Kristu Ukash wa Nzamb

1. Ov, mulong wak Paul walonda anch “Kristu udi ukash wa Nzamb”?

YEHOVA wamekesha usu wend upandakena mu mitapu kushalijan kusutil kudi Yesu. Padingay Yesu pa divu, wasala yilay yivud. Tukutwish kuyitan yilay yiney mu Bibil, ni yikutwish kukasikesh ritiy retu. (Mat. 9:35; Luka 9:11) Mwaning, Yehova wamwinka Yesu usu uvud. Chawiy chalonday Paul anch: “Kristu udi ukash wa Nzamb.” (1 Kor. 1:24) Chad, mutapu ik ukutwisha yilay ya Yesu kwikal ni usu padi etu?

2. Chom ik tukutwisha kwilejin ku yilay ya Yesu?

² Kabuy pita walonda anch Yesu wasala yilay ap “yishimokish.” (Mid. 2:22, TMK) Yom ik yitufundishina yilay yiney? Yitufundishin yom yikezay Yesu kusal mu mivu Kanan ya Kuyikel kwend. Yilay yiney yitwinkishin kand ronganyin piur pa untu wend ni wa Tatukwend. Mu mutu wa mulong winou, tukushinshikin yilay yisatu yasalay Yesu, ni tukwilej kand mutapu yikutwisha kwikal ni usu padi etu nlel ni machuku ma kurutu.

CHILAY CHIFUDISHINA MUCHIMU WA KUPAN

3. (a) Ov, mulong wak Yesu wasala chilay chend chakusambish. (b) Mutapu ik wamekeshay Yesu muchim wa kupan mu Kana?

³ Yesu wasala chilay chakusambish ku musambu wa uruw wa mu Kana wa ku Galalia. Kwading angendj avud nakash. Pakwez, ap anch chading mwamu, maar mapwa. Pakach pa angendj inay pading kand Mariy, makwend a Yesu. Wading wij nawamp uprofet wawonsu wading ulondina piur pa mwanend, mulong wading wij anch ading afanyidin kumutazuk anch ‘Mwanenday Udia Piur.’ (Luka 1:30-32; 2:52) Ov, Mariy wading wij anch mwanend wading ukwet usu wa kusal mwamu? Chidi chakin anch, ku musambu winiwa, Mariy ni Yesu ayovila angatan riy ni asota kuyikwash. Yesu wading wij anch chading chifanyidin kuyikwash mulong wa kwak angendj. Chawiy chakarumunay Yesu alitre a mem mudi 380 kwikal “maar mawamp nakash.” (Tang Yohan 2:3, 6-11.) Amushindila Yesu chakwel asal chilay chinech? Bwat. Wasala mwamu mulong wading uyibangidin antu ni mulong wading kumwimburij Tatukwend pa kumekesh muchim wa kupan.

4, 5. (a) Ov, dilejan ik twilejidina ku chilay chakusambish cha Yesu? (b) Chom ik chitufundishina chilay cha mu Kana piur pa machuku ma kurutu?

⁴ Yesu wakarumuna mu chilay mem kwikal maar mawamp nakash, ni mavud kand mulong wa antu avud. Ov, wij chitufundishina chilay chinech? Rusot ra Yesu ra kusal chilay chinech ritwinkishin kashinsh anch maswir ma antu makwet usey nakash kudi ndiy ni kudi Tatukwend. Yehova ni Yesu kakwetap choy. Tong bil mutapu ukusadinay Yehova usu wend nich muchim uwamp mwi ngand yisu mulong wa kupan yom yiwamp ku “michid yawonsu” ya pa divu.​—Tang Isay 25:6.

⁵ Tong bil pa mulong winou! Chisu chikat kwez chikuwanyina maswir ma pakampwil ma antu​—ma kwikal ni yakudia yivud ni chikumbu yau yiwamp. Musangar wetu upandiken mulong wa yom yiwamp yikaninay Yehova kutwinkish mu mangand makwikala Paradis.

