“Ndiy Ukat Kupan Usu Kudi Uziyina”

1. Milong ik yimwing tufanyidina kujijamen, pakwez, mulong wak Yehova ukat kusangar mulong wa atushalapol end ashinshamena? (Tal yipich ya kwinsambishin.)

MWOM mu mangand minam uswapelap bwat. Chilakej, akadivar nau anambaz ney avud amen mar mulong wa mayej makash. Akwau apamina kal akwet kand chisend cha kulam anamakwau amapal. Pakwez akwau akat kurish mulong wa kuwanyish maswir ma majuku mau. Ni twij anch avud pakach pen karishinap kwau nich mulong umwing pa milong yiney, pakwez arishin nich milong yawonsu kapamp kamwing. Chinech chitin chisu chijim, usu, ni nfalang. Pakwez ukwet kamu kashinsh anch Yehova ukukukwash. Wij anch yom yikwikal nawamp mulong wawiy mutapu washilayimu kal. Ritiy rey rifanyidin kumusangaresh chakin kamu Yehova!

2. Mutapu ik utukasikeshinay Isay 40:29, pakwez kurumbuk ik kukash tukutwisha kusal?

² Wiyovilap kal chisu chimwing anch milong yiukweta yikukasikedin kuyijijamen? Anch wiyovil mutapu winou, udiap amwiney. Atushalapol amwing ashinshamena a Nzamb a pakur niyau iyova mutapu wawiy umwing. (1 Ant 19:4; Job 7:7) Chom ik chayikwasha chakwel adandamena kujijaman? Amuchingejina Yehova mulong wa kuyikasikesh. Bibil ulondin anch Nzamb “ukat kupan usu kudi uziyina.” (Isay 40:29) Cha ushon, antu a Nzamb amwing amening anch mutapu uwamp wa kujijamen milong yau yikwetau mu mwom udi wa kulik kumusadin Yehova mu chisu chimwing. Akat kutong anch kumusadin Yehova chidi chisend chilimina pa ndond pa kwikal chiyukish. Chawiy akat kwimik kutang Bibil, kuya ku yikumangan, ni kulik kusal mudimu wa kulejan. Chinech chawiy chikatinay kamu Satan anch asala.

3. (a) Mutapu ik tukutwisha kumukangesh Satan kutuziyish? (b) Yom ik tukwisambina mu mutu wa mulong winou?

³ Djabul kakatinap anch etu twikal ni usu. Ni wijing anch tukweting usu nakash chisu tukwatakening nakash mu mudimu wetu tumusadidina Yehova. Chawiy, chisu umena anch wovil kuziy ku mujimbu ap mu yitongijok yey, kangal umuchina Yehova. Sej piswimp kudi ndiy. Bibil ulondin anch: “Ukez kukupizurishany, ni kukukasikeshany.” (1 Pita 5:10; Jakobu 4:8) Mu mutu wa mulong winou tukwilejin ku Isay 40:26-31 piur pa ukaliweny wa Yehova wa kutukasikesh. Tukwisambin kand yom yaad yikutwisha kusal anch tusala yom yikemp mu mudimu wa Yehova, ni tukwilej kand mutapu wa kusadin mbil ja Bibil jikutwisha kutukwash kujijaman.

ANTU AKATA KUMUCHINGEJIN YEHOVA AKWIKAL KAND NI USU

4. Dilejan ik tukutwisha kwilejin ku Isay 40:26?

⁴ Tang Isay 40:26. Kwikil muntu watwishina kal kuchind atutumbu awonsu adia mwiur. In siyans itiyijin anch kukutwish kwikal uvud wa mamiliyar 400 ma atutumbu mu rukongal retu. Pakwez Yehova ukat kumupil katumbu ni katumbu dijin. Chom chinech chitufundishin ik piur pa Yehova? Anch ukat kuyibangin atutumbu akad kwikal ni mwom, tong chad mutapu ufanyidinay kwiyov piur peyey! Umusadidin chidiap anch mulong ufanyidin kusal mwamu, pakwez chidi mulong umukatin. (Kuseng 19:1, 3, 14) Tatukwetu mukatish wij yom yawonsu piur pey. Bibil ulondin anch: “Nzamb wachindil kal nswich jawonsu jidia ku mitu yen.” (Mateu 10:30) Yehova ukatin twijika anch: “Wij machuku ma in kashinsh.” (Kuseng 37:18) Chakin kamu, Yehova umen milong yawonsu ukweta, ni ukutwish kukwinkish usu ukweta nich kuswir mulong ujijamena milong yiney.

