Yom Yikangenyay Siyans Kuwanyish

Nlel unou, ma buku mavud malejena yitongijok ya antu akad kwitiyij kwikalaku kwa Nzamb amapalangeshin nakash. Mikand yiney yapwita yitongijok ya antu avud ni yalangwisha ntad ni kupwitijan. Piur pa chinech, mwin kwilej milong ya mijir David Eagleman wafunda anch: “In kutang amwing atongining anch . . . in siyans ijing yom yawonsu.” Walonda kand anch: “Pakwez siyans muwamp ukat kuburil manangu ma antu, ni rusangu ra siyans ridi rusangu rimwing rikweta yom yishimokishina.”

Mu chirung chasutina, in siyans a manangu ajingunina yom yikash mu kukimbijol kwau kwa yakul ku yipul yishimokishina piur pa chitangil. Pakwez, amwing pakach pau arumbuka kand mu kukimbijol kwau. Isaac Newton wading mwin siyans mujim nakash. Ndiy walejana anch kudi usu umwing usadina anch divu dipwita ma planet mudi atutumbu, ni yisak ya atutumbu yidia mwiur. Ndiy wasala malejan ma tupamp masadidinau mu maordinater nlel, mulong wa kuya mwiur, ni yom ya murinzwiz. Pakwez, Newton wasala kand siyans watazukau anch alchimie wasadinau mu milong ya kwilej atutumbu ni kukarumun utad win wawonsu chakwel wikala utad wa or.

Mu mivu 1 500 kurutu kwa Newton, Mwin Grek Ptolemy wileja milong ya atutumbu wajingunina diur nich mes mend kusu. Ndiy walondula maplanet mwiur uchuku ni wading nich ukaliweny wa kusal ma Kart ma jingand. Pakwez ndiy witiyija anch divu diading pakach pa yitang yawonsu. Mwin kwilej atutumbu Carl Sagan wafunda piur pa Ptolemy anch: “Anch chitongijok chinech cha makasu chakwel anch divu didi pakach pa yitang yawonsu achitiyija mu mivu 1 500, chinech chimekeshin anch ap muntu wa manangu ukutwish kudimban.”

Nlel unou in siyans akweting yikokujol ya chilik chimwing mu kukimbijol kwau. Ov, akez kujingunin kamu kurumburik kwakin kwa yom ya mwiur? Ap anch chiwapidil kwijik kuya kurutu kwa milong ya siyans ni kuman mutapu tukata kutaninamu, pakwez chidi cha usey kwijik anch kudi yom yikutwishap siyans kusal. Paul Davies mwin kwilej ya mu rinzwiz walonda anch: “Chikasiken kamu kupan kurumburik kwakin piur pa diur diawonsu chikala mu mutapu win wawonsu ap kuwanyin kwa yom yawonsu yidiamu.” Mazu minam mamekeshin patok uyakin winou ulejena anch: Antu kakutwisha kwijik nawamp disambishil dia yom yidia pa mangand. Chawiy lel anch kudi chitongijok chiletinau kudi in siyans mulong wa kurumburil piur pa kwikalaku kwa yom yawonsu kusutil ku kukimbijol kwau, chifanyidin kubabal kurutu kwa kwitiyij yitongijok yiney.

Bibil wisambidin piur pa mutapu ushimokishena wa yom yatangau anch: “Yom yiney yawonsu yidi kusu kachikunku ka midimu [ya Nzamb], niyetu tukat kutesh ching kusu mu kayauyau” (Job 26:14) Kudi kand yom yivud nakash yakad antu kwijik ap kujingunin. Chakin kamu, mazu ma kambuy Paul mafunday pasutin kal mivu 2 000, madandamedin kwikal makin: “A, kujimb kwa rupit ni chiyul ni ronganyin ra Nzamb! Dirumburish diend diakad kwijikan ni jinjil jend jakad kurumburik kudi antu!”​—Rom 11:33.