‘Teshany Dipup Chakwel Wikalany in Manangu’

1. Mutapu ik tukutwisha kwikal ni manangu, ni makutukwash mutapu ik?

MANANGU madiokiling kudi Yehova ni ukat kumapan kwa kwikatin kudi antu akwau. Tutangin mu Jakobu 1:5 anch: “Anch umwing wenen waburen manangu, amwita Nzamb, chad ndiy ukumwinkish, mulong ukat kupan kudi awonsu wakad katond.” Mutapu umwing tukutwisha kwikal ni manangu udi wa kwitiy dipup dia Nzamb. Kusal mwamu kukat kutuchidij ku kusal yom yiyimp ni kutukwashin kushal piswimp ni Yehova. (Jinswir 2:10-12) Ni tukwikal ni ruchingej ruwamp ra mwom wa chikupu.—Jud 21.

2. Mutapu ik tukutwisha kwilej kukat dipup dia Nzamb?

² Mulong tudi antu akad kuwanyin ap mulong wa mutapu watulilau, chikasikening yisu yimwing kwitiy dipup ni kudiman anch chidi chom chiwamp. Pakwez anch twaman yiyukish yidiokila ku kwitiy dipup dia Nzamb mu mwom wetu, tukwijik kamu anch utukatin nakash. Jinswir 3:11, 12 utulejin anch: “Mwanam ikundj, kangal wadiwol [kupup kwa Yehova].” Kupwa ulondin kand anch: “[Yehova] ukat kumubabesh mwawonsu ukatilay.” Tukutwish kwikal nich kashinsh anch Yehova ukatin yom yiwamp mulong wetwetu. (Tang Hebereu 12:5-11.) Mulong Nzamb utwij nawamp, dipup diend diding chisu chawonsu diwanyidina ni tukweta nich kuswir. Mu mutu wa mulong winou, tukwisambin mitapu yinying ya dipup: (1) kwikand ayinetu, (2) dipup difanyidinau anvaj kuyinkish anau, (3) dipup tutambwila mu chikumangen ni (4) chom chimwing chisansena nakash kusutamu dipup din diawonsu.

MULONG WAK TUDI IN MANANGU ANCH TWIKAND AYINETU?

3. Mutapu ik ukatay mwan kukudish kwikand? Let chilakej.

³ Anch twikand ayinetu, tukat kusop mutapu tusadina yom ni tutongina. Tukatap kuvadik ni mwikadil wa kwikand pakwez tukat kwilej kuwikal nich. Chilakej, anch mwan wilejin kwendish nking, nvaj wend umwing ukutwish kumulamin chakwel nking kangal yawa. Pakwez mu kusut kwa chisu, mwan ukat kwilej mutapu wa kushakam pa nking ni nvaj wend ukutwish kumulikinaku chad mu ka chisu kakemp. Anch nvaj wikal nich kashinsh anch mwan ukutwish kushakam chad nawamp pa nking, ukutwish kumulik endisha amwinend. Chilik chimwing, anch anvaj ayifundish anau nich kushimpish muchim mu ‘kuyikand ni kuyibabesh nich malejan ma Yehova,’ akat kuyikwash anau kukudish kwikand ni manangu.—Efes 6:4.

4, 5. (a) Mulong wak kwikand chidi chikunku cha usey cha ‘wuntu usu’? (b) Mulong wak tufanyidinap kuziy anch twarumbuk?

⁴ Chinech chidi kand chakin kudi antu ashikedina kumwijik Yehova chisu chidiau amakurump. Ap anch akutwish kwikal ni kwikand mu chilik kanang, kand kal ikala in Kristu aswila. Pakwez anch asambish kudjal ‘wuntu usu’ ni kusal usu wa kwikal mudi Kristu, akat kwikal aswila. (Efes 4:23, 24) Kwikand kutukwashin kwijik mutapu wa “kulik mwom uyimp ni maku mayimp ma yom ya mangand, chakwel twikal nich mwom wa kwilam ayinetu, utentamina, [kulamat kudi] Nzamb mu chirung chinech.”—Titus 2:12.

⁵ Pakwez tudi akayitil. (Mulej 7:20) Komb anch twarumbuk, chinech chirumburikin anch tukwetap kwikand ap pakemp? Bwat kwau. Twilejin mu Jinswir 24:16 anch: “Anch mwin kutentam wawa tupamp sambwad, ukulank kand.” Yom ik yikutukwasha ‘kulank kand’? Tukutwishap kusal mwamu ku usu wetu, ching ku spiritu wa Nzamb. (Tang Filip 4:13.) Mu dibuj dia spiritu mudi kand kwilam, kufanikena ni kwikand amwiney.

