Shakamany Kukwatijan ni Malembil ma Chilakej​—Chikunku cha I

1. Ov, mutapu ik tukutwish kusadil mu mudimu wetu wa kulejan malembil mafundinau mu Mateu 6:9-13?

ANTU avud akutwish kuchirikin Malembil ma Nsalejetu mu manangu mau. Mu mudimu wetu wa kulejan ku chis ni chis, twisambidining yisu yivud piur pa malembil minam mulong wa kuyikwash in chikumbu chakwel ijika anch Want wa Nzamb udi winyikel wakin ukeza kukarumun yom mu mutapu wamushena nakash pa divu. Tukutwish kwisambin piur pa chikunku cha kusambish cha malembil minam mulong wa kumekesh anch Nzamb ukwet dijin dia pakampwil, difanyidina kutumbish, ap ‘kudikwat nich katumb.’​—Mat. 6:9.

2. Ov, mutapu ik twija anch Yesu kasotap anch malembil ma chilakej minam tusambisha kumachirikin yisu yawonsu pitukata kulembil?

² Ov, Yesu wasota anch malembil minam asambisha kumachirikin dizu ku dizu chisu chawonsu tukata kulembil, mudi musadiningau antu avud adia mu Kristendom? Bwat. Kurutu kwa Yesu kulejan malembil minam ma chilakej, ndiy walonda anch: ‘Piukulembilanya kangal wachirikinany mazu mamwing mamwing.’ (Mat. 6:7) Pa chisu chikwau, ndiy wachirikina malembil minam, pakwez wasadina mazu kushalijan. (Luka 11:1-4) Chad, Yesu watukwasha kwijik yom tufanyidina kwit kukwatijan ni usey wa chom ni chom. Chawiy lel, chiwanyidin kumatazuk malembil minam anch malembil ma chilakej.

3. Ov, pa yipul ik yimwing tukutwisha kutongijokin pitukwileja malembil ma chilakej?

³ Mu mutu wa mulong winou ni ulondwilaku, tukez kwilej yom yidia mu malembil ma chilakej. Pitukusala mwamu, iyipula anch, ‘Ov, mutapu ik malembil minam ma chilakej makutwish kwinkwash kutenchik malembil mam? Ni cha usey nakash chidi anch, ov, mwom wam ukwatijadin nich malembil minam?’

“TATUKWETU UDIA MWIUR”

4. Ov, dizu “Tatukwetu” dituvurishin ik, ni mulong wak in Kristu akweta ruchingej ra kushakam pa divu amutazukining Yehova anch “Tatuku”?

⁴ Dizu “Tatukwetu,” pa ndond pa kulond anch “Tatukwam,” dituvurishin anch tudi mu chisak cha ‘anamakwetu in Kristu’ akatijadina chakin kamu umwing ni mukwau. (1 Pita 2:17) Chidi chisend cha usey mud ik! In Kristu Azizidilau many, avadika mudi an a Nzamb nich ruchingej ra mwom wa mwiur, amutazukining kamu Yehova mudi “Tatuku” mu mutapu uwanyidina. (Rom 8:15-17) In Kristu akweta ruchingej ra kushakam chikupu pa divu akutwish niyawiy kumutazuk Yehova anch “Tatuku.” Ndiy udi mwin kuyinkish Mwom, ni uwanyishin ni rukat maswir ma in kumwifukwil awonsu akin. Antu akweta ruchingej ra kushakam pa divu akez kwikal niyawiy chakin kamu an a Nzamb pakezau kwikal in kuwanyin ni kumekesh kushinshaman kwau ku choziu cha nsudiel.​—Rom 8:21; Kuj. 20:7, 8.

5, 6. Ov, chipan ik chiwamp nakash chikutwishau anvaj kuyinkish anau, ni chom ik chifanyidinay kusal mwan mwawonsu nich chipan chinech? (Tal chipich cha kwinsambishil.)

