Dipup Uman wa Rukat ra Nzamb

1. Mutapu ik urumburilay Bibil yisu yivud piur pa dipup?

YOM ik yikata kukwez mu manangu anch watesh piur pa dizu ‘dipup’? Antu avud akat kutong piur pa chibau, pakwez dipup dirumburikin yom yivud kusutamu kwau yiney. Bibil ulondin anch dipup didi diwamp mulong wetwetu ni yisu yimwing ukat kudijimbul pamwing ni ronganyin, manangu, rukat ni mwom. (Jinswir 1:2-7; 4:11-13) Chawiy dipup dia Nzamb dimekeshin anch utukatin ni ukimbin anch tushakama chikupu. (Hebereu 12:6) Ap anch mu dipup dia Nzamb muding yisu yimwing kukand antu, didingap dia chisum ap diyimp. Pakwez kurumburik kukwau kwa usey kwa dizu ‘dipup’ kurumburikin kand kufundish, mudi mafundish makatau kumwinkish mwan ukatinau kudi nvaj.

2, 3. Mu mutapu ik mu dipup mudi kand mafundish ni kukand? (Tal chipich cha kwinsambishin.)

² Tong piur pa chilakej chinech. Mwan umwing utazukinau anch Johnny wadjibwila ndundu mu chikumbu. Makwend wamuleja anch: “Johnny, wij anch ufanyidinap kubudin ndundu mu chikumbu! Ukubaril chom kanang.” Pakwez walika kumutesh makwend ni wadandamena kusengan ni ndundu. Ndundu wabula mwi nnung ya kam ni yabarika! Yom ik yasalay makwend a Johnny mulong wa kumupup? Wamuleja mu kumurumburil mulong wak yom yasalay yading yiyimp. Wakimba anch mwanend ajingunina anch chidi chiwamp kuziyin anvajend ni anch mbil jau jikwet usey ni ja manangu. Mulong wa kumukwash Johnny kwijik dilejan dined, wakwata mupak anch chidi chiwamp kumukand mu kumutambul ndundu ni kumujindjik mu chisu kanang. Chinech chamusangareshap Johnny, pakwez chamukwasha kuvurik anch, kukwikal yibudikin yiyimp anch wayibwambwil anvajend.

³ Mulong tudi in Kristu, tudi antu a mu chikumbu cha Nzamb. (1 Timote 3:15) Tatukwetu Yehova, ukwet mbil ya kukwat mupak piur pa yom yidia yiwamp ni yiyimp ni kutupup anch twamubwambwil. Chikwau kand, anch yisalijok yetu yikwet yibudikin yiyimp, dipup dia rukat dia Yehova dikutwish kutuvurish anch chidi cha usey kumuziyin. (Galatia 6:7) Nzamb utukatin nakash ni kakatinap anch etu tumana mar.—1 Pita 5:6, 7.

4. (a) Mutapu ik ukatinay Yehova anch tuyifumba antu akwau? (b) Yom ik tukwisambina mu mutu wa mulong winou?

⁴ Anch twapan dipup dimedina pa Bibil, tukutwish kumukwash mwan ap mwin kwilej wa Bibil kwikal mwin kwilej wa Kristu. Tukat kusadin Bibil mulong wa kuyifundish in kwilej etu yom yidia yiwamp ni kuyikwash kwijik ni ‘kuyilej kuziyil ku yom yawonsu yatulejau kudi Yesu.’ (Mateu 28:19, 20; 2 Timote 3:16) Wawiy mutapu ukatinay Yehova anch ayifumba chakwel niyau ayikwasha antu akwau kumulondul Kristu. (Tang Titus 2:11-14.) Katat el twisambinany yipul yiney yisatu ya usey: (1) Dipup dia Nzamb dimekeshin mutapu ik anch utukatin? (2) Yom ik tukutwisha kwilejin kusutin yilakej ya antu apupau kudi Nzamb? (3) Mutapu ik tukutwisha kwimburij mutapu wa kupup wa Yehova ni wa Yesu?

NZAMB UKAT KUTUPUP NICH RUKAT

5. Dipup didiokila kudi Yehova dimekeshin mutapu ik anch utukatin?

⁵ Yehova ukat kutukand, kutufundish ni kutufumb mulong utukatin. Ukatin anch tushala piswimp ni ndiy ni tushakama chikupu. (1 Yohan 4:16) Kand kal atusaanlangap ap kutusal twiyova anch tudi antu a chamwamu. (Jinswir 12:18) Pakwez, Yehova ukat kushinshikin mikadil yetu yiwamp ni witiyijin anch twikala ni want ipau. Ov, ukutwish kuman mutapu dipup didiokila mu Bibil, mu mikand yetu, kudi anvaj etu ap kudi amakurump a mu chikumangen dimekeshina anch Yehova utukatin? Chawiy, anch amakurump asal usu wa kutukand mu mutapu wa rukat ni witudishina kurutu kwetwetu kujingunin anch twasalang chom chiyimp, akat kwimburij rukat ra Yehova mulong wetwetu.—Galatia 6:1.

