“Ov, Nzamb Wading Kwisu?”
“NADANDAMENA KWIYIPUL CHIPUL CHINECH: OV, NZAMB WADING KWISU?”—Pap Benoît XVI, payay kutal kompony mukur wa mar mu musumb wa Auschwitz, mwi ngand ya Polonge.
ANCH MAR MASHIKEN, OV, WIYIPWILAP KAL ANCH: ‘OV, NZAMB WADING KWISU?’ AP MU MWOM WEY KUDI YOM YIYIMP YASADIKA YASALA WIYIPULA ANCH NZAMB UKAT KUKUBANGIN KAMU EY PAKAMPWIL?
Pamwing ap wiyova mudi mwiyovay Sheila, ushicha mu État-Unis. Mulong amulidina mu dijuku diading dikatina yom ya relijon nakash, ulondin anch: “Kudiosh ku wanikanch, nading nikat kumusejin Nzamb mulong udi Sakatang wetu. Pakwez kand kal niyovangap anch nidi nend piswimp. Nitongin anch wading wimen, pakwez palemp nakash. Niyovangap anch Nzamb winkisin, pakwez nitiyijap kamu anch wading winkatin.” Mulong wak Sheila widjidjeka anch Nzamb umukatin? Urumburil anch: “Dijuku diam diarisha ni mar malondulijadina ni chimeken anch Nzamb kadingap katukwashina ap pakemp.”
Mudi Sheila, ukutwish kwikal nich kashinsh anch Nzamb wa Dikand Diawonsu udiaku. Pakwez ukutwish kwiyipul anch ukubangidin chakin kamu ey. Job muntu utentamina, wadinga ni ritiy mu ukash ni manangu ma Sakatang, niyend widjidjeka. (Job 2:3; 9:4) Kupwa kwa Job kurish ni mar malondulijadina—pakad ukwash anch makupwa—wamwipula Nzamb anch: “Ov, mulong wak winjindjikidina mpal yey, ni kwinman mudi nidi mukankuny ney?”—Job 13:24.
Yom ik yilondinay Bibil? Ov, chifanyidin kumufish nich Nzamb anch mar mashiken? Kudi uman umekeshina anch Nzamb ukat kuyibangin antu awonsu ni kubangin kand muntu ni muntu panrend? Mu kuman kwey, ov, kudi muntu umwing pakach petu ukutwisha kwijik anch Nzamb ukat kutuman, kututesh, kutwanaken ap kutukwash mu milong yetu?
Mu mitu ya milong yilondwilaku ey, tukushinshikin yom yitufundishina yitang piur pa mutapu utubangidinay Nzamb. (Rom 1:20) Kupwa, tukushinshikin yom yilondinay Bibil piur pa kubangin kwa Nzamb. Anch wadandamen ‘kumwijik ndiy’ kusutil yom yatangay ni Dizu diend, ukudandamen kwikal nich kashinsh anch ‘ukat kukubangin.’—1 Yohan 2:3; 1 Pita 5:7.