BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • w18 Kalang map. 21 ​-​ 26
  • Ov, Nany Ukata Kuumb Yitongijok Yey?

Kwikil video ukimbina

Video winou umukimbinap amboku nawamp.

  • Ov, Nany Ukata Kuumb Yitongijok Yey?
  • Chinong cha Kalam Chilejen Want wa Yehova—2018
  • Tumitu twa milong
  • Yom Yifanakena
  • YITONGIJOK YA YEHOVA YIDI YA USEY
  • YITONGIJOK YA YEHOVA YIDI YA PIUR
  • IPUK KWIKAL UUMBINAU KUDI MANGAND MINAM
  • NANY UKUUMBILA KATAT?
  • Ov, Usadin Usu wa Kwikal ni Yitongijok ya Yehova?
    Chinong cha Kalam Chilejen Want wa Yehova—2018
  • “Ov, Nany Wijika Chitongijok Cha [Yehova]?”
    Chinong cha Kalam Chilejen Want wa Yehova—2010
  • Mutapu ik Ukutwisha Kulam Muchim Wey?
    Chinong cha Kalam Chilejen Want wa Yehova (Cha Kwilej)—2019
  • Mwimburija Yehova ni Yesu mu Mutapu wey wa Kutong
    Chinong cha Kalam Chilejen Want wa Yehova (Cha Kwilej)—2025
Chinong cha Kalam Chilejen Want wa Yehova—2018
w18 Kalang map. 21 ​-​ 26

Ov, Nany Ukata Kuumb Yitongijok Yey?

‘Likany kwikal aumbinau kudi ditenchik dined dia yom.’​—ROM 12:2.

MIMINY: 88, 45

OV, UKUTWISH KWAKUL?

  • Mulong wak yitongijok ya Yehova yidi ya usey nakash kudi etu?

  • Mulong wak yitongijok ya Yehova yidi ya piur nakash kusutamu yitongijok ya mangand?

  • Yom ik tufanyidina kusal mulong wa kwipuk kwikal aumbinau kudi mangand?

1, 2. (a) Mutapu ik wakulay Yesu chisu chamulejau kudi Pita anch iyanakena amwiney? (Tal chipich cha kwinsambishin.) (b) Mulong wak Yesu wakula mu mutapu winou?

IN KWILEJ a Yesu iyova nayimp! Atonga anch Yesu wafanyina kuchirish want wa Isarel, pakwez Yesu walonda anch mu machuku makemp ukuman mar ni ukufa. Kambuy Pita wamuleja anch: “Nsalejam, [iyanakena amwiney]! Yom yiney kangal yashik kudi [ey]!” Yesu wamwakula anch: ‘Sut kwinyim kwam, Satan, ey udi chom cha kwimpwakesh am, mulong yitongijok yey kiyidiokilap kwa Nzamb, yidiokil kudi antu.’​—Mateu 16:21-23; Midimu 1:6.

2 Kusutin kulond mazu minam, Yesu wamekesha patok anch yitongijok ya Yehova yishalijadin ni yitongijok ya mangand matakedilau kudi Satan. (1 Yohan 5:19) Pita wamukasikesha Yesu kwikal ni chitongijok cha choy chikwetau antu avud mu mangand. Pakwez Yesu wading wij anch Yehova wading ukatin anch irijek mulong wa mar ni rufu rading rifanyidina kumushiken mu machuku makemp. Chakul cha patok cha Yesu chamekesha anch wading witiyin yitongijok ya Yehova ni kulik kamu yitongijok ya mangand.

3. Mulong wak chikasiken kwitiy yitongijok ya Yehova ni kulik yitongijok ya mangand?

3 Chid nchik piur petu? Ov, tutongining mudi Yehova anch mudi antu a mangand? Mulong tudi in Kristu, tukat kusal usu wawonsu wa kwikal nich kashinsh anch yom yawonsu tusadina yimusangaresh Yehova. Pakwez chidi nchik piur pa mutapu tutongining? Ov, tusadin usu wa kutong mudi Yehova, charumburik anch kuman yom mudi muyimenay? Kusal mwamu kwitin usu nakash. Pakwez, chiswapel nakash kutong mudi antu a mangand. Chidi mwamu mulong spiritu wa mangand utunyingumukin etu awonsu. (Efes 2:2) Chikwau kand, yisu yivud antu mu mangand akat kushinshikin pa ayinau ni tukutwish kwikal apakinau chakwel tutonga mudi awiy. Mwaning, chikasiken kutong mudi Yehova pakwez chiziyin nakash kutong mudi antu a mu mangand.