5. Mutapu ik tukutwisha kwikal nich kashinsh anch Yehova ukutwish kutwinkish usu?

⁵ Tang Isay 40:28. Yehova ndiy Musul wa usu wawonsu. Chilakej, shinshikin usu watekay mu muten wetu. Mwin kufund yom ya siyans David Bodanis walonda anch sekond mwawonsu ukata kusut, muten ukat kubudish usu uvud kusutamu usu ukata kubudik anch mamiliyar ma mabomb atomiques mabarik. Mwin kukimbijol mukwau watana anch uvud wa usu ukata kubudik mu muten mu sekond umwing, ukutwish kuyikwash antu adia pa mangand mawonsu nich usu mu mivu 200 000! Chakin kamu, Yehova, ukata kutek usu mu muten, ukutwish kutwinkish usu tukweta nich kuswir mulong wa kujijamen milong yetu.

6. Mu mutapu ik upipela mpand ya Yesu, ni mutapu ik yom yiney yikweta chibachikin kudi etu?

⁶ Tang Isay 40:29. Kumusadin Yehova kukat kutuletin musangar nakash. Yesu wayileja in kwilejend anch: “Itwikany mpand yam.” Ni walonda kand anch: “Mipim yen yikwiswedish . . . Mulong mpand yam yiswakel kwitwik, ni chisend cham chipipel.” (Mateu 11:28-30) Chinech chidi kamu chakin! Yisu yimwing tukutwish kuziy pituyila ku yikumangan ap pitulejena. Pakwez, mutapu ik tukata kwiyov chisu tukata kuchirik ku chikumbu? Tukat kwiyov nawamp ni irijekina mulong wa kurish ni milong yetu. Chakin kamu, mpand ya Yesu yipipel.

7. Let chilakej chimekeshina anch yom yilondinau mu Mateu 11:28-30 yidi yakin.

⁷ Shinshikin chilakej cha nambaz wetu umwing. Nambaz winou uyedin mayej ma kuziy chisu chawonsu, kuziy mu manangu, ni mutu wading umuswejin nakash. Chawiy, yisu yimwing yading yimukasikedin nakash kuya ku yikumangan. Pakwez, dichuku dimwing pasalay usu wa kuya ku yikumangan, wafunda anch: “Diskur diading disambidin piur pa kuziy. Diskur dined adisala mu mutapu wa kwitek pa ndond ya muntu mukwau ni yom yalondau yading yintadin chawiy nasambisha kudil. Navurika anch ku yikumangan yawiy ndond nading nifanyidina kwikal.” Nambaz winou wova musangar nakash mulong wasala usu wa kuya ku yikumangan!

8, 9. Yom ik yakimbay kulond kambuy Paul pafunday anch: “Anch niziyil, chad nikwet [usu]”?

⁸ Tang Isay 40:30. Tukutwish kwikal ni ukaliweny wa kusal yom yivud, pakwez tukwet mimbu mu yom tukutwisha kusal ku usu wetu ayinetu. Dined didi dilejan tukutwisha etu awonsu kwilej. Kambuy Paul wading ukatin kusal yom yivud, pakwez katwishap kusal yom yawonsu yakatay kusal. Pamulejay Yehova mutapu wading wiyovilay, Yehova wamuleja anch: ‘Usu wam ukat kwikal uwanyidina mu kuziy.’ Paul watesha yom yamulejau kudi Yehova. Chawiy chalonday anch: “Anch niziyil, chad nikwet [usu].” (2 Korint 12:7-10) Chom ik chakimbay kulond?