6. Mutapu ik umekeshina dipup rukat ra Nzamb ap anch muntu kawanyidinap kand kwikal ni yisend kanang?

⁶ Yisu yimwing dipup dirumburikin kand yom yivud kusutamu kwau chiyul. Anch muntu wasalang chitil chijim, kawanyidinap kand kwikal ni yisend kanang mu chikumangen. Ap anch yom yiney yashiken, dipup dimekeshin anch Nzamb umukatin. Chilakej, dikutwish kumukwash kuman usey wa kwitekin chisu chijim mulong wa kwilej Bibil, kutongijokin ni kulembil. Kusal yom yiney kukutwish kukasikesh urund wend ni Yehova. (Kuseng 19:7) Mu kusut kwa chisu, ukutwish kand kwikal ni yisend yend yashadishay. Ap anch muntu amwopat mu chikumangen, chinech chimekeshin rukat ra Yehova mulong dikat kuchidij chikumangen ku yibachikin yiyimp. (1 Korint 5:6, 7, 11) Ni mulong dipup dia Nzamb diding ching ditentamina, dikutwish kumukwash muntu wopatangau kuman kujimb kwa chitil chend. Chinech chikutwish kumubachik kukarumuk.—Midimu 3:19.

TUKAT KUTANINAMU MU DIPUP DIA YEHOVA

7. Shebina wading nany, ni mwikadil ik uyimp wakudishay?

⁷ Mulong wa kwijik usey wa dipup, tukimbin kwisambin katat antu aad apupau kudi Yehova. Wakusambish udi Shebina, mwin Isarel washakama pa chirung cha Mwant Ezekias, ni wa kaad udi Graham, mukadivar wa pa chirung chetu. Shebina wading “kalam mukurump wa chikumbu,” chimeken anch chikumbu cha Mwant Ezekias, ni wading ni ulabu nakash. (Isay 22:15) Pakwez Shebina wikala mwin kwibaz ni wakimba antu akwau amana anch ndiy wading wa usey nakash. Ni wasala nzay ya usey nakash mulong wendendiy amwinend ni wendinang mu ‘matemb ma uyaj.’—Isay 22:16-18.

8. Mutapu ik wamupupau Shebina kudi Yehova ni yibudikin ik yadingaku?

⁸ Mulong Shebina wasala usu wa kwikakin uyaj amwinend, Nzamb wapana chisend chend kudi muntu mukwau utazukinau anch Eliakim. (Isay 22:19-21) Chinech chasadika chisu charijekay Sanakerib Mwant wa in Asiria mulong wa kurishikish Yerusalem. Kupwa, Sanakerib watuma chisak cha antwend ni amasalay avud mulong wa kuyovish in Yuda wom ni kumulej Mwant Ezekias anch ipana. (2 Ant 18:17-25) Ezekias wamutuma Eliakim ni amakundj akwau aad mulong wa kutanijan nau antu inay. Umwing wau wading Shebina ni wading usadin mudi sekreter. Kusutin yom yiney tumen anch Shebina wileja kamu kwikal muntu wikepishina ni kiyovap anch amurumbukin kal ni kanengananap. Wakata kwikal ni ndond ya mwinshin. Tukutwish kwilej malejan masatu kusutin yom yamushikena Shebina.

9-11. (a) Malejan ik ma usey tukutwisha kwilejin kusutin yom yamushikena Shebina? (b) Mutapu ik wiyovila piur pa mutapu wamusadinau Shebina kudi Yehova?

⁹ Chakusambish, uman umekeshina anch Shebina washadisha ndond yend utuvurishin anch “kwibaz kukat kusambeliku chad lel kusheshik.” (Jinswir 16:18) Tukutwish kwikal ni yisend ya pakampwil mu chikumangen ni antu akwau akutwish kutong anch tudi antu akweta usey. Anch chidi mwamu, ov, tukushal kamu ikepishina? Ov, tukuvurik anch ukaliweny wawonsu tukweta ap yom yawonsu yiwamp tusadina chidi mulong wa Yehova? (1 Korint 4:7) Kambuy Paul watubabesha anch: ‘Nikat kukulejany en awonsu anch, kangal wapandakeshany kwitong ayinen chamwamu, pakwez kutong mulong wa kwikal mwin kwilam.’—Rom 12:3.