4. (a) Yom ik yikushikena anch twitiy anch mangand mikal ni yibachikin pa mutapu wetu wa kutong? (b) Yom ik tukwileja mu mutu wa mulong winou?

4 Anch twalik mangand mikal ni usu pa mutapu wetu wa kutong, tukwikal kamu in choy ni kukat kukwat mupak ayinetu piur pa yom yidia yiwamp ni yiyimp. (Marko 7:21, 22) Chawiy chidi cha usey nakash kwilej kutong ‘yitongijok ya Nzamb’ kulik ‘yitongijok ya antu.’ Mutu wa mulong winou ukutukwash kusal mwamu. Tukushinshikin mayingishin mamekeshina anch kuman yom mudi muyimenau kudi Yehova kutukangeshinap kusal yom tukatina, pakwez chidi mulong wa kutaninamu kwetu. Tukushinshikin kand mutapu tukutwisha kwipuk kwikal aumbinau ap abachikinau kudi yitongijok ya mangand minam. Mu mutu wa mulong ulondwilaku, tukwilej mutapu tukutwisha kwikal ni yitongijok ya Yehova piur pa milong yimwing ni kutong mudi mutonginay ndiy.

YITONGIJOK YA YEHOVA YIDI YA USEY

5. Mulong wak antu amwing kakukatangap muntu kanang kwikal ni yibachikin padi awiy?

5 Antu amwing kakatiningap anch muntu kanang ikal ni yibachikin pa mutapu wau wa kutong. Akat kulond anch, “amwinam nitongin.” Chirumburikin pamwing ap anch akatin kukwat mipak ayinau ni anch akwet usu wa kusal mwamu. Kakukatangap anch antu akwau ayiyikel ap kuyibachik kwikal mudi muntu mukwau.a (Tal mazu ma kwinshin.)

6. (a) Kukolik ik kutwinkishinau kudi Yehova? (b) Ov, kukolik kwinoku kudi kwakad mimbu?

6 Chidi chiwamp kwijik anch ang twitiy yitongijok ya Yehova, tukutwish kudandamen kwikal ni yitongijok yetu. Mukand wa kaad wa Korint 3:17, (TMK) ulondin anch: “Kwawonsu kudia spiritu wa [Yehova] kwawiy kudia kwikol.” Yehova watwinkisha kukolik mulong wa kwikal mu mutapu tukatina kwikal. Tukutwish kwikal ni yom tukatina ni kutond chom tufanyidina kusanger. Yehova watusala mu mutapu winou. Pakwez chinech chirumburikinap anch kukolik kwinoku kudi kwakad mipak. (Tang 1 Pita 2:16.) Anch tukimbin kwijik chom chidia chiwamp ap chiyimp, Yehova ukatin anch tusadin Dizu diend chakwel ditutakel. Ov, kusal mwamu chidi chikangesh anch kudi kutaninamu?

7, 8. Ov, chidi chikangesh anch twaman yom mudi muyimenau kudi Yehova? Let chilakej.

7 Tukutwish kwovakesh kusutin chilakej chinech. Anvaj akat kusal usu wa kuyifundish anau yom yiwamp. Akutwish kuyifundish kwikal in kashinsh, in kusal mudimu, ni in kuyibangin antu akwau. Mafundish minam madiap chikangesh. Pakwez, anvaj ayitenchikin anau chakwel ikal ni mwom uwamp. Anch an apam ni adiokal ku chikumbu, akwikal ant ipau mulong wa kutond ayinau. Anch atond kushakam kukwatijan nich yom yiwamp yayifundishau kudi anvajau, pinipa akwat kal chakin kamu mipak yiwamp ni kwipuk milong yivud, yakamish ni minan.