⁹ Paul wamana anch wading ukwet mipak piur pa yom yading yikimbinay kusal ni usu wend amwinend. Wading ukwet kuswir kwa kumukasikesh kudi muntu ukweta usu nakash. Spiritu utumbila wa Nzamb wafanyina kumwinkish Paul usu chisu chiziyinay. Ni spiritu winou wafanyina kand kusal yom yivud. Spiritu wa Nzamb wafanyina kumwinkish Paul usu wa kusal yom yakanganyay kusal ni usu wend amwinend. Yom mudi yiney yikutwish kand kutushiken etu. Anch Yehova watwinkish spiritu wend utumbila, tukwikal kamu ni usu!

10. Mutapu ik wamukwashau David kudi Yehova kujijamen milong yend?

¹⁰ Nfund a kuseng David wamana yisu yivud mutapu spiritu wa Nzamb wamukwashay kwikal ni usu. Wawanga anch: “Mulong mu usu wey nikuyopat akankuny nam, nikupandakan mapat mau.” (Kuseng 18:30) Mudi rubumbu rilemp rikasikena kukandam, yisu yimwing milong yetu yiding yijim nakash, chawiy tukutwishap kuyipwish ni usu wetu ayinetu. Tukwet kuswir kwa ukwash wa Yehova.

11. Mutapu ik utukwashina spiritu utumbila kujijamen milong yetu?

¹¹ Tang Isay 40:31. Ambur kakatap kwiman mu rinzwizu mu kusadin usu wau ayinau. Usu ukata kudiokalang ku mapur mau monikina wawiy ukata kusal anch mbur atwika. Chinech chikat kumukwash mbur kutwik ni kuya kwi ndond yilemp ni chimukwashining kulam usu. Chawiy anch ukwet mulong ukupandakedina kujimb, tongin piur pa mbur. Mwita Yehova chakwel akwinkisha usu kusutin “mwin kukwash, ndiy kamu [spiritu] utumbila.” (Yohan 14:26) Tukutwish kumwit Yehova chakwel atwinkisha spiritu wend yisu yawonsu, mu asaa 24 ma dichuku. Tukutwish kwiyov anch tukwet kuswir kwa kumwit Yehova ukwash pakampwil anch twovijadinap ni mukadivar ap nambaz netu mu chikumangen. Pakwez mulong wak kulik kovijan kwinoku kukat kushiken?

12, 13. (a) Mulong wak kukat kushiken kulik kovijan pakach pa in Kristu yisu yimwing? (b) Yom ik yitufundishina mwom wa Josef piur pa Yehova?

¹² Kulik kovijan kukat kushiken mulong etu awonsu tudi antu akad kuwanyin. Yisu yimwing, tukutwish kwov ujim mulong wa yom yikulondau ap yikusalau antu akwau, ap niyetu tukutwish kuyovish antu akwau ujim. Kwinoku kukutwish kwikal kupak kujim. Pakwez chinech chikat kutwinkish mutapu wa kwikal ashinshamena kudi Yehova. Mutapu ik? Mu kwilej kusal mu umwing pamwing ni akadivar nau anambaz netu. Yehova uyikatin chikalap nchik kurumbok kwau, niyetu tufanyidin kusal mwamu.

¹³ Yehova kakangeshinap kuyipak atushalapol end. Twij yom yiney kusutin mwom wa Josef. Padingay Josef nsand, anamakwend amwovila mukau. Amulandisha mudi muswik, ni amutwala mu Idjibit. (Disambishil 37:28) Yehova wamana nawamp yom yading yisadikina ni wiyova kamu nayimp pamanay mutapu uyimp wamusadinau murund nend, kashalapol wend ushinshamena Josef. Pakwez, Yehova kakangeshap yom yashikena. Kupwa, pamufundau Josef anch wakimbang kulal ku usu ni mband a Potifar ni pamutekau mu rukan, Yehova kakangeshap kand yom yiney kumushiken. Pakwez, ov, Nzamb wamulika Josef? Bwat. Bibil ulondin anch: “[Yehova] wading ni Josef, ni mu yom yawonsu yasalangay, [Yehova] wamukwasha kusal.”—Disambishil 39:21-23.