⁵ Anvaj ayinkishining anau chipan chiwamp payifundishiningau anau mutapu wa kulembil ni kuyikwash kumuman Yehova mudi Tatuku wa mwiur ukata kuyibangin. Mukadivar umwing usadina katat mudi kalam wa munyingumuku mu Afrique du Sud uvurikin anch: “Kudiosh pavadikau anetu amband, nalembila nau pamwing uchuku wawonsu chisu chinadinga ku chikumbu. Yisu yivud, anetu amband alondang anch, twavurikap kamu mazu ma malembil minam ma uchuku. Pakwez, avurika mutapu uwamp ni utumbila wadingau ni kwambamb ni Tatukwetu, Yehova, ni iyova kwikal mu chisambu ni mu diking. Pasambishau niyawiy kulembil, nayikasikesha chakwel alembila ni dizu dia piur chakwel nitwisha kutesh yitongijok ni yovil yau pantaliken ni Yehova. Chinech chading chisu chiwamp cha kujingunin yom yadinga mu michim yau. Kupwa nasambisha kuyitakel nawamp mulong ateka yom ya usey yidia mu malembil ma chilakej chakwel malembil mau mikala ma usey nakash.”

⁶ Chishimokishinap, pa kuman anch an a mband a mukadivar winou akula kamu nawamp muspiritu. Akwet katat musangar mu uruw wau, ni asadin rusot ra Nzamb mu mudimu wa chisu chawonsu pamwing ni anfumwau. Anvaj akutwish kuyinkish anau chipan chijim nakash mudi kuyikwash kukudish urund wau wa piswimp ni Yehova. Chakin kamu, muntu ni muntu pakach petu ufanyidin kulam urund winou wa piswimp ni Yehova. Chinech chitin kwilej kukatish dijin dia Nzamb, ni kudilimish nakash.​—Kus. 5:11, 12; 91:14.

“DIJIN DIEY ADITUMBISH”

7. Ov, chisend ik chikwetau antu a Nzamb, ni chitin ik kud etu?

⁷ Tukwetap ching kusu chisend cha kwijik dijin dia Nzamb pakwez tukwet kand chisend cha kwikal mudi ‘antu atazukinau pa dijin diend.’ (Mid. 15:14; Isay 43:10) Chawiy tukata kulembil anch Tatukwetu wa mwiur: “Dijin diey aditumbish.” Kulembil mwamu kukutwish kukubachik kumwit Yehova chakwel akukwasha kwipuk kusal ap kulond chom chawonsu chikutwisha kusadish masaal dijin diend ditumbila. Tusotinap kwikal mudi antu amwing a mu mivu chitot ya kusambish kasadinap yom yalejanau. Kambuy Paul wayifundina anch: “Antu a michid yikwau akat kusaal dijin dia Nzamb masaal mulong wenen.”​—Rom 2:21-24.

8, 9. Let chilakej chimekeshina mutapu ukatay Yehova kuyiyukish antu akata kutumbish dijin diend.

⁸ Tusotining kutumbish dijin dia Nzamb. Pafay nfumwend, nambaz umwing wa mu Norvège, washala ni mwan ikundj wa mivu yaad. Ulejen anch: “Chading chisu chimwing chikash mu mwom wam. Nalembilanga pichuku pichuku, chisu ni chisu, mulong wa kulam usu mu yovil yam, chakwel kangal nimushila Satan ndond ya kumusaal Yehova anch nakwat mupak win wawonsu wakad manangu ap uyimp. Nasota kutumbish dijin dia Yehova, ni nasota kand anch mwanam ikundj ashikena kand ku kumuman tatukwend mu Paradis.”​—Jinsw. 27:11.

⁹ Ov, Yehova wakwiling ku malembil ma kashinsh? Mwaning. Nambaz winou watambula ukwash kusutil ku kukumangan pakad kujing ni ambay nend akaritiy adinga ni kumubangin. Mu kusut kwa mivu yitan, amwata kudi mukurump umwing. Nlel, mwanend ikundj ukwet mivu 20, udi katat mukadivar wabatishau. Ulondin anch: “Nikwet musangar nakash, mulong nfumwam wankwasha kumulil mwanam.”

10. Ov, chom ik chifanyidina kusal chakwel dijin dia Nzamb dikala ditumbila kamu?

¹⁰ Ov, chom ik chifanyidina kusal chakwel dijin dia Nzamb dikala ditumbila kamu ni dishitwila ku masaal mawonsu? Mulong wa yom yashikena, Yehova ufanyidin kusal usu wend wawonsu mulong wa kuyidiosh antu awonsu alikina kuziyil ku ukaleng wend. (Tang Ezekiel 38:22, 23.) Pakemp pakemp, antu awonsu akez kuyishikij ku kuwanyin. Tuchingedin ni musangar chisu chikezau yitang yawonsu ya manangu kusadil dijin dia Yehova mu mutapu utumbila mu manangu, mu mazu, ni mu yisal yau yawonsu! Kupwa, Tatukwetu wa mwiur wa rukat ukez “kwikal yawonsu kudiay [m]wawonsu.”​—1 Kor. 15:28.