Yehova utwitin kwilej kuman yom mutapu uyimenay ndiy ni kushakam kukwatijan ni yom yitufundishinay

8 Mudi nvaj muwamp, Yehova ukatin anend ikal ni mwom uwamp. (Isay 48:17, 18) Chawiy ukat kutufundish mbil ja pa dishin piur pa mwikadil uwamp ni mutapu tufanyidina kuyisadin antu akwau. Utwitin kwilej kuman yom mutapu uyimenay ndiy ni kushakam kukwatijan ni yom yitufundishinay. Yom yiney yidiap chikangesh. Pakwez, yikat kutusal twikal in manangu ni kukwat mipak yiwamp. (Kuseng 92:5; Jinswir 2:1-5; Isay 55:9) Tukutwish kwetu kudandamen kusanger yom tukatina, pakwez tukutwish kutond yom yikutuletina musangar. (Kuseng 1:2, 3) Anch twikal ni yitongijok ya Yehova, tukat kutaninamu mu mitapu yivud!

YITONGIJOK YA YEHOVA YIDI YA PIUR

9, 10. Yom ik yimekeshina anch yitongijok ya Yehova yidi ya piur nakash kusutamu ya mangand?

9 Diyingishin dikwau disadina anch tukata kwikal ni yitongijok mudi ya Yehova didi anch yitongijok yend yidi ya piur nakash kusutamu ya mangand. Mangand makat kupan yiyul piur pa mwikadil udia uwamp, mutapu wa kwikal ni mashakamin ma dijuku masangareshina, ni mutapu wa kwikal ni mudimu uwamp, ni piur pa yom yikwau kand ya mu mwom. Pakwez yiyul yivud pakach pa yiyul yiney yikwatijadinap ni yitongijok ya Yehova. Chilakej, yisu yivud mangand makat kuyikasikesh antu kushinshikin ching pa maswir mau ayinau ni kuman masandj mudi madi kwau mawamp. Ni yisu yimwing mangand makat kufundish anch ambay a uruw akutwish kwikal ni musangar anch aurik ap ajip uruw mulong wa tumayingishin tukemp tukemp. Yiyul yiney yikwatijadinap ni yom yifundishinay Bibil. Pakwez, ov, yiyul ya mangand yikwet usey nakash nlel kusutamu yiyul ya Bibil?

10 Yesu walonda anch: “Manangu [. . .] makat kumekan anch madi makin ku yisalijok yau.” (Mateu 11:19) Ap anch mangand mayil kurutu nakash mu milong ya tekinoloji, matwishinap kupwish milong yijim yitukangeshina kwikal ni musangar mudi njit, katond ka ulomb wa chikit, ni kujipijan. Chikwau kand, mangand mamen masandj mudi chom chiwamp. Pakwez antu avud amen anch masandj makat kujip majuku, kulet mayej ni yibudikin yikwau yiyimp. Pakwez chidi nchik piur pa yiyul ya Yehova? In Kristu akata kwitiyij yiyul ya Yehova akwet majuku makweta musangar, ukash wa mujimbu uwamp, ni urund wa chisambu nau akadivar ni anambaz adia pa mangand mawonsu. (Isay 2:4; Midimu 10:34, 35; 1 Korint 6:9-11) Yiney yimekeshin patok anch yitongijok ya Yehova yidi ya piur nakash kusutamu ya mangand.

11. Nany waumba yitongijok ya Moses, ni yibudikin ik yikalaku?

11 Atushalapol ashinshamena a Yehova a pasak ading ij anch yitongijok ya Yehova yidi ya piur nakash. Chilakej, ap anch Moses amufundisha “manangu mawonsu ma in Ijibit,” wading wij anch manangu makin madiokil kudi Yehova. (Midimu 7:22; Kuseng 90:12) Chawiy chamwelay Yehova anch: “Nlejap jinjil jey.” (Kubudik 33:13) Mulong Moses witiya anch Yehova aumb yitongijok yend, Yehova wamusadina mu mutapu ushimokishena mulong wa kuwanyish chitongijok chend ni kusal anch Moses amutazuk anch muntu wa ritiy rijim nakash.​—Hebereu 11:24-27.

12. Mipak ya Paul yading yimedin pa chom ik?

12 Kambuy Paul wading ni manangu, wading muntu wileja, ni walondang mazu anch makep maad. (Midimu 5:34; 21:37, 39; 22:2, 3) Pakwez walika manangu ma mangand ni wakwata mipak yend yimedina pa Dizu dia Nzamb. (Tang Midimu 17:2; 1 Korint 2:6, 7, 13.) Mudi chibudikin, watwisha kusal nawamp mudimu wend wa kulejan ni wachingeja kutambul difut dia chikupu.​—2 Timote 4:8.