14. Mutapu ik tukutaninamu anch twalik kulam ujim?

¹⁴ Chilakej chikwau chidi cha David. Antu avud kand kal ayisadinangap nayimp mudi mwamusadinau David. Pakwez, murund winou wa Nzamb kalamap ujim. Wafunda anch: “Ikuchika ku kuswej, ulika ujim. Kangal wiswidiosh, mulong yawiy yikata kutwalan ku kuyip.” (Kuseng 37:8) Diyingishin dia usey dia ‘kulik’ ujim, ap kulik kulam ujim, didi anch tukatin kumwimburij Yehova. “Ndiy kakutwilikejinangap mudi mudia yitil yetu” pakwez ukat kutulikishin. (Kuseng 103:10) Kudi kand kutaninamu kukwau mu kulik kulam ujim. Chilakej, ujim ukutwish kuletish mayej ma tansion ni ma michim. Ujim ukutwish kuyipish michim yitok ni pancréas, ni ukutwish kuletish milong ya kuswej kwa divumu, kusut mwivumu, kulik kuya ku musalany, mayej ma ditont ni mayej makwau kand. Chikwau kand anch tujimen, tukatap kutong nawamp. Tukutwish kulond ap kusal yom yikutwisha kuyijimesh akwetu, ni chinech chikutwish kutuziyish nakash chisu chilemp. Chidi chiwamp nakash kwikuchik. Bibil ulondin anch: “Mwom wa mujimbu kudi kushakam zong kwa muchim.” (Jinswir 14:30) Chawiy, chom ik tukutwisha kusal anch antu akwau atwovish kuyip, ni mutapu ik tukutwisha kusal chisambu nau akadivar netu? Tukutwish kusadin chiyul cha manangu cha mu Bibil.

ANCH ATURUMBUKIN KUDI AKADIVAR NETU

15, 16. Yom ik tukutwisha kusal anch muntu waturumbukin?

¹⁵ Tang Efes 4:26. Tukatap kushimok anch aturumbukin kudi antu akad kumusadin Yehova. Pakwez anch mwin Kristu, mukadivar ap nambaz ap muntu wa mu dijuku walond ap wasal yom yitwovishina kuyip, tukutwish kwiyov nayimp nakash. Chikwikal nchik anch tutwishinap kuvuramen yom yasadikang? Ov, tukudandamen kulam ujim pamwing ap mu mivu yivud? Anch tukulondul chiyul cha manangu cha Bibil cha kupwish milong pakad kulab? Anch twasutish chisu chilemp pakad kwambamb ni muntu, chikutukasiken kusal chisambu.

¹⁶ Chikwikal nchik anch wiyovil nayimp piur pa yom yakusalangay mukadivar ni utwishinap kuvuramen yom yiney? Chom ik ukutwisha kusal mulong wa kusal chisambu? Chakusambish, ukutwish kumulembil Yehova. Mwilembina akukwasha chakwel wambamba nawamp ni mukadivar ney. Vurik anch mukadivar ney udi niyend murund wa Yehova. (Kuseng 25:14) Nzamb umukatin. Yehova uyisadidining arund nend nich ranaken, ni ukatin anch niyetu tusala mwamu. (Jinswir 15:23; Mateu 7:12; Kolosay 4:6) Cha kaad, tongin piur pa yom ukumuleja mukadivar ney. Kangal wamekesh anch wakatang kukusal nayimp. Pamwing ap kwading kurumbuk ap wateshangap nawamp mulong. Itiyin anch mu mulong winou niyey warumbukang. Ukutwish kusambish mambamb ni mazu mudi manam, “pamwing ap nikat kujimanang swa, pakwez nangalosh pawalondang, novang . . .” Anch mambamb minam makwashinap kusal chisambu pakach peyey ni mukadivar ney, dandamen kusal usu. Lembil mulong wa mukadivar ney. Mwita Yehova chakwel amuyukisha ni akukwasha chakwel ey ushinshikina mikadil yend yiwamp. Ukutwish kwikal nich kashinsh anch Yehova ukusangar mulong wa usu usadina mulong wa kusal chisambu ni mukadivar ney, udia murund wa Nzamb.