“WANT WEY WEZA”

11, 12. Ov, ronganyin ik ratambulau in Kristu akin kwinsudiel kwa chitot cha mivu cha 19?

¹¹ Kurutu kwa Yesu kuya mwiur, atwimbuy end amwipula anch: “Ov, Nsalejetu, chisu chinech chawiy chiusotila kuyichirishin in Isarel want wau?” Chakul cha Yesu chamekesha anch chadingap chisu chau, cha kwijik chisu chikeza kusambish kuyikel kwa Want wa Nzamb. Ndiy wayileja in kwilejend anch afanyidin kushinshikin pa mudimu wa usey wa kulejan wayinkishau. (Tang Midimu 1:6-8.) Pakwez, Yesu wayileja in kwilejend atongijokina pa Want wa Nzamb wezina. Chawiy lel, kudiosh pa chirung cha atwimbuy in Kristu adandamedin kulembil chakwel Want winou weza.

¹² Paseja piswimp chisu cha kuyikel kwa Want wa Nzamb udia mu makas ma Yesu mwiur, Yehova wayikwasha antwend chakwel atesha kurumburik kwa kushiken kwa yom yiney. Mu muvu wa 1876, mutu wa mulong umwing wafundau kudi Charles Taze Russell wapalangeshau mu gazet watazukau anch Scrutateur de la Bible. Mutu wa mulong, «Les temps des Gentils: Quand prendront-ils fin?,» walejana anch muvu wa 1914 ukwet usey nakash. Mutu wa mulong winou wilikeja “mivu sambwad” yisambidinau mu uprofet wa Daniel nich ‘muten wa kuwanyin kwa michid’ kwalejanay Yesu.a​—Dan. 4:16; Luka 21:24.

13. Ov, chom ik chashikena mu muvu wa 1914, ni yom ik yasadika pa mangand yamekesha kuwanyin kwa chisu chinech?

¹³ Mu muvu wa 1914, njit jasambisha pakach pa michid yading Mwimputu—njit japalangana ni kukwat mangand mawonsu. Papwa njit jinej mu muvu wa 1918, kwadinga kamungun ni yipupu yikash yayijipa antu kupandakanamu antu ajipau kwinjit. Chawiy lel, “chijingidij” chapanay Yesu chamekesha patok kwikalaku kwa Yesu kwakad kumekan pa divu mudi Mwant musu chasambisha kuwanyin. (Mat. 24:3-8; Luka 21:10, 11) Kudi uman uvud wamekesha patok anch muvu wa 1914 wading chisu ‘chapanau chibangul’ kudi Mwant Yesu Kristu. Ndiy “waya mudi mwin kupandakan uyila ni kupandakan.” (Kuj. 6:2) Ndiy watokisha mwiur payasay Satan ni ayilembil end njit ni kuyidjibul pansh. Kudiosh pinipa, antu asambisha kuman uyakin wa mazu minam mapepidilau anch: “Pakwez riyind kudi mangand ni karung, mulong Sakudimban washirik kal wezil kudi en! Ujimen nakash, mulong wij anch chisu chend chashal kal chikemp.”​—Kuj. 12:7-12.

14. (a) Ov, mulong wak chidi cha usey kudandamen kulembil chakwel Want wa Nzamb weza? (b) Ov, chisend ik tukweta cha kusal?

¹⁴ Uprofet wafundau mu Kujingunik 12:7-12 ulejen mulong wak kuvadik kwa Want wa Nzamb kwa kwatijana nich disambishil dia mar makash madandamedina kuyishiken antu. Yesu, Mwant wa Want wa Nzamb wasambisha kuyikel piur pa akankuny nend. Kushik ni pakezay kupwish kupandakan kwend ni kudiosh uyimp wawonsu pa divu, tukudandamen kulembil chakwel Want wa Nzamb weza. Pa chisu chinicha, tufanyidin kushakam kukwatijan ni malembil kusutil ku kupan ukwash wetu ku kuwanyin kwa “chijingidij” chinech chamushena nakash. Yesu watakela kulond anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”​—Mat. 24:14.