¹⁰ Cha kaad, chiyul chikash chamwinkau Shebina kudi Yehova chimekeshin anch Nzamb witiyija anch Shebina ukuswimp. (Jinswir 3:11, 12) Dined didi dilejan kudi antu ashadishina kal yisend ya pakampwil. Pa ndond pa kwov ujim ni kuman anch ayirumbukidin, akutwish kudandamen kumwinkish Yehova yom yau yiwamp. Akutwish kuman dipup mudi uman wa rukat ra Yehova. Vurik anch Tatukwetu ukuyifut antu akushala ikepishina. (Tang 1 Pita 5:6, 7.) Dipup dia rukat dia Yehova dikutwish kutuumb anch twikal ikepishina ni anch tudi mudi kam muwamp.

¹¹ Cha kasatu, twilejin dilejan dia usey kusutin mutapu wamusadinau Shebina kudi Yehova. Ap anch kupup kwa Yehova kumekeshin anch ukisin chitil, kumekeshin kand anch umukatin muntu wasalang chitil. Yehova ukat kuman mikadil yiwamp ya antu. Anch udi nvaj ap mukurump wa chikumangen, ukutwish kwimburij mutapu wa kupup wa Yehova?—Jud 22, 23.

12-14. (a) Mutapu ik ukatau kusal antu amwing ku dipup dia Yehova? (b) Dizu dia Nzamb diamukwasha mutapu ik mukadivar umwing kuswimp mwikadil wend ni yibudikin ik yikalaku?

¹² Chaushon, antu amwing akat kwov nayimp nakash anch ayipup ni chinech chikat kusal anch aya kulemp nakash ni Nzamb ni chikumangen. (Hebereu 3:12, 13) Ov, chinech chirumburikin anch kwikil muntu ukutwisha kuyikwash? Bwat! Tal chilakej cha Graham, wopatau mu chikumangen ni kupwa amuchirisha. Pakwez kupwa kwa kumuchirish, walika kusal mudimu wa kulejan ni kuya ku yikumangan. Mukurump umwing wasala usu wa kwikal murund wa Graham ni kupwa Graham wamuleja mukurump winou kwilej nend Bibil.

¹³ Mukurump winou walonda anch: “Graham wading ni mulong wa chibud. Wayilondang nayimp amakurump ading mu komite wa dirumburish mulong wa kumwopat. Chawiy kupwa kwa kwilej mwi mbing jikemp, twisambina piur pa maverse malondina piur pa chibud ni yibudikin yach. Graham wasambisha kwiman amwinend nawamp mu Dizu dia Nzamb didia mudi dikalash ni kasangerap yom yamanayamu! Yibudikin yading yishimokishena! Kupwa kwa kujingunin anch ading amubwikin kal pa mes ni chibud chidia mudi ‘mutond’ ni anch mwikadil wa kulond nayimp wawiy wading mulong wend, chawiy wasambisha kuswimp kapamp kamwing mulong wa kusal yom yiwamp. Wasambisha kukumangan ku yikumangan ya win Kristu pakad kujing, kwilej Dizu dia Nzamb nich mushiku ni wikala ni chaku cha kulembilang dichuku diawonsu. Witiya kand yisend yend ya mu spiritu mudi ntakel wa dijuku, ni chinech chamusangaresha nakash mukajend ni anend.”—Luka 6:41, 42; Jakobu 1:23-25.

¹⁴ Mukurump winou walonda kand anch: “Dichuku dimwing, Graham wanleja chom chimwing chapukuna muchim wam. Ulondin anch: ‘Nading nij uyakin kudiosh pakur ni nasala kand mudi chibol. Pakwez nich kashinsh kawonsu, pinap pawiy nikutwisha kamu kulond anch nimukatin Yehova.’” Machuku makemp, Graham amwinkisha chisend cha kusal ni mikro ku yikumangan ni wading nich musangar wa kwikal ni chisend chinech. Mukurump winou walonda anch: “Chilakej chend chanfundisha anch ang muntu wikepish amwinend kurutu kwa Nzamb mu kwitiy dipup, yiyukish yikat kwez chad yivud!”

MWIMBURIJA NZAMB NI KRISTU CHISU UPANINA DIPUP

15. Yom ik tufanyidina kusal chakwel dipup dietu dikala nich usu?

¹⁵ Anch tukatin kwikal alej awamp, tufanyidin chakusambish kwikal in kwilej awamp. (1 Timote 4:15, 16) Chilik chimwing, anch udi muntu usadidinau kudi Yehova mulong wa kuyipup antu akwau, ufanyidin kushal wikepishina ni kwitiy anch Yehova akutakela mu mwom wey. Anch antu akwau aman anch udi wikepishina, akukulimish ni chikuyiswapel kwitiy yiyul yey. Tukutwish kwilejin kusutin chilakej cha Yesu.