6. Ov, mutapu ik wasadinangay Yesu usu wend, ni mutapu ik tukutwisha kumwimburij?

⁶ Yesu kasadilap usu wend mu mutapu uyimp. Tongin piur pa chashikena chisu chamwozau kudi Djabul, pamulejay anch karumun mayal mikala mukat. Yesu walika kusadin usu wend mulong wa kwisangaresh amwinend. (Mat. 4:2-4) pakwez wasadina usu wend mulong wa kwakul ni kuwanyish maswir ma antu akwau. Mutapu ik tukutwisha kwimburij mwikadil wend wa kulik kwikal ni choy? Uyikasikeshin atushalapol a Nzamb chakwel ikala ni “chaku cha kupan.” (Luka 6:38, NWT) Ov, tukutwish kumekesh mwikadil wa kupan pa kuyitazuk akwetu ku yikumbu yetu mulong wa kudia nau yakudia ni kusanger mambamb ma muspiritu? Tukutwish kwitekin chisu kupwa kwa yikumangan mulong wa kumukwash muntu, kumutesh parijekinay diskur diend? Ukwash ik tukutwisha kumwinkish muntu ukweta kuswir kwa kumufumb mu mudimu wa kulejan? Tukutwish kumekesh anch twimburijin muchim wa kupan wa Yesu chisu tuyikwashina antu akwau anch chitwishikin.

‘ANTU AWONSU ADIA NI IKUTA’

7. Ov, mashakamin ik makudandamena kwikalaku mu ditenchik dined diyimp dia yom?

⁷ Uzwendj usambishinap nlel. Yehova wayileja in Isarel anch atuzwendj kakezap kuburen mwi ngand yiney. (Kuv. 15:11) Kwinyim kwa yitot ya mivu, Yesu walonda anch: “En ushichany nau atuzwendj machuku mawonsu.” (Mat. 26:11) Ov, Yesu wakimba kulond anch atuzwendj afanyidin ching kwikalaku pa mangand? Bwat, wakimba kulond anch atuzwendj akudandamen kwikalaku mu ditenchik dined diyimp dia yom. Pakwez, chikwikal nchik chisu tukushakama mwi ngand yisu! Chisu chinicha, kukwikalap kand kazwendj ap umwing. Antu awonsu akwikal ni yakudia yivud, ni akwikut.

8, 9. (a) Ov, mulong wak Yesu wadisha yitot ya antu? (b) Chom ik chikusangareshina piur pa chilay cha kuyidish yitot ya antu?

⁸ Nfund a kuseng wamuleja Yehova anch: “Ukat kuburil chikas chey ni kuwanyish rusot ra chom chawonsu chikweta mwom.” (Kus. 145:16) Padingay pa divu, Yesu wamwimburija Tatukwend mu mutapu uwanyidina ni wabanginang nakash pa maswir ma antu akwau. Kasalap mwamu mulong wa kumekesh anch wading ukwet usu nakash. Muchim wend uwamp wawiy wamukwasha kuyibangin antu akwau. Twambambinany bil piur pa Mateu 14:14-21. (Tang.) In kwilej a Yesu eza kudi ndiy mulong wa kumwipul piur pa yakudia. Kasalap mwamu mulong ading ovil nzal, pakwez anenganana mulong antu ading aziyang kal ni ovang kal nzal mulong wa kumulondul Yesu ra pansh kudiokal mu mal mau. (Mat. 14:13) Ov, chom ik chafanyinay Yesu kusal?

⁹ Nich mikat yitan ni ansh aad, Yesu wayidisha antu 5 000, ni amband ni an! Yitusangareshinap pa kuman mutapu wasadinay Yesu usu wend wa kusal yilay mulong wa kuyibangin antu avud, ni anikanch kand? Yisak ya antu ‘yadia ni yikuta.’ Chinech chimekeshin anch kwading yakudia yivud nakash yashalap. Yakudia yayinkau kudi Yesu yayinkisha usu wadingau nich kuswir mulong wa kuchirik kwol kwau. (Luka 9:10-17) Kupwa kwa kwikut, in kwilej izwisha yimpay 12 ya yakudia yashalap!

10. Ov, chom ik chikushikena nzal ni uzwendj mu machuku ma kurutu am?

¹⁰ Nlel, mulong wa ris ni antakel ayimp, yitot ya mamiliyon ma antu akat kulal ni nzal mulong wa kuyikel kuyimp. Ap anch akadivar netu amwing ameken anch akwet yakudia yivud, kakatap kwau “kwikut.” Pakwez, chisu chasej kal piswimp chikezau antu amuziyidina Nzamb kusanger mangand makad uyimp ni uzwendj. Anch wading ukwet usu, ov, welangap kuwanyish maswir ma antu? Nzamb wa dikand diawonsu ukwet usu ni kuswir kwa kusal mwamu​—usotin kusal mwamu piswimp ap. Mwaning, wawiy mutapu utonginay kusal!​—Tang Kuseng 72:16.