6. Mutapu ik tukutwisha kwikal in kwilej awamp a Dizu dia Nzamb? (Tal chipich cha kwinsambishin.)

⁶ Malembil, dilejan dia Bibil ni kutongijokin kukutukwash kand kukudish mwikadil wa kwikand. Pakwez chikwikal nchik anch kwilej Bibil kukukasikedin ap ukatinap kwilej? Kangal waziy. Anch witiy, Yehova ukukukwash kwikal nich “impu yikash” mulong wa Dizu diend. (1 Pita 2:2) Mwita Yehova akukwasha kwikand amwiney chakwel utwisha kuman chisu cha kwilej Bibil. Pamwing ap ukutwish kusambish kwilej mwa aminit akemp kwau. Pakemp pakemp, chikukuswapel ni ukusanger chad kwilej nakash. Ukukat chisu chidia zong mulong wa kutongijokin piur pa yitongijok yiwamp ya Yehova.—1 Timote 4:15.

7. Kwikand kutukwashin mutapu ik kuwanyish mipak yetu mu mudimu wa Yehova?

⁷ Kwikand kutukwashin kuwanyish mipak yetu mu mudimu wa Yehova. Chilakej, tatuku umwing wamana anch washadish kal mushiku wend, chawiy witekina mupak wa kwikal chibol wa rawonsu. Kwikand kwamukwasha mutapu ik? Watanga mitu ya milong yidia mu mikand yetu yilondina piur pa mudimu wa uchibol ni walembila. Kusal mwamu kwakasikesha urund wend ni Yehova. Wasala uchibol nkwash chisu chatwishangay kusal mwamu. Kalikap anch chom ap chimwing chimukangesha; pakwez, washinshikina pa mupak wend. Kupwa kwa chisu kanang, wikala chibol wa rawonsu.

MULILA MWANEY MU KUPUP KWA YEHOVA

8-10. Yom ik yikutwisha kuyikwash anvaj kulil anau mulong wa kumusadin Yehova? Let chilakej.

⁸ Yehova wayinkisha anvaj chisend cha kulil anau mu ‘kukand ni kuyibabesh nich malejan ma Yehova.’ (Efes 6:4) Chinech chikasiken kusal mwamu mu mangand minam ma nlel. (2 Timote 3:1-5) Anch an avadik, kijingap kwau uwamp ni uyimp ni kom kau kadingap kakufumb. Chawiy akwet kuswir kwa dipup mulong wa kukafumb. (Rom 2:14, 15) Mwin manangu umwing wija jinsangu ja Bibil walonda anch dizu dia Grek dikarumwinau anch ‘dipup’ dikutwish kand kurumburik anch “kukul kwa mwan” ap kumulil mwan chakwel ikala mwin kulam yisend yend pakupamay.

⁹ Anch anvaj ayipup anau nich rukat, an akwiyov anch adi mu diking. Akat kwilej anch want ipau ukwet mimbu ni anch chom chawonsu chikusalau mu mwom wau chikwet yibudikin. Chawiy chidia cha usey nakash kudi anvaj in Kristu kuchingejin manangu ma Yehova mulong wa kuyikwash kulil anau. Yitongijok piur pa kulil an yishalijadin nakash kukwatijan ni ndond yishichay muntu ni yitongijok yiney yidandamedin kuswimp. Pakwez, anvaj amuteshina Nzamb kakatap kwakam piur pa yom yifanyidinau kusal ap kuchingejin yitongijok ya antu.

¹⁰ Tukutwish kwilejin kusutin chilakej cha Nowa. Chisu chamulejau kudi Yehova kusal waat, Nowa kadingap kija mutapu wa kusal mwamu. Wamuchingejina Yehova ni tutangin anch ndiy wasala ‘kamu mwamu’ mudi mwamulejau kudi Yehova. (Disambishil 6:22) Yibudikin ik yikalaku? Waat wamupandisha Nowa ni dijiku diend! Nowa wading kamu nvaj muwamp. Mulong wak? Mulong wachingejina manangu ma Nzamb. Nowa wayifundisha anend nawamp ni wayishila chilakej chiwamp, chom chinech chadingap chiswapela mu mangand minima mayimp kurutu kwa Mabeb.—Disambishil 6:5.

