Mutapu ik Ufanyidina Kulembil Chakwel Nzamb Akutesh?

LEMBIL KUD YEHOVA NZAMB MU DIJIN DIA YESU

“Tatuku ukez kakwinkishany yom yawonsu yiukez kamwitany[a] mu dijin diam.”​—Yohan 16:23.

Yom yalonday Yesu yimekeshin patok anch Yehova ukatin tumulembil ndiy amwinend, kadiap kusutin atupony, ansant, angel, ap angak afila kal, pakwez ukatin anch tumulembil mu dijin dia Yesu Kristu. Anch twamulembil Nzamb mu dijin dia Yesu, tumekeshin anch twij chisend cha usey chikwetay Yesu. Yesu walonda anch “kwikil muntu ukutwisha kwiyil kwa Tatuku ching wasutil kudi am.”—Yohan 14:6.

LEMBIL YOM YIDIA MU MUCHIM

“Anzurilany michim yen kudi ndiy.”—Kuseng 62:9.

Chisu tumulembila Yehova, tufanyidin kulond mud twambambin ni tatuku wa rukat. Pa ndond pa kutang malembil ma kutang ap kuchirikin malembil twalamina kal mu manangu, tufanyidin kumulej yom yidia mu muchim wetu nich kalimish.

LEMBIL KUKWATIJAN NI RUSOT RA NZAMB

“Anch twamwit chom, chad tumwit mudi mudia rusot rend, ndiy ukututesh.”—1 Yohan 5:14.

Yehova utulejin kusutil Bibil yom yikutusadinay ni yom yikatinay anch etu tusal. Pakwel anch Nzamb itiy malembil metu, tufanyidin kulembil “mudi mudia rusot rend.” Chakwel tutwish kusal mwamu, tufanyidin kwilej Bibil chakwel tumwijik nawamp. Anch twasal mwamu, malembil metu makumusangaresh.

TUKUTWISH KULEMBIL PIUR PA YOM IK?

Lembil Piur pa Maswir Mey. Tukutwish kumulembil Nzamb mulong wa maswir metu ma pichuku pichuku mud—yakudia, maswin, ni ndond ya kulal. Tukutwish kand kulembil mulong wa kumwit manangu chakwel tukwata mipak yiwamp ni chakwel twikal ni usu wa kujijaman mu yoziu. Tukutwish kumwit chakwel atukwash kwikal ni ritiy, chakwel atulikishin yitil yetu, ap chakwel atukwash chom kanang.—Luka 11:3, 4, 13; Jakobu 1:5, 17.

Lembil Mulong wa Antu Akwau. Anvaj ayikatina anau akat kusangarang anch aman anch anau akatijadin. Yehova niyend ukatin anch anend adia pa divu akatijan. Chawiy, chiwapin kumulembil mbay netu wa uruw, anamakwetu, anetu, ap arund netu. Kambuy Jakobu wafunda anch: “Lembilijadilany muntu ni mukwau.”—Jakobu 5:16.

Lembil Mulong wa Kumujikitish Nzamb. Bibil ulondin piur pa Sakatang wetu anch: “Ndiy wimekeshina ku yom yiwamp yasalay. Ndiy ukat kukunakishinany ruvul, ni kukwinkishany chirung cha kwangul, ukat kukwinkishany yakudia, ni kwizwish michim yen nich musangar.” (Midimu 14:17) Anch twatongijokin piur pa yom yawonsu yatusadidinay kal Nzamb, muchim wetu ukutubachik kumujikitish mu malembil. Pakwez tufanyidin kand kumujikitish Nzamb kusutil kusal yom yikatinay mu mashakamin metu.—Kolosay 3:15.

SHIMPISH MUCHIM NI DANDAMEN KULEMBIL

Yisu yimwing, tukutwish kuziy mulong tumen anch malembil metu kamakwilap kapamp kamwing. Ov, tufanyidin kutong anch Nzamb katubangidinap? Bwat! Shinshikin yilakej yidia kwinshin oku yimekeshina anch tufanyidin kwetu kudandamen kulembil.

Steve, twisambinang mu mutu wa mulong wa kusambish ulondin anch: “Anch nadandamenap kulembil, nafanyina kushadish ruchingej rawonsu ra kwikal kand ni musangar.” Yom ik yamukwasha? Wasambisha kwilej Bibil ni wileja piur pa usey wa kudandamen kulembil. Ulondin anch: “Nalembila mulong wa kumujikitish Nzamb piur pa ukwash wawonsu natambula kud arund nam akatish. Katat nikwet musangar kusutamu pakur.”

Chid nchik piur pa Jenny, wading wiyovila anch kakwetap usey ni kawanyidinap kwend kumutesh kud Nzamb? Ulondin anch: “Pampandikena yovil yiney, namwilembina Nzamb chakwel ankwash kujingunin mulong wak niyovil mwamu.” Kusal mwamu kwamukwasha mutapu ik? “Kumulej Nzamb mutapu nading niyovila kwankwasha kwiman amwinam mutapu winmenay Nzamb, ni kwijik anch ap anch muchim wam winfishin nich, pakwez ndiy kanfishinap nich. Kwankwasha kand kulik kuziy.” Yibudikin ik yikalaku? Ulejen anch: “Malembil mankwasha kumuman Yehova anch, ud Nzamb, Tatuku, ni Murund wakin, winkatina, wimbangidina ni ud kwaku chisu chawonsu mulong wa kwinkwash anch nadandamen kwikasikesh kusal yom yikatinay.”

Shinshikin kand chilakej cha Isabel. Pimishay, dokter wamupima ni wamuleja anch ukuval mwan ukweta ulim ukash. Isabel waziya nakash. Antu amwing amuyula anch adiosha kwend madikaj. Ulondin anch: “Niyova mud nikufa kwam mulong wa ushon nading nich.” Yom ik yasalay? Ulondin anch: “Namulembila Nzamb tupamp ni tupamp chakwel ankwash.” Mu kusut kwa chisu wavala mwan wapilay anch Gerard, ni wading chilim. Ov, Isabel wiyova anch Nzamb wakula malembil mend? Mwaning! Mutapu ik? Ulondin anch: “Pinikata kumuman mwanam ukweta katat mivu 14, ukat kusanger mwom chikalap nchik ulim wend, nikat kujingunin anch mwanam ud chakul chiwamp nakash cha Nzamb ku malembil mam, ud chiyukish chijim nakash changinkishay Nzamb.”

Mazu ma win kashinsh mud minam matuvurishin yom yafunday nfund a kuseng anch: “A! [Yehova], ey ukat kutesh kulembil kwa antu itudishila. Ukat kupan usu mu michim yau, ni kuta matu kudi awiy.” (Kuseng 10:17) Ov, umenap anch tukwet mayingishin mapandikena kuwap ma kudandamen kulembil?

Tutanin malembil mavud nakash ma Yesu mu Bibil. Malembil mend mijikena nakash mawiy mayifundishay in kwilejend. Yom ik tukutwisha kwilejin ku malembil minam?