11. Ov, mulong wak ukwet kashinsh anch Kristu ukusadin piswimp ap usu wend pa mangand mawonsu, ni chinech chikubachikin kusal ik?

¹¹ Padingay pa divu, Yesu wasala mudimu mu teritwar kakemp, mu chisu chikemp mu mivu yisatu ni chikunku. (Mat. 15:24) Mulong udi Mwant utumbila, teritwar wend ukwikal pa mangand mawonsu. (Kus. 72:8) Yilay ya Yesu yitwinkishin kashinsh mu ukaliweny wend ni maswir mend yikusadinay piswimp ap mulong wa uwamp wetu. Ap anch tukutwishap kusal yilay, tukutwish kupwitin yitongijok ya antu ku Dizu dia Nzamb. Uprofet wa Bibil utwinkishin kashinsh piur pa machuku mawamp mezina kurutu oku. Mulong tudi Atuman a Yehova alejena ronganyin rakin riner piur pa machuku ma kurutu, ov, umenanyap anch tukwet chikal cha kuyilej antu akwau? (Rom 1:14, 15) Tutongijokinany amboku piur pa yitubachikina kuyilej antu rusangu ruwamp ra Want wa Nzamb.​—Kus. 45:1; 49:3.

YEHOVA NI YESU AKAT KUYIKEL PIUR PA USU WA CHITANGIL

12. Ov, mulong wak tukutwish kwikal nich kashinsh anch Yesu wij nawamp mangand?

¹² Patangay Nzamb mangand ni yom yawonsu, Yesu wading nend pamwing mudi “mwant wa mudimu.” (Jinsw. 8:22, 30, 31; Kol. 1:15-17) Chawiy lel, tukutwish kulond anch Yesu wij nawamp mangand. Wij mutapu wa kusadin, kutakel ni kwangan mapit ma divu nawamp ni mu mutapu uwanyidina.

13, 14. Pan chilakej chimekeshina anch Kristu ukutwish kuyikel piur pa usu wa chitangil.

¹³ Padingay pa divu, Yesu wamekesha anch udi “ukash wa Nzamb” payikelay piur pa usu wa chitangil. Shinshikin bil mutapu waninetishay rikind mukash watuta ni wakimba kujiyish mwom ya in kwilejend. (Tang Marko 4:37-39.) Mwin kwilej milong ya Bibil umwing urumburil anch: “Dizu dia Grek [difundinau anch “rikind mukash” didia mu Marko 4:37] adisadila mulong wa kumekesh anch wading rikind upandakena ap ouragan [chipepil chiyimp nakash]. Kalondap kusu mulong wa rikind . . . pakwez walonda piur pa rikind mukash watuta ni yidjimin yikash, walangwisha mambek, ruval, ni kunyikesh yom yawonsu mulong wa kuyijiyish.” Rusangu ra Mateu rirumburil anch rikind winou wading “rikind mukash upandakena.”​—Mat. 8:24.

¹⁴ Tongin bil pa chom chinech: Kristu waziyang kal mulong wa mudimu wend wa kulejan. Mambek, tumanas tukemp tukemp twa mem ni mafuril yading yasambish kal kwandam mu waat. Pakwez, ap anch mambek ni rikind mukash yading yikat kwibul ku waat, Yesu wading ulel kwend tul. Wading ukwet kuswir kwa kwiswedish. Mulong in kwilejend ova wom, amulangwisha Yesu ni amuleja anch: “Tudi piswimp ni kufa!” (Mat. 8:25) Palankay, Yesu wamubarokina rinkind ni wamela mambek anch: “Ikuchika kamu kwey zong!” ni rikind mukash wakatuka. (Mar. 4:39) Pakwez, Yesu wamubarokina rinkind ni mambek chakwel yinineta. Chom ik chashikena? “Rinkind wanineta, kwikal kamu pukupuku zong.” Usu mudi ik wamekeshay Yesu!