16. Yom ik tukutwisha kwilej kusutin Yesu piur pa dipup ni mafundish mawamp?

¹⁶ Yesu wamuziyinang Tatukwend chisu chawonsu, ap anch chading chikasiken yisu yimwing kusal mwamu. (Mateu 26:39) Wayivurisha in kumutesh anch mafundish ni manangu mend mading madiokil kudi Tatukwend. (Yohan 5:19, 30) Yesu wading wikepishina ni uziyidina, ni chinech chamukwasha kwikal mulej mwin ranaken. Antu a kashinsh asangerang kwikal pamwing ni ndiy. (Tang Luka 4:22.) Mazu mawamp ma Yesu mayikasikesha antu ading aziyina. (Mateu 12:20) Wayikanda atwimbuy end mu mutapu uwamp ni wa rukat ap anch wajimana mulong atadikijana mulong wa kwijik nany wading mukurump nakash pakach pau.—Marko 9:33-37; Luka 22:24-27.

17. Mikadil ik yikuyikwasha amakurump kulam nawamp chikumangen?

¹⁷ Mulong chisu chawonsu amakurump akat kupanang dipup dimedina pa mbil ja Bibil, akwet kuswir kwa kumwimburij Kristu. Mu mutapu winou, akumekesh anch akatin kuyitakel kudi Nzamb ni Mwanend. Kambuy Pita wafunda anch: “Yilamany yisak ya amikoku a Nzamb akwinkishanyau, kangal wasalany mulong wakukushindilany, pakwez salany mudi mudia rusot ra Nzamb. Kangal wasalany kusu mulong wa kupit nfalang, pakwez salany nich mushiku. Kangal wayikelany nich usu antu iulaminanya, pakwez ikalany chilik chiwamp kudi yisak ya amikoku a Nzamb.” (1 Pita 5:2-4) Amakurump akata kumuziyin Nzamb ni Kristu nich musangar akutaninamu, ni antu alaminau akutaninamu niyau.—Isay 32:1, 2, 17, 18.

18. (a) Yehova uchingejin anch anvaj asal yom ik? (b) Mutapu ik ukatau kuyikwash anvaj kudi Nzamb?

¹⁸ Chidi nchik piur pa kupup ni kufumb tutambwila mu dijuku? Yehova uyilejin antakel a majuku anch: “Kangal wayisudishany anen ku michim. Pakwez yikandany ni kuyibabesh nich malejan ma [Yehova].” (Efes 6:4) Ov, kufumb ni dipup yidi kamu ya usey? Tutangin mu Jinswir 19:18 anch: “Mufumba mwaney ikundj pichikudia ruchingej, pakwez kangal wamutek muchim mulong wa kumushesh.” Yehova uyinkishin anvaj chisend cha kuyipup anau. Anch kasadinap mwamu, akupan kuchind kudi ndiy! (1 Samwel 3:12-14) Pakwez Yehova uyinkishin anvaj usu ni manangu makwetau nich kuswir chisu chimwitinau ukwash wend mu malembil ni kuchingejin mu Dizu diend ni spiritu wend utumbila mulong wa kuyitakel.—Tang Jakobu 1:5.

ILEJA MUTAPU WA KUSHAKAM CHIKUPU MU CHISAMBU

19, 20. (a) Yiyukish ik tukata kwikal nich anch twitiy dipup dia Nzamb? (b) Yom ik tukushinshikina mu mutu wa mulong ulondwilaku ou?

¹⁹ Anch twitiy dipup dia Nzamb ni twimburij mutapu wa Yehova ni wa Yesu wa kupupan, tukwikal ni yiyukish yivud nakash kupandakan! Majuku metu ni yikumangen yetu yikwikal mu chisambu ni muntu mwawonsu ukwiyov anch amukatin, ukwet usey ni udi mu diking. Chinech chidi kwau chilakej chikemp cha chisambu ni musangar tukwikala nich mu machuku ma kurutu am. (Kuseng 72:7) Dipup dia Yehova diturijekin kushakam pamwing chikupu mudi dijuku didia mu chisambu ni mu uumwing ni dikweta Yehova mudi Tatukwetu. (Tang Isay 11:9.) Anch twavurik chom chinech, tukuman kurumburik kwa dipup: mutapu uwamp umekeshinay Nzamb anch utukatin.

²⁰ Mu mutu wa mulong ulondwilaku ou, tukwilej yom yivud piur pa dipup tutambwila mu dijuku ni mu chikumangen. Tukwisambin mutapu tukutwisha kwikand ayinetu. Ni tukwilej mutapu wa kwipuk chom chisansena nakash kusutamu dipup din diawonsu tukutwisha kutambul.