Ov, Usadin Usu wa Kwikal ni Yitongijok ya Yehova?

1, 2. Pitudandamedina kuya kurutu, yom ik tukata kwilej? Let chilakej.

TONG bil anch muntu wamwinkish mwan mukemp chipan. Anvaj a mwan akumulej anch, “Lond anch wajikitany.” Mwan ukusal mwamu, nakash chidi mulong amulejang kusal mwamu. Pakwez anch mwan winou wapam, ukusambish kwijik mulong wak anvaj amen anch chidi cha usey kujikitish anch antu akwau atusadin chom chiwamp. Kupwa, ukwiyov kwikal ubachikinau kuyijikitish antu akwau pakad kumulej mulong wilejin kal kwikal mwin kujikitish.

² Chom mudi chinech chatushikedin kal. Chisu twasambisha kwilej uyakin, twileja anch chidi cha usey kuziyin kwi mbil ya Yehova. Pakwez pitudandamedina kuya kurutu, twilejin yom yivud piur pa yitongijok yend, charumburik anch yom yikatinay, yikisinay ni mutapu umenay yom. Anch twitiy anch yitongijok ya Yehova yikal ni yibachikin pa kutond kwetu ni yisalijok yetu, tukwet yitongijok ya Yehova.

3. Mulong wak chikutwish kutukasiken kutong mudi mutonginingay Yehova?

³ Ap anch tusangaredin kwilej yitongijok ya Yehova, yisu yimwing chikasiken kutong mudi mutonginay Yehova mulong tudi antu akad kuwanyin. Chilakej, twij mutapu umeningay Yehova mwikadil wishitwila, yom ya ku mujimbu, mudimu wa kulejan, kusadin kuyimp kwa mash, ni yom yikwau. Pakwez chikutwish kwikal chikash kudi etu kutesh mulong wak Yehova uyimen yom yiney mu mutapu winou. Chawiy mutapu ik tukutwisha kwilej kutong kamu nakash mudi Yehova? Ni kusal mwamu kukutukwash mutapu ik kusal yom yiwamp katat ni mu machuku ma kurutu?

MUTAPU TUKATA KWIKAL NI YITONGIJOK YA NZAMB

4. Chom ik chirumburikina kukarumun manangu metu?

⁴ Tang Rom 12:2. Mu verse winou, kambuy Paul ujimbwil yom tufanyidina kusal mulong wa kwilej kutong mudi mutonginay Yehova. Ulondin anch ‘likany kwikal aumbinau kudi ditenchik dined dia yom.’ Mudi twilejang mu mutu wa mulong wasambedina, chinech chirumburikin anch tufanyidin kulik yitongijok ni yisal ya mangand. Pakwez, Paul walonda kand anch tufanyidin kuswimp manangu metu. Chinech chirumburikin anch tufanyidin kutang Dizu dia Nzamb, kutesh yitongijok yend, kuyitongijokin, ni kusal usu wa kwikal ni yitongijok ya Yehova.

5. Rumburil kushalijan kudia pakach pa kutang ni kwilej.

⁵ Kwilej kwitin yom yivud kusutamu kwau kutang jinsangu mau mau ap kutek yijingidij pa yakul mu chichap kanang cha kwilej. Chisu twilejina, tukat kutong piur pa yom yitufundishina yom yiney piur pa Yehova, yom yisadinay ni mutapu wend wa kutong. Tukat kusal usu wa kutesh mulong wak Yehova utulejin kusal chom kanang ni kwipul kusal chom kampand. Tukat kushinshikin kand yom tufanyidina kuswimp mu mwom wetu ni mu yitongijok yetu. Chakin kamu, chikutwish kutukasiken kutongijokin pa manans minam mawonsu chisu ni chisu twilejina. Pakwez chidi chiwamp kusutish chisu, pamwing ap chikunku cha chisu cha dilejan mulong wa kutongijokin pa yom tutangina.​—Kuseng 119:97; 1 Timote 4:15.

6. Yom ik yikata kushiken chisu tutongijokidina pa Dizu dia Nzamb?

⁶ Chom kanang chishimokishena chikat kushiken chisu tutongijokidina chisu ni chisu pa Dizu dia Nzamb. Tukat ‘kwitiyij ayinetu’ ap kwikal nich kashinsh anch yitongijok ya Yehova yidi yiwanyidina. Tukat kusambish kwijik mutapu umenay yom, ni pakemp pakemp tukat kwitiyij mutapu wend wa kuman yom. Tukat kuswimp manangu metu ni kusambish kutong mu mutapu usu. Pakemp pakemp, tukat kwikal ni yitongijok ya Yehova.