15. Ov, mutapu ik wamekeshay Nzamb wa Dikand Diawonsu anch ukwet usu wa kuyikel piur pa usu wa chitangil?

¹⁵ Yehova ndiy wamwinka Kristu usu, chawiy lel tukwet kashinsh anch Nzamb wa Dikand Diawonsu ukwet usu nakash wa kuyikel usu wa chitangil. Tushinshikinany bil yilakej yimwing. Kurutu kwa Mabeb kusambish, Yehova walonda anch: mu “Machuku sambwad, am nikez kutum ruvul pansh, ukez kunak machuku makum manying ma muten ni makum manying ma uchuku.” (Dis. 7:4) Chilik chimwing, mu Kubudik 14:21, Bibil ulondin anch: “[Yehova] wamubachika rikind mukash wa kwingangel.” Chikwau kand tutangin mu Yona 1:4 anch: “[Yehova] watuma rinkind mukash pa Karung, chad waat wela kubarik mulong wa mambek masweja.” Chikasikeshin kwijik anch Yehova ukwet usu wa kuyikel piur pa usu wa chitangil. Chakin, machuku ma kurutu ma mangand madi mu makas mawamp.

16. Ov, mulong wak chisangareshin kwijik anch Yehova ni Yesu akwet ukash wa kuyikel piur pa usu wa chitangil?

¹⁶ Chikasikeshin kwijik anch Yehova ni Yesu akwet usu wa kuyikel piur pa usu wa chitangil. Mu Mivu Kanan ya Kuyikel kwa Kristu, antu awonsu akushakama pa divu akwikal mu diking. Mar mawonsu ma chitangil makata kuyovish antu wom makwikalakwap kand. Kukwikalap diyingish ap dimwing dia kwov wom wa yipupu mudi: rikind mukash, tsunami (mambek makash), kubarik kwa volkan, ni kuzal kwa divu mwi ngand yisu. Chisangareshin mudi ik pa kwijik anch kukwikal chisu chikeza usu wa chitangil kulik kujipan ap kusalan nayimp, mulong “mwinkand wa Nzamb [ukwikal] nau antu”! (Kuj. 21:3, 4) Tufanyidin kwikal nich kashinsh anch Yehova ukumwinkish Yesu usu wa kuyikel piur pa usu wa chitangil mu mivu Kanan ya Kuyikel kwend.

MWIMBURIJA KATAT NZAMB NI YESU

17. Ov, mutapu ik tukutwisha kumwimburij Nzamb ni Kristu?

¹⁷ Pakwez, chinyim ni Yehova ni Yesu, tukutwishap kwijik kukangesh mar ma chitangil kusadik, pakwez tukutwish kwikal ni usu mu chilik kanang. Ov, mutapu ik tukutwisha kuusadin? Tukutwish kusal mwamu anch twasadin Jinswir 3:27. (Tang.) Anch anamakwetu amen mar, tukutwish kuyikasikesh ni kuyikwash nich yom ya kumujimbu, mu yitongijok, ni muspiritu. (Jinsw. 17:17) Chilakej, tufanyidin kuyikwash kupwa kwa mar ma chitangil kusadik. Tesh bil mutapu wovay mwadiamufu wading ni chikumbu chasheshika chisu cha rinkind mukash: “Nikwet musangar nakash wa kwikal mu dirijek dia Yehova, chidiap ching mulong wa ukwash wa kumujimbu nitambwila, pakwez chidi kand mulong wa ukwash wa muspiritu.” Nambaz mukwau wadinga mujich wamana anch wakangany kal chisu chawishay rinkind mukash chikumbu chend. Kupwa kwa kutambul ukwash, walonda anch: “Nimenap cha kulond! Nitwishinap kurumburil mutapu niyovila . . . Kujikitish kudiay Yehova!” Tukwet musangar nakash mulong akadivar ni anambaz netu akat kubangin kamu chakin pa maswir ma antu akwau. Tukwet kand musangar mulong Yehova ni Yesu Kristu akat kutubanginang chakin kamu.

18. Ov, chom ik chikusangareshina piur pa rutong ramubachika Yesu kusal yilay?

¹⁸ Mu mudimu wend wa kulejan, Yesu wamekesha anch udi “ukash wa Nzamb.” Pakwez, chom ik chamubachikanga Yesu kusal mwamu? Kasadinap dichuku ap dimwing usu wend mulong wa kuyishimokish antu ap mulong wa kwisangaresh amwinend. Chakin, yilay yasalay Yesu yamekesha rukat radingay nich mulong wa antu. Tukwilej yom yivud piur pa yom yiney mu mutu wa mulong ulondwilaku ou.