Mulong Wak Nzamb Utwitin Kulembil

Nzamb utanguril chikas kudi arunend.

Arund akat kwambambang umwing ni mukwau mulong wa kukudish urund wau. Chilik chimwing, Nzamb utwitin kwambamb nend, chakwel twikala nend mu urund. Ulondin anch: “Ukez kantazukany ni kwinlembil, chad am nikez kakwakulany.” (Jeremiy 29:12) Anch wambamb nend Nzamb, ‘ukusej piswimp nend, chad niyend ukusej piswimp ney.’ (Jakobu 4:8) Bibil utwinkin kashinsh anch: “[Yehova] udi piswimp kudi awonsu akata kumutazuk ndiy.” (Kuseng 145:18) Anch twamulembil Nzamb nakash, urund wetu nend ukuwap nakash.

Nzamb ukatin kukukwash.

Yesu walonda anch: “Ov, kudi umwing wenen, atatuku, anch mwanend wamwit dibot, ndiy ukumwinkish diyal? Ap anch mwanend wamwit insh, ov, ndiy ukumwinkishay nnak? Anch en . . . ukat kupanany yom yiwamp kudi anen, . . . Tatukwen udia mwiur ukez kupandakeshamu kupan yom yiwamp kudi antu awonsu akata kwit.” (Mateu 7:9-11) Mwaning, Nzamb ukwitin kumulembil mulong ‘ukat kukubangin’ ni ukatin kukukwash. (1 Pita 5:7) Ukwitin kand kumulej milong yey. Bibil utulejin anch: “Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya.”​—Filip 4:6.

Antu akwet kuswir kwa yom ya muspiritu.

In kwilej yom piur pa untu wa antu ashinshika anch ma miliyon ni ma miliyon ma antu akweting maswir ma kulembil. Ap antu akad kwitiy anch Nzamb udiaku ni antu akata kwidjidjek piur pa kwikalaku kwa Nzamb niyau adi pakach pa antu inay.a Chinech chimekeshin anch antu ayitanga nich maswir ma muspiritu. Yesu walonda anch: “Ayuk kwau antu ija anch: ‘Tukwet kuswir kwa yom ya Nzamb mu michim yetu.’” (Mateu 5:3) Mutapu umwing wa kuwanyish maswir minam udi kusutil ku kwambamb chisu ni chisu nend Nzamb.

Anch twitiy yitulejinay Nzamb piur pa kumulembil, chom ik tukutwisha kuchingej kutaninamu?