ANCH TUKAT KWIFISH NICH MULONG WA YOM TWASALA PAKUR

17. Mutapu ik utukwashiningay Yehova kurijek urund wetu ni ndiy chisu tukata kusal chitil, ni mulong wak tufanyidin kwitiy ukwash winou?

¹⁷ Antu amwing akat kwiyov anch kawanyidinap kumusadin Yehova mulong asala yitil yijim. Kwifish nich kwinoku kukutwish kushadish chisambu chetu, musangar ni usu. Mwant David warisha nich yovil ya kwifish nich ni walonda anch: “Pinalika kwitiyil yitil yam, mafup mam mauma, nading ni kukimuk muten wawonsu. Mulong chikas chey chading chilimin padi am muten ni uchuku.” Cha musangar, David watakamana mu kusal yom yikatinay Yehova anch atushalapol end asala. Wafunda anch: “Chad [nitiyila] chitil cham kudi ey, . . . chad ey wanlikishina yitil yam yawonsu.” (Kuseng 32:3-5) Anch wasala chitil chijim, Yehova ukutwish kukulikishin. Ukatin kukukwash ey kurijek urund wey ni ndiy. Pakwez ufanyidin kwitiy ukwash uletinay kusutin amakurump. (Jinswir 24:16; Jakobu 5:13-15) Chawiy kangal wachingel! Chitin kusal mwamu mulong wa kutambul mwom wa chikupu. Pakwez tong bil anch udandamedin kwifish nich chisu chilemp kupwa kwa kulikishin chitil chey. Yom ik ufanyidina kusal?

18. Chilakej cha Paul chiyikwashin mutapu ik antu iyovila anch kawanyidinap kumusadin Yehova?

¹⁸ Kwading chisu chaziyay kambuy Paul mulong wa yitil yasalay pakur. Walonda anch: “Mulong am nidi mukemp nakash kupandakan atwimbuy a Yesu awonsu. Kiniwanyidinap kwimpil anch kambuy wa Yesu, mulong am [nazengola chikumangen] cha Nzamb.” Ap mwamu, Paul walonda kand anch: “Pakwez mulong wa ranaken ra Nzamb am nidi mudi munidia.” (1 Korint 15:9, 10) Yehova wading wij anch Paul wading muntu wakad kuwanyin. Pakwez wamwitiyija Paul mudi mwadingay, ni wakata anch Paul ijika mwamu. Anch winanin chakin mulong wa yom wasala ni wamuleja Yehova yom yiney, ni amakurump anch chading cha usey, Yehova ukukulikishin chakin kamu. Itiyij anch Yehova wakulikishidin kal ni itiy dilikishin diend!—Isay 55:6, 7.

19. Wisu mufund wa muvu wa 2018, ni mulong wak uwanyididin?

¹⁹ Patusejina piswimp ni disudiel dia ditenchik dined, tukutwish kuchingejin anch tukwikal ni milong yivud. Pakwez tufanyidin kuvurik anch Yehova, Muntu ukata ‘kupan usu kudi uziyina ni muntu wakad usu ujim ukat kumwinkish ukash,’ ukutwish kukwinkish yom yawonsu ukweta nich kuswir chakwel udandamen kumusadin nich kushinshaman. (Isay 40:29; Kuseng 55:22; 68:19) Mu muvu wa 2018, tukuvurik uyakin winou wa usey chisu chawonsu tukuya ku yikumangan mu Chot chetu cha Want ni kuman mazu ma mufund wa muvu malondina anch: ‘Awonsu amuchingejidina Yehova akwikal kand ni usu.’—Isay 40:31.