11. Mulong wak anvaj afanyidin kusal usu nakash wa kuyifumb anau?

¹¹ Anch udi nvaj, mutapu ik ukutwisha niyey kusal ‘kamu mwamu’? Mutesha Yehova. Mulika akukwasha kulil aney. Sadin yiyul yidia mu Dizu diend ni yiletinau kudi dirijek diend. Anch wasal mwamu, mwaney ukukujikitish chakin kamu! Mukadivar umwing wafunda anch: “Nijikitishin nakash mulong wa mutapu wanlilau kudi anvajam. Asala usu nakash mulong wa kupukun muchim wam.” Ulondin anch anvajend awiy amukwasha kusej piswimp ni Yehova. Chakin kamu, ap anch anvaj asal yom yawonsu yikutwishau mulong wa kumulil mwanau, mwan ukutwish kumulik Yehova. Pakwez nvaj wasala usu wend wawonsu ukutwish kwikal ni kom kawamp ni ukutwish kuchingej anch dichuku dimwing mwanend ukumuchirikin Yehova.

12, 13. (a) Anch mwan amwopat mu chikumangen, mutapu ik ukumekeshau anvaj anch amuziyidin Nzamb? (b) Mutapu ik dijuku dimwing dataninamu mu kuziyin kwa anvaj kudi Yehova?

¹² Kudi anvaj amwing, chom chimwing chikata kupak kuziyin chikat kushiken anch mwan amwopat mu chikumangen. Nambaz umwing ukweta mwanend changadim wopatau ni wadiokala ku chikumbu ulondin anch: “Nakimba kurumbuk kanang mu mikand yetu chakwel nitwisha kwiyingish nich mulong wa kusutish chisu ni mwanam mband ni mwijukuram mband.” Pakwez nfumwend wamukwasha mu mutapu uwamp kuman anch awiy kakwetap kand chisend cha mwanau ni anch afanyidin kushal ashinshamena kudi Yehova.

¹³ Kupwa kwa mivu kanang, changadim winou amuchirisha mu chikumangen. Makwend ulondin anch: “Katat ukat kwintazuk ap kwinfundin mesaj dichuku diawonsu! Ni utulimishin nakash mulong wij anch twamuziyina Nzamb. Katat tukwet urund uwamp.” Anch mwaney ikundj ap mband amwopat, ov, ‘ukumuchingejin Yehova ni muchim wey wawonsu’? Ukumekesh kudi Ndiy anch “[uchingejidinap] ronganyin rey amwiney”? (Jinswir 3:5, 6) Vurik anch dipup dia Yehova dimekeshin mutapu ukwetay manangu ni mutapu utukatinay nakash. Kangal wavuramen anch wapana Mwanend mulong wa antu in awonsu, pamwing ni mwaney ikundj ap mband. Nzamb ukatin anch muntu mwawonsu ikala ni mwom wa chikupu. (Tang 2 Pita 3:9.) Chawiy en anvaj, dandamenany kuchingejin anch dipup dia Yehova ni umutakel wend yitentamin, ap anch kuziyin kukat kulet kusansan yisu yimwing. Teshany dipup dia Yehova ni kangal wadibwambwilany.

MU CHIKUMANGEN

14. Mutapu ik tutanidinamu mu malejan ma Yehova matwinkinau kudi “kashalapol ushinshamena”?

¹⁴ Yehova washilamu kulam, kuchidij ni kufundish chikumangen cha win Kristu. Usadin mwamu mu mitapu yivud. Chilakej, wamuteka Mwanend mulong wa kulam chikumangen, ni Yesu wamutonda “kashalapol ushinshamena” kupan yakudia ya mu spiritu mulong wa kutukwash kushal ashinshamena. (Luka 12:42) “Kashalapol” winou utwinkishin mafundish mawamp, ap dipup. Ukutwish kutong yisu yimwing watesha diskur ap kutang mutu wa mulong umwing mu mikand yetu wakukwasha kuswimp mutapu wey wa kutong ap wa kusal yom. Ukutwish kwikal nich musangar anch wasala kuswimp kwinoku, mulong chirumburikin anch witiyija anch Yehova akupupa.—Jinswir 2:1-5.

15, 16. (a) Mutapu ik tukutwisha kutaninamu mu mudimu usadinau amakurump? (b) Mutapu ik tukutwisha kusal anch amakurump asangera mudimu wau?

¹⁵ Kristu wayiteka amakurump mulong wa kubangin nich rukat chikumangen. Bibil uyitazukin akadivar inay anch ‘yipan kudi antu.’ (Efes 4:8, 11-13) Mutapu ik tukutwisha kutaninamu mu mudimu usadinau amakurump? Tukutwish kwimburij ritiy rau ni chilakej chau chiwamp, ni tukutwish kulondul yiyul yitwinkishinau kusutin Bibil. (Tang Hebereu 13:7, 17.) Amakurump atukatin ni akatin anch tuseja piswimp ni Nzamb. Anch aman anch twezinap kand ku chikumangan ap twashadish kal mushiku wetu, akat kusal usu kapamp kamwing mulong wa kutukwash. Akat kututesh bil nawamp kupwa akutukasikesh mu mutapu wa rukat ni akutwinkish yiyul ya manangu yidia mu Bibil. Ov, ukat kuman ukwash wau mudi uman umekeshina anch Yehova ukukatin?

