatukwam. Kusadil yijil ya Bibil kwasala anch nikala ni musangar ni chisambu mu manangu. Kwankwasha kand chakwel nikatijana ni antu akwau chikalap nchik mwikadil wau, chikit, rudim, ap muchid wau. Ov, ikundj ik wangata? Ndiy udi kand wa mwi ngand ya Edo ni ulondin rudim ra Esan!

Ov, mulong wak Bibil watwisha kuyikwash antu inay ni akwau chakwel apwisha rukis ni kasolikany? Chidi anch mulong Bibil udi Dizu dia Nzamb. Ukwet usu wa kukarumun yitongijok ni yovil ya antu akwau. Chikwau kand, Bibil ulejen kand chitufanyidina kusal chakwel tudiosha kasolikany kawonsu.

WANT WA NZAMB UKEZ KUDIOSH KASOLIKANY KAWONSU

Patwishina ronganyin ra Bibil kukukwash kwishinshikin ni kudiosh yovil yikash, kudi kand yom yikwau yaad tufanyidina kurish nich kurutu kwetwetu kudiosh kasolikany rawonsu. Chakusambish, chidi chitil ni kuburen kuwanyin kwa antu. Bibil ulejen patok anch: “Kwikil muntu ap kusu umwing wakad kusal chitil.” (1 Ant 8:46) Chawiy lel chikalap nchik usu tusadila, turishin njit ja chilik chimwing mudi kambuy Paul, wafunda anch: “Pinikutonga anch, ing nasalang yom yiwamp, nikat kutwish kutond ching kusu kusal yom yiyimp.” (Rom 7:21) Chawiy lel, chisu ni chisu, muchim wetu wakad kuwanyin ukutwish kulet “yitongijok yiyimp” yikutwisha kulet kasolikany.​—Marko 7:21.

Chakaad, kudi chibachikin cha Satan Djabul. Bibil ulejen anch udi “mwin kujipan” ni “udi mwin kuyipumbol antu a mangand awonsu.” (Yohan 8:44; Kujingunik 12:9) Chinech chilejen mulong wak kasolikany kapandiken kwawonsu ni mulong wak antu akangeny kwipuk kasolikany, kujipan, ni mitapu kushalijan ya katond ka ulomb wa chikit, ka relijon, ni ka chisak.

Chawiy lel, kurutu kwa kudiosh kasolikany rawonsu, chifanyidin kudiosh chitil ni kuburen kuwanyin kwa antu ni chibachikin cha Satan Djabul. Bibil ulejen anch Want wa Nzamb wawiy ukeza kusal mwamu.

Yesu Kristu wayileja in kumulondul anch alembila mu mazu minam: “Want wey weza. Rusot rey arusala pansh mudi mwiur.” (Mateu 6:10) Kusutil ku Want wa Nzamb, katond kawonsu​—ni mitapu yawonsu ya kasolikany​—yikez kupwa.

Pakeza kwez Want wa Nzamb ni kuyikel yom yawonsu pa mangand, Satan akez “kumukas,” ap kumukangesh chakwel ‘kangal atwisha kuyidimb kand in michid.’ (Kujingunik 20:2, 3) Kukez kwikal chad “mangand masu,” ap chisak cha antu atentamina, mulong “kwinikwa kwawiy kukeza kwikal kutentam.”a​—2 Pita 3:13.

Antu akeza kushakam mu chisak chinech chitentamina akez kwikal awanyidina, akad chitil. (Rom 8:21) Mulong adi an a Want, “kukez kikalap chom cha ubaj ap chom chiyimp.” Mulong wak? Mulong “ngand yikez kizul nich ronganyin ra [Yehova].” (Isay 11:9) Pa chisu chinicha, antu awonsu akez kilej jinjil ja Yehova Nzamb ni kwimburij rukat rend. Disudiel dined dirumburikin disudiel dia kasolikany kawonsu, “mulong Nzamb kakwetap kasolikany.”​—Rom 2:11.