13. Nany ukweta chisend cha kurijek yitongijok yetu chakwel tuman yom mudi muyimenau kudi Yehova?

13 Chakin kamu, yitongijok ya Yehova yidi ya piur nakash. Anch twalondul mbil ja Nzamb, tukwikal kamu chakin nich musangar ni tukutwish mu mwom. Pakwez Yehova kakumushindinap muntu chakwel atong mudi ndiy. ‘Kashalapol ushinshamena ni kubabal’ kakatap kusop yitongijok yetu, ni ap amakurump a chikumangen kakusalangap mwamu. (Mateu 24:45; 2 Korint 1:24) Umwing ni umwing wa pakach petu ukwet chisend cha kurijek yitongijok yend chakwel aman yom mudi muyimenau kudi Yehova. Mutapu ik tukutwisha kusal mwamu?

IPUK KWIKAL UUMBINAU KUDI MANGAND MINAM

14, 15. (a) Yom ik tufanyidina kutongijokin chakwel tutong mudi Yehova? (b) Mulong wak tufanyidinap kulikidil yitongijok ya mangand yandam mu manangu metu? Let chilakej.

14 Rom 12:2 ulondin anch: ‘Likany kwikal aumbinau kudi ditenchik dined dia yom, pakwez karumukany mu kuswimp manangu men, chakwel en utwishany kwijik yidia rusot ra Nzamb, yiwamp, yisangarishina ni yiwanyidina.’ Verse winou utufundishin anch chikalap nchik yom yaumba yitongijok yetu kurutu twileja uyakin, tukutwish kuswimp yitongijok yetu ni kwikal ni yitongijok mudi ya Nzamb. Ap anch mutapu twavadika ni yom yatushikena yikal ni yibachikin pa mutapu wetu wa kutong mu chilik kanang, manangu metu makutwish kuswimp. Ni makuswimp kukwatijan ni yom tutondina kutongijokin. Anch twatongijokin pa yitongijok ya Yehova, tukuman patok anch mutapu wend wa kuman yom udi kamu chisu chawonsu uwamp. Kupwa, tukukat kuman yom mudi muyimenay.

15 Pakwez mulong wa kuswimp manangu metu chakwel tutonga mudi Yehova, tufanyidin ‘kulik kwikal aumbinau kudi ditenchik dined.’ Chinech chirumburikin anch tufanyidin kulik kutal, kutang ni kutesh chom chin chawonsu chakad kukwatijan ni yitongijok ya Nzamb. Mulong wa kutukwash kutesh mutapu chidia cha usey kusal mwamu, tushinshikinany chilakej cha yakudia. Muntu ukatina kwikal ni mujimbu uwamp ukutwish kukwat mupak wa kudia yakudia yiwamp. Pakwez usu wend usadinay ukwikal wa chamwamu anch ukat kudia chisu chawonsu yakudia yivundina! Chilik chimwing, usu wetu wawonsu tusadina mulong wa kwilej piur pa yitongijok ya Yehova ukwikal wa chamwamu anch twalikidil yitongijok ya mangand yandam mu manangu metu.

16. Tufanyidin kwichidij ku yom ik?

16 Ov, tukutwish kwipuk kamu yitongijok yawonsu ya mangand? Bwat, tukutwish kutesh ap kuman yom yimwing yikweta yitongijok ya mangand mulong tukutwishap kamu kudiokal mu mangand. (1 Korint 5:9, 10) Ap chisu tudia mu mudimu wa kulejan, tukutwish kutesh antu akat kulond piur pa yitongijok yiyimp ap yitiyij ya makasu. Mulong tukutwishap kamu kwipuk yitongijok yawonsu yiyimp, tufanyidinap kudandamen kutong mudi awiy ap kwitiy yitongijok yau. Mudi Yesu, tufanyidin kwikal aswapela kulik yitongijok yikatinay Satan anch twikal nich. Ni tukutwish kwichidij ayinetu kusutin kwipuk kwibwand kwa kwikatin yitongijok ya mangand.​—Tang Jinswir 4:23.

17. Mutapu ik tukutwisha kwipuk kwibwand kwa kwikatin yitongijok ya mangand?

17 Chilakej, tufanyidin kutond arund netu nich manangu. Bibil utubabeshin anch ang twikal mu urund wa piswimp nau antu akad kumwifukwil Yehova, tukusambish kutong mudi awiy. (Jinswir 13:20; 1 Korint 15:12, 32, 33) Tufanyidin kand kutond mitapu ya kwipuwangej nich kubabal. Anch twalik kwipuwangej kukasikeshina malejan ma dikarumuk, chisum, yom ya kwijond, twipukin kuyipish manangu metu nich yitongijok ‘yakad kukwatijan ni ronganyin ra Nzamb.’​—2 Korint 10:5.

