Chisu Twiyovila Anch Mwom Wetu Ukwetap Kand Usey

Chilakej, Sally,a udia mu États-Unis washadisha yom yend yivud ku rinkind mukash, ulondin anch: “Niyova anch nikutwishap kujijamen chakamish chinech. Mu machuku mavud, niyova anch nashik kal kwinsudien.”

Chad chidi nchik anch twafish muntu tukatina? Janice, udia mwi ngand ya Australie ulondin anch: “Chisu nafisha anam amakundj aad, niyova anch chishiken chinech chansut kal chipim. Namwita Nzamb anch: ‘Nilemb amboku nikutwishap kwam kujijamen chishiken chinech! Nlika kwam nifa. Nikwetap kand kuswir kwa kwikal mwom.’”

Chikwau kand, Daniel wiyova nayimp nakash chisu chaburenay mukajend kushinshaman. Ulondin anch: “Chisu chanlejay mukajam anch wendin ni ikundj mukwau mu machuku ma kwinyim, niyova mudi ampamp kal mpak ku muchim. Kusansan kwinoku kwamesha mar nakash ni kwasala angond avud.”

Ov, niyey urishin ni kusansan kwa chakamish chimwing pakach pa yakamish yidia kwinshin oku?

• Mar madiokila ku yom yatangau

• Kufish muntu ukatina

• Kuburen kushinshaman kwa mbay wa uruw

• Kurish ni mayej makash

• Anch mwom wikal mudi ukwetap usey

Mu nimero winou wa Chinong cha Kalam tukushinshikin mutapu ukutwisha mwom kwikal ni usey ap anch turishin ni yakamish mudi yiney.