Tuyitany Eza
1 Diladikij dimwing diapanau yitot ya mivu pasak dioviken katat mwi ngand 233 pa divu diawonsu: “Ezany, tukandamany pa mukandu wa Yehova, . . . ndiy ukutufundish jinjil jend, ni tukwendil mu jinjil jatonday ndiy.” (Is. 2:3, NW) Mulad umwing upandikena kuwap wa kumukwash muntu kuya kurutu muspiritu mwi njil yitwadina ku mwom wa chikupu kudi kumushikij ku dirijek dia Yehova.
2 Antwarubil amwing akutwish kwikak pa kutazuk antu kwez ku Chot cha Want anch kand kal amekesha anch ayil kurutu mu dilejan dia Baibel. Pakwez, yisu yimwing ni yikwau, antu akat kusambish kukumangan ap kurutu kwa kusambish kwilej Baibel. Tufanyidinap kulab pa kuyitazuk antu nich chirungil ni kuyikasikesh kwez ku yikumangan.
3 Ya Kusal: Tusadilany mapapel ma diladikij chakwel kuyijikish antu ya yikumangan yetu. Tuyileja anch yikumangan yidi kwau yakad kufut ni kakwitangap nfalang bwat. Turumburila mutapu ukatau kusal yikumangan. Tuyileja anch mading malejan ma kashinsh ma Baibel, muntu ni muntu ukutwish kumalondul nich ukwash wa mikand yipaninau kud awonsu. Twisambina nau yinshakur ni milad kushalijan ya in kukumangan akwau. Tuyileja anch in kukumangan adi antu a mu ul ni aan a mivu yawonsu ni yawiy akutwish kwez ni kukumangan. Tufanyidin kuyitazuk antu tukata kwilej nau Baibel ni kuyikwash.
4 Umwing wa mifund ya nsudel ya Baibel didi diladikij dia chirungil dia kwisakin yitenchik yikwatinay Yehova mulong wa mwom anch: “Spiritu ni Ngachik alondil anch: ‘Ez.’ . . . Ni yend ukweta impu, mulikany eza. Ni wawonsu usotila, mulikany atambul mem ma kupand makad usey.” (Kubur. 22:17) Tuyitany eza ni kukumangan mulong kwikil chom ap chimwing chikutwisha kuswinken pa kuyitazuk akwau kwez ku yikumangan yetu.
5 Uprofet udia mu Isay 60:8 (NW), ulejen yitot ya tunan twa asu ezina mu yikumangen ya Nzamb mulong wa kumushiman mud amayemb “atwikina mud madj; mud amayemb mu yinswal yau.” Etu awonsu tukutwish kutazuk asu chakwel eza ku yikumangan yetu ni kuyak nich musangar. Mwi njil yiney, tukusadil pamwing ni Yehova paswakejinay mudimu wa kukumangej.—Is. 60:22, NW.