Ukwash Mulong wa Kwiyep Milong

KUSADIN KUYIMP KWA MAAR

Delphine, wajimbulangau mu mutu wa mulong wasambelang, wiyova anch yakamish yend yamubachikang kuna maar nakash. Bibil kakangeshinap kuna maar mu chilik chiwamp, pakwez ulondin anch: “Kangal wikal pakach pa in kuna maar [nakash].” (Jinswir 23:20) Kusadin kuyimp kwa maar kukat kulet mayej makash mu mujimbu, kukat kujip ni kuyipish urund ni kukat kuletish rufu ra mamiliyon ma antu muvu ni muvu. Milong yiney akutwish kuyiyep kudi antu anch asadin chiyul cha manangu chidia mu Bibil.

Mwawiy mwasalay Delphine. Katat ulondin anch: “Najingunina anch maar mapwishangap yakamish yam. Nasadina chiyul chidia mu Filip 4:6, 7, chilondina anch: ‘Kangal wiyakamishany mulong wa chom chin chawonsu. Pakwez . . . mwijikishany Nzamb yom yawonsu umwitilanya.’ Uchuku wawonsu panikalang ni yitongijok nakash ni yakamish, namulembilang Yehova. Namulejang yovil yam yawonsu, pamwing ni ujim, kusansan ni kuburen ruchingej, ni namwilembinang chakwel ankwasha kwikal ni yitongijok yiwamp. Pamanch, nasalang usu wa kwikal nich kashinsh anch nalikang kal yovil yiney. Chaku chinech chankwasha kushinshikin manangu mam pa yom nading nich pa ndond pa kushinshikin pa yom nakad kwikal nich. Nakwata mupak wa kulik kand kuna maar. Mulong chisambu nikala nich chading cha usey nakash, nakatap kand kuchishadish.”

MWIKADIL UYIMP

Mwikadil uyimp udi pakach pa milong yikata kulet runeng nakash ni mar. Pakwez mbil ja Bibil jikutwish kutukwash kwiyep milong mudi yiney mu kutulej yom yimwing yikata kushikij ku mwikadil uyimp mudi kwizez kuyimp ap pornografi. Nsand umwing utazukinau anch Samuel ulondin anch: “Chading chiswapel nakash kwizez nau ayangadim. Yisu yimwing namusangerangap changadim kampand, pakwez am nalondang anch winkatin—ni chinech chansangareshang kwizez nend.” Samuel wamana anch akat kumufund yisu yivud anch ukat kwizez nau ayangadim —ap anch kadiap katongina kusal mwamu—chawiy wakwata mupak wa kudandamen kwizez ni chitongijok kampand. Pakwez chaku chinech chamwakamisha nakash. Ulondin katat anch: “Chading chaku cha ubaj nakash, mulong chikat kukudish mwikadil wa kwitongin.”

Samuel watanga mutu wa mulong wisambidina piur pa ansand wabudishau pa kapend ka web ka jw.org. Ni watongijokina pa Jinswir 20:11, ulondina anch: “Chawiy chimwing ni yend mwan ukat kwimekeshil ku yisalijok yend, ap anch yidi zwang ni kutentam.” Jinswir winou wamukwasha mutapu ik? Samuel wajingunina anch kwizez kwadingap zwang ni kutentamina. Ulondin katat anch: “Najingunina anch nsand ukata kwizez ukat kukudish mikadil yimwing yiyimp yikutwisha kusal anch ikala mbay wa uruw muyimp. Nasambisha kutongijok mutapu ukezay kwov mband nikeza kwat anch waman anch nikat kwizez nau amband akwau. Chinech chankwasha kujingunin anch chaku chinech chidi cha ubaj. Chitongijok chakwel anch chiswapel kwau kwizez chimekeshinap anch kwizez kuwapin.” Samuel waswimpa. Chawiy, kwiyep kwizez kwamukwasha kand kwiyep mwikadil uyimp.

Antonio wading mu ubaj ukash wa mwikadil uyimp: Wading musuk wa pornografi. Ap anch wading ukwet mband ukatinay nakash, wamana anch wading udandamedin kamu mu chaku chinech. Ulondin anch kutongijokin piur pa 1 Pita 5:8 kwamukwasha kamu nakash. Verse winou ulondin anch: “Ilamany ayinen, babalany! Mukankuny nen, [Djabul] ukat kuzomb mudi ntambu wonyina ukata kukimb nany ukudiay.” Antonio ulondin anch: “Yipich ya pornografi yitunyingumukin pa mangand mawonsu ni yipich yiney yikutwish kushal mu manangu. Chakin kamu verse winou wankwasha kutongijokin piur pa musul wa yoziu yiney. Nileja kuvurik swa anch yipich yiney ya pornografi yidiokil kudi Djabul. Katat nij anch ching kusu Yehova ndiy ukutwisha kwinkwash ‘kwilam amwinam ni kubabal’ chakwel nitwisha kurish nich yom yiney mu manangu mam, mu muchim wam ni mu uruw wam.” Antonio watambula ukwash wading uswirikedinay ni kupwa walikap rawonsu chaku chinech chiyimp. Chinech chamukwasha kand kwiyep milong yikash.

Chakin kamu, Bibil uletin yiyul ya manangu yikutwisha kutukwash kwiyep milong yikash. Pakwez chidi nchik piur pa milong yasadikina kal ni yidandamedina? El tushinshikinany mutapu ukutwisha kutukwash Dizu dia Nzamb kupwish milong mudi yiney.