¹⁶ Vurik anch chiswapelingap kudi amakurump kutwinkish chiyul. Utongin anch muprofet Natan wiyova mutapu ik chisu chambambay ni Mwant David kupwa kwa mwant kusal usu wa kujindjik chitil chend chijim? (2 Samwel 12:1-14) Mutapu ik wiyovay kambuy Paul chisu chamuyulay kambuy Pita, umwing wa atwimbuy 12, mulong wa kuyisadin in Kristu in Yuda nawamp kusutamu akwau akad kwikal in Yuda? Paul wading ufanyidin kwikal ni kutakaman mulong wa kusal mwamu. (Galatia 2:11-14) Chawiy mutapu ik ukutwisha kusal anch chiyiswapela amakurump kukwinkish chiyul? Ikal wikepishina, mwin kujikitish ni uswapela kwambamb nend. Man ukwash wau mudi uman wa rukat ra Nzamb. Ukutaninamu ni amakurump akusanger kusal mudimu wau.

17. Mutapu ik wamukwashau nambaz umwing kudi amakurump?

¹⁷ Nambaz umwing ulondin anch yom yamushikena pakur yasala anch chimukasikena ndiy kumukat Yehova ni waziya nakash. Ulondin anch: “Nading nij anch nifanyidin kwambamb nau amakurump. Kanfishap nich ap kwinlond nayimp, pakwez ankasikesha nakash. Kupwa kwa yikumangan yin yawonsu, ap anch ading akwatiken nakash, umwing pakach pau wezang kwingipul mutapu nidia. Mulong wa yom yasadika pakur, namana anch chikasiken kwiyov anch niwanyidin rukat ra Nzamb. Pakwez chisu ni chisu, Yehova wasadina chikumangen ni amakurump mulong wa kwinlej anch winkatin. Nalembila anch nikutwishap kumulik ap kapamp kamwing.”

CHOM IK CHIDIA CHIYIMP NAKASH KUSUTAMU KUSANSAN KWA DIPUP?

18, 19. Chom ik chidia chiyimp nakash kusutamu kusansan kwa dipup? Let chilakej.

¹⁸ Dipup dikutwish kulet kusansan, pakwez yibudikin ya kulik dipup dia Nzamb yiding yisansena nakash kupandakan. (Hebereu 12:11) Tukutwish kwilejin kusutin yilakej yiyimp ya Kain ni Mwant Sedekias. Chisu chamanay Nzamb anch Kain umukisin mwanamakwend ni ukimbin kumujip, wamubabesha Kain anch: “Mulong wak wovila ujim mwamu, ni mulong wak mpal yey yakarumukang kal? Anch ey watongang kusal nawamp ing kakukutambulap? Pakwez anch ey kiwatongangap kusal nawamp, yitil yidi mudi nnam wa chidiany ukubatamidina ku chis mulong wa kukukwat, pakwez chifanyidin ey kuyipandakan.” (Disambishil 4:6, 7) Kain walika dipup dia Yehova, wamujipa mwanamakwend ni wamana mar nakash mu mwom wend wawonsu mulong wa yom yasalay. (Disambishil 4:11, 12) Anch Kain wamutesha Nzamb, ing kwovap kusansan mudi kwinoku.

¹⁹ Sedekias wading mwant muyimp ni uziyina. Chisu chadingay mwant, antu a mu Yerusalem ading mu mashakamin mayimp. Muprofet Jeremiy wamubabesha Sedekias tupamp ni tupamp anch ufanyidin kuswimp. Pakwez mwant walika dipup dia Yehova ni yibudikin yading yiyimp nakash. (Jeremiy 52:8-11) Yehova kakatinap anch twova kusansan mudi kwinoku kwa chamwamu!—Tang Isay 48:17, 18.

20. Yom ik yikuyishikena antu akwitiya dipup dia Nzamb ni antu akudilika?

²⁰ Nlel unou, antu avud mu mangand akat kusip dipup dia Nzamb ni kudilik. Pakwez piswimp ap, muntu mwawonsu ukata kulik dipup dia Nzamb ukuman mar ma yibudikin yiyimp. (Jinswir 1:24-31) Komb el ‘tuteshany dipup, chakwel twikalany in manangu.’ Jinswir 4:13 ulondin anch: ‘Lam ba dipup, kangal wadilik. Dilama, mulong diawiy didia mwom wey.’