“RUSOT REY ARUSALA PANSH”

15, 16. Ov, mutapu ik tukutwisha kushakam kukwatijan ni malembil mamekeshina anch rusot ra Nzamb rikusadik pansh?

¹⁵ Kwasutin kal mivu 6 000, rusot ra Nzamb rasambishin kal kusadik pa divu mu mutapu uwanyidina kamu. Chawiy lel, pamanay Yehova disambishil diwamp diapanay kudi antu, ndiy walonda anch: “Yading yiwamp kamu.” (Dis. 1:31) Pabwambwilay Satan, ni kudiosh pinipa, antu akemp kusu, awiy asambisha kusal rusot ra Nzamb pa divu. Pakwez, nlel kudi mamiliyon chinan ni kusut ma Atuman, makata kulembil anch rusot ra Nzamb risadika pa divu ni ikasikeshina kand kushakam kukwatijan ni malembil minam. Asadil mwamu kukwatijan ni mashakamin mau ni ipanin nich mushiku mu mudimu wa kwikadish in kwilej.

¹⁶ Chilakej, nambaz umwing wabatishau mu 1948 ni wasala mudi mishoner mu Afrik ulondin anch: “Kukwatijan nich chikunku chinech cha malembil ma chilakej, yisu yivud nikat kulembil mulong wa antu awonsu adia mudi a mikoku chakwel tuyileja ni kuyikwash ashikena ku kumwijik Yehova kurutu kwa chisu. Chikwau kand, pinikata kumulej muntu kanang, nitining manangu chakwel nishika ku muchim wend. Piur pa antu adia mudi amikoku twatana, nikat kumulembil Yehova chakwel ayukisha usu wetu chakwel tudandamena kuyibangin.” Chishimokishinap pa kuman anch nambaz winou wa mivu 80 watwisha mu mudimu wend wa kulejan ni ukwash wa antu akwau, washikena ku kuyikwash antu avud chakwel ikala Atuman a Yehova. Ukutwish kand kutongin pa yilakej yikwau yiwamp ya antu ipana ayinau mu kusal rusot ra Nzamb chikalap nchik uvud wa mivu.​—Tang Filip 2:17.

17. Ov, mutapu ik wiyovila piur pa yom yikezay Yehova kusal mu kwakul ku malembil metu makwel anch rusot rend risadika pansh?

¹⁷ Djat ni pakezau akankuny a Want wa Nzamb kuyidiosh awonsu pa divu, tukudandamen kulembil anch rusot ra Nzamb risadika. Chawiy lel, tukez kuman kusadik kwa rusot ra Nzamb mu mutapu uwanyidina pakuvumbulau mabiliyon ma antu mu paradis pa divu. Yesu walonda anch: “Kangal washimwokany mulong wa chom chinech. Chisu chikat kwez chikez kuteshau afu awonsu adia mwi nzay [ya chivurikish] dizu dined, chad akez kuvumbuk kwikal kand aom.” (Yohan 5:28, 29) Chikwikal chisu chishimokishena mudi ik pa kwikalaku mulong wa kuyak akatish netu afila kal! Nzamb “ukez kukusol mansoj mawonsu ku mes [metu].” (Kuj. 21:4) In kuvumbuk avud akwikal antu “afila nich,” ashakama ni afa pakad kwilej uyakin piur pa Yehova Nzamb ni Mwanend. Chikwikal chisend chiwamp nakash cha kupan ronganyin ra rusot ni rutong ra Nzamb kudi in kuvumbuk, mu kuyikwash chakwel atambula “mwom wa chikupu.”​—Mid. 24:15, TMK; Yohan 17:3.

18. Ov, yom ik yidia maswir majim ma antu?

¹⁸ Kushakam pamwing ni chisambu pa mangand mawonsu kwimedin pa kutumbish dijin dia Yehova kusutil ku Want wa Nzamb. Chawiy lel, chakul chiwanyidina ku yipul yisatu ya kusambish yidia mu malembil ma chilakej yikez kuwanyish maswir majim nakash ma antu. Katat, tukwet kand maswir makwau ma usey majimbwilau mu yom yinying yikwau yitinau mu malembil ma Yesu ma chilakej. Yom yiney tukuyisambidin mu mutu wa mulong ulondwilaku.