YITONGIJOK YETU YIKWET USU PA YISALIJOK YETU

7, 8. (a) Mutapu ik umeningay Yehova yom ya ku mujimbu? (Tal yipich yidia kwinsambishin.) (b) Anch tumen yom ya ku mujimbu mudi muyimenau kudi Yehova, yom ik yikwikala chisu chawonsu pa ndond ya kusambish kudi etu?

⁷ Yitongijok yetu yikweting usu pa yom tusadina. (Marko 7:21-23; Jakobu 2:17) El tushinshikinany yom yikemp yikutwisha kutukwash kutesh nawamp yom yiney. Chilakej chakusambish, rusangu piur pa kuvadik kwa Yesu rimekeshin patok yitongijok ya Yehova piur pa yom ya ku mujimbu. Nzamb amwinend wamutonda Josef ni Mariy chakwel amulila mwanend ap anch dijuku dined diadingap ni nfalang jivud. (In Levi 12:8; Luka 2:24) Chisu chavadikay Yesu, Mariy “wamuladik[a] mwi ndond yikat kudilangau annam, mulong mu chikumbu cha aeny kimwadingap ndond.” (Luka 2:7) Anch Yehova wading ukatin, wafanyina kusal anch Yesu avadikin mwi ndond yiwamp nakash. Pakwez wakata anch Yesu amulidin mu dijuku ditekina difukwil dia Nzamb pa ndond ya kusambish. Chinech chawiy chading chom cha usey kudi Yehova.

⁸ Rusangu riner piur pa kuvadik kwa Yesu ritufundishin mutapu umeningay Yehova yom ya ku mujimbu. Anvaj amwing akatining anch anau ikala ni yom yiwamp ya ku mujimbu, ap anch yom yiney yikutwish yayipish urund wa anau pamwing ni Yehova. Pakwez, Yehova umening chakin kamu urund wetu pamwing ni ndiy mudi chom cha usey nakash. Ov, niyey umening yom ya ku mujimbu mudi muyimenay Yehova? Yisalijok yey yimekeshin ik?​—Tang Hebereu 13:5.

9, 10. Mutapu ik tukutwisha kumekesh anch tumen kupwakesh antu akwau mudi mumenay Yehova?

⁹ Chilakej cha kaad chidi piur pa mutapu umeningay Yehova antu ayipwakeshina akwau. Yesu walonda anch: ‘Mwawonsu ukumwipwakesha umwing wa akemp angitiyijina am, chifanyidin kumukasin muntu winou diyal dijim mwi nshing amudjibul nich mu karung.’ (Marko 9:42) Minam madi mazu makash! Ni twij anch Yesu udi mudi Tatukwend. Chawiy tukutwish kwikal nich kashinsh anch Yehova ukisining nakash anch waman muntu kanang ukat kumwipwakesh umwing wa in kwilej a Yesu.​—Yohan 14:9.

¹⁰ Ov, tumening kuyipwakesh antu akwau mudi mumeningay Yehova ni Yesu? Yisalijok yetu yimekeshin ik? Chilakej, tukutwish kukat mutapu umwing wa kudjal, wa kukidish ap wa kukasish nsuch. Pakwez yom ik tukusala anch mupak wetu ukutwish kuyisal nayimp antu amwing mu chikumangen ap kuyisal antu akwau ikal ni yitongijok yiyimp? Ov, rukat retu mulong wa akadivar rikutubachik kulik yom yitukatina?​—1 Timote 2:9, 10.

11, 12. Mutapu ik tukwichidija anch twilej kukis yom yikisinay Nzamb ni kukudish mwikadil wa kwilam?

¹¹ Chilakej cha kasatu: Yehova ukisining kuburen kutentam. (Isay 61:8) Chakin, wijing anch yisu yimwing chitukasikedining kusal yom yitentamina mulong tudi antu akad kuwanyin. Pakwez, ukatin anch tukis yom yiyimp, mudi mukisinay ndiy. (Tang Kuseng 97:10.) Anch twatongijokin mulong wak Yehova ukisin yom yiyimp, chinech chikutukwash kwikal ni yitongijok yendendiy ni chikutwinkish usu wa kujijaman mulong wa kulik kusal yom yiyimp.

¹² Anch twilej kukis yom yidia yiyimp, chikutukwash kand kujingunin anch yom yimwing yidi yiyimp ap anch Bibil kalondinap kamu patok piur pa yom yiney. Chilakej, mwikadil umwing wijondila utazukinau anch lap dancing upalangen nakash mu mangand nlel. Antu amwing akat kutong anch kusal mwamu kushalijadin ni kulalijan, chawiy atongining anch chiyipinap kwau.a (Tal mazu ma kwinshin.) Ov, wawiy kamu mutapu umenay Yehova yom yiney? Vurik anch Yehova ukisining milad yawonsu ya tuyimp. Chawiy el twipukany chom chin chawonsu chidia chiyimp mu kwilej kukudish mwikadil wa kwilam kusutin kukis yom yikisinay Yehova.​—Rom 12:9.

KATAT TONG CHAD PIUR PA YOM UKUSALA MU MACHUKU MA KURUTU

13. Mulong wak tufanyidin kutong katat piur pa mutapu umenay Yehova yom chakwel tutwish kukwat mipak ya manangu mu machuku ma kurutu?

¹³ Chisu twilejina, tufanyidin kutong piur pa mutapu umenay Yehova yom mulong kusal mwamu kukutukwash kukwat mipak ya manangu. Kupwa, anch twikal mu chishiken chitina kukwat mupak pakad kulab, tukutwishap kukashimuk. (Jinswir 22:3) El tushinshikinany yilakej yimwing yidia mu Bibil.

14. Yom ik twilejidina ku chakul chamwakulau mband wa Potifar kudi Josef?

¹⁴ Pasalay mband wa Potifar usu wa kumwoz Josef, Josef walika kapamp kamwing. Chakin kamu, Josef wading watongijokidin kal pa mutapu umeningay Yehova uruw. (Tang Disambishil 39:8, 9.) Josef wamuleja mband a Potifar anch: “Nikutwish nchik lel kusal kuyip mudi kwinoku, ni kusal kand chitil kurutu kwa Nzamb?” Yiney yimekeshin anch wading ni yitongijok ya Nzamb. Chidi nchik piur petu? Yom ik ukusala anch mbay ney wa mudimu wasambish kwizez ney? Ap chidi nchik anch muntu wakutumin mesaj makweta yom ya masandj ap chipich cha winzikis mu telefon wey?b (Tal mazu ma kwinshin.) Chiswapel kushal ashinshamena kudi Yehova anch twilejin kal ni kwikal ni chitongijok chend piur pa milong kanang ni anch twasambedin kal kukwat mupak wa yom tukusala.

15. Mutapu ik tukutwisha kushal ashinshamena kudi Yehova mudi mwasalau in Hebereu asatu?

¹⁵ Shinshikin kand chilakej cha in Hebereu asatu, Shadirak, Meshak, ni Abed Nego. Chisu chayilejau kudi Mwant Nebukadinezar anch ifukwil mukish wa or wasalay, alika kamu nakash. Chakul chau cha patok kudi mwant chamekesha anch ading atenchikin kal yitongijok yau piur pa yom yafanyina kushiken anch ashal ashinshamena kudi Yehova. (Kubudik 20:4, 5; Daniel 3:4-6, 12, 16-18) Chidi nchik nlel? Ukusal nchik anch mukurump wey wa mudimu wakwit kupan nfalang mulong wa musambu ukwatijadina ni relijon wa makasu? Pa ndond pa kuchingel chom mudi chinech chishiken, chikwikal chiwamp kutongijokin katat piur pa mutapu umenay Yehova yom yiney. Kupwa, anch twikal mu chishiken mudi chinech, chikutuswapel kusal ni kulond yom yiwamp mudi mwasalau in Hebereu asatu inay.

16. Kwijik nawamp yitongijok ya Yehova kukutukwash mutapu ik kwitenchik piur pa mayej mitina kwok mau mau?

¹⁶ Kutongijokin pa yitongijok ya Yehova kukutwish kutukwash kushal ashinshamena kudi ndiy anch twayel mayej mitina kwok mau mau. Chakin kamu, twakwatin kal mupak wa kulik kututek mash ap yikunku yinying yijim ya mash. (Midimu 15:28, 29) Pakwez kudi mitapu yimwing ya kwok yikwatijadina ni mash yitina mwin Kristu amwinend kukwat mupak wimedina pa mbil ja Bibil. Chisu ik chiwamp cha kukwat mupak wa yom tukusala? Ov, chidi chisu tudia mu opital, pamwing ap twovil kusansan ni atubachikin kukwat mupak wa mau mau? Bwat kamu. Chinech chawiy chisu cha kukimbijol, kwinzwish kart utazukinau anch DPA urumburila patok yom tukatina ni kwambamb pamwing ni dokiter wetu.c (Tal mazu ma kwinshin.)

17-19. Mulong wak chidi cha usey kwilej katat mutapu umenay Yehova yom? Let chilakej.

¹⁷ Kupwa tong kand piur pa chakul cha Yesu ku chiyul chakad manangu cha Pita: ‘Nsalejam, iyanakena amwiney.’ Yesu wading watongidin kal nakash pa yom yikatinay Nzamb anch asal ni pa uprofet wading ulondina piur pa mwom wend ni rufu rend pa divu. Rongonyin riner ramwinkisha usu wa kushal ushinshamena kudi Yehova ni kupan mwom wend mudi yakupesh mulong wetwetu awonsu.​—Tang Mateu 16:21-23.

¹⁸ Nlel, Nzamb ukatin anch twikal arund nend ni tusal usu wawonsu mulong wa kulejan rusangu ruwamp. (Mateu 6:33; 28:19, 20; Jakobu 4:8) Pakwez antu amwing amekena mudi akwet yitongijok yiwamp akutwish kusal usu wa kutuziyish, mudi mwasalay Pita kudi Yesu. Chilakej, mukurump wey wa mudimu ukutwish kukwinkish nfalang jivud pakwez ey ufanyidin kusal mudimu mu asaa avud ni kusal mwamu kukukangesh kwikal ni chisu cha kuya ku yikumangan ap kulejan pamwing ni chikumangen. Ap anch udi ku shikol, tong bil anch alej ey akulej kudiokal kwol kwel mulong wa kuya ndond yikwau chakwel uwejinaku yom yikwau pa yom wilejina kal. Anch yom yiney yashiken, ov, ukwikal ni kuswir kwa kulembil, kukimbijol, kwambamb ni antu a mu dijuku diey ap amakurump kurutu kwa kukwat mupak? Chidi chiwamp kwilej katat mutapu umenay Yehova yom yiney ni kwikal ni yitongijok yend. Kupwa, anch yom mudi yiney yakushiken, ukutwish kuman anch chidiap kwau choziu chikash. Wij kamu chakin yom ufanyidina kusal mulong wakwatin kal mupak wa kushinshikin pa kumusadin Yehova.

¹⁹ Ukutwish kutong pamwing ap piur pa yishiken yikwau yikutwisha kupak kwa chikashimwish kushinshaman kwey kudi Yehova. Chakin kamu, tukutwishap kamu kwitenchik mulong wa chishiken chin chawonsu. Pakwez anch twatongijokin pa yitongijok ya Yehova pa chisu cha dilejan dia muntu panrend, tukutwish chakin kamu kuvurik yom twilejina kal ni kwijik mutapu wa kuyisadin mu chishiken chin chawonsu. Chawiy pitwilejina, tufanyidin kusal usu wa kujingunin mutapu umenay Yehova yom, kwikal ni yitongijok yend ni kutong piur pa mutapu ukutwisha yom yiney kutukwash kukwat mipak ya manangu katat ni mu machuku ma kurutu.

YITONGIJOK YA YEHOVA NI MACHUKU MEY MA KURUTU

20, 21. (a) Mulong wak mwi ngand yisu tukusanger kukolik? (b) Mutapu ik tukutwisha kusanger mwom katat?

²⁰ Etu awonsu tuchingejin kamu ngand yisu. Avud pakach petu achingejin kushakam chikupu mu Paradis pa divu. Mwinshin mwa Want wa Nzamb, tukukwolik ku kusansan ni mar tumena mu mangand minam. Ni chakin kamu, tukwikal ni want ipetu wa kukwat mipak piur pa yom tusangaredina ni tukatina.

²¹ Pakwez chinech chirumburikinap anch kukwolik kwetu kukwikal kwakad mwimbu. Antu itudishina akudandamen kukwat mipak yimedina pa yijil ya Yehova ni yitongijok yend. Ni kusal mwamu kukulet musangar nakash ni chisambu chipandakena. (Kuseng 37:11) Kurutu chisu chinech chiwanyin, tukutwish kusanger mwom katat anch twikal ni yitongijok ya Yehova.