18, 19. (a) Mulong wak tufanyidina kwikal ababela pa ntaliken ni yitongijok ya mangand yipalangeshinau mu mutapu wakad kumekan nawamp? (b) Yipul ik tufanyidina kwiyipul, ni mulong wak?

18 Tufanyidin kand kwijik ni kulik yitongijok ya mangand yikasikeshinau mu mitapu yakad kwijikan nawamp. Chilakej, jinsangu jimwing ajilejen mu mutapu ukasikeshina yitongijok yimwing ya politik. Ni jinsangu jikwau jikasikeshin mipak ni yom yimwing yikatinau kudi mangand. Mafilim ni mabuku mamwing makasikeshin chitongijok chakwel anch “am bil” ni “dijuku bil” ni makat kumekesh yitongijok yiney mudi yisikena, yisangareshina ni yiwamp. Pakwez, yitongijok yiney yikwatijadinap ni Bibil. Bibil ulondin anch etu ni dijuku dietu tukwikal ni musangar wakin anch twamukat chakusambish Yehova. (Mateu 22:36-39) Chikwau kand, nsangu jimwing ja anikanch, ap anch akutwish kujitiy kudi antu avud, jikutwish pakemp pakemp kusal anch an ikal ni yisal yiyimp.

19 Chinech chirumburikinap anch chidi chiyimp kusanger kwipuwangej kuwamp. Pakwez tufanyidin kwiyipul anch: ‘Ov, nikat kujingunin yitongijok ya mangand ap anch ayipalangeshin mu mutapu wakad kumekan nawamp? Ov, nikat kwichidij amwinam ni anam ku maprogram mamwing ma TV ni kulik kutangol jinsangu jimwing? Ov, nikat kuyikwash anam kuman yom mudi muyimenau kudi Yehova chakwel alik kwikal ni yibachikin ya yitongijok ya mangand yiteshinau ap yimenau?’ Anch twajingunin kushalijan kudia pakach pa yitongijok ya Nzamb ni yitongijok ya mangand, tukutwish kwipuk ‘kwikal aumbinau kudi ditenchik dined dia yom.’

NANY UKUUMBILA KATAT?

20. Yom ik yikumekesha musul utuumbina?

20 Tufanyidin kuvurik anch kudi misul yaad ya jinsangu. Musul umwing udi Yehova, ni ukwau udi Satan ni mangand mend. Nany ukuumbina? Chakul chidi anch, udi musul kuukata kutambul jinsangu. Anch twitiy yitongijok ya mangand, mangand makuumb yitongijok yetu ni tukusal kwa choy. Chawiy chidi cha usey nakash kubabal chisu tutondina yom tukimbina kutal, kutang, kutesh, ap kutongijokin.

21. Yom ik tukwisambina mu mutu wa mulong wambakedinap?

21 Mu mutu wa mulong winou twilej kal anch mulong wa kwikal ni yitongijok ya Yehova, tufanyidin kwipuk yitongijok ya mangand. Tufanyidin kand kutongijokin pa yitongijok ya Yehova chakwel tutwish kutong mudi ndiy. Mu mutu wa mulong wambakedinap, tukwilej mutapu tukutwisha kusal mwamu.

a Uyakin udi anch ap antu akata kwisadin yom mu mutapu ukatinau akweting ching yibachikin ya akwau. Chilakej, anch tutongin piur pa mutapu wasambisha mwom ap kwau piur pa yom tukudjala, tukutwish kwikal ni yibachikin ya antu akwau, ap pakad kutongin. Pakwez tufanyidin kutond muntu ufanyidina kwikal ni yibachikin padi etu.

KURUMBURIL KWA MAZU KANANG

  • Tukat kwikal ni yitongijok ya Yehova chisu tukata kuman yom mudi muyimenay ndiy. Tukat kusanger yom yisangaredinay ni kukis yom yikisinay. Mulong wa kutong mudi Yehova, tufanyidin kulik yitongijok ya mangand yakad kukwatijan ni mbil ja